Okiteochijkej Jacob

Isaac okipiaya 40 xiuitl ijkuak omonamikti iuan Rebeca. Ye sapanoa okitlasojtlaya isiua. Satepan yejuan okinpixkej ome inkoneuan koatsitsintin.

Intlayekankone omotokayotiaya Esaú uan okse omotokayotiaya Jacob. Esaú okipaktiaya yetos kuajtlan uan okinmiktiaya yolkamej. Pero Jacob okipaktiaya yetos ikalijtik.

Itech nonmej tonalmej, tetajmej okinkajteuiliayaj inkoneuan nochi tlen okatka inmiaxka ijkuak omikiayaj. Pero tlayekankonetl okiseliaya okachi ueyi tlali uan okachi miak tomin. Itech ikalchanejkauan Isaac, noijki okinkajteuiliayaj tekitl para ma tlapaleuikan ma mochiua tlen Jehová okilui Abrahán. Esaú amo okipatioitaya tlen Jehová okilui Abrahán. pero Jacob kema okipatioitaya.

Se tonal, Esaú okintemoto yolkamej nochi tonal uan sapanoa osotlauak. Ijkuak oajsito ikalijtik okijnekuik tlakuali tlen okichijchijtoka Jacob uan okilui: “¡Niapismiki! ¡Xinechmaka seki tlakuali non chichiltik!”. Jacob okilui: “Kema, pero achto xinechilui ma nikmokaui tlen mitsmakaskej”. Esaú okinankili: “¡Tlen nechmakaskej amo itlaj ipati! Xikmokaui. Ne san nikneki nitlakuas”. ¡Amo kuali tlen okichi Esaú! Okipatlak san ika tlakuali itlaj tlen miak ipati.

Ijkuak Isaac yokipiaya miak xiuitl, kiteochiuaskia itlayekankone. Pero Rebeca okipaleui Jacob para Isaac ma kiteochiua. Ijkuak Esaú okimatki non, sapanoa okualanki uan okinekiaya kimiktis ikni. Isaac uan Rebeca okipaleuijkej Jacob, ik non, okiluijkej: “Xio uan ximokaua iuan motío Labán, ikni monantsin, hasta ma moyolseui Esaú”. Jacob okintlakamatki itatajuan, ye ocholo uan ijkon ikni amo okimikti.