¿Tleka miakej ayakmo tetlakaitaj?

MIAK IPATI MATITETLAKAITAKAN

Ijkuak titetlakaitaj techpaleuia amo matimokualanikan inuan oksekimej uan amo matimoouijtilikan.

Biblia kijtoua: “Akin kuali tlanankilia kichiua amikaj makualani pero akin kijtoua tlen teyolkoko kichiua oksekimej makualankamikikan” (Proverbios 15:1). San tikinkualaniskej oksekimej tla amo titetlakaitaj.
Jesús okijto: “Tlen kajki toyolipan non tlen tikijtouaj” (Mateo 12:34). Tla amo tikintlakaitaj oksekimej ijkuak inuan timotlapouiaj, xamo ijkon tikchiuaj porque tikinchikoitaj. Xamo tikinchikoitaj akinmej uitsej okse altepetl. Noijki xamo tikinchikoitaj porque okse tlamantli motaj uan kichiuaj okseki tlamantli. Ikinon moneki tikpatlaskej tlen timokuayejyekouaj.

Okintlajtlanijkej kanaj 32,000 (treinta y dos mil) personas tlen pouij itech 28 altepemej uan kanaj 65% okijtojkej axkan ayakmo miakej tetlakaitaj.

¿TLEN UELIS TIKCHIUAS?

Xikintlakaita oksekimej ijkuak inuan timotlapouia maski amo mokuayejyekouaj ijkon ken te. Xikintlapoui tlen kinpaktia uan ijkon amo tikinteneuas oksekimej.

“Ayakmo xitlateneuakan uan ijkon amo namechteneuaskej” (Mateo 7:1).

Xikchiua tlen mitspaktiskia mamitschiuilikan oksekimej. Noijki mitstlakaitaskej oksekimej tla kitaj titetlasojtla uan titetlakaita.

“Noijki xikchiuakan tlen namechpaktiskia manamechchiuilikan oksekimej” (Lucas 6:31).

Xitetlapojpolui. Amo xikita tlen amo kuali kichiuaj oksekimej uan xikintlapojpolui ijkuak itlaj mitstoktiaj.

“Akin ixtlamatki amo san niman kualani uan kitlakaitaskej porque tetlapojpoluia” (Proverbios 19:11).

Kanin timonechikouaj mota nochtin motlajpalouaj uan motlapouiaj maski sekimej yikipiaj miak xiuitl uan oksekimej amo.

¿TLEN TIKCHIUAJ TIITLAIXPANTIJKAUAN JEHOVÁ?

Tejuan titetlakaitaj maski san kanin tichantij noso maski san kanin titekipanouaj uan tikinyoleuaj oksekimej noijki ijkon makichiuakan.

Tikinmiluiaj oksekimej mamomachtikan Biblia uan amitlaj kitlaxtlauaskej. Amo tikinnauatiaj oksekimej mamokuayejyekokan ijkon ken tejuan nion tikinmiluiaj makineltokakan tlen tikneltokaj. Tejuan kuali tikintlapouiaj oksekimej uan tikintlakaitaj porque Biblia kijtoua ijkon matikchiuakan (1 Pedro 3:15; 2 Timoteo 2:24).

Amo titechikoitaj. Nochtin kuali tikinseliaj kanin timonechikouaj. Tikinseliaj akinmej kinekij momachtiskej Biblia uan amo tikitaj tlen achto okichiuayaj. Timochijchikauaj nochtin tikinmajsikamatiskej uan tikintlakaitaskej (1 Pedro 2:17).

Tikintlakaitaj tekiuajkej tlen tlanauatiaj kanin tichantij (Romanos 13:1). Tikintlakamatij tlanauatilmej tlen kintlaliaj tekiuajkej uan titlatlaxtlauaj. Tejuan amo timokajkalakiaj itech política pero amitlaj tikinmiluiaj ijkuak oksekimej ijkon kichiuaj.