Israelitas okijtojkej kitlakamatiskiaj Jehová

Israelitas oajsitoj itech tepetl Sinaí kanaj ome metstli satepan ijkuak okiskej Egipto uan ompa omokajkej. Ijkuakon, Jehová okinauati Moisés ma tlejko ipan tepetl Sinaí uan okilui: “Onikinmakixti israelitas. Yejuan yetoskej noaltepe tla kintlakamatiskej notlanauatiluan”. Ijkuak Moisés otemok, okinmilui israelitas tlen okijto Jehová. ¿Tlen okijtojkej israelitas? Otlanankilijkej: “Tikchiuaskej nochi tlen Jehová kijtos”.

Satepan, Moisés oksepa otlejkok ipan tepetl. Ompa Jehová okilui: “Ijkuak panos eyi tonal nikintlapouis israelitas. Xikinmilui amo ma tlejkokan ipan tepetl Sinaí”. Ijkuak Moisés otemok, okinmilui israelitas ma kikakikan Jehová.

Eyi tonal satepan, israelitas okitakej opejki tlapejpetlani uan otlamixtlayoak ipan tepetl. Noijki okikakej chikauak okipitsayaj se kuakouitl uan chikauak otlatijtikuinki. Satepan, Jehová otemok ipan tepetl itlajkotia tlitl. Israelitas sapanoa omomojtijkej. Tepetl opopokatoka uan chikauak otlalolinki. Uan okachi chikauak omokakiaya okipitsayaj kuakouitl. Ijkuakon, toTajtsin Dios okijto: “Ne niJehová. Amo xikueyichiuakan okse dios”.

Moisés oksepa otlejkok ipan tepetl uan ompa Jehová okimakak itlanauatiluan. Nonmej tlanauatilmej okijtoayaj ken kiueyichiuaskiaj Jehová uan ken kipiaskiaj inyelis. Moisés okinmijkuilo uan satepan okintlajtoltili israelitas. Yejuan okijtojkej: “Tikchiuaskej nochi tlen Jehová technauatia”. Ijkon okiluijkej Jehová kitlakamatiskiaj. Pero ¿melauak okichijkej?