Jacob uan Esaú omotlapojpoluijkej

Jehová okilui Jacob kimaluiskia, ijkon ken okinmalui Abrahán uan Isaac. Jacob ochantito altepetl Harán. Ompa omonamikti uan okinpixki miakej ikoneuan uan miak tomin.

Satepan, Jehová okilui Jacob: “Ximokuepa inmialtepe motatajuan”. Ik non, Jacob uan ikalchanejkauan oyajkej. Pero itech ojtli, sekimej itlakeualuan Jacob okiluijkej: “Ompa uits mokni Esaú iuan 400 tlakamej”. Jacob omomojti. Omokuayejyeko Esaú itlaj kichiuiliskia ye uan ikalchanejkauan. Ik non, okilui Jehová: “Nimitstlatlaujtia, techmakixti imak nokni”. Mostlatika, Jacob okititlanili se tetliokolil Esaú. Okinmakak miakej ichkamej, tentsomej, vacas, burros uan camellos.

Non yoak, ijkuak Jacob okatka iselti, okitak se ángel. Uan Jacob opejki moteuia iuan non ángel. Omoteuijkej nochi yoak hasta ijkuak otlaneski. Jacob amo omosotla maski okikokojkej. Ángel okilui: “Xinechkauili ma nio”. Pero Jacob okinankili: “Amo, hasta xinechteochiua”.

Saiktlami, nin ángel okiteochi Jacob. Ijkon Jacob okimatki Jehová kimaluiskia tla Esaú itlaj okinekiaya kichiuilis.

Ijkuak otlaneski, Jacob okitak Esaú uan 400 tlakamej. Okiski achto kisaskiaj ikalchanejkauan uan okinamikito Esaú. Ijkuak oajsito kanin okatka Esaú, omotlankuaketski chikome uelta. Esaú omotlalo okinamikito Jacob uan okinapalo. Ochokakej uan omotlapojpoluijkej. ¿Tikneltoka Jehová okipakti tlen okichi Jacob?

Satepan, Esaú omokuepki ikalijtik uan Jacob oyajki. Jacob okinpiaya 12 ikoneuan. Yejuan omotokayotiayaj: Rubén, Simeón, Leví, Judá, Dan, Neftalí, Gad, Aser, Isacar, Zabulón, José uan Benjamín. Satepan, Jehová okimakixti ialtepe ika José, se ikone Jacob. ¿Tikneki tikmatis ken okichi? Ma tikitakan.