TLAJTLANILMEJ ITECH BIBLIA
¿Tlen kinekij mokoneuan pampa ma kitlasojtlakan toTajtsin Dios?
Ika nochi tlen onka xikmachti mokone pampa ma kixmati uan ma kitlasojtla toTajtsin Dios
Mokoneuan kitlasojtlaskej Jehová tla kimatij ye onka uan kintlasojtla. Noijki moneki ma kixmatikan (1 Juan 4:8). Se neskayotl, moneki kimatiskej Jehová okichijchi tlakatl, tleka kitekauilia ma titlajyouikan uan tlen kichiuas satepan. (Xiktlajtolti Filipenses 1:9.)
Pampa mokoneuan ma kitlasojtlakan toTajtsin Dios, moneki kitaskej te noijki tikintlasojtla, pampa yejuan kichiuaskej ijkon ken tikchiua. (Xiktlajtolti Deuteronomio 6:5-7 uan Proverbios 22:6.)
¿Tlen uelis tikchiuas pampa mokoneuan ma kitlasojtlakan toTajtsin Dios?
ITlajtol toTajtsin Dios kipia miak chikaualistli (Hebreos 4:12). Ik non, xikinpaleui mokoneuan pampa ma kimatikan tlen tlamachtia Biblia. Pampa kuali tikinmachtis, moneki xikinmachti ken Jesús okinmachti imachtijkauan: xikinchiuili tlajtlanilmej, xikaki tlen mitsiluiaj uan xikinyekilui tlen amo kajsikamatij. (Xiktlajtolti Lucas 24:15-19, 27, 32.)
Noijki inmiuan uelis timomachtis seki tlapoualismej tlen techmachtia Jehová kintlasojtla tlaltikpaktlakamej. Ijkon okachi kuali kixmatiskej akin okichijchi nochi uan okachi kitlasojtlaskej. Itech www.jw.org/ncx tikajsis miak tlapaleuilistli. (Xiktlajtolti 2 Timoteo 3:16.)