Esdras otlamachti iTlanauatil toTajtsin Dios

Opanok kanaj 70 xiuitl desde ijkuak israelitas omokuepkej Jerusalén, pero sekimej ok ochantiayaj itech altepemej kanin otlanauatiaya tekiuajkayotl persa. Esdras okatka se israelita tlen ompa ochantiaya, ye okatka teopixki uan otlamachtiaya iTlanauatil Jehová. Esdras okimatki akinmej ochantiayaj Jerusalén amo okitlakamatiayaj iTlanauatil Jehová. Ik non, okinekiaya yas Jerusalén para kinpaleuiskia. Ueyi tekiua persa tlen omotokayotiaya Artajerjes okilui: “ToTajtsin Dios omitsmakak ixtlamatilistli para xitlamachti iTlanauatil. Ik non, xio uan xikinuika akinmej kinekiskej mouan yaskej”. Esdras omonechiko iuan akinmej okinekiayaj mokuepaskej Jerusalén. Okiluijkej Jehová ma kinmalui itech ojtli uan oyajkej.

Naui metstli satepan, oajsitoj Jerusalén. Príncipes okiluijkej Esdras: “Israelitas ayakmo kitlakamatij Jehová uan monamiktiaj iuan siuamej tlen kinueyichiuaj oksekimej dioses”. ¿Tlen okichi Esdras? Omotlankuaketski inmixpan israelitas uan omotlatlaujti: “Jehová, te yotechteochi, pero tejuan moixpan otitlajtlakolchijkej”. Nochtin omoyolkuepkej, pero satepan oksepa okichijkej tlen amo kuali. Ik non, Esdras okinpejpenki sekimej tlayekankej uan jueces para kiyektlaliskiaj tlen opanotoka. Eyi metstli satepan, okinkixtijkej akinmej amo okinekiayaj kiueyichiuaskej Jehová.

Opanok 12 xiuitl. Ijkuakon, otlankej okiyektlalijkej tepamitl tlen okiyaualoaya Jerusalén. Esdras okinnechiko israelitas kanin nochtin omonechikoayaj para kintlajtoltiliskia iTlanauatil Jehová. Nochtin omoketskej ijkuak Esdras okitlapo amochtli kanin oijkuilitoka iTlanauatil Jehová. Esdras okiueyichi Jehová uan israelitas okajkokuijkej inmauan, ijkon okiteititijkej okinpakti tlen okichi. Satepan, Esdras okitlajtolti iTlanauatil Jehová uan okiyekijto. Nochtin kuali okikakej. Okajsikamatkej oksepa okikajkej Jehová uan ochokakej. Mostlatika, Esdras okachi okintlajtoltili iTlanauatil Jehová. Israelitas okimatkej omonekiaya san niman kichiuaskiaj Fiesta de las Cabañas. Uan totoka opejkej kiyektlaliaj nochi para iluichiuaskiaj.

Israelitas oiluichijkej chikome tonal uan sapanoa oyolpakej. Okitlasojkamatilijkej Jehová porque sapanoa otlamochi. Amo okichiuayaj Fiesta de las Cabañas ken okichijkej desde ijkuak okatka Josué. Ijkuak otlanki oiluichijkej, omonechikojkej uan omotlatlaujtijkej: “Jehová, te otechmakixti ijkuak otikatkaj titlakeualmej. Otechtlamakak ijkuak otikatkaj kanin tlauaki uan otechmakak nin kualtsin tlali. Pero miak uelta amo otimitstlakamatkej. Uan maski otikintitlanki teotlajtojkej ma techiluikan otitlajtlakolchijtokaj, amo otikinkakej. Pero te amo otimosotla. Amo keman otikilka tlen otikilui Abrahán. Axkan, nochipa timitstlakamatiskej”. Israelitas okijkuilojkej tlen okijtojkej uan príncipes, levitas uan teopixkej okitlalilijkej se sello non amatl.