MOTLAPOUIAJ ITECH BIBLIA
¿Keman opejki tlanauatia iTekiuajkayo toTajtsin Dios? (Parte 1)
Matikitakan ken ikaj motlapouiskia iuan se iTlaixpantijka Jehová, matimokuayejyekokan se iTlaixpantijka Jehová tlen itoka Julio motlapouijtok iuan se tlakatl tlen itoka Ernesto.
XIKTEMOJTOKAN IXTLAMATILISTLI
Julio: Ernesto, nechpaktia mouan nimotlapouis itech Biblia.a ¿Tikilnamiki otechtlajtlani itlaj itech iTekiuajkayo toTajtsin Dios? Otechilui tikneki tikmatis tleka tiiTlaixpantijkauan Jehová titlamachtiaj nin Tekiuajkayotl opejki tlanauatia itech xiuitl 1914.
Ernesto: Kema, itech se revista tlen onechmakakej okijtouaya iTekiuajkayo toTajtsin Dios opejki tlanauatia itech xiuitl 1914 uan non onechtlajtlachialti. Namejuan nankijtouaj nochi tlen nantlamachtiaj kisa itech Biblia.
Julio: Kema, nochi tlen titlamachtiaj kisa itech Biblia.
Ernesto: Ne yoniktlajtolti nochi Biblia uan amo nikilnamiki kox kijtoua non xiuitl. Ik non, oniktemo “1914” itech se Biblia tlen kajki itech internet uan amitlaj onikajsik.
Julio: Nikneki nimitsiluis ome tlamantli tlen kuali tikchiua. Se, yotiktlajtolti nochi Biblia uan non kiteititia tikpatioita.
Ernesto: Kema, ne sapanoua nikpatioita porque amo onka okse amochtli ken Biblia.
Julio: Ne noijki ijkon nikita. Noijki kuali otikchi porque otiktemo tlen otiknekiaya tikmatis. Otikchi ijkon ken Biblia techiluia: matiktemojtokan ixtlamatilistli.b ¡Kuali tla ijkon tikchiua!
Ernesto: Tlasojkamati Julio, ne nikneki okachi nimomachtis, ik non, okachi oniktemo itech amochtli tlen timomachtijtokej uan itlaj onikajsik itech 1914. Otlajtouaya itech se kuauitl uejkapantik tlen okitsontekej uan satepan oksepa omoskalti.
Julio: Kema, yonikilnamik. Profecía tlen kajki itech amochtli Daniel capítulo 4. Tlajtoua itech tlen okitemik tekiua Nabucodonosor akin otlanauatiaya Babilonia.
Ernesto: Kema, ye non. Miak uelta oniktlajtolti pero amo nikajsikamati ken mouika 1914 iuan iTekiuajkayo toTajtsin Dios.
Julio: Amo ximotekipacho. Profeta Daniel noijki amo nochi okajsikamatiaya.
Ernesto: ¿Melauak?
Julio: Kema. Xikita tlen okijkuilo itech Daniel 12:8: “Ne onikak pero amo onikajsikamatki”.
Ernesto: Amo san ne ijkon nechpanoua, ye noijki amo san niman okajsikamatki.
Julio: ¿Tikmati tleka amo nochi okajsikamatiaya Daniel? Porque toTajtsin Dios ayamo okinekiaya mamomati. Pero non yopanok, axkan uelis tikajsikamatiskej profecías tlen katej itech Biblia.
Ernesto: ¿Melauak?
Julio: Kema itech versículo 9 ijkon techiluia, ompa kijtoua: “Nin tlamantli amikaj moneki kimatis uan moneki tsaktos hasta itlamian tonalmej”. Nin texto kijtoua keman moajsikamatiskia nin profecía uan nochi tlen panotok axkan kiteititia yitikatej itlamian tonalmej. Satepan non tikitaskej itech amochtli tlen timomachtijtokej.c
Ernesto: ¿Uelis techiluis tlen kijtosneki profecía?
Julio: Kema matimomachtikan.
TLEN OKITEMIK NABUCODONOSOR
Julio: Achto matikitakan tlen okitemik Nabucodonosor uan satepan tikitaskej tlen kijtosneki.
Ernesto: Kuali kajki.
Julio: Nabucodonosor okitemik se kuauitl uejkapantik. Noijki okikak iángel toTajtsin Dios okijto makitsontekikan non kuauitl. San okikajkej itlaktson uan ineluayouan. Satepan opanok “chikome tiempos” uan kuauitl oksepa omoskalti.d Nin profecía achto okipanok Nabucodonosor, ye okatka se tekiua sapanoua chikauak ken nin kuauitl uejkapantik. Satepan okitsontekej uan opanok “chikome tiempos”. ¿Tikilnamiki tlen kijtosneki?
Ernesto: Amo nikilnamiki.
Julio: Biblia kijtoua okuatlapolo, ijkon okatka “chikome tiempos”. Ik non, ayakmo otlanauati, maski ijkon okipanok oksepa otlalnamik uan oksepa opejki tlanauatia.e
Ernesto: Kuali, nikajsikamati. Pero tlen axkan timotlapouijtokej, ¿ken mouika iuan iTekiuajkayo toTajtsin Dios uan 1914?
Julio: Nin profecía ome uelta opanok. Achto opanok ijkuak ayakmo okikauilijkej matlanauati Nabucodonosor. Oksepa ijkon opanok ijkuak ayakmo otlanauatijkej tekiuajkej israelitas, yejuan okineskayotiayaj iTekiuajkayo toTajtsin Dios. Tlen okinpanok tekiuajkej israelitas techpaleuia matikajsikamatikan itlaj itech iTekiuajkayo toTajtsin Dios.
Ernesto: ¿Ken tikmati oksepa opanok nin profecía?
Julio: Para tikajsikamatiskej, nin profecía techiluia seki tlamantli tlen panoskia. Daniel 4:17 kijtoua nin profecía okijtojkej para nochtin makimatikan “akin Ueyititok Tlanauatia kanin tlakamej tlanauatiaj uan ye uelis kimakas akin kineki uan maski okachi yolyamanki”. ¿Otikitak kijtoua “kanin tlakamej tlanauatiaj”?
Ernesto: Kema, ompa kijtoua “akin Ueyititok Tlanauatia kanin tlakamej tlanauatiaj”.
Julio: ¿Akin tikijtoskia “Ueyititok”?
Ernesto: Ne nikijtoua toTajtsin Dios.
Julio: Kema. Non kiteititia, profecía amo san kipanoskia Nabucodonosor. Noijki panoskia “kanin tlakamej tlanauatiaj”, nin kijtosneki tekiuajkayotl tlen toTajtsin Dios kitlalis para tlanauatis tlaltikpak. Tla tikintlajtoltiskej okseki textos kanin moijtoua nin profecía, okachi tikajsikamatiskej.
Ernesto: Nikneki okachi nikmatis.
TLEN TECHMACHTIA AMOCHTLI DANIEL
Julio: Amochtli Daniel techiluia miak uelta ken peuas tlanauatis iTekiuajkayo toTajtsin Dios tlen kiyekantos Jesucristo. Matikitakan se tlamantli tlen kijtoua Daniel 2:44. Xiktlajtolti.
Ernesto: Kema, kijtoua: “Ijkuak tlanauatijtoskej nonmej uejueyij tekiuajkej toTajtsin Dios tlen kajki iluikak kitlalis se tekiuajkayotl tlen amo keman kitlajtlamiskej. Nin tekiuajkayotl amo kiuikaskej itech okse altepetl. Kintlajtlamis uan kinmachiuas nochi ninmej tekiuajkayomej uan ye nochipa yetos”.
Julio: Tlasojkamati. ¿Tikijtoskia nin texto techtlapouia itech iTekiuajkayo toTajtsin Dios?
Ernesto: Mmm... Amo nikmati.
Julio: Nin texto kijtoua tekiuajkayotl “nochipa yetos”, nin kijtosneki amikaj kipojpolos. San toTajtsin Dios uelis kichiuas iTekiuajkayo nochipa matlanauati.
Ernesto: Kema.
Julio: Pero matikitakan okse profecía tlen techiluia itech iTekiuajkayo toTajtsin Dios. Kajki itech Daniel 7:13, 14 ompa kijtoua akin yetoskia tekiua. Xikita tlen kijtoua: “Okimakakej tlanauatijkayotl uan ueyitilistli uan tekiuajkayotl para uejueyij altepemej uan nochtin akinmej tlajtouaj nochi tlatlamantli tlajtolmej makitekichiuilikan. Itlanauatijkayo se tlanauatijkayotl tlen amo keman tlamis uan itekiuajkayo amo keman kixpoloskej”. Nikan kijtoua tlen achto yotikitakej.
Ernesto: Kema, kijtoua tlen kipanoskia se tekiuajkayotl.
Julio: Pero amo san se tekiuajkayotl. Texto kijtoua kinnauatia “uejueyij altepemej uan nochtin akinmej tlajtouaj nochi tlatlamantli tlajtolmej”. Nin kijtosneki tlanauatis itech nochi tlaltikpak.
Ernesto: Amo onikmatiaya pero melauak tlen ompa kijtoua.
Julio: Oksepa xikita tlen nika kijtoua: “Itlanauatijkayo se tlanauatijkayotl tlen amo keman tlamis uan itekiuajkayo amo keman kixpoloskej”. ¿Noijki ijkon kijtoua tlen otiktlajtoltijkej itech Daniel 2:44?
Ernesto: Kema, ijkon kijtoua.
Julio: Matikojpauikan tlen yotimomachtijkej. Profecía tlen kajki itech Daniel capítulo 4 techmatiltia “akin Ueyititok Tlanauatia kanin tlakamej tlanauatiaj”. Ompa kijtoua “akin Ueyititok”, ik non, nin profecía amo san omochi itech Nabucodonosor. Noijki itech amochtli Daniel tikinmajsij miakej profecías pero nochtin techmatiltiaj ken peuas tlanauatis iTekiuajkayo toTajtsin Dios tlen kiyekantos Jesucristo. Ik non, tlen tikijtoskia, ¿profecía tlen kajki itech Daniel capítulo 4 techtlapouia itech iTekiuajkayo toTajtsin Dios?
Ernesto: Kema, yonikajsikamatki. Pero amo nikajsikamati ken mouika iuan 1914.
PANOUA CHIKOME TIEMPOS
Julio: Oksepa matikitakan tlen okipanok Nabucodonosor. Otikijtojkej itech profecía kineskayotiaj ika kuauitl uejkapantik. Ijkuak okitekej kuauitl okineskayoti ijkuak ayakmo otlanauati uan opanok chikome tiempos. Nabucodonosor okuatlapolo pero satepan otlalnamik uan oksepa otlanauati. Oksepa ijkon opanok ijkuak ayakmo otlanauatijkej tekiuajkej israelitas, yejuan okineskayotijkej iTekiuajkayo toTajtsin Dios. Ayakmo otlanauatijkej, pero amo porque toTajtsin Dios itlaj amo kuali okichi.
Ernesto: Amo nikajsikamati.
Julio: Yiuejkika ijkuak se tekiua israelita otlanauatiaya, okijtouayaj omotlaliaya itech itrono Jehová.f Porque toTajtsin Dios okinpejpenaya matlanauatikan. Yejuan okineskayotiayaj iTekiuajkayo toTajtsin Dios. Satepan sekimej tekiuajkej okixnamikej uan noijki ijkon okichijkej akinmej okinnauatiayaj. Ik non, toTajtsin Dios okikauili Babilonia makimoaxkati Jerusalén itech xiuitl 607 achto itech xiuitl 1. Itech non xiuitl ayakmo otlanauatijkej tekiuajkej tlen okineskayotiayaj Jehová ompa Jerusalén. Uelis tikijtoskej iTekiuajkayo toTajtsin Dios ayakmo otlanauati. ¿Tikajsikamati?
Ernesto: Kema, nimitskaki.
Julio: Chikome tiempos opejki desde itech xiuitl 607 achto itech xiuitl 1. Ijkuakon ayakmo otlanauatijkej tekiuajkej tlen okineskayotiayaj iTekiuajkayo toTajtsin Dios. Ijkuak opanok chikome tiempos okitlali itech iluikak se yankuik tekiua. Okseki profecías tlen otiktlajtoltijkej itech amochtli Daniel noijki opanok ijkuak otlanki chikome tiempos. Pero ¿keman otlanki chikome tiempos? Ijkon tikmatiskej keman opejki tlanauatia iTekiuajkayo toTajtsin Dios.
Ernesto: ¿Otlanki itech 1914?
Julio: Kema Ernesto, ijkuakon.
Ernesto: Pero ¿ken tikmati?
Julio: Ijkuak Jesús okatka ipan tlaltikpak okijto chikome tiempos ayamo otlamiaya.g Ik non, tikajsikamatij miak xiuitl opanok. Chikome tiempos opejki achto ualaskia Jesús nikan tlaltikpak uan ijkuak oyajki iluikak ayamo otlamiaya. Tla tikilnamiki otimomachtijkej profecías tlen katej itech amochtli Daniel moajsikamatiskiaj hasta “itlamian tonalmej”.h Itlamian xiuitl 1800, akinmej omomachtiayaj Biblia opejkej momachtiaj tlen kijtosneki nin uan okseki profecías. Yolik okajsikamatkej chikome tiempos tlamiskiaj itech xiuitl 1914. Tlen panotok desde ijkuakon, kiteititia itech non xiuitl opejki tlanauatia iTekiuajkayo toTajtsin Dios uan noijki opejki tlen Biblia kitokayotia itlamian tonalmej. Ernesto, axkan miak tlamantli otimomachtijkej uan ualeua oui tikajsikamatiskej.
Ernesto: Miak tlamantli otimomachtijkej. Para kuali nikajsikamatis moneki oksepa nikojpauis.
Julio: Kema, uelis ijkon tikchiuas. Para nikajsikamatis nin profecía miak uelta onikojpaui. Nikchia tlen axkan otimomachtijkej mamitspaleui xikneltoka nochi tlen titlamachtiaj itech iTekiuajkayo toTajtsin Dios kisa itech Biblia.
Ernesto: Kema. Nechtlajtlachialtia porque nochipa nikita namejuan nankineltokaj nochi tlen kijtoua Biblia.
Julio: Nikita tejuatsin noijki tikneki tikneltokas. Ken onimitsilui, axkan miak tlamantli otimomachtijkej uan ualeua oui tikajsikamatiskej, ik non, xamo tikneki itlaj techtlajtlanis. Otimomachtijkej chikome tiempos opejki itech xiuitl 607 achto itech xiuitl 1 uan otikijtojkej mouika iuan iTekiuajkayo toTajtsin Dios. Pero ¿tleka tikijtouaj otlanki itech xiuitl 1914?i
Ernesto: Kema, non tlen oniknekiaya nimitstlajtlanis.
Julio: Biblia mitspaleuis xikmati keski xiuitl kijtosneki chikome tiempos. ¿Tikneki non matimomachtikan ijkuak oksepa niuits?j
Ernesto: Kema, nimitschias.
¿Tikneki tikajsikamatis tlen tlamachtia Biblia? ¿Tikneki tikmatis tlen kineltokaj iTlaixpantijkauan Jehová? Ximotlapoui inmiuan, yejuan mitspaleuiskej xikajsikamati tlen tikneki tikmatis.
a ITlaixpantijkauan Jehová tlamachtiaj Biblia tekalijtik uan amo kitlajtlanij tomin.
b Proverbios 2:3-5.
c Xikita tlamachtil 9 itech amochtli ¿Tlen melauak tlamachtia Biblia?, tlen kichijchiuaj iTlaixpantijkauan Jehová.
d Daniel 4:13-17.
e Daniel 4:20-36.
f 1 Crónicas 29:23.
g Ijkuak Jesús okinmilui idiscípulos tlen panoskia itlamian tonalmej, okijto “kitlajtlaksaskeh n Jerusalén, asta ijkuak Dios kijtos matlami tlan kichijtokeh n tlakah non amo judíojteh”, Jerusalén okineskayotiaya iTekiuajkayo toTajtsin Dios (Lucas 21:24). Ik non, ijkuak Jesús okatka nikan tlaltikpak, iTekiuajkayo toTajtsin Dios ayamo otlanauatijtoka uan ijkon okatka hasta ijkuak opejki tlen moixmati ken itlamian tonalmej.
h Daniel 12:9.
i Xikita okseki tlamachtilmej “Itech xiuitl 1914 omochi miak tlamantli tlen kijtoa Biblia” itech amochtli ¿Tlen melauak tlamachtia Biblia?
j Itech okse revista tlen noijki kipia nin tlamachtil tikitaskej ken techpaleuia Biblia matikmatikan keski xiuitl kijtosneki chikome tiempos.