Matikintlakaitakan oksekimej

1. ¿Tleka techpaktia matechtlakaitakan oksekimej? (Proverbios 22:1).

TINOCHTIN techpaktia matechtlakaitakan oksekimej. Techpaktia ijkon matechtlakaitakan porque ijkon otechchijkej. Ikinon iTlajtol toTajtsin Dios kijtoua “techtlakaitaskej okachi kuali amo ken plata uan oro” (xiktlajtolti Proverbios 22:1).

2, 3. ¿Tleka ualeua tikitaj oui tikintlakaitaskej oksekimej uan tlen timomachtiskej?

² Ualeua tikitaj oui tikintlakaitaskej oksekimej. ¿Tleka? Porque titlajtlakolejkej uan axkan miakej ayakmo tetlakaitaj. Pero tejuan nochtin tikintlakaitaj porque Jehová kineki ijkon matikchiuakan (1 Ped. 2:17).

³ Axkan tikitaskej tlen kijtosneki tikintlakaitaskej oksekimej uan ken uelis ijkon tikchiuaskej. Achto tikitaskej ken tikintlakaitaskej akinmej pouij itech tofamilia. Noijki tikitaskej ken tikintlakaitaskej tokniuan uan akinmej amo kitekichiuiliaj toTajtsin Dios. Pero tikitaskej ken tikintlakaitaskej oksekimej ijkuak tikitaj okachi oui ijkon tikchiuaskej.

¿TLEN KIJTOSNEKI TIKINTLAKAITASKEJ OKSEKIMEJ?

4. ¿Tlen kijtosneki tikintlakaitaskej oksekimej?

⁴ Ijkuak titetlakaitaj kijtosneki ken tikinmitaj oksekimej uan ken tikinseliaj. Xamo tiktlakaitaj akin kipia kuali iyelis, kichiua tlen kuali noso porque technauatia. Miak ipati matiktlakaitakan uan makisa toyolipan ijkuak ijkon tikchiuaskej (Mat. 15:8).

5. ¿Tleka tikintlakaitaj oksekimej?

⁵ Jehová kineki matikintlakaitakan oksekimej. Technauatia matikintlakaitakan nochtin tekiuajkej (Rom. 13:​1, 7). Pero xamo ikaj uelis kijtos: “Ne niktlakaitas akin kimotlanilis makitlakaitakan”. Pero amo kuali tla ijkon timokuayejyekouaj. Tejuan tikintlakaitaj oksekimej porque tiktlasojtlaj Jehová uan tiknekij tikyolpaktiskej. Amo tikintlakaitaj oksekimej porque kichiuaj tlen techpaktia (Jos. 4:14; 1 Ped. 3:15).

6. Xikyekijto kox uelis tikintlakaitaskej akinmej amo techtlakaitaj. (Xikita dibujo).

⁶ Xamo timotlajtlaniaj: “¿Kox uelis tiktlakaitaskej akin amo techtlakaita?”. Uelis tiktlakaitaskej. Matikitakan ken uelis ijkon tikchiuaskej. Tekiua Saúl okipinati Jonatán inmixpan oksekimej (1 Sam. 20:​30-34). Pero ye okitlakaitak ipapa hasta ijkuak oixpoliuik. Ijkon tikijtouaj porque ye nochipa okipaleui ipapa (Éx. 20:12; 2 Sam. 1:23). Teopixki Elí okijto Ana otlauanki (1 Sam. 1:​12-14). Pero Ana okitlakaitak ijkuak okinankili maski miakej okimatiayaj amo kuali okinyekanaya ikoneuan uan amo kuali okichiuaya iteki (1 Sam. 1:​15-18; 2:​22-24). Noijki sekimej tlakamej okiuijuikaltijkej Pablo ijkuak okiluijkej “san tlajtojtinemi” (Hech. 17:18). Pero ye okintlakaitaya ijkuak inuan omotlapouiaya (Hech. 17:22). Tlen okinpanok akinmej okitekichiuiliayaj toTajtsin Dios techmachtia uelis tikintlakaitaskej akinmej amo techtlakaitaj maski ualeua tikitaj oui. Ijkon tikchiuaj porque tiktlasojtlaj Jehová uan tiknekij tikyolpaktiskej. Axkan matikitakan akinmej moneki tikintlakaitaskej uan tleka.

MATIKINTLAKAITAKAN AKINMEJ POUIJ ITECH TOFAMILIA

7. ¿Tleka ualeua tikitaj oui tikintlakaitaskej akinmej pouij itech tofamilia?

⁷ ¿Tleka ualeua tikitaj oui titetlakaitaskej? Ijkuak tikatej iuan tofamilia okachi kuali tikinmixmatij. Tikmatij ken inyelis uan tlen amo kuali kichiuaj. Xamo tikinpiaj sekimej tofamiliares uan tikitaj oui tikinmaluiskej noso sekimej sapanoua motekipachouaj. Sekimej xamo techiluiaj itlaj teyolkoko. Oksekimej amo kintlakaitaj infamiliares uan san mokualanijtokej. Ikinon miakej amo mouikaj inuan infamilia. Matikitakan se tlamantli tlen techpaleuis kuali matikajsikamatikan nin tlamantli. Tofamilia kajki ken yetoskia tocuerpo. Tocuerpo amo kuali tekipanoua ijkuak timokokouaj. Noijki ijkon panoua ijkuak se tofamiliar amo tetlakaita ikinon titlajyouiaj uan amo kuali tikatej.

8. ¿Tleka moneki matikintlakaitakan akinmej pouij itech tofamilia? (1 Timoteo 5:​4, 8).

⁸ ¿Tleka moneki titetlakaitaskej? (xiktlajtolti 1 Timoteo 5:​4, 8). Achto carta tlen Pablo okijkuilili Timoteo okiyekijto tlen omonekiaya kichiuaskej akinmej pouij itech se familia tla okinekiayaj kuali yetoskej. Noijki okijto moneki tikintlakaitaskej akinmej pouij itech tofamilia. Ijkon moneki tikchiuaskej porque tiktlasojtlaj Jehová uan amo porque techiluiaj moneki ijkon tikchiuaskej. Ijkon matikchiuakan porque ijkon tikueyichiuaj Jehová uan ye “okichi mayetokan nochi familias” (Efes. 3:​14, 15). Tikueyichiuaj Jehová ijkuak tikintlakaitaj akinmej pouij itech tofamilia. Ikinon techiluia miak ipati matikintlakaitakan oksekimej.

9. ¿Ken uelis motlakaitaskej akinmej yomonamiktijkej? (Noijki xikinmita fotos).

⁹ ¿Ken uelis tikintlakaitaskej oksekimej? Tlakatl tlen kipatioita isiua kiteititia kitlakaita ijkuak katej teixpan uan ijkuak katej inselti (Prov. 31:28; 1 Ped. 3:7). Tlakatl amo kiuiteki isiua, amo kipinauia nion kiluia amitlaj ipati. Se tokni tlen itoka Ariela uan chanti Argentina, okijto: “Nosiua mokokoua ikinon ualeua nechiluia tlen teyolkoko maski ye amo kineki ijkon nechiluis. Nochipa nikilnamiktok tlen kijtoua amo neli tlen kineki nechiluis. Ijkuak okachi mokokoua nikilnamiki tlen kijtoua 1 Corintios 13:5 uan non nechpaleuia manimoyolseui uan maniktlakaita ijkuak iuan nimotlapouia” (Prov. 19:11). Noijki siuatl kiteititia kitlakaita inamik ijkuak kinmiluia oksekimej tlen kuali kichiua (Efes. 5:33). Ye amo kiteneua inamik, amo san tlen amo kiluia para kipinauis nion kiuijuikaltia. Ye kimati tla ijkon kichiuas san motlajyouiltiskej (Prov. 14:1). Se tokni tlen chanti Italia uan inamik sapanoua motekipachoua, okijto: “Ne nikmachilia nonamik sapanoua kitekipachoua miak tlamantli. Achto amo oniktlakaitaya ijkuak onechtlapouiaya uan itech noixko omotaya tlen amo onechpaktiaya. Satepan onikitak niktlakaita nonamik ijkuak opejki nimouika inuan akinmej tetlakaitaj”.

10. ¿Ken uelis kiteititiskej telpochmej uan ichpochmej kintlakaitaj inpapanuan?

¹⁰ Telpochmej uan ichpochmej xikintlakamatikan namopapanuan uan xikintlakaitakan ijkuak inuan nanmotlapouiaj (Éx. 21:17; Efes. 6:​1-3). Xamo okachi monekis nankinmaluiskej ijkuak kipiaskej okachi miak xiuitl. Ikinon ximochijchikauakan kuali xikinmaluikan. Matikitakan tlen okipanok se tokni itoka María. Ipapa amo kitekichiuilia toTajtsin Dios pero omokoko uan omonekiaya kimaluis. Pero ipapa amo okipaktiaya ken okimaluiaya. Ye okijto: “Oniktlatlaujtiaya Jehová manechpaleui maniktlakaita nopapa. Onikajsikamatki Jehová kineki maniktlakaita nopapa ikinon ye nechpaleuiskia ijkon manikchiua. Noijki onikajsikamatki omonekiaya niktlakaitas nopapa maski ye amo kipatlas iyelis”. Ualeua tikitaj oui tikintlakaitaskej akinmej pouij itech tofamilia pero moneki tikintlakaitaskej uan ijkon tikteititiskej tiktlakaitaj Jehová porque ye okichi mayetokan nochi familias.

MATIKINTLAKAITAKAN TOKNIUAN

11. ¿Tleka ualeua tikitaj oui tikintlakaitaskej tokniuan?

¹¹ ¿Tleka ualeua tikitaj oui titetlakaitaskej? Tokniuan mochijchikauaj kichiuaskej tlen kijtoua iTlajtol toTajtsin Dios. Pero ualeua xamo tikitaj amo techtlasojtlaj, itlaj techtlajtlakoltiaj maski amo neli noso techkualaniaj. Tla se tokni itlaj techtoktia xamo tikitaj oui tiktlakaitaskej (Col. 3:13). Pero ¿tlen techpaleuis matitetlakaitakan?

12. ¿Tleka miak ipati matikintlakaitakan tokniuan? (2 Pedro 2:​9-12).

¹² ¿Tleka moneki titetlakaitaskej? (xiktlajtolti 2 Pedro 2:​9-12). Okse carta tlen okijkuilo Pedro kijtoua tokniuan tlen okatkaj achto siglo amo okintlakaitayaj ‘akinmej oueyititokaj’ uan nin kijtosneki yejuan tlayekankej. ¿Tlen okichijkej ángeles ijkuak okitakej tlen okichiuayaj tokniuan? Pedro okijto ángeles kitlakaitaj Jehová ikinon amo okinteluijkej nion okinuijuikaltijkej nonmej tokniuan tlen amo otetlakaitayaj. Techtlajtlachialtiaj ángeles porque yejuan amo tlajtlakolejkej pero amitlaj okijtojkej ijkuak nonmej tokniuan amo otetlakaitayaj. Yejuan okikauilijkej Jehová makinmixkomaka uan makinyektlali (Rom. 14:​10-12; noijki xikita Judas 9). Ángeles techmachtiaj miak tlamantli. Tejuan tikintlakaitaj akinmej techtlajyouiltiaj ikinon noijki moneki matikintlakaitakan tokniuan. Pero tejuan achto matikintlakaitakan (Rom. 12:10). Ijkon tikteititiskej tiktlakaitaj Jehová.

13, 14. ¿Ken tikteititiaj tikintlakaitaj tokniuan? (Noijki xikinmita fotos).

¹³ ¿Ken uelis tikintlakaitaskej oksekimej? Tlayekankej xitetlasojtlakan ijkuak nantlamachtiaj (Filem. 8, 9). Amo san xikualanikan ijkuak nankiyektlaliskej se tokni. Okachi kuali xikteititikan nankitlasojtlaj. Siuamej amikaj xikteneuakan nion ‘xikinteneuakan oksekimej para amo kuali makinmitakan’. Ijkon nantlapaleuiskej nochtin tokniuan mamotlakaitakan kanin timonechikouaj (Tito 2:​3-5). Tinochtin uelis tikteititiskej tikintlakaitaj tlayekankej. Tikteititiskej ijkon tikchiuaj tla tikinpaleuiaj uan tikintlasojkamatiliaj ijkuak kinyekanaj nechikolmej, kitaj kanin titetlapouiskej uan ijkuak kipaleuiaj akin “mokxitlanuia” (Gál. 6:1; 1 Tim. 5:17).

¹⁴ Se tokni itoka Rocío okitak oui kitlakaitas se tlayekanki tlen okilui tlen omonekiaya kichiuas. Ye okijto: “Ne onikmachili san onechtlauelilui tlen omonekiaya nikchiuas. Onikteneuaya ijkuak onikatka nokalijtik. Pero onimochijchikauaya amo mamota onechkualaniaya. Noyolipan onikijtouaya kox neli okinekiaya nechpaleuis non tokni pero amo oniknekiaya nikchiuas tlen onechilui”. ¿Tlen okipaleui Rocío ayakmo ijkon makichiua? Ye okijto: “Oniktlajtolti 1 Tesalonicenses 5:​12, 13 uan onikitak amo oniktlakaitaya non tokni. Ijkuakon opejki nechkuejsoua notlalnamikilis. Oniktlatlaujti Jehová manechpaleui uan oniktemo itech amatlajkuilolmej tlen uelis nechpaleuiskia manikpatla noyelis. Satepan onikitak ne onimoueyinekiaya uan tokni amo okichi ijkon ken onimokuayejyekouaya. Onikajsikamatki omonekiaya niyetos niyolyamanki tla oniknekiaya nitetlakaitas. Ne nikmati moneki nitetlakaitas pero kuali nimomachilia porque Jehová kita nimochijchikaua ijkon nikchiuas”.

MATIKINTLAKAITAKAN AKINMEJ AMO KITEKICHIUILIAJ TOTAJTSIN DIOS

15. ¿Tleka ualeua tikitaj oui tikintlakaitaskej akinmej amo kitekichiuiliaj toTajtsin Dios?

¹⁵ ¿Tleka ualeua tikitaj oui titetlakaitaskej? Miakej amo kinekij techkakiskej ijkuak titetlapouiaj iTlajtol toTajtsin Dios (Efes. 4:18). Ijkon kichiuaj porque okse tlamantli okinmachtijkej ijkuak omoskaltijkej. Noijki xamo titekipanouaj noso timomachtiaj inuan akinmej amo teajsikamatij uan teuijuikaltiaj. Ikinon tikitaj oui inuan timotlapouiskej uan ayakmo tikintlakaitaj.

16. ¿Tleka miak ipati matikintlakaitakan akinmej ayamo kitekichiuiliaj toTajtsin Dios? (1 Pedro 2:12; 3:15).

¹⁶ ¿Tleka moneki titetlakaitaskej? Matikilnamiktokan Jehová kitok kox tikintlakaitaj akinmej amo kitekichiuiliaj. Apóstol Pedro okinmilui tokniuan tla tetlakaitaskej, oksekimej uelis kiueyichiuaskej Jehová. Okinmilui makimatikan ken tlanankiliskej ijkuak kintlajtlaniskej tlen kineltokaj. Ye okinmilui: “Xiyetokan nanyolyamankej uan xikintlakaitakan ijkuak nankinnankiliskej” oksekimej (xiktlajtolti 1 Pedro 2:12; 3:15). Yejuan omonekiaya kintlakaitaskej tekiuajkej ijkuak inmixpan oyayaj mopaleuitiuij noso ijkuak oyayaj inmixpan oksekimej. Omonekiaya tetlakaitaskej ken yetoskia ompa okinmitoka toTajtsin Dios. Jehová kikaki tlen tikijtouaj uan kita tlen tikchiuaj. Ikinon moneki tikintlakaitaskej akinmej amo kitekichiuiliaj toTajtsin Dios.

17. ¿Ken uelis tikteititiskej tikintlakaitaj akinmej amo kitekichiuiliaj toTajtsin Dios?

¹⁷ ¿Ken uelis tikintlakaitaskej oksekimej? Amo matikteititikan okachi tiixtlamatkej ijkuak tikintlapouiaj akinmej amo okachi kixmatij iTlajtol toTajtsin Dios. Matikilnamiktokan Jehová kinpatioita uan tejuan tikinmitaj okachi ueyititokej (Ageo 2:7; Filip. 2:3). Amo matimomakopakan tla ikaj techuijuikaltia porque titlaneltokaj. Noijki amitlaj matikijtokan tlen kiteititis tiixtlamatkej uan yejuan xoxojtin (1 Ped. 2:23). Tla ikaj otikiluijkej tlen amo moneki, san niman matikiluikan matechtlapojpolui. ¿Ken tikteititiskej tikintlakaitaj akinmej inuan titekipanouaj? Matimochijchikauakan kuali matitekipanokan uan okachi matikpatioitakan tlen kuali kichiuaj tlen inuan titekipanouaj uan akinmej techyekanaj (Tito 2:​9, 10). Noijki amo matitlakajkayauakan uan matitekipanokan ika nochi toyolo. Ijkon tikyolpaktiskej Jehová maski oksekimej amo kinpaktis (Col. 3:​22, 23).

18. ¿Tleka miak ipati matikintlakaitakan oksekimej?

¹⁸ Yotikitakej tleka miak ipati matikintlakaitakan oksekimej. Otikitakej tikueyichiuaskej Jehová tla tikintlakaitaskej akinmej pouij itech tofamilia porque ye okintlali mayetokan familias. Noijki tikueyichiuaskej toTajtsin Dios tla tikintlakaitaskej tokniuan. Saiktlami otikitakej uelis kiueyichiuaskej toTajtsin Dios akinmej amo kitekichiuiliaj tla tejuan tikintlakaitaj. Noijki matikintlakaitakan oksekimej maski yejuan amo ijkon kichiuaj uan Jehová techteochiuas tla ijkon tikchiuaskej. Ye yokijto ‘kintlakaitas akinmej kitlakaitaj’ (1 Sam. 2:30).