Okachi ma tiktekichiuilikan toTajtsin Dios uan ijkon tikueyichiuaskej
SE filósofo romano tlen ochantiaya itech achto siglo okijto: “Tla akin kiuika se barco amo kimati kanin ajsiti, maski ejeka amo kanaj kiuikas”. Ninmej tlajtolmej itlaj techmachtiaj: Tla tiknekij tiyolpakiskej, moneki timokuayejyekoskej tlen tiknekij tikchiuaskej.
Biblia kijtoua yiuejkika sekimej itekipanojkauan Jehová okachi okitekichiuilijkej. Kanaj cincuenta xiuitl, Noé okichijchi arca “non ika kinmakixtiskia non ken kimita”. Profeta Moisés otlachixtoka “itech n tlatliokólili non Dios kimakaskia” (Hebreos 11:7, 26). ToTajtsin Dios okilui Josué ma kimoaxkati tlali Canaán (Deuteronomio 3:21, 22, 28; Josué 12:7-24).
Itech achto siglo Jesús okijto “nin kualitlájtoli non techilia kenomi Dios tlanawatia, motetlapowis itech nochi n tlaltíkpaktli”, tlen okijto Jesús okipaleui apóstol Pablo para okachi ma kitekichiuili Jehová (Mateo 24:14). Jesús okitlapoui Pablo uan okititi seki tlamantli para kiyolchikauas uan ijkon ma tetlapoui, noijki Pablo otlapaleui para ma mochiuakan miakej nechikolmej itech altepemej tlen katej Asia Menor uan Europa (Hechos 9:15; Colosenses 1:23).
Miakej itekipanojkauan Jehová mochijchikauaj para okachi kitekichiuiliskej uan ijkon kiueyichiuaj. ¿Ken uelis okachi tiktekichiuiliskej toTajtsin Dios? ¿Tlen tlamantli uelis tikchiuaskej para okachi tiktekichiuiliskej?
¿Tleka ijkon tikchiuaj?
Nochtin uelis kipejpenaskej tlen kinekij kichiuaskej uan miakej ijkon kichiuaj. Pero sekimej mochijchikauaj kichiuaskej seki tlamantli para ma kintlakaitakan uan amo para kiueyichiuaskej toTajtsin Dios. Noijki miakej kipejpenaj kichiuaskej seki tlamantli porque kinekij kipiaskej miak tomin, kinekij ma kintlakaitakan uan san kinekij tlanauatiskej. Amo kuali tla san tiknekij tikchiuaskej seki tlamantli para tikpiaskej miak tomin noso para ma techtlakaitakan. Tla timochijchikauaj tiktekichiuiliskej toTajtsin Dios, tikteititiskej tikueyichiuaj uan tikpaleuiaj itekiuajkayo (Mateo 6:33). Uelis ijkon tikchiuaskej tla tiktlasojtlaj Jehová uan oksekimej, noijki amo tiknekiskej tikchiaskej itlaj tlen uelis kiyolkokos toTajtsin Dios (Mateo 22:37-39; 1 Timoteo 4:7).
Ijkuak timochijchikauaj okachi tiktekichiuiliskej Jehová itech ialtepe noso timochijchikauaj okachi iuan timouikaskej, moneki timokuayejyekoskej tleka ijkon tikchiuaj. Maski tiknekij okachi tiktekichiuiliskej toTajtsin Dios, amo nochipa ueli ijkon tikchiuaj. ¿Tlen uelis tikchiuaskej para okachi tiktekichiuiliskej toTajtsin Dios?
Moneki timochijchikauaskej
Ma tikitakan tlen okichi toTajtsin Dios para kichiuas tlen okinekiaya ijkuak okichijchi tlaltikpak. Satepan ijkuak otlanki otlachijchi, toTajtsin Dios okijto: “Otiotlakik uan otlaneski” (Génesis 1:5, 8, 13, 19, 23, 31). ToTajtsin Dios kuali okimatiaya tlen okinekiaya kichiuas ijkuak okichijchi tlaltikpak. Uan okichi nochi tlen okijto kichiuas (Apocalipsis 4:11). Job okijto: “Ijkuak itlaj kineki kichiuas [Jehová], ye kichiua” (Job 23:13). Jehová oyolpakik ijkuak okitak “nochi tlen okichijchi” uan okijto “sapanoua kuali” (Génesis 1:31).
Tla tiknekij okachi tiktekichiuiliskej toTajtsin Dios, moneki timochijchikauaskej ika nochi toyolo. ¿Tlen techpaleuis ijkon ma tikchiuakan? Ijkuak tlaltikpak ayamo itlaj okipiaya uan okatka tlauaki, Jehová omokuayejyeko ken motaskia tlaltikpak ijkuak kiyektlaliskia: tlaltikpak kualtsin motaskia uan kiueyichiuaskia toTajtsin Dios. Tejuan noijki uelis ijkon tikchiuaskej tla timokuayejyekouaj tlen tikseliskej tla timochijchikauaj tiktekichiuiliskej toTajtsin Dios. Tony tlen kipia 19 xiuitl ijkon okichi. Sapanoua omotlajtlachialti ijkuak oyajki Betel tlen kajki Europa occidental. Opejki mokuayejyekoua ken yetoskiaj tla ompa tlapaleuiskia uan ompa chantiskia. Nochipa omokuayejyekouaya tlen ueliskia kichiuas para ompa yetos. Sapanoua oyolpakik ijkuak okiluijkej uelis tlapaleuiti ompa Betel.
Tla timouikaj iuan akinmej kitekichiuiliaj toTajtsin Dios, uelis techpaleuiskej noijki ijkon ma tikchiuakan. Jayson tlen kipia 30 xiuitl, kijtoua ijkuak okatka telpochtli amo oyolpakiaya ijkuak otetlapouiaya, pero ijkuak ayakmo oyajki escuela san niman omochi precursor uan oyolpakiaya porque okachi opejki tetlapouia. ¿Tlen okipaleui ma mochiua precursor? Ye okijto: “Onechpaleui nimotlapouis iuan tokniuan tlen okatka precursores uan noijki inmiuan onitetlapouiaya”.
Xikijkuilo tlen tikneki tikchiuas
Ijkuak timokuayejyekouaj itlaj tlen amo tikajsikamatij uelis tikajsikamatiskej tla tikinmiluiaj oksekimej tlen timokuayejyekouaj. Salomón okijto ijkuak technojnotsaj ixtlamatkej, yetoskia ken techyekanaj ika se tlakotl yakauitstik porque techpaleuiaj ma tikchiuakan tlen kuali (Eclesiastés 12:11). Ijkuak tikijkuilouaj tlen timokuayejyekouaj, melauak ajsi itech toyolo uan nochipa tikilnamiktokej. Ik non, Jehová okinnauati tekiuajkej ma kichiuakan se copia itech tlanauatil (Deuteronomio 17:18). Uelis tikijkuiloskej tlen tiknekij tikchiuaskej para okachi tiktekichiuiliskej Jehová uan ken uelis tikchiuaskej, noijki ma tikijkuilokan tlen tlamantli uelis panos uan ken tikixnamikiskej. Ma timokuayejyekokan akinmej uelis techpaleuiskej, tlen tlamantli timomachtiskej uan tlen uelis tikchiuaskej.
Tokni Geoffrey okimatiaya tlen okinekiaya kichiuas para okachi kitekichiuilis Jehová, ye okatka precursor uan miak xiuitl otlapaleui itech se altepetl tlen kajki Asia. Satepan oixpoliuik isiua uan tokni sapanoua omoyolkoko pero opejki mokuayejyekoua tlen tlamantli uelis kichiuas para ok yetos precursor. Tokni okijkuilo tlen okinekiaya kichiuas uan okitlatlaujti Jehová, noijki okijto itech se metstli kintemoskia eyi akinmej uelis kinmachtis ika Biblia. Nochipa okitaya tlen okichiuaya itech se tonal uan ijkuak opanouaya majtlaktli tonal okitaya kox okichijtoka tlen okijto. ¿Okichi tlen okinekiaya? Ye okijto ijkon okichi uan amo san eyi opejki kinmachtia, opejki kinmachtia naui itech se metstli.
Tlamantli tlen amo okachi oui tikchiuaskej
Ualeua timokuayejyekouaj oui tikchiuaskej tlen tiknekij. Tony tlen itech yotimotlapouijkej itech okse párrafo, okijtouaya amo keman uelis tlapaleuiskia itech Betel porque yiuejkika okichiuaya tlen amo kuali uan ayamo omoapolaktiaya. Pero satepan opejki kichiua tlen Jehová kipaktia uan omochijchika para uelis moapolaktis. Ijkuak omoapolakti okijkuilo itech se calendario keman mochiuaskia precursor auxiliar uan precursor regular. Satepan opejki mokuayejyekoua uelis tlapaleuiti ompa Betel porque yokatka precursor.
Tejuan noijki uelis tikijkuiloskej seki tlamantli tlen amo okachi oui tikchiuaskej, ijkon satepan uelis tikchiuaskej okseki tlamantli para okachi tiktekichiuiliskej Jehová. Noijki techpaleuis tla nochipa tikitaj kox melauak tikchijtokej tlen otikijtojkej, ijkon okachi timochijchikauaskej. Tla nochipa tiktlatlaujtiaj Jehová, techpaleuis para ma tikchiuakan tlen yotikijtojkej. Apóstol Pablo otechnauati: “Ixmostla ximotiotsajtsilijtokah” (1 Tesalonicenses 5:17).
Ma timokuayejyekokan uan san niman ma tikchiuakan
Ualeua maski timochijchikauaj okachi tiktekichiuiliskej Jehová, itlaj panoua uan ayakmo ijkon tikchiuaj. Ximokuayejyeko ken omomachili Juan Marcos ijkuak apóstol Pablo amo okiuikak ijkuak okintlajpaloto oksekimej tlanechikolmej (Hechos 15:37-40). Marcos amo omoyolkoko uan okitak tlen uelis kichiuaskia para okachi kitekichiuiliskia Jehová. Satepan Pablo okijto Marcos okachi okitekichiuili Jehová uan oyolpakik porque iuan okatka apóstol Pedro ompa Babilonia (2 Timoteo 4:11; 1 Pedro 5:13). Jehová okiyekanki Marcos ika iespíritu santo para ma kijkuilo tlen okichi Jesús uan ken otetlapoui ijkuak okatka nikan tlaltikpak.
Xamo amo nochipa ueli okachi tiktekichiuiliaj Jehová ijkon ken tikneki. Pero amo ma timosotlauakan uan ma tikilnamikikan ken yotiktekichiuilijkej Jehová. Noijki oksepa ma timokuayejyekokan tlen tiknekij tikchiuaskej uan san niman ijkon ma tikchiuakan. Ijkuak itlaj tikitaj oui tikchiuaskej, amo ma timosotlauakan uan ma timochijchikauakan para titlaxikoskej. Tekiua Salomón okijto: “Xiktlali imak Jehová tlen tikchiuas uan nochi kuali kisas” (Proverbios 16:3).
Maski tiknekij okachi tiktekichiuiliskej Jehová ualeua amo ueli. Ualeua tiknekiskiaj tikchiuaskej miak tlamantli, pero amo ueli porque timokokouaj noso moneki tikmaluiskej se tofamiliar. Maski tichantiskej iluikak noso tlaltikpak, ma tikilnamiktokan uelis tichantiskej nochipa, porque toTajtsin Dios techteochiuas (Lucas 23:43; Filipenses 3:13, 14). Apóstol Juan okijto: “Akin kichiwah tlan Dios kineki nochipa yolitos”. Tla ijkon tikchiuaj, uelis nochipa tiyoltoskej (1 Juan 2:17). Maski amo uelis tikchiuaskej nochi tlen tiknekiskiaj, nochipa uelis ‘tiktlakaitaskej akin melauak toTajtsin Dios uan tikintlakamatiskej itlanauatiluan’ (Eclesiastés 12:13). Ijkuak okachi tiktekichiuiliaj Jehová, techpaleuia para amo ma tikilkauakan tlen moneki tikchiuaskej. Ik non, okachi ma tiktekichiuilikan uan ijkon tikueyichiuaskej.
[Recuadro]
Seki tlamantli tlen uelis tikchiuaskej
○ Nochipa ma tiktlajtoltikan Biblia
○ Ma tiktlajtoltikan revistas Akin Tetlapouijtok uan ¡Ma titlachixtokan!
○ Kuali ma timokuayejyekokan tlen tikijtoskej ijkuak timotlatlaujtiaj
○ Ma tikpiakan toyelis ken kineki toTajtsin Dios
○ Okachi ma titetlapouikan
○ Ma tikitakan ken uelis okachi kuali titetlapouiskej uan titlamachtiskej
○ Ma timomachtikan ken uelis titetlapouiskej ika teléfono, kanin tlanemakaj noso itech ojtli