TLAMACHTIL 11
¿Tleka titlajyouiaj?
1, 2. ¿Tlen motlajtlaniaj miakej?
NOCHIPA tikkakij panoa miak tlamantli amo kuali: chikauak tlalolini uan miakej ixpoliuij, se tlakatl okimikti ikaj akin amitlaj okichi uan se siuatl tlen okipiaya cáncer oixpoliuik uan inselti omokajkej makuili ikoneuan.
2 Ijkuak ijkon panoa, miakej motlajtlaniaj tleka sekimej mokokoliaj uan miakej tlajyouijtokej. ¿Tejuatsin noijki ijkon timotlajtlania?
3, 4. 1) ¿Tlen okinekiaya kimatis Habacuc? 2) ¿Tlen okijto Jehová kichiuaskia?
3 Biblia kijtoa sekimej itekipanojkauan toTajtsin Dios noijki ijkon omotlajtlanijkej. Profeta Habacuc okitlajtlani Jehová: “¿Tleka tikchiua ma nikita tlen amo kuali? ¿Tleka tiktekauilia ma yeto tlajyouilistli? ¿Tleka tlaxixini uan noixpan moteuiaj? ¿Tleka sapanoa mokualaniaj uan moteuiaj?” (Habacuc 1:3).
4 Biblia kijtoa Jehová okilui Habacuc kiyektlaliskia nochi ouijkayotl (Habacuc 2:2, 3). Jehová sapanoa techtlasojtla. Biblia kijtoa: “Ye nomechmokuitlawia [noso namechmaluia]” (1 Pedro 5:7). Tla tejuan timoyolkokoaj ijkuak tikinmitaj oksekimej tlajyouiaj, toTajtsin Dios okachi moyolkokoa (Isaías 55:8, 9). Pero ¿tleka sapanoa titlajyouiaj? Ma tikitakan tleka.
¿TLEKA TITLAJYOUIAJ?
5. 1) ¿Tlen tlamachtiaj sekimej? 2) ¿Tlen kijtoa Biblia?
5 Miakej teopixkej, akinmej kinyekanaj religiones uan oksekimej tlen kijtoaj tlamachtiaj, kijtoaj titlajyouiaj porque toTajtsin Dios ijkon kineki. Noijki kijtoaj ye kipejpena nochi tlen techpanos uan noijki keman titlajyouiskej. Ualeua kijtoaj amo keman tikajsikamatiskej tleka titlajyouiaj. Oksekimej kijtoaj tiixpoliuij para tiaskej iluikak inauak toTajtsin Dios. Noijki ijkon kijtoaj ijkuak ixpoliui se konetl. Pero non amo melauak. Jehová amo techtlajyouiltia. Biblia kijtoa: “¡Akin melauak toTajtsin Dios amo uelis kichiuas tlen amo kuali, akin kipia sapanoa miak chikaualistli amo kichiua tlen amo kuali!” (Job 34:10).
6. ¿Tleka miakej kitlajtlakoltiaj toTajtsin Dios ijkuak tlajyouiaj?
6 Miakej kineltokaj toTajtsin Dios kinauatijtok tlaltikpak, ik non, kitlajtlakoltiaj ijkuak tlajyouiaj. Pero itech tlamachtil 3 otimomachtijkej Satanás kinauatijtok tlaltikpak.
7, 8. ¿Tleka sapanoa titlajyouiaj?
7 Biblia kijtoa “nochteh n tlaltikpaktlakah non amo kineltokah Dios kinnawatijtok n satanás” (1 Juan 5:19). Satanás kinauatijtok tlaltikpak pero ye amo yolkuali uan tetlajyouiltia. Noijki “kinkajkayawa nochteh n tlaltikpaktlakah” (Apocalipsis 12:9). Miakej kichiuaj ken Satanás, ik non, tlakajkayauaj, tekokoliaj uan tetlajyouiltiaj.
8 Ma tikitakan tleka noijki titlajyouiaj. Ijkuak Adán uan Eva okixnamikej toTajtsin Dios otlajtlakolchijkej, ik non, okinpanoltilijkej tlajtlakoli inkoneuan. Tinochtin titlajtlakolejkej uan sekimej tetlajyouiltiaj. Ualeua kinekij ueyititoskej, ik non, tlateuiaj, yauij guerras uan miakej kinchiuiliaj tlen amo kuali (Eclesiastés 4:1; 8:9). Noijki titlajyouiaj porque tinochtin uelis techpanos itlaj “tlen amo tikchiaj” (Eclesiastés 9:11). Ma tikijtokan tinejnenti uan itlaj mopan uetsi, ¿itlajtlakol Diablo noso ijkon omitspanok porque titlajtlakole? Amo. Uelis itlaj techpanos, tla tikatej kanin panotikisa tlen amo kuali.
9. ¿Tleka tikijtoaj toTajtsin Dios kimati tleka kitekauilijtok ma titlajyouikan?
9 Jehová amo techtlajyouiltia. Amo itlajtlakol mochiuaj guerras uan nochi tlen amo kuali. Noijki amo itlajtlakol ijkuak tlalolini, ejekakiaui, tlatemi uan ijkuak panoa okseki tlamantli. Xamo tejuatsin timotlajtlania: “Tla Jehová kipia sapanoa miak chikaualistli, ¿tleka amo kipojpoloa tlen techtlajyouiltia?”. Tikmatij toTajtsin Dios techtlasojtla miak, ik non, kimati tleka kitekauilijtok ma titlajyouikan (1 Juan 4:8).
¿TLEKA TOTAJTSIN DIOS KITEKAUILIA MA TITLAJYOUIKAN?
10. ¿Tlen okijto Satanás itech Jehová?
10 Itech xochitlali Edén, Satanás okichi Adán uan Eva amo ma kitlakamatikan toTajtsin Dios. Okijto Jehová amo kuali tlanauatia uan noijki okijto okatka itlaj tlen amo okinekiaya kinmakas. Satanás okinekiaya ma kineltokakan ye okachi kuali tlanauatiskia uan amo Jehová, ik non, amo omonekiaya Jehová ma kinyekana (Génesis 3:2-5; xikita nota 27).
11. ¿Tlen tlajtlanilistli moneki tiknankiliskej?
11 Adán uan Eva amo okitlakamatkej Jehová uan okixnamikej. Omokuayejyekojkej yejuan okinnamikiaya kipejpenaskej tlen kuali uan tlen amo kuali. ¿Tlen kichiuaskia Jehová para kiteititiskia Adán uan Eva omotlapololtijkej uan san ye kimati tlen techpaleuia?
12, 13. 1) ¿Tleka Jehová amo san niman okixpolo Adán uan Eva? 2) ¿Tleka Jehová kitekauilia Satanás ma tlanauati itech tlaltikpak uan tlaltikpaktlakamej inselti ma monauatikan?
12 Jehová okinekiaya nochi tlaltikpak ma yeto se xochitlali kanin chantiskiaj inkoneuan Adán uan Eva. Jehová kichiuas tlen kineki maski Satanás kinekis kitsakuilis (Génesis 1:28; Isaías 55:10, 11). Ik non, Jehová amo san niman okixpolo Adán uan Eva, okinkauili ma kinpiakan inkoneuan uan yejuan uelis kijtoskiaj akin kinnauatiskia.
13 Satanás okixnamik Jehová inmixpan sapanoa miakej ángeles (Job 38:7; Daniel 7:10). Ik non, Jehová okitekauili ma pano miak xiuitl uan ijkon Satanás kiteititiskia kox melauak tlen okijto. Noijki tlaltikpaktlakamej uelis inselti moyekanaskiaj kanin Satanás tlanauatijtoskia. Ijkon motaskia kox uelis inselti monauatiskiaj uan kox monekiskia ma kinpaleui toTajtsin Dios.
14. ¿Tlen yomoteititi?
14 Yiuejkika miakej inselti monauatiaj uan kipejpenaj intekiua pero amikaj kuali tlanauatia. Yomoteititi Satanás san tlakajkayaua uan tlaltikpaktlakamej moneki ma kinpaleui toTajtsin Dios. Melauak tlen okijto profeta Jeremías: “Kuali nikmati oh Jehová, tlakatl amo kinamiki monauatis nion kinamiki kiyekanas kanin tlaksas” (Jeremías 10:23).
¿TLEKA JEHOVÁ YOKITEKAUILI MIAK XIUITL MA TITLAJYOUIKAN?
15, 16. 1) ¿Tleka Jehová yokitekauili miak xiuitl ma titlajyouikan? 2) ¿Tleka Jehová amo kiyektlalia tlen kichijtok Satanás?
15 ¿Tleka Jehová yokitekauili miak xiuitl ma titlajyouikan? ¿Tleka kitekauilia ma techpano tlen amo kuali? Omonekiaya panos miak xiuitl para moteititiskia Satanás amo kuali tlanauatia. Yokinpapatlakej miakej tekiuajkej pero amikaj kuali tlanauatia. Maski ixtlamatkej yokichijchijkej miak tlamantli uan noijki katej miakej teposmej tlen ika kichiuaj miak tlamantli, axkan okachi mochijtok tlen amo kuali, miakej amo kipiaj tlen ika mopanoltiskej, oksekimej tlachtekij uan onka guerras. Non kiteititia amo ueli timonauatiaj toselti. Moneki ma techpaleui toTajtsin Dios.
16 Jehová amo kiyektlalia tlen kichijtok Satanás. Tla kichiuaskia, kiteititiskia kipaleuijtoskia pero Jehová amo keman ijkon kichiuas. Tla kipaleuiskia, miakej mokuayejyekoskiaj uelis monauatiskej inselti. Pero toTajtsin Dios amo keman kipaleuis itlaj tlen amo melauak porque ye amo tlakajkayaua (Hebreos 6:18).
17, 18. ¿Tlen kichiuas Jehová para kiyektlalis tlen Satanás yokijtlako?
17 Satanás uan oksekimej kixnamikij Jehová uan yotlaijtlakojkej, pero Jehová kiyektlalis tlen yokichijkej. Ye nochi ueli kichiua uan kimatok keman moteititis amo melauak tlen okijto Satanás. Ijkuakon, Jehová kikopas nochi tlaltikpak se xochitlali ijkon ken kineki. Kinyolitiskej “nochteh non yomikkeh iwa tooktokeh” (Juan 5:28, 29). Amikaj mokokos nion ixpoliuis. Jehová kitekitiltis Jesús “para kipojpolos nochi tlan kichiwa n diablo” (1 Juan 3:8). Tiktlasojkamatiliaj Jehová ok mochixtok porque ijkon techkauilia ma tikixmatikan uan ma tikpejpenakan tla tiknekij ma technauati (xiktlajtolti 2 Pedro 3:9, 10, TNM). Maski titlajyouiaj, Jehová techpaleuia ma titlaxikokan (Juan 4:23; xiktlajtolti 1 Corintios 10:13).
18 Jehová amo techchiualtia ma tikpejpenakan ken totekiua. Ye techkauilia ma tikpejpenakan tlen tikchiuaskej. Ma tikitakan ken techpaleuia non.
¿TLEN TIKCHIUAS?
19. 1) ¿Tlen techkauilia Jehová ma tikchiuakan? 2) ¿Tleka moneki tiktlasojkamatiliskej?
19 Jehová techkauilia ma tikpejpenakan tlen tikchiuaskej. Ik non, uelis tikijtoskej tlen tikchiuaskej uan kox tiktekichiuiliskej Jehová noso amo. Tejuan amo tikchiuaj ken yolkamej, porque yejuan amo kimatij tlen kuali uan tlen amo kuali (Proverbios 30:24-28). Noijki amo tikatej ken máquinas tlen san seki tlamantli kichiuaj porque ijkon okinchijchijkej. Tejuan uelis tikpejpenaskej ken tikpiaskej toyelis, akinmej inmiuan timouikaskej uan tlen tikchiuaskej. Jehová kineki ma tiyolpakikan.
20, 21. ¿Tlen moneki xikpejpena?
20 Jehová kineki ma tiktlasojtlakan (Mateo 22:37, 38). Ye ken se teta tlen yolpaki ijkuak ikone ika nochi iyolo kiluia kitlasojtla pero amo ijkon kiluia san porque moneki kiluis. Jehová techkauilia ma tikijtokan kox tiktekichiuiliskej noso amo. Satanás, Adán uan Eva okixtopejkej Jehová. ¿Tlen tikchiuas tejuatsin?
21 Xiktekichiuili Jehová, non tlen okachi kuali tikchiuas. Miakej yokixtopejkej Satanás uan kitekichiuiliaj toTajtsin Dios (Proverbios 27:11). Yotimomachtijkej toTajtsin Dios kitlajtlamis nochi tlen techtlajyouiltia uan nochi tlaltikpak kikopas se xochitlali. ¿Tlen moneki tikchiuas tla tikneki ompa tiyetos? Itech okse tlamachtil tikitaskej.