Mitspaleuis tikmatis tlen opanok Edén
Sekimej ixtlamatkej kijtouaj Biblia amo okachi tlajtoua itech xochitlali Edén. Se ixtlamatki tlen itoka Paul Morris uan kita tlen tlamachtiaj religiones, okijto: “San itech Génesis tlajtoua tlen opanok itech xochitlali Edén”. Miakej ixtlamatkej noijki ijkon mokuayejyekouaj, pero non amo melauak.
Itech nochi Biblia techiluia tlen opanok itech xochitlali Edén, tlen okichijkej Adán, Eva uan kouatl.a Tlen kijtouaj ixtlamatkej amo okachi tlajtlakoli, okachi tlajtlakoli tlen tlamachtiaj teopixkej uan oksekimej ixtlamatkej, yejuan kijtoua amo melauak okatka xochitlali Edén. ¿Tleka? Porque ijkon kijtouaj amo melauak tlen tlamachtia Biblia.
Moneki kuali tikajsikamatiskej tlen opanok itech xochitlali Edén para tikmatiskej tlen kijtoua Biblia. Axkan timomachtiskej seki tlamantli miak ipati tlen Biblia technankilia uan para tikajsikamatiskej moneki tikitaskej tlen opanok itech xochitlali Edén.
● ¿Tleka tikokoxkatij uan tiixpoliuij? Tla Adán uan Eva kitlakamatiskiaj Jehová, nochipa yoltoskiaj. Pero otlajtlakolchijkej ijkuak amo okitlakamatkej toTajtsin Dios uan satepan oixpolikej (Génesis 2:16, 17; 3:19). Yejuan otechpanoltilijkej tlajtlakoli, ik non, tinochtin titlajtlakolejkej. Biblia kijtoua: “Por itlajtlakol se tlakatl n tlajtlákoli okalak itech nin tlaltíkpaktli iwa okualík mikílistli, ijkó noiwa nochteh mikkih porke nochteh otlajtlakolchijkeh” (Romanos 5:12).
● ¿Tleka toTajtsin Dios kitekauilia mapano tlen amo kuali? Itech xochitlali Edén, Satanás okijto Jehová san tlakajkayaua uan amo kineki mayolpakikan itekipanojkauan (Génesis 3:3-5). Okijto Jehová amo kuali tlanauatia. Adán uan Eva okineltokilijkej Diablo uan amo okitlakamatkej Jehová, ijkon okiteititijkej san yejuan okinekiayaj kipejpenaskiaj tlen kuali uan tlen amo kuali. ¿Tlen okichi Jehová? Ye sapanoua ixtlamatki uan nochipa kichiua tlen kuali, ik non, okinkauili tlakamej san inselti mamonauatikan seki xiuitl. Axkan panotok miak tlamantli amo kuali porque Satanás tlanauatijtok, nin kiteititia amo uelis san tejuan timonauatiskej (Jeremías 10:23).
● ¿Tleka toTajtsin Dios okichijchi tlaltikpak? ToTajtsin Dios okinekiaya nochi tlaltikpak mayeto kuajkualtsin ken xochitlali Edén. Ye okinnauati mamomiaktilikan, makimaluikan tlaltikpak uan makikopakan nochi tlaltikpak ken xochitlali Edén (Génesis 1:28). Totajtsin Dios kineki tlaltikpak mamokopa xochitlali, noijki ompa machantikan uan mayolpakikan nochtin ixuiuan Adán uan Eva. Biblia kijtoua ken mochiuas tlen kineki toTajtsin Dios.
● ¿Tleka ouala Jesús tlaltikpak? Ijkuak Adán uan Eva otlajtlakolchijkej itech xochitlali Edén okinpanoltilijkej ixuiuan tlajtlakoli, ik non, ixpoliuij. ToTajtsin Dios sapanoua techtlasojtla, ik non, okiualtitlanki iKone para matechmakixti (Mateo 20:28). ¿Ken techmakixtia? Jesús nochipa okitlakamatki Jehová, Biblia kijtoua ye “sa iksemi Adán” uan amo otlajtlakolchi. Otechmakixti ijkuak okitemakak iyolilis topatka. Tlen okichi kinpaleuiaj akinmej yolkualmej porque otechmakixtiko itech tlajtlakoli, techtlapojpoluia uan kichiuas satepan matiyoltokan nochipa (1 Corintios 15:22, 45; Juan 3:16). Jesús ouala tlaltikpak para uelis mochiuaskia tlen toTajtsin Dios okinekiaya.b
Uelis tikmatiskej tlen kineki toTajtsin Dios kichiuas ipan tlaltikpak porque ye nochi techyekiluia uan amo itlaj kitlatia. Amo oui tikajsikamatiskej tlen techiluia. Ijkon ken xochitlali Edén, yolkamej uan achto tlakatl melauak okatkaj noijki tlen kijtoua toTajtsin Dios melauak mochiuas. ¿Tlen moneki tikchiuaskej para tikitaskej? Moneki timochijchikauaskej. ToTajtsin Dios kineki nochtin mamomakixtikan, hasta akinmej ayamo kitekichiuiliaj (1 Timoteo 2:3, 4). ¿Ken tikmatij?
Achto mikiskia Jesús okitlapoui se tlakatl tlen noijki kimiktiskiaj, non tlakatl okichi miak tlamantli amo kuali pero omoyolkopki uan okilui Jesús makitlapojpolui uan makipaleui. Jesús okinankili: “Tiyetos nouan itech xochitlali” (Lucas 23:43, TNM). Jesús okinekiaya nin tlakatl tlen okichiuaya tlamantli tlen amo kuali mamomakixti uan mayeto itech xochitlali. ¿Kineki tejuan noijki ompa matiyetokan? Kema, Jehová kineki matiyetokan itech xochitlali. Tla tikneki ompa tiyetos, ximomachti tlen kijtoua Biblia uan tlen kineki Jehová.
[Notas]
a Tla tikneki okachi tikmatis xiktlajtolti Génesis 13:10; Deuteronomio 32:8; 2 Samuel 7:14; 1 Crónicas 1:1; Isaías 51:3; Ezequiel 28:13; 31:8, 9; Lucas 3:38; Romanos 5:12-14; 1 Corintios 15:22, 45; 2 Corintios 11:3; 1 Timoteo 2:13, 14; Judas 14 uan Apocalipsis 12:9.
b Tla tikneki tikmatis okachi xiktlajtolti tlamachtil 5 tlen kipia amochtli ¿Tlen melauak tlamachtia Biblia?, tlen kichijchiuaj iTlaixpantijkauan Jehová
[Recuadro uan foto]
ACHTO PROFECÍA TECHILUIA TLEN KIJTOUA BIBLIA
“Nikchiuas ximokualankaita te [kouatl] iuan siuatl. Uan mokualankaitaskej mokoneuan iuan ikoneuan ye. Ye kixajxamanis motsonteko uan te tikkokos ikxi” (Génesis 3:15).
Nin achto profecía tlen tikajsij itech Biblia, okijto toTajtsin Dios itech xochitlali Edén. Pero ¿akin siuatl, kouatl uan inkoneuan? ¿Tleka mokualaniaj?
KOUATL
Satanás (Apocalipsis 12:9).
SIUATL
Ialtepe Jehová tlen kajki iluikak (Gálatas 4:26, 27). Isaías okijto nin siuatl kipiaskia ikoneuan ompa iluikak (Isaías 54:1; 66:8).
IKONEUAN KOUATL
Akinmej kichiuaj tlen Satanás kineki (Juan 8:44).
IKONEUAN SIUATL
Jesucristo ouala itech ialtepe Jehová tlen kajki iluikak. Noijki ompa pouij ikniuan Jesucristo tlen toTajtsin Dios okinpejpenki matlanauatikan iuan Jesús ompa iluikak uan ijkon nochtin yetoskej “iaxkawah Dios” (Gálatas 3:16, 29; 6:16; Génesis 22:18).
TIKKOKOS IKXI
Satanás okichi makimiktikan Jesús ijkuak okatka tlaltikpak. Tlen opanok teyolkoko pero oksepa okiyoliti Jehová.
KIXAJXAMANIS MOTSONTEKO
Jesús kixajxamanis itsonteko Satanás ijkuak kixpolos. Pero achto tlayektlalis ipan tlaltikpak, kiyektlalis nochi tlen Diablo okijtlako itech xochitlali Edén (1 Juan 3:8; Apocalipsis 20:10).
Itech amatlajkuilol Biblia ¿tlen techiluia?, tlen kichijchiuaj iTlaixpantijkauan Jehová, kiyekijtoua tlen kijtoua Biblia.
[Foto]
Adán uan Eva otlajyouijkej porque otlajtlakolchijkej