Ma tikueyichiuakan Jehová ika tlen tikpejpenaj
“Akin ixtlamatki mokuayejyekoua itech sejse tlamantli tlen kichiua” (PROV. 14:15).
1, 2. (a) ¿Tlen moneki tikilnamiktoskej ijkuak itlaj tikpejpenaj? (b) ¿Tlen timomachtiskej?
TINOCHTIN nochipa tikpejpenaj tlen tikchiuaskej, seki tlamantli amo okachi oui pero okseki uelis kipatlas tonemilis. Ik non, nochipa ijkuak itlaj tikpejpenaskej moneki ma kiyolpakti toTajtsin Dios (xiktlajtolti 1 Corintios 10:31).
2 ¿Tikita oui tikpejpenas tlen tikchiuas? Tla tiknekij tikpejpenaskej tlen kiyolpaktis toTajtsin Dios, moneki tikmatiskej tlen kuali uan tlen amo kuali. Ijkon tikpejpenaskej tlen tejuan timokuayejyekouaj kuali uan amo tlen oksekimej techiluiskej (Rom. 12:1, 2; Heb. 5:14). ¿Tlen techpaleuis ma tikpejpenakan tlen kuali? ¿Tleka ualeua oui tikitaj itlaj tikpejpenaskej? ¿Ken tikyolpaktiskej Jehová ika tlen tikpejpenaj?
¿TLEKA MONEKI TIKPEJPENASKEJ TLEN TIKCHIUASKEJ?
3. Ijkuak itlaj tikpejpenaskej, ¿tlen amo moneki tikchiuaskej?
3 Moneki tikchiuaskej tlen technauatia Biblia. Porque tla amo ijkon tikchiuaj, akinmej inmiuan timomachtiaj uan titekipanouaj mokuayejyekoskej amo melauak tikneltokaj tlen timomachtiaj uan san tikchiuaj tlen oksekimej techiluiaj. Xamo yejuan tlakajkayauaj, tlachtekij uan techiluiskej tejuan noijki ijkon ma tikchiuakan noso amikaj ma tikiluikan tlen okichijkej. Pero tla ijkon tikchiuaskej, san tikchijtoskej tlen oksekimej kinekij (Éx. 23:2). Akin kineki kiyolpaktis toTajtsin Dios nochipa kichiua tlen kijtoua Biblia uan amo itlaj kichiua san para oksekimej ma kiselikan (Rom. 13:5).
4. ¿Tleka ualeua sekimej techiluiaj tlen moneki tikchiuaskej?
4 Ualeua toyolikniuan uan tofamilia techiluiaj tlen moneki tikchiuaskej porque kinekij techpaleuiskej. Maski ayakmo tikatej tokalijtik, tofamilia kinekis techpaleuis ika tlen tikpejpenaskej uan ijkuak ijkon panoua xamo techiluiaj tlen yejuan mokuayejyekouaj. Ximokuayejyeko tikneki timopajtis, Biblia kijtoua amo moneki tikmotlaliliskej estli (Hech. 15:28, 29). Pero okseki tlamantli Biblia amo techiluia kox tikmotlaliliskej, ik non, sejse moneki tikpejpenaskej kox tikseliskej noso amo.a Xamo itech seki tlamantli tofamiliares kinekiskej itlaj ma tikchiuakan pero moneki tikilnamiktoskej tla yotimoapolaktijkej, moneki tejuan tikpejpenaskej tlen tikchiuaskej (Gál. 6:4, 5). Ijkuak itlaj tikpejpenaskej moneki tikitaskej kox techpaleuia kuali ma timouikakan iuan toTajtsin Dios, ma tikilnamiktokan amo tikchiuaj para tikinyolpaktiskej oksekimej (1 Tim. 1:5).
5. ¿Tlen techpaleuis nochipa ma titlaneltokakan?
5 Amo techpaleuis tla tikpapatlaj tlen otikijtojkej tikchiuaskej. ¿Tleka? Porque Santiago okijto: “Akin kiwilita kipapatlatos itlayejyekolis, amayik kichiwas tlan kimolia kichiwas” (Sant. 1:8). Akin kichiua tlen oksekimej kiluiaj, san kipapatla tlen kineki kichiuas ijkon ken se barco ijkuak amo kipia tlen ika kiuikaskej uan ejekatl kiuika ik kanin kineki. Nin amo kipaleuis nochipa ma kitekichiuili Jehová uan ijkuak kipanoua tlen amo kuali kintlajtlakoltia oksekimej (1 Tim. 1:19). ¿Tlen tikchiuaskej para amo ijkon ma techpano? Moneki titlaneltokaskej (xiktlajtolti Colosenses 2:6, 7). Para timoyektlakxilijtoskej moneki tikteititiskej ika tlen tikpejpenaj tikneltokaj iTlajtol toTajtsin Dios (2 Tim. 3:14-17). Ualeua xamo tikitaskej oui tikpejpenaskej tlen tikchiuaskej. ¿Tleka?
¿TLEKA UALEUA OUI TIKPEJPENASKEJ TLEN TIKCHIUASKEJ?
6. ¿Tlen techpanos tla timomojtiaj?
6 Xamo ualeua tikitaj oui porque amo tiknekij timotlapololtiskej noso ma techpinauikan. Nochtin uelis ijkon techpanos porque tlen tikpejpenaj tikchiaj ma techpaleui. Tla tiktlasojtlaj toTajtsin Dios uan iTlajtol, amo timomojtiskej ijkuak itlaj tikpejpenaskej. Non techpaleuis ma tikitakan tlen kijtoua Biblia uan amatlajkuilolmej achto itlaj tikpejpenaskej, tla ijkon tikchiuaj techpaleuis amo ma timotlapololtikan. Biblia kichiua “akin amo ixtlamatki ma kimati tlen kichiuas uan telpochtli mayeto ixtlamatki uan kuali mamokuayejyeko” (Prov. 1:4).
7. ¿Tlen techmachtia tlen okipanok David?
7 ¿Kijtosneki amo keman timotlapololtiskej? Amo, porque nochtin timotlapololtiaj (Rom. 3:23). David okatka ixtlamatki uan okichiuaya tlen toTajtsin Dios okinekiaya pero noijki omotlapololti uan tlen okichi okitlajyouilti ye uan oksekimej (2 Sam. 12:9-12). Maski ijkon okipanok ok omochijchika nochipa okipejpenki tlen kiyolpaktis toTajtsin Dios (1 Rey. 15:4, 5). Ijkon ken okipanok David, moneki tikilnamiktoskej Jehová techtlapojpoluia uan nochipa kinpaleuis akinmej kitlasojtlaj uan kitlakamatij. Nin techpaleuis amo ma tikilnamiktokan tlen amo kuali otikchijkej (Sal. 51:1-4, 7-10).
8. ¿Tlen techmachtia tlen okijto Pablo?
8 ¿Tlen techpaleuis amo sapanoua ma timotekipachokan ijkuak itlaj tikpejpenaskej? Ma tikilnamiktokan amo san se tlamantli uelis tikchiuaskej. Ma tikitakan tlen omokuayejyekouaya Pablo ijkuak okintlapoui akinmej ayamo omonamiktiayaj. Ye okijkuilo: “Pero tla ikaj mokuayejyekoua kichijtok tlen amo kuali porque kajki iselti, tla yikipia xiuitl, ijkin moneki kichiuas: makichiua tlen kineki; amo tlajtlakolchiua. Mamonamiktikan. Pero tla ikaj yokijto itech iyolo uan kita amo kineki monamiktis, kuali monauatia uan yokijto itech iyolo iselti yetos, kuali tlen kichiuas” (1 Cor. 7:36-38). Pablo okijto kuali yetoskia tla ikaj amo monamiktia pero noijki okijto oksekimej kipejpenaskiaj monamiktiskiaj, ik non, maski san tlen kipejpenaskiaj amo tlajtlakolchiuaskiaj.
9. ¿Moneki techtekipachos tlen oksekimej mokuayejyekouaj? Xikyekijto.
9 Kema pero amo nochipa. Ma tikitakan tlen okijto Pablo ijkuak okintlapoui kox uelis kikuaskiaj itlaj tlen yokinmanilijkaj ídolos. Achto okinmilui tlen kipejpenaskiaj, maski amo tlajtlakoli, uelis kichiuaskia amo kuali ma momachilikan oksekimej. ¿Tlen okichi Pablo? Ye okijto: “Tla niktlajtlakolchiwaltia se nokni ika tlan nikkua, ayik nikkuas non nakatl, para amo maniktlajtlakolchiwalti nokni” (1 Cor. 8:4-13). Tejuan noijki moneki tikitaskej kox kinpaleuis oksekimej tlen tikpejpenaj uan moneki tikitaskej kox techpaleuis kuali ma timouikakan iuan Jehová (xiktlajtolti Romanos 14:1-4). ¿Tlen techpaleuis ma tikpejpenakan tlen kiyolpaktis toTajtsin Dios?
Chikuase tlamantli tlen techpaleuis
10, 11. (a) ¿Tlen techpaleuis ma tikpejpenakan san tlen technamiki itech tofamilia? (b) ¿Tlen moneki kilnamiktoskej tlayekankej ijkuak itlaj kipejpenaskej?
10 Ma tikpejpenakan san tlen technamiki. Achto itlaj tikpejpenaskej moneki ma timotlajtlanikan: “¿Ne moneki nikpejpenas tlen tikchiuaskej?”. Tekiua Salomón okijto: “Ijkuak ikaj peua moueyineki, satepan kipinatiskej, pero ixtlamatilistli kajki iuan akinmej yolyamankej” (Prov. 11:2).
11 Xamo tetajmej kinkauiliaj inkoneuan ma kipejpenakan tlen kichiuaskej pero amo kijtosneki konemej kichiuaskej san tlen yejuan kinekij (Col. 3:20). Maski siuatl noijki uelis kiyekanas ifamilia, amo moneki kilkauas inamik kinamiki kipejpenas tlen kichiuaskej (Prov. 1:8; 31:10-18; Efes. 5:23). Tlakatl noijki moneki kilnamiktos amo san ineuian monauatia, moneki kitlakamatis Cristo (1 Cor. 11:3) Kanin timonechikouaj tlayekankej kipejpenaj tlen tikchiuaskej. Ik non, moneki momaluiskej para “amaka makixpanawi itlajkuilol Dios” (1 Cor. 4:6). Noijki moneki kichiuaskej tlen kinmiluia tlakeuali yolmelajki (Mat. 24:45-47). Tla amo tiknekij titlajyouiskej tejuan uan oksekimej, moneki tikpejpenaskej tlen tikchiuaskej san ijkuak technamiki.
12. (a) ¿Tleka moneki kuali tikitas tlen tikchiuas? (b) ¿Tlen moneki tikajsikamatis achto itlaj tikpejpenas?
12 Kuali ma tikitakan tlen tikchiuaskej. Salomón okijto: “Kuali kisas tlen kichiua akin kipaktia tekipanos pero amitlaj kipias akin san niman itlaj kichijtikisa” (Prov. 21:5). Ma tikijtokan ikaj mitsiluia iuan xitlanemaka. Maski tiyolpaktok amo san niman xikilui iuan titlanemakas. Achto kuali xikita, xikintlajtlani akinmej ijkon kichiuaj uan xiktemo principios bíblicos tlen mitspaleuiskej (Prov. 20:18). Satepan xikijkuilo tlen tiktlanis uan tlen tikpolos, xikilnamiki akin ixtlamatki achto kuali mokuayejyekoua tlen kichiuas (Luc. 14:28). Xikita ika tlen tikpejpenas tikchiuas, kech tiktlanis uan kox mitspaleuis ximouika iuan Jehová. Xamo oui para tikmatis nochi nin tlamantli pero mitspaleuis kuali xikpejpena tlen tikchiuas uan amo san timotlajyouiltis.
13. (a) ¿Tlen techiluia Santiago 1:5? (b) ¿Tleka miak ipati ma tikiluikan toTajtsin Dios matechpaleui?
13 Ma tiktlajtlanikan ixtlamatilistli. Para tikyolpaktiskej toTajtsin Dios ijkuak itlaj tikpejpenaskej, moneki tikiluiskej ma techpaleui. Santiago okijto: “Tla seme de nomejwah amo kipia ixtlamatílistli, makitlajtlanili Dios. Ye nomechmakas miak ixtlamatílistli iwa amo nomechixtokilis” (Sant. 1:5). Amo ma tipinauakan tikiluiskej toTajtsin Dios matechpaleui para itlaj kuali tikpejpenaskej (Prov. 3:5, 6). Tla san tejuan tikpejpenaj tlen tikchiuaskej xamo amo kuali kisas. Pero tla tiktlatlaujtiaj Jehová uan timomachtiaj Biblia, espíritu santo techpaleuis ma tikmatikan tlen moneki tikpejpenaskej uan tleka (Heb. 4:12; xiktlajtolti Santiago 1:22-25).
14. ¿Tleka amo moneki tiuejkauaskej ijkuak itlaj tikchiuaskej?
14 Amo ma tiuejkauakan ijkuak itlaj tikpejpena tikchiuaskej. Achto itlaj tikchiuaskej moneki timomachtiskej uan tikiluiskej toTajtsin Dios ma techpaleui. Porque “Akin ixtlamatki mokuayejyekoua itech sejse tlamantli tlen kichiua” (Prov. 14:15). Pero amo ma tiuejkauakan, porque uelis techpanos ken akin amo kimati tlen kichiuas uan peuas tikijtoskej miak tlamantli para amo tikchiuaskej tlen otikijtojkej (Prov. 22:13). Tla ijkon tikchiuaj, tikteititiskej tikinkauiliaj oksekimej ma kijtokan tlen tikchiuaskej.
15, 16. ¿Tlen moneki tikchiuaskej ijkuak itlaj tikpejpenaj?
15 Ma tikchiuakan tlen otikijtojkej tikchiuaskej. Amo ipati tla yotikijtojkej tlen tikchiuaskej uan amo tikchiuaj. Salomón okijto: “Nochi tlen uelis tikchiuas, xikchiua ika mochikaualis” (Ecl. 9:10). Ma tikchiuakan nochi tlen moneki para kuali ma kisa tlen otikpejpenkej. Tla se publicador kineki mochiuas precursor, moneki kitas tlen tlamantli okachi ipati para ijkon uelis kichiuas tlen okipejpenki.
16 Ualeua tikmachilia oui tikchiuaskej tlen okachi ipati, ijkon panoua porque nikan tlanauatijtok Satanás (1 Juan 5:19). Tinochtin “timotekilmakatokeh [...] iwan espíritus amokualteh non nemih tlakpak, iwa kipiah weletílistli. Yejwah kinnawatijokeh akimeh kichijtinemih tlan amokuali ken nemih itech tleyuálistli” (Efes. 6:12). Ik non, akinmej kinekij kitlakamatiskej Jehová, kixnamikiskej miak tlamantli ijkon ken okijtojkej apóstol Pablo uan Judas (1 Tim. 6:12; Jud. 3).
17. ¿Tlen kineki Jehová ma tikchiuakan ika tlen yotikpejpenkej?
17 Ma tikitakan tlen otikpejpenkej uan tlen moneki tikyektlaliskej. Ualeua amo nochi kisa ken otikijtojkej porque “tinochtin titlajyouiaj uan uelis itlaj amo kuali techpanotikisa” (Ecl. 9:11). Jehová kichia seki tlamantli tlen otikpejpenkej, ma tikchijtokan maski san tlen panos. Ken ijkuak otikpejpenkej timonamiktiskej uan ijkuak otikijtojkej tiktekichiuiliskej Jehová (xiktlajtolti Salmo 15:1, 2, 4). Xamo okseki tlamantli tlen otikpejpenkej amo okachi inpati pero tiyetoskej tiixtlamatkej tla tikilnamiktoskej tlen moneki tikchiuaskej uan kox itlaj moneki tikpatlaskej (Prov. 16:18). Moneki tikilnamiktoskej okachi ipati ma tiktlakamatikan Jehová.
Ma tikinpaleuikan oksekimej kuali ma kipejpenakan tlen kichiuaskej
18. ¿Tlen uelis kichiuaskej tetajmej para kinmachtiskej inkoneuan kuali ma kipejpenakan tlen kichiuaskej?
18 Tetajmej uelis kinpaleuiskej inkoneuan ma kimatikan tlen kichiuaskej uan ijkon kitlakamatiskej Jehová uan kinpaleuis tla kitaj intatajuan ijkon kichiuaj (Luc. 6:40). Uelis kinmiluiskej inkoneuan tlen okichijkej yejuan achto kipejpenaskiaj seki tlamantli. Xamo kinkauiliskej ma kijtokan ken kichiuaskej seki tlamantli uan tla kichiuaj tlen kuali moneki kinmiluiskej kuali tlen okichijkej. Pero tla kichiuaj tlen amo kuali, xamo san niman kinekiskej kinpaleuiskej para amo ma tlajyouikan. Ma tikijtokan se teta kikauilia itelpoch ma kiuika se carro pero nin telpochtli amo kiuika ken moneki uan kiluiaj moneki kitlaxtlauas seki tomin, xamo teta uelis kipaleuis pero okachi kuali kichiuas tla kiluia itelpoch ye ma tekipano para kitlaxtlauas. Ijkon kipaleuis ma kita amo kuali tlen okichi (Rom. 13:4).
19. ¿Ken moneki tikinpaleuiskej akinmej tikinmachtiaj?
19 Jesús okijto moneki nochtin tikinmachtiskej (Mat. 28:20). Ik non, miak ipati ma tikinpaleuikan akinmej tikinmachtiaj kuali ma kipejpenakan tlen kichiuaskej. Non amo kijtosneki tikinmiluiskej tlen moneki kichiuaskej. Okachi kuali ma tikinpaleuikan ika principios bíblicos ijkuak itlaj kipejpenaskej, porque “tosejselti tikmokuitiskeh inawak Dios nochi tlan otikchijkeh” (Rom. 14:12). Tinochtin moneki timochijchikauaskej kuali ma tikpejpenakan tlen tikchiuaskej uan ijkon tikyolpaktiskej Jehová.
[Nota]
a Tla tikneki okachi tikmatis, xikita tlamachtil “¿Qué opino de las fracciones sanguíneas y de los procedimientos médicos que impliquen el uso de mi sangre?” (Toteki itech Tekiuajkayotl, noviembre 2006, páginas 3 hasta 6).
¿TLEN TITLANANKILISKIA?
• ¿Tleka moneki tikpejpenaskej tlen tikchiuaskej?
• ¿Tlen techpanos tla timomojtiaj uan tlen uelis tikchiuaskej?
• ¿Tlen chikuase tlamantli techpaleuis para ma tikyolpaktikan Jehová ika tlen tikpejpenaj?
[Recuadro uan foto]
Chikuase tlamantli tlen techpaleuis
1 Ma tikpejpenakan san tlen technamiki
2 Kuali ma tikitakan tlen tikchiuaskej
3 Ma tiktlajtlanikan ixtlamatilistli
4 Amo ma tiuejkauakan ijkuak itlaj tikpejpena tikchiuaskej
5 Ma tikchiuakan tlen otikijtojkej tikchiuaskej
6 Ma tikitakan tlen otikpejpenkej uan tlen moneki tikyektlaliskej
[Foto]
Akin kichiua tlen oksekimej kiluiaj, san kipapatla tlen kineki kichiuas ijkon ken se barco ijkuak amo kipia tlen ika kiuikaskej uan ejekatl kiuika ik kanin kineki