ToTajtsin Dios ye akin okachi kuali toyolikni tlen uelis tikpiaskej

Tiyetos tiiyolikni toTajtsin Dios ye tlen okachi kuali mitspanos itech monemilis. ToTajtsin Dios mitsmachtis ken uelis tiyolpakis uan ayakmo timomojtis; mitsmakixtis itech tlaneltokilismej tlen amo melauakej uan nochi tlamantli tlen teijtlakoaj. Kikakis motlatlaujtilis. Mitsmakas yolseuilistli uan tikpias tenmachialis itech toTajtsin Dios (Salmo 71:5; 73:28). ToTajtsin Dios mitspaleuis ijkuak tikpias tlajyouilistli (Salmo 18:18). Uan noijki, kineki mitstliokolis nemilistli tlen amo keman tlamis (Romanos 6:23).

Ijkuak timijkuaniaj iuan toTajtsin Dios, noijki timijkuaniaj iuan iyolikniuan. Iyolikniuan toTajtsin Dios noijki mochiuaskej moyolikniuan. Melauak, yetoskej ken mokniuan. Pakiskej mitsmachtiskej itech toTajtsin Dios, mitspaleuiskej uan mitsyolchikauaskej.

Tejuan amo ken toTajtsin Dios. Tla tikneki timochiuas iyolikni toTajtsin Dios, moneki tikajsikamatis itlaj tlen miak ipati: timouikas iuan toTajtsin Dios amo ijkon ken timouikas iuan se tlakatl. Ye kipia sapanoa miak xiuitl, ye sapanoa ixtlamatki uan kipia miak chikaualistli, amo ken tejuan. San ye kinamiki yetos toTekiua. Ik non, tla tiknekij timochiuaskej iyolikniuan, moneki tikakiskej uan tikchiuaskej tlen techtlajtlanilia. Tla nochipa tiktlakamatij toTajtsin Dios tikpiaskej tlateochiualismej (Santiago 1:25).