TLAMACHTIL 4

¿Tleka moneki tikintlakamatiskej akinmej tlanauatiaj?

“Xikintlakitakah nochteh.” (1 PEDRO 2:17.)

1, 2. 1) ¿Tleka sapanoa oui tikintlakamatiskej akinmej technauatiaj? 2) ¿Tlen tlajtlanilmej tikinnankiliskej?

¿YOTIKITAK iixko se konetl ijkuak sepa amo kineki kichiuas tlen kinauatiaj? Iixko kiteititia tlen kimachilia itech iyolo. Maski kikaki inantsin noso itajtsin uan kimati moneki kintlakamatis, ye amo kineki kichiuas tlen kinauatiaj. Nin kiteititia tlen ualeua techpanoa tinochtin.

² Ualeua sapanoa oui tikintlakamatiskej akinmej technauatiaj. ¿Noijki tikita oui tikintlakamatis akinmej mitsnauatiaj? Tla oui, amo san tejuatsin ijkon mitspanoa. Itech ninmej tonalmej tlaltikpaktlakamej nion tepitsin kinekij tetlakamatiskej. Ik non, Biblia technauatia moneki ma tikintlakamatikan akinmej technauatiaj (Proverbios 24:21). Uan tla tiknekij tiyetoskej itech itlasojtlalis toTajtsin Dios, moneki tiktlakamatiskej nin tlanauatil. Ik non, uelis timotlajtlaniskej, ¿tleka sapanoa oui tikintlakamatiskej akinmej technauatiaj? ¿Tleka technauatia Jehová ijkon ma tikchiuakan, uan tlen techpaleuis ma titetlakamatikan? Uan, ¿ken uelis tikintlakaitaskej akinmej technauatiaj?

¿TLEKA SAPANOA OUI?

3, 4. ¿Ken opejki tlajtlakoli, uan tleka oui tikintlakaitaskej akinmej technauatiaj?

³ Ma tikitakan ome tlamantli tlen kiteititiaj tleka sapanoa oui tikintlakaitaskej akinmej technauatiaj. Achto, pampa tinochtin titlajtlakolejkej; ome, pampa akinmej technauatiaj noijki tlajtlakolejkej. Tlajtlakoli opejki yiuejkika, ijkuak Adán uan Eva okixnamikej toTajtsin Dios itech xochitlali Edén. Ken tikitaj, tlajtlakoli opejki ijkuak otlaixnamikej. Ik non, axkan ijkon tinesij, totech kajki titlaixnamikiskej (Génesis 2:15-17; 3:1-7; Salmo 51:5; Romanos 5:12).

⁴ Pampa titlajtlakolejkej, san niman timoueyinekij uan timosijsiniaj, uan tla tiknekij tiyetoskej tiyolyamankej moneki timochijchikauaskej miak pampa nochipa ijkon tiyetoskej. Uan maski yikipia miak xiuitl tiktekichiuilijtokej toTajtsin Dios, se tonal uelis timoueyinekiskej uan tiyoltlakuauaskej. Ijkon okipanok Coré, ye okatka yolmelajki uan okixiko miak ouijkayotl iuan ialtepe Jehová. Pero satepan ye okinek tlayekanas uan omixeui kixnamikis Moisés, akin okachi yolyamanki okatka itech non tonalmej (Números 12:3; 16:1-3). Moita noijki ijkon okipanok ueyi tekiua Uzías, akin omoueyineki uan okalak itech teokali uan okichi se tekitl tlen san okichiuayaj teopixkamej (2 Crónicas 26:16-21). Ninmej tlakamej sapanoa otlajyouijkej pampa otlaixnamikej. Nin tlen amo kuali okichijkej, technejmachtia itlaj: moneki ma timochijchikauakan amo ma timoueyinekikan, pampa tla timoueyinekij, amo uelis tikintlakaitaskej akinmej technauatiaj.

5. ¿Ken otetlajyouiltijkej sekimej tekiuajkej?

⁵ Noijki, tekiuajkej kichiuaj miak tlamantli tlen kinchiualtia sekimej amo ma tetlakaitakan. Miakej tekiuajkej otetlajyouiltijkej, okichijkej tlen amo kuali uan okitekitiltijkej intlanauatilis ken yejuan okinekej. Itech nochi xiuitl tlen yopanok moita ken tekiuajkej otetlajyouiltijkej (xiktlajtolti Eclesiastés 8:9). Ma tikitakan ineskayo Saúl, ijkuak Jehová okipejpenki ma yeto ueyi tekiua, Saúl okatka yolkuali uan yolyamanki. Pero satepan omoueyineki uan ochauatik, ik non, opejki kitojtoka David akin okatka yolmelajki (1 Samuel 9:20, 21; 10:20-22; 18:7-11). Satepan, ijkuak David okitlalijkej ueyi tekiua itech Israel, maski ye okachi kuali otlayekanki amo ken oksekimej tekiuajkej, amo kuali okitekitilti itlanauatilis pampa okikixtili isiua Urías tlen okatka hitita, uan otlanauati ma kitlalikan tlayekapan kanin omoteuijtokaj pampa ma kimiktikan nin tlakatl tlen amo itlaj itlajtlakol (2 Samuel 11:1-17). Ken tikitaj, pampa tekiuajkej tlajtlakolejkej amo kuali kitekitiltiaj intlanauatilis. Uan okachi kichiuaj ijkuak sepa amo kitlakaitaj Jehová. Se tlakatl británico tlen tlajkuiloa itech miak tlamantli, otlajto itech tlen okichijkej sekimej papas católicos ijkuak san kanin okintlajyouiltijkej miakej tlaltikpaktlakamej, uan noijki okijto: “Akin kipia tlanauatilistli kichiuasneki tlen amo kuali uan akin kipia nochi tlanauatilistli uelis kichiuas nochi tlen amo kuali”. Ijkuak tikitaj nochi tlen amo kuali okichijkej, uelis timotlajtlaniaj: “¿Tleka moneki tikintlakaitaskej akinmej tlanauatiaj?”.

¿TLEKA MONEKI TIKINTLAKAITASKEJ AKINMEJ TLANAUATIAJ?

6, 7. 1) Pampa tiktlasojtlaj Jehová, ¿tlen techyolinia ma tikchiuakan, uan tleka? 2) ¿Tlen kijtosneki titetlakamatiskej, uan ken uelis tikchiuaskej?

⁶ Onka eyi tlamantli tlen kisa itech tlasojtlalistli tlen techyolinia ma tikintlakamatikan akinmej tlanauatiaj: pampa tiktlasojtlaj Jehová, tikintlasojtlaj tokniuan uan noijki timotlasojtlaj. Achto, pampa Jehová akin okachi tiktlasojtlaj uan tiknekij tikyolpaktiskej (xiktlajtolti Proverbios 27:11; Marcos 12:29, 30). Ken yitikmatij, ijkuak okixnamikej toTajtsin Dios itech xochitlali Edén, nikan Tlaltikpak opejki moijtoa amo kinamiki ma tlanauati itech nochi semanauak, uan noijki tikmatij sapanoa miakej tlaltikpaktlakamej kixtopeuaj iTekiuajkayo toTajtsin Dios uan kipaleuiaj Satanás. Tejuan amo ijkon tikchiuaj, ika miak pakilistli tikseliaj iTekiuajkayo Jehová. Ik non, ijkuak tiktlajtoltiaj Apocalipsis 4:11, sapanoa tiyolpakij, pampa tikitaj san ye kinamiki ma tlanauati itech nochi semanauak. Tikseliaj iTekiuajkayo toTajtsin Dios uan tiktlakamatij mojmostla itech nochi tlen tikchiuaj.

⁷ Tiktlakaitaskej Jehová amo san kijtosneki tiktlakamatiskej. Maski tikchiuaj tlen technauatia pampa tiktlasojtlaj, ualeua sapanoa oui tiktlakamatiskej. Ijkon techpanos ken konetl tlen achto otikijtojkej, pero moneki tikchiuaskej tlen technauatia maski amo tikajsikamatij tleka. Ma tikilnamikikan Jesús okitlakamatki iTajtsin maski tlen kichiuaskia melauak oui okatka, uan okilui iTajtsin: “Pero amo mamochiwa kemi Ne nikneki, yej kemi Tejwatsi tikmonekiltia” (Lucas 22:42).

8. 1) Axkan, ¿ken tikteititiaj tiktlakamatij Jehová, uan ika tlen neskayotl tikmatij tlen kimachilia Jehová tla amo titetlakamatij? 2) ¿Tlen techpaleuis ma tikselikan tlen techiluiskej ijkuak technojnotsaskej uan techyektlaliskej? (Xikita recuadro “Xikkaki ijkuak mitsnojnotsaj uan xikseli ijkuak mitsyektlaliaj”).

⁸ Axkan, Jehová amo techtlapouia tisejse; ye kitekitiltia iTlajtol uan tlayekankej nikan Tlaltikpak. Ik non, tikteititiaj tiktlakamatij Jehová ijkuak tikchiuaj tlen technauatiaj tlayekankej tlen Jehová kintlalia, noso akinmej ye kinkauilia ma technauatikan. Tla tikinmixnamikiskej —ken ijkuak amo tiknekij tikinkakiliskej ijkuak technojnotsaj uan techyektlaliaj ika Biblia—, tikyolkokoskej toTajtsin Dios. Ijkon okinpanok israelitas, ijkuak otlatlajtokej itech Moisés uan okixnamikej, Jehová okimachili ye okixnamiktokaj (Números 14:26, 27).

9. ¿Tleka tla tikintlasojtlaj tokniuan moneki tikintlakamatiskej akinmej technauatiaj? Xikyekijto ika se neskayotl.

⁹ Ome, tikintlakamatij akinmej technauatiaj pampa tikintlasojtlaj tokniuan. ¿Ken uelis tikteititiskej? Ximokuayejyeko tejuatsin tisoldado. Pampa tejuatsin uan oksekimej soldados nantlatlaniskej uan nanmakisaskej, moneki sejse namejuan nantekitiskej ken namechiluiaj, nankintlakamatiskej uan nankintlakaitaskej sejse tlen namechyekanaj. Tla tejuatsin amo tikneki titetlakamatis, nochtin soldados uelis itlaj amo kuali kinpanos. Ijkuak timotlapouiaj itech guerras san tikilnamikij ken momiktiaj uan tlajyouiaj tlaltikpaktlakamej. Pero isoldados Jehová nochipa tlapaleuiaj. Biblia kijtoa Jehová “kinyakana isoldadojwah” (Santiago 5:4). Ye kinyekana sapanoa miakej ángeles. Ualeua Jehová kinneskayotia itekipanojkauan nikan Tlaltikpak ken soldados tlen kitekichiuiliaj (Salmo 68:11; Ezequiel 37:1-10). Tla tejuan amo tikintlakamatij akinmej Jehová kintlalia ma technauatikan, uelis tikinmijtlakoskej tokniuan tlen katej ken soldados. Ik non, ijkuak se tokni kinmixnamikij tlayekankej, nochtin tokniuan itech tlanechikol noijki tlajyouiaj (1 Corintios 12:14, 25, 26). Ijkon panoa ijkuak ikaj amo tetlakamati itech tokalijtik, tinochtin titlajyouiaj. Ik non, tikteititiskej tikintlasojtlaj tokniuan tla titetlakaitaj uan tikchiuaj tlen technauatiaj.

10, 11. ¿Ken techpaleuia tikmatiskej tlen tikseliskej tla tikintlakaitaj akinmej tlanauatiaj?

¹⁰ Eyi, tikintlakamatij akinmej technauatiaj pampa ijkon kuali tikatej. Ijkuak Jehová techiluia ma titetlakamatikan, noijki techiluia ken uelis techpaleuis tla ijkon tikchiuaskej. Ma tikitakan seki neskayomej. Jehová kinnauatia konemej ma kintlakamatikan intatajuan pampa yoltoskej miak xiuitl uan ika yolpakilistli (Deuteronomio 5:16; Efesios 6:2, 3). Techiluia ma tikintlakaitakan tlayekankej itech tlanechikol pampa nochipa kuali timouikaskej iuan Jehová (Hebreos 13:7, 17). Uan noijki techiluia tla tikintlakamatij tekiuajkej, kuali tiyetoskej (Romanos 13:4).

¹¹ Okachi amo oui tikmachiliskej tikintlakamatiskej akinmej technauatiaj pampa Jehová techiluia tleka kineki ma tikintlakaitakan. Ma tikitakan eyi tlamantli kanin moneki tikteititiskej tikintlakaitaj akinmej tlanauatiaj.

MA TIKINTLAKAITAKAN TOKALCHANEJKAUAN

12. ¿Tlen kinauatia Jehová ma kichiua tlakatl iuan isiua uan ikoneuan, uan ken uelis kichiuas?

¹² Jehová ye akin oKintlali kalchanejkej. Pampa kipaktia nochi kuali ma mochiua, yokijto tlen moneki kichiuaskej kalchanejkej pampa yolpakiskej (1 Corintios 14:33). Kinauatia tlakatl ma kiyekana isiua uan ikoneuan. Tlakatl kiteititia kitlakaita iTlayekanki, Jesucristo, ijkuak kichiua ken ye kiyekana tlanechikol (Efesios 5:23). Ik non, tlakatl amo kikauilia okse ma kichiua iteki, okachi kuali ye kichiua ken moneki; amo tetlajyouiltia nion sapanoa kualani, tetlasojtla, yolkuali uan teajsikamati. Nochipa kilnamiktok amo tlanauatia itech nochi pampa Jehová noijki kiyekana.

Se teta kichiua ken Cristo ijkuak kinyekana ikalchanejkauan

13. ¿Ken uelis siuatl kichiuas iteki ken Jehová kineki?

¹³ Siuatl moneki kuali kipaleuis inamik uan yetos iajsikayo. Siuatl noijki tlayekana ikalijtik pampa Biblia tlajtoa itech ‘itlanojnotsalis tonana’ (Proverbios 1:8). Siuatl tlen kichiua ken Cristo, amo ajsitok itlanauatilis, ik non, moneki kitlakamatis inamik, uan kiteititia kitlakaita itlanauatilis inamik ijkuak kipaleuia kuali ma tlayekana. Siuatl amo keman kipinatia inamik, amo kineki ma mochiua san tlen ye kipaktia nion kineki tlayekanas, okachi kuali ye kipaleuia. Ijkuak amo kipaktia tlen kineki kichiuas inamik, ika tlakaitalistli kiluia tlen mokuayejyekoa uan kitlakamati maski amo kajsikamati tleka. Uan tla inamik amo tlaneltoka uelis kipiaskej ouijkayotl, ik non, moneki ma kitlakamati pampa ijkon uelis inamik se tonal tlaneltokas itech Jehová (xiktlajtolti 1 Pedro 3:1).

Se teta kinojnotsa ikone ika tlasojtlalistli

14. ¿Ken uelis konemej kiyolpaktiskej Jehová uan intatajuan?

¹⁴ Ijkuak konemej kintlakamatij intatajuan kiyolpaktiaj Jehová. Noijki kinyolpaktiaj uan kintlakaitaj intatajuan (Proverbios 10:1). Uan tla chantij san iuan intajtsin noso san iuan innantsin, noijki kitlakamatij pampa kitaj moneki okachi ma kipaleuikan. Kalchanejkej kanin nochtin kichiuaj tlen toTajtsin Dios kinnauatia, yolpakij uan katej ika yolseuilistli, uan noijki kiueyichiuaj Jehová akin oKintlali kalchanejkej (Efesios 3:14, 15).

MA TIMOTLAKAITAKAN ITECH TLANECHIKOL

15. 1) ¿Ken tikteititiaj itech tlanechikol tiktlakamatij itlanauatilis Jehová? 2) ¿Tlen principios bíblicos techpaleuiskej ma tikintlakamatikan akinmej tlayekanaj itech tlanechikol? (Xikita recuadro itech “Ma tikintlakamatikan akinmej kiyekanaj tlanechikol”).

¹⁵ Jehová okitlali iKone ma tlayekana itech tlanechikol (Colosenses 1:13). Uan Jesús, okitlali “tlakeuali yolmelajki uan ixtlamatki” ma kipaleui nikan Tlaltikpak ialtepe Jehová pampa kuali ma kiueyichiuakan (Mateo 24:45-47, TNM). “Tlakeuali yolmelajki uan ixtlamatki”, ye Cuerpo Gobernante tlen kipiaj iTlaixpantijkauan Jehová. Ijkon ken omochiuaya itech achto siglo, axkan Cuerpo Gobernante kinmaka tlanauatilmej tlayekankej itech tlanechikolmej, ika amatlajkuilolmej noso ika tokniuan tlen kintekitiltiaj ken tlayekankej tlen kintlajpaloaj tlanechikolmej. Ik non, ijkuak tikintlakamatij tlayekankej, tiktlakamatij Jehová (xiktlajtolti 1 Tesalonicenses 5:12; Hebreos 13:17).

16. ¿Tleka tikijtoaj ika espíritu santo kintlaliaj tlayekankej?

¹⁶ Maski tlayekankej uan siervos ministeriales noijki tlajtlakolejkej uan motlapololtiaj ken tinochtin, yejuan se “tlatliokólili” tlen techmaka Jehová pampa techpaleuiskej nochipa ma timouikakan kuali iuan ye (Efesios 4:8). Tlayekankej kintlaliaj ika espíritu santo (Hechos 20:28). ¿Tleka ijkon tikijtoaj? Pampa achto tlayekankej kitaj kox tokni kichijtok tlen kijtoa Biblia, tlen toTajtsin Dios otlanauati ma kijkuilokan (1 Timoteo 3:1-7, 12; Tito 1:5-9). Satepan, tlayekankej noijki kitaj ken tekititok tokni uan kitlatlaujtiaj Jehová ma kinyekana ika iespíritu santo.

17. Ijkuak tokniuan siuamej kichiuaj seki tekitl itech tlanechikol, ¿tleka moneki mokuatlakentiskej?

¹⁷ Itech tlanechikol ualeua amo yetoskej tlayekankej uan siervos ministeriales tlen kichiuaskej tekitl tlen san yejuan kinnamiki kichiuaskej, ken ijkuak kiyekanaj nechikol ijkuak tetlapouitiuij. Ik non, se tokni tlakatl tlen yomoapolakti uelis kichiuas nin tekitl. Uan tla amo onka nion se tokni tlakatl, se tokni siuatl tlen kuali tekititok uelis kichiuas nin tekitl. Pero ijkuak se tokni siuatl kichiua se tekitl tlen moneki kichiuas se tokni tlakatl, moneki mokuatlakentis (1 Corintios 11:3-10).a Nin tlanauatil amo kijtosneki siuatl amo okachi ipati. Okachi kuali, nin tlanauatil kikauilia siuatl ma kiteititi kitlakaita ken otlayektlali Jehová itech kalchanejkej uan itech tlanechikol.

MA TIKINTLAKAITAKAN TEKIUAJKEJ

18, 19. 1) ¿Ken uelis tikyekijtos principios bíblicos tlen katej itech Romanos 13:1-7? 2) ¿Ken tikteititiaj tikintlakaitaj tekiuajkej?

¹⁸ Akinmej melauak tikchiuaj ken Cristo, timochijchikauaj miak pampa tiktlakamatiskej tlen kijtoa Romanos 13:1-7 (xiktlajtolti). Tla tikintlajtoltiaj ninmej tlaxelolmej, tikitaskej tlajtoa itech “tekiwajkeh”. Jehová kitekauilia ma yetokan ninmej tekiuajkej pampa ma kichiuakan seki tekitl tlen miak ipati, ken ijkuak amo kinkauiliaj tlaltikpaktlakamej ma kichiuakan tlen amo kuali uan ijkuak kitemakaj tlen okachi moneki. Tikteititiaj tikintlakamatij tekiuajkej ijkuak tikintlakamatij intlanauatiluan. Ik non, tiktlaxtlauaj nochi tlen moneki, tikijkuiloaj nochi tlen kijtoa se amatl noso tlen techtlajtlaniliaj tekiuajkej, uan tikintlakamatij nochi tlanauatilmej tlen techmakaj, iuan tokalchanejkauan, ika tlen tikpiaj noso tla itlaj tiknemakaj. Axkan, tla tekiuajkej technauatiaj amo ma tiktlakamatikan toTajtsin Dios, amo tikchiuaskej tlen techiluiaj. Okachi kuali, titlanankiliaj ken yiuejkika otlanankilijkej tlatitlanilmej: “Tejwah tikpiah tiktlakitaskeh [noso tiktlakamatiskej] tlan Dios kijtoa iwa amo tlan kijtoah n tlakah” (Hechos 5:28, 29; xikita recuadro tlen itoka “¿Akin moneki niktlakamatis?”).

¹⁹ Noijki tikintlakaitaj tekiuajkej ijkuak kuali tikinnotsaj intekipanojkauan, okachi ijkuak inmiuan timotlapouiaj. Ma tikitakan ineskayo Pablo. Se tonal ye omotlapoui iuan ueyi tekiua Herodes Agripa uan noijki iuan tekiua Festo. Maski ninmej tlakamej sapanoa otlajtlakolchiuayaj, Pablo okintlakaitak ijkuak inmiuan omotlapoui (Hechos 26:2, 25). Moneki noijki tikchiuaskej ken Pablo, ijkuak tiyetoskej ixpan se ueyi tekiua noso iixpan se policía. Telpokamej uan ichpokamej noijki moneki kintlakaitaskej akinmej tlamachtiaj noso akinmej tekitij kanin momachtiaj. Uan amo san tikintlakaitaj akinmej kiseliaj tlen tikneltokaj, noijki akinmej kinmixnamikij iTlaixpantijkauan Jehová. Akinmej tlaneltokaj ken tejuan uan akinmej amo, moneki kitaskej tejuan titetlakaitaj (xiktlajtolti Romanos 12:17, 18; 1 Pedro 3:15).

20, 21. ¿Tlen tlateochiualismej tikseliskej tla tikintlakaitaj tekiuajkej?

²⁰ Moneki nochtin ma tikintlakaitakan. Tlatitlanil Pedro okijto: “Xikintlakitakah nochteh” (1 Pedro 2:17). Axkan miakej amo tetlakaitaj. Ik non, motlajtlachialtiskej tla kitaj melauak titetlakaitaj. Tla ijkon tikchiuaj, tiktlakamatiskej tlen otechnauati Jesús: “Nomejwah xikintlawilikah n tlakah para makitakah nomejwah nonkichiwah tlan kuali, ijkó n tlakah kitaskeh tlan kuali nonkichiwah. Ijkó yejwah kiweyijkachiwaskeh Nomotajtsi Dios non kajki ilwikak” (Mateo 5:16).

²¹ Maski tlaltikpaktlakamej ken yetoskiaj itech tlayoali, akinmej yolkualmej kinpaktia tlauili tlen kitemaka toTajtsin Dios. Ik non, tla tikintlakaitaj tokalchanejkauan, tokniuan itech tlanechikol uan tekiuajkej, akinmej techitaj uelis kinekiskej touan yetoskej itech itlauil toTajtsin Dios. ¡Melauak kuali yetoskia non! Uan maski amo ijkon panos, tla titetlakaitaj tikyolpaktiskej Jehová uan tiyetoskej itech itlasojtlalis. ¡Nin okachi ueyi tlateochiualistli tlen uelis tikpiaskej!

a Itech okse tlamachtil “¿Tleka uan keman moneki mokuatlakentis siuatl?”, ompa moijtoa ken uelis timoyekanaskej ika nin principio bíblico.

“XIKKAKI IJKUAK MITSNOJNOTSAJ UAN XIKSELI IJKUAK MITSYEKTLALIAJ”

Axkan miakej tlaltikpaktlakamej kichiuaj ken Satanás, tlaixnamikij uan amo tetlakamatij. Ik non, Biblia kijtoa ye Satanás akin “tlanawatia kan ejekatl” uan noijki kijtoa ye “kinyakantok akimeh amo kitlakitah Dios” (Efesios 2:2). Axkan katej miakej tlaltikpaktlakamej tlen amo ikaj kinekij kitlakamatiskej. Uan sekimej tlen kichiuaj ken Cristo, noijki ijkon kinpanoa. Ma tikitakan se neskayotl, ijkuak se tlayekanki ika tlasojtlalistli kiluia se tokni ken uelis kijtlakos tla kimauisoa ijkuak auilnemij, noso kanin sapanoa moteuiaj noso okse tlamantli kiluia, amo kineki tlakakis. Ik non, tinochtin moneki tikchiuaskej tlen kijtoa Proverbios 19:20: “Xikkaki ijkuak mitsnojnotsaj uan xikseli ijkuak mitsyektlaliaj, pampa satepan okachi tiixtlamatis”.

¿Tlen techpaleuis ma tikchiuakan ijkon? Ma tikitakan san eyi tlamantli tlen kijtoaj sekimej tokniuan ijkuak amo kinekij kikakiskej ma kinnojnotsakan noso ma kinyektlalikan, uan tlen kijtoa Biblia itech non tlamantli.

“Amo nechnamiki tlen onechilui.” Uelis timokuayejyekoskej tlen otechiluijkej amo moneki tikchiuaskej, noso akin otechtlapoui amo kimati nochi tlen techpanotok. Ualeua san niman timokuayejyekoaj amo miak ipati tlen techiluiaj (Hebreos 12:5). Pero pampa tinochtin titlajtlakolejkej, ¿amo tejuan moneki ma tikyektlalikan ken timokuayejyekoaj? (Proverbios 19:3.) ¿San okinek tokni techiluis itlaj maski amo itlaj okitak totech? Ik non, ma timokuayejyekokan itech tlen otechilui tokni. ITlajtol toTajtsin Dios kijtoa: “Xikkitski ijkuak mitsyektlaliaj uan amo xikkajkaua. Xikmalui, pampa non moyolilis” (Proverbios 4:13).
“Amo onechpakti ken onechilui.” ITlajtol toTajtsin Dios kijtoa tlen moneki kichijtoskej akinmej kinnojnotsaj tokniuan (Gálatas 6:1). Uan, noijki kijtoa ‘tinochteh otitlajtlakolchijkeh, iwa otikmopolilijkej iweyijkachiwalis Dios’ (Romanos 3:23). San uelis tikseliskej se kuali tlanojnotsalistli tla techmakas akin amo tlajtlakole (Santiago 3:2). Pero Jehová kintekitiltia tlaltikpaktlakamej tlajtlakolejkej pampa technojnotsas, ik non, moneki tikkakiskej tlen techiluiaj uan amo tikitaskej akin techiluia. Ma timokuayejyekokan itech tlen otechiluijkej uan ma timotlatlaujtikan itech toTajtsin Dios pampa tikmatiskej ken uelis tikchiuaskej.
“Ye amo itlaj uelis nechiluis.” Tla timokuayejyekoaj okachi tlajtlakole akin otechnojnotski, okachi kuali ma tikilnamikikan tlen achto yotimomachtijkej. Uan tla timokuayejyekoaj amo ikaj uelis techiluis itlaj pampa yitikpiaj miak xiuitl, tikmatij miak noso pampa tikpiaj se tekitl itech tlanechikol, moneki tikyektlaliskej ken timokuayejyekoaj. Yiuejkika itech altepetl Israel, uejueyij tekiuajkej omonekiaya tlakakiskej ijkuak teotlajtojkej, teopixkej noso oksekimej okinnojnotsayaj (2 Samuel 12:1-13; 2 Crónicas 26:16-20). Axkan, ialtepe Jehová kinnauatia tlaltikpaktlakamej tlajtlakolejkej ma techpaleuikan, uan tla chikauak tikpiaj totlaneltokilis, ika nochi toyolo tikchiuaskej tlen techiluiskej. Uan maski tikpiaj se tekitl itech tlanechikol noso okachi tikmatij ken oksekimej, ma tikilnamiktokan moneki tikteititiskej tiyolyamankej uan tikchiuaskej tlen otechiluijkej akinmej otechnojnotskej (1 Timoteo 3:2, 3; Tito 3:2).

Moneki nochtin ma technojnotsakan. Ik non, moneki ma tikselikan tlen techiluiaj, ma titetlakamatikan uan ma tiktlasojkamatilikan Jehová pampa techmaka nin tetliokolil tlen uelis techmakixtis. Tlanojnotsalistli kiteititia Jehová techtlasojtla, uan tejuan tiknekij tiyetoskej itech itlasojtlalis toTajtsin Dios (Hebreos 12:6-11).

Ma tikintlakamatikan akinmej kiyekanaj tlanechikol

Yiuejkika, itech altepetl Israel omonekiaya kuali moyekanaskej. Moisés amo ouelitiaya san ye kinyekanas sapanoa miakej israelitas tlen oyayaj kanin tlauaki, kanin uelis itlaj amo kuali kinpanoskia. Ik non, ¿tlen okichi? “Moisés okinpejpenki tlakamej tlen ixtlamatkej itech Israel uan okintlali ma kiyekanakan altepetl, akinmej kiyekanaskej sejse mil, akinmej kinyekanaskej sejse ciento, akinmej kinyekanaskej tlatlajko ciento, uan akinmej kinyekanaskej majtlaktli tlaltikpaktlakamej.” (Éxodo 18:25.)

Axkan itech ninmej tonalmej, noijki moneki ma yetokan akinmej kuali kiyekanaskej tlanechikol. Ik non, se tokni kiyekana se nechikol pampa akinmej tetlapouiaj, sekimej tlayekankej kiyekanaj se tlanechikol, se tlayekanki itech circuito kinyekana seki tlanechikolmej, uan se Comité del País noso akinmej tlayekanaj itech Betel kiyekanaj sejse ueyi altepetl. Pampa nochi ijkon moyekana, nochtin tlajpixkej tlen okintlali Jehová kuali kinmaluiaj iichkauan tlen okinmakak. Tlayekankej kimatij Jehová uan Jesucristo kintlajtlaniskej ken tlayekantokej (Hechos 20:28).

Uan pampa kuali kisas tlen Jehová yotlanauati, tinochtin moneki titetlakamatiskej uan tikchiuaskej tlen technauatiaj, maski amo tikajsikamatiskej tleka. Amo tiknekij tikchiuaskej ken Diótrefes, akin nion tepitsin okintlakaitaya akinmej otlayekanayaj (3 Juan 9, 10). Okachi kuali, moneki tikchiuaskej tlen okijto Pablo: “Xikintlakitakah akimeh nomechyakanah iwa xikchiwakah tlan nomechnawatiah, porke yejwah nomechmokuitlawia, iwa kuali kimatokeh Dios kintlajtlanis kenomi onomechyakankeh. Xikintlakitakah para makichiwakah intekih ika pakílistli, iwa amo san matsoyontokah. Porke noni amitla nomechpalewis” (Hebreos 13:17). Sekimej tlaltikpaktlakamej kinekij tetlakamatiskej tla kinpaktia tlen kinnauatiaj, uan tla amo kinpaktia noso amo kajsikamatij tleka moneki kichiuaskej, amo kinekij tetlakamatiskej. Ik non, ma tikilnamiktokan moneki titetlakamatiskej maski amo tiknekij, noso amo tikajsikamatij tleka. Ik non, moneki ma timotlajtlanikan: “¿Nikintlakamati akinmej nechyekanaj uan nikchiua tlen nechnauatiaj maski amo nikajsikamati tleka?”.

Maski Biblia amo nochi kijtoa ken mochiuas sejse tekitl itech tlanechikol, kema kijtoa: “Nochi xikyekchiwakah ika kuali iwa kemi moneki” (1 Corintios 14:40). Cuerpo Gobernante ijkon kichiua ijkuak kintlalia tlanauatilmej itech tlen mochiuas uan ken mochiuas, pampa kuali ma tekiti uan ma yeto kuali tlanechikol. Tlayekankej uan siervos ministeriales kintlakamatij nochi non tlanauatilmej, uan ijkon techititiaj ken moneki titetlakamatiskej tinochtin. Noijki teajsikamatij uan san niman tetlakamatij (Santiago 3:17). Ijkon nochi nechikolmej, tlanechikolmej, circuitos uan uejueyij altepemej kuali tekitij san sekan, ijkon kiteititiaj kitekichiuiliaj toTajtsin Dios akin yolpaki (1 Corintios 14:33; 1 Timoteo 1:11, TNM).

Noijki, Pablo techiluia itech Hebreos 13:17 tlen amo kuali panos tla amo titetlakamatij. Akinmej tlayekanaj uelis san ‘tsoyontoskeh’, noso san elsisijtoskej ijkuak kichiuaskej inteki. Maski se tlayekanki uelis yolpakis miak pampa kipia non tekitl, uelis sapanoa motekipachos tla tokniuan teixnamikij noso amo tlapaleuiaj. Tla ijkon panos, non ‘amitla kipalewis’ noso moijtlakos nochi tlanechikol. Kema, akin amo kineki kitlakamatis nochi tlen yokitlali Jehová, tlajyouia itech okse tlamantli: itlaneltokilis ayakmo yetos chikauak uan moxelos itech iTajtsin akin kajki iluikak (Salmo 138:6). ¡Moneki ma titetlakamatikan uan ma tikchiuakan tlen techiluiaj, maski amo tikajsikamatij tleka!