¿Keman opejki tlanauatia iTekiuajkayo toTajtsin Dios? (Parte 2)

MATIKOJPAUIKAN TLEN OKITEMIK NABUCODONOSOR

Julio: Panolti Ernesto, niyolpaki oksepa nimitsitas. Nechpaktia niuits sejse semana para timomachtiskej Biblia.a ¿Ken tika?

Ernesto: Kuali nika, tlasojkamati.

Julio: ¡Niyolpaki nikmatis! Okse tonal otimomachtijkej tleka tiiTlaixpantijakuan Jehová tikijtouaj iTekiuajkayo toTajtsin Dios opejki tlanauatia itech xiuitl 1914.b Otikitakej Daniel capítulo 4 techiluia itlaj tlen techpaleuia matikajsikamatikan. ¿Tikilnamiki tlen techiluia?

Ernesto: Kema, otikitakej tlen okitemik tekiua Nabucodonosor.

Julio: Kema. Ye okitemik se kuauitl uejkapantik tlen oajsiaya hasta iluikak. Noijki okikak iángel toTajtsin Dios okijto makitsontekikan non kuauitl. San okikajkej itlaktson uan ineluayouan. Satepan opanok “chikome tiempos” uan kuauitl oksepa omoskalti.c Noijki otikitakej nin profecía opanok ome uelta. ¿Tikilnamiki keman achto opanok?

Ernesto: Itlaj tlen okipanok Nabucodonosor, okuatlapolo uan ijkon okatka chikome xiuitl.

Julio: Kema. Okuatlapolo, ik non, ayakmo otlanauati. Oksepa ijkon opanok ijkuak chikome tiempos ayakmo otlanauatijkej tekiuajkej israelitas, yejuan okineskayotiayaj iTekiuajkayo toTajtsin Dios. Nin opejki itech xiuitl 607 achto itech xiuitl 1. Desde ijkuakon ayakmo okatkaj tekiuajkej tlen okineskayotiayaj iTekiuajkayo toTajtsin Dios ipan tlaltikpak. Pero ijkuak tlamiskia chikome tiempos, toTajtsin Dios kitlaliskia se yankuik tekiua ompa iluikak. Nin kijtosneki ijkuak tlamiskia chikome tiempos peuaskia tlanauatis iTekiuajkayo toTajtsin Dios ompa iluikak. Yotikitakej keman opejki chikome tiempos pero axkan timomachtiskej keski xiuitl ouejka, ijkon tikmatiskej keman opejki tlanauatia iTekiuajkayo toTajtsin Dios. ¿Yotikilnamik?

Ernesto: Kema, yonikilnamik tlen otimomachtijkej okse tonal.

Julio: Kuali kajki. Matikitakan keski xiuitl ouejka chikome tiempos. Achto niuits oksepa onikojpaui para amo itlaj nikilkauas. Nimochijchikauas kuali nimitsyekiluis.

Ernesto: Kuali kajki.

OTLANKI CHIKOME TIEMPOS UAN OPEJKI ITLAMIAN TONALMEJ

Julio: Ijkuak profecía omochi itech Nabucodonosor, chikome tiempos ouejka chikome xiuitl. Pero ijkuak oksepa ijkon opanok, itech tekiuajkej tlen okineskayotiayaj iTekiuajkayo toTajtsin Dios, okachi ouejka.

Ernesto: ¿Ken tikmati?

Julio: Chikome tiempos opejki itech xiuitl 607 achto itech xiuitl 1, ijkuak okipojpolojkej Jerusalén. Tla tikpouaj chikome xiuitl, tiajsij itech xiuitl 600 achto itech xiuitl 1 pero ijkuakon amitlaj opanok tlen pouiskia itech iTekiuajkayo toTajtsin Dios. Uan ken yotimomachtijkej, ijkuak Jesús okatka nikan tlaltikpak, maski yopanok miak xiuitl, okijto chikome tiempos ayamo otlamiaya.

Ernesto: Kema, nikilnamiki.

Julio: Ik non, tla chikome tiempos amo ouejka chikome xiuitl, kijtosneki okachi miak xiuitl ouejka.

Ernesto: ¿Okachi ouejka? ¿Keski xiuitl?

Julio: Itech amochtli Apocalipsis, kipia se profecía tlen mouika iuan profecías tlen katej itech amochtli Daniel uan techpaleuis matikmatikan keski xiuitl ouejka chikome tiempos. Itech non profecía kijtoua eyi tiempos uan tlajko kijtosneki 1,260 tonalmej.d Ik non, chikome tiempos kijtosneki 2,520 tonalmej. ¿Tikajsikamati?

Ernesto: Kema, pero ayamo nikajsikamati tleka nankijtouaj iTekiuajkayo toTajtsin Dios opejki tlanauatia 1914.

Julio: Amo ximotekipacho, matimomachtikan. Seki profecías tlen katej itech Biblia kijtoua se tonal kijtosneki se xiuitl.e Tla ijkon tikpouaj chikome tiempos, 2,520 tonalmej yetoskia 2,520 xiuitl. Tla tikpouaj 2,520 xiuitl desde itech xiuitl 607 achto itech xiutl 1, ijkuak opejki chikome tiempos, tiajsij 1914. Ik non, tikijtouaj chikome tiempos otlanki itech non xiuitl uan noijki ijkuakon Jesús opejki tlanauatia itech iTekiuajkayo toTajtsin Dios. Noijki itech xiuitl 1914 opejki mochiua tlen Biblia kijtoua panoskia itlamian tonalmej.

Ernesto: ¿Tlen panotok uan ijkon uelis nikneltokas?

Julio: Itech Mateo 24:7, Jesús okijto tlen panoskia ijkuak peuaskia tlanauatis iluikak, ye okijto: “Se país momakas iwa n ok se, iwa se altepetl momakas iwa n ok se. Yetos apisotl, iwa sentetl tlalolinis”. Jesús okijto yetoskia apistli uan tlaloliniskia. Tlen tikijtoskia, ¿ijkon panotok desde itech non xiuitl?

Ernesto: Kema, ijkon panotok.

Julio: Jesús noijki okijto yetoskia guerras uan itech amochtli Apocalipsis kijtoua yetoskia guerras itech nochi tlaltikpak amo san itech se altepetl.f ¿Tikilnamiki keman opanok Primera Guerra Mundial?

Ernesto: Opanok 1914. Xiuitl tlen namejuan nankijtouaj Jesús opejki tlanauatia itech iTekiuajkayo toTajtsin Dios. Amo keman onimokuayejyeko tleka ijkon opanok.

Julio: Ijkuak tikitaj ken mouika profecía tlen kijtoua chikome tiempos uan tlen kijtoua itech itlamian tonalmej, tikajsikamatij san se tlamantli kijtosneki. TiiTlaixpantijkauan Jehová tikneltokaj itech xiuitl 1914 Jesús opejki tlanauatia itech iTekiuajkayo toTajtsin Dios uan desde ijkuakon yitikatej itlamian tonalmej.g

Ernesto: Oui para nikajsikamatis nochi tlen axkan otimomachtijkej.

Julio: Nimitsajsikamati. Ne noijki yolik onikajsikamatki ijkuak onechmachtijkej nin tlamantli. Pero tlen otimomachtijkej mitspaleuis xikita tleka tiiTlaixpantijkauan Jehová tikneltokaj Jesús opejki tlanauatia itech xiuitl 1914 maski Biblia amo kijtoua non xiuitl. Noijki ika tlen otimomachtijkej otikitak nochi tlen titlamachtiaj kisa itech Biblia.

Ernesto: Kema, nikita nochipa ijkon nankichiuaj. Namejuan nochipa nantlamachtiaj ika Biblia. Ijkuak itlaj nimitstlajtlania amo tinechiluia “ne nikijtoua” noso “ne nikneltoka”. Nochipa tiktekitiltia Biblia. Pero ¿tleka oui tikajsikamatiskej? ¿Tleka toTajtsin Dios amo san okijto Jesús peuaskia tlanauatis itech 1914?

Julio: Kuali tlen titlajtlani Ernesto. Ualeua oui tikajsikamatiskej Biblia. ¿Tleka toTajtsin Dios ijkon okichijchi? ¿Tleka moneki timochijchikauaskej para tikajsikamatiskej? ¿Tikneki non matimomachtikan okse semana?

Ernesto: Kema, nechpaktiskia. Nimitschias.