Jehová okitlapoui Samuel

Ueyi teopixki Elí okinpiaya ome ikoneuan, se omotokayotiaya Hofní uan okse Finehás. Yejuan okatkaj teopixkej uan otekitiayaj tabernáculo. Pero amo okintlakamatiayaj itlanauatiluan Jehová uan okintlajyouiltiayaj israelitas. Ijkuak israelitas okiuikayaj tlamanali para Jehová, Hofní uan Finehás okimokauiayaj nakatl tlen okachi kuali. Elí okimatiaya ikoneuan okichijtokaj tlen amo kuali, pero amo itlaj okinmiluiaya. ¿Tlen okichi Jehová?

Maski Samuel amo okipiaya miak xiuitl ken Hofní uan Finehás, amo okichi ken yejuan. Ik non, Jehová okitlasojtlaya Samuel. Se yoak, Samuel okochtoka uan okikak ikaj okinotsaya. Omejki uan omotlalo kanin okatka Elí uan okilui: “Nikan nika”. Pero Elí okinankili: “Ne amo onimitsnotski; oksepa xikochiti”. Samuel oksepa omotekato. Ijkuakon, oksepa ikaj okinotski. Ijkuak eyi uelta ijkon opanok, Elí okimatki Jehová okinotstoka Samuel. Elí okilui Samuel tla oksepa kikakiskia ikaj kinotsa, ma kinankili: “Jehová, xitlajto. Motlakeual mitskaktok”.

Samuel oksepa omotekato uan okikak ikaj okiluiaya: “Samuel, Samuel”. Ye okinankili: “Jehová, xitlajto. Motlakeual mitskaktok”. Jehová okilui: “Xikilui Elí niktlajyouiltis ye uan ikalchanejkauan. Ye kimati ikoneuan tlajtlakolchijtokej itech notabernáculo pero amo itlaj kinmiluia”. Mostlatika, Samuel otlatlapo itech tabernáculo ken nochipa okichiuaya. Ye omomojtiaya kiluis Elí tlen okijto Jehová. Pero Elí okinotski uan okitlajtlani: “Nokone, ¿tlen omitsilui Jehová?”. Samuel okilui nochi tlen okijto Jehová.

Samuel omoskalti uan kuali omouikaya iuan Jehová. Nochtin israelitas okimatiayaj Jehová okipejpenki Samuel para yetoskia teotlajtojki uan juez.