TLAMACHTIL 26
¿Tleka sapanoua titlajyouiaj?
Ijkuak panoua itlaj tlen amo kuali, miakej kinekij kimatiskej tleka ijkon panoua. Biblia techiluia tleka titlajyouiaj uan non techyolchikaua.
1. ¿Tlen okichi Satanás para mamochiua tlen amo kuali?
Diablo noso Satanás amo okitlakamatki toTajtsin Dios. Ye okinekiaya tlanauatis, ikinon okichi Adán uan Eva noijki makixnamikikan toTajtsin Dios. Ijkon okichi ijkuak okikajkaya Eva (Génesis 3:1-5). Satanás okijto Jehová amo okikauiliaya mayolpaki Eva. Yetoskia ken okijto tinochtin tiyolpakiskej tla amo tiktlakamatij toTajtsin Dios. Satanás opejki tlakajkayaua ijkuak okilui Eva amo mikiskia. Ikinon Biblia kijtoua: “Ye tlakajkayaua. Ye intaj akinmej tlakajkayauaj” (Juan 8:44).
2. ¿Tlen okichijkej Adán uan Eva?
Jehová okinmilui uelis kikuaskiaj nochi tlakilotl. San itlakilo se kuauitl amo uelis kikuaskiaj (Génesis 2:15-17). Pero amo okitlakamatkej uan okikuajkej. Eva “okitekik se [tlakilotl] uan opejki kikua” uan satepan Adán “noijki okikua” (Génesis 3:6). Yejuan amo okitlakamatkej toTajtsin Dios. Adán uan Eva uelis kitlakamatiskiaj porque amo okatkaj tlajtlakolejkej. Pero yejuan amo okitlakamatkej, ijkon otlajtlakolchijkej uan okiteititijkej amo okinekiayaj makinnauati, ik non, opejkej tlajyouiaj (Génesis 3:16-19).
3. ¿Tlen techpanoua porque Adán uan Eva otlajtlakolchijkej?
Ijkuak Adán uan Eva amo okitlakamatkej toTajtsin Dios opejki tlajtlakolchiuaj uan ijkuak oneskej inkoneuan, noijki okatkaj tlajtlakolejkej. Biblia techiluia tlen okichi Adán, ompa kijtoua: “Onka tlajtlakoli ipan tlaltikpak porque se tlakatl otlajtlakolchi uan tlajtlakoli kichiua matimikikan, ikinon tinochtin timikij porque tinochtin titlajtlakolejkej” (Romanos 5:12).
¿Tleka titlajyouiaj? Ualeua porque timotlapololtiaj uan tikchiuaj tlen amo kuali, techtlajyouiltia tlen oksekimej kichiuaj uan ualeua noijki titlajyouiaj porque itlaj panotikisa (xiktlajtolti Eclesiastés 9:11).
MATIMOMACHTIKAN
Matikitakan tleka amo kuali matiktlajtlakoltikan toTajtsin Dios ijkuak titlajyouiaj uan ken momachilia ijkuak kita titlajyouiaj.
4. ¿Akin itlajtlakol titlajyouiaj?
Miakej kijtouaj toTajtsin Dios tlanauatijtok nikan tlaltikpak. Pero ¿melauak tlen kijtouaj? Xikitakan VIDEO.
Xiktlajtoltikan Santiago 1:13 uan 1 Juan 5:19 uan satepan xikitakan tlen namechmachtia.
¿Itlajtlakol toTajtsin Dios titlajyouiaj uan mochijtok miak tlamantli tlen amo kuali?
5. ¿Ken tlanauatia Satanás?
Xiktlajtoltikan Génesis 3:1-6 uan satepan xikitakan tlen namechmachtia.
¿Tlen okijto Satanás? (Xikitakan versículo 4 uan 5).
¿Tleka tlen okijto Satanás yetoskia ken kijtoskia toTajtsin Dios amo techkauilia matikpiakan tlen kuali?
Tlen okijto Satanás, ¿moneki technauatis Jehová para tiyolpakiskej?
Xiktlajtoltikan Eclesiastés 8:9 uan satepan xikitakan tlen namechmachtia.
¿Tlen techpanoua porque Jehová amo tlanauatijtok?
Adán uan Eva amo okipiayaj tlajtlakoli uan ochantiayaj itech xochitlali, pero okichijkej tlen okinmilui Satanás uan okixnamikej Jehová.
Titlajtlakolejkej, titlajyouiaj uan tiixpoliuij porque Adán uan Eva amo okitlakamatkej Jehová.
Jehová kichiuas ayakmo matitlajtlakolchiuakan, ayakmo matitlajyouikan, ayakmo matiixpoliuikan uan nochipa tichantiskej itech xochitlali.
6. Jehová moyolkokoua ijkuak kita titlajyouiaj
¿Ken momachilia toTajtsin Dios ijkuak kita titlajyouiaj? Xikita tlen okijto tekiua David uan apóstol Pedro. Xiktlajtoltikan Salmo 31:7 uan 1 Pedro 5:7 uan satepan xikitakan tlen namechmachtia.
¿Ken timomachilia tikmatis Jehová moyolkokoua ijkuak kita titlajyouiaj?
7. ToTajtsin Dios kichiuas ayakmo matitlajyouikan
Xiktlajtoltikan Isaías 65:17 uan Apocalipsis 21:3, 4 uan satepan xikitakan tlen namechmachtia.
Jehová kijtoua kipojpolos nochi tlen techtlajyouiltia, ¿mitsyolchikaua tikmatis ijkon kichiuas? ¿Tleka ijkon tikijtoua?
¿Otikmatiaya?
Ijkuak Satanás achto otlakajkaya, okijto Jehová amo yolkuali, noijki okixnamik porque okijto amo kuali tlanauatia. Pero ayakmo miak poliui Jehová kitlajtlamis nochi tlen techtlajyouiltia uan ijkon noijki kichipauas itoka. Nin kijtosneki kiteititis san ye kinamiki tlanauatis. Miak ipati mamochipaua itoka toTajtsin Dios (Mateo 6:9, 10).
SEKIMEJ KIJTOUAJ: “ToTajtsin Dios techtlajyouiltia porque kineki kitas kox melauak titlaneltokaj”.
¿Tlen tikijtoskia tla ikaj ijkon mitsiluis?
XIKILNAMIKTO
Nochi tlen techpanotok intlajtlakol Satanás, Adán uan Eva. Jehová moyolkokoua ijkuak kita titlajyouiaj uan kipojpolos nochi tlen techtlajyouiltia.
Matikojpauikan
¿Tlen okijto Satanás para kikajkayauas Eva?
¿Tlen techpanoua porque Adán uan Eva amo okitlakamatkej Jehová?
¿Ken tikmatij Jehová moyolkokoua ijkuak kita ken titlajyouiaj?
NIN NOIJKI MITSPAKTIS
Biblia kijtoua tlen kijtosneki tlajtlakoli.
“¿Tikmati tlen kijtosneki tlajtlakoli?” (Nin tlamachtil kajki itech jw.org/ncx)
Okachi ximomachti tlen okichi Satanás itech xochitlali Edén.
“¿Tleka toTajtsin Dios kitekauilia ma titlajyouikan?” (Akin Tetlapouijtok, 1 de enero 2014)
Xikita se tlamantli tlen opanok yiuejkika uan ken techyolchikaua Biblia.
Xikita tlen okimatki se tlakatl tlen sapanoua otlajyouiaya.