Achto ueyi tekiua itech Israel

Jehová okintlali jueces para ma kinyekanakan israelitas pero yejuan okinekiayaj se ueyi tekiua. Ik non, okiluijkej Samuel: “Nochtin altepemej kipiaj se ueyi tekiua uan tejuan noijki tiknekij tikpiaskej”. Samuel amo kuali okitak non. Okitlatlaujti Jehová uan ye okinankili: “Yejuan amo te mitsixtopeuaj, ne nechixtopeuaj. Xikinmilui uelis kipiaskej se ueyi tekiua pero ye kintlajtlanilis miak tlamantli”. Maski Jehová ijkon okijto, israelitas okijtojkej: “¡Non amo techtekipachoa! ¡Tejuan tiknekij se ueyi tekiua!”.

Ijkuakon, Jehová okilui Samuel, achto ueyi tekiua yetoskia se tlakatl tlen omotokayotiaya Saúl. Ijkuak Saúl okitlajpaloto Samuel itech altepetl Ramá, Samuel okitlalili aceite ipan itsonteko uan ijkon okiteititi yetoskia ueyi tekiua.

Satepan, Samuel okinnechiko israelitas para kixmatiskiaj ueyi tekiua. Pero amo kanaj okajsiayaj Saúl. ¿Tikmati tleka? Saúl omotlati kanin okatka miak tlamantli. Ijkuak okajsikej, okiuikakej uan okitlalijkej intlajkotia israelitas. Saúl okatka okachi uejkapan uan sapanoa kuajkualtsin. Samuel okijto: “Xikitakan akin okipejpenki Jehová”. Uan yejuan okijtojkej: “¡Ma yolto ueyi tekiua!”.

Ueyi tekiua Saúl okikakiaya Samuel uan okitlakamatiaya Jehová. Pero satepan okipatlak iyelis. Se tonal, Samuel okilui Saúl ma kichia para kitlamaniliskiaj Jehová. Ueyi tekiua Saúl amo uelis kitemakaskia tlamanali. Pero Samuel ouejka, ik non, Saúl san iselti okitemakak tlamanali. ¿Tlen okichi Samuel? Okilui Saúl: “Omonekiaya tiktlakamatis Jehová pero amo otikchi”. ¿Okajsikamatki Saúl omonekiaya nochipa kitlakamatis Jehová?

Satepan, Saúl omoteuito iuan amalequitas uan Samuel okilui ma kinmikti nochtin. Pero Saúl amo okimikti ueyi tekiua Agag. Ijkuakon, Jehová okilui Samuel: “Saúl onechka uan ayakmo nechtlakamati”. Samuel omoyolkoko, ik non, okilui Saúl: “Jehová kipejpenas okse ueyi tekiua porque ayakmo tiktlakamati”. Ijkuak Samuel omokuepki para yaskia, Saúl okikitskili itempa itlaken uan okitsayanki. Samuel okilui Saúl: “Ijkon Jehová mitskixtilis tekiuajkayotl”. Non kijtosneki Jehová kimakaskia tekiuajkayotl akin kitlasojtlaskia uan kitlakamatiskia.