TLAJTLANILMEJ ITECH BIBLIA

¿Ken uelis nanyetoskej kuali tetajmej?

Pampa kuali nankinmiskaltiskej nanmokoneuan yejuan kipiaj kitaskej namejuan ken tetajmej nanmotlasojtlaj uan nanmotlakaitaj (Colosenses 3:14, 19). Noijki yejuan kipiaj kimachiliskej namejuan nankintlasojtlaj uan nankinpatioitaj. ToTajtsin Dios otechmakak se kuali neskayotl ijkuak okilui ikone, Jesucristo, sapanoa okitlasojtlaya uan itech oyolpakiaya. (Xiktlajtolti Mateo 3:17.)

Jehová, toTajtsin Dios tlen kajki iluikak, nochipa techkaki uan kimati tlen tikmachiliaj. Tetajmej moneki kichiuaskej ijkon uan kipiaj kinkakiskej inkoneuan (Santiago 1:19). Moneki kimachiliskej tlen yejuan kimachiliaj uan amo kipiaj kualaniskej tla amo kuali tlanankiliaj. (Xiktlajtolti Números 11:11, 15.)

¿Ken uelis nankinpaleuiskej nanmokoneuan pampa ma yetokan yolkualmej?

Tetajmej moneki kuali kinnauatiskej inkoneuan (Efesios 6:1). Pero moneki kichiuaskej ken kichiua Jehová, kinmachtiskej ken tetlakamatiskej uan kinmiluiskej tlen kinpanos tla amo tetlakamatij. Ijkon kiteititiaj kintlasojtlaj (Génesis 3:3). Noijki amo moneki kinchiualtiskej ma tetlakamatikan. Okachi kuali moneki kinmachtiskej tlen tlateochiualismej kiseliskej tla tetlakamatij uan kichiuaj tlen kuali. (Xiktlajtolti Isaías 48:18, 19.)

Ximochijchikaua pampa tikinpaleuis mokoneuan ma kitlasojtlakan toTajtsin Dios. Tla kuali tikchiua, yejuan kichiuaskej tlen kuali, maski amo tiyetos inmiuan. ToTajtsin Dios techmaka se kuali neskayotl, ik non, xikchiua ken ye. (Xiktlajtolti Deuteronomio 6:5-7; Efesios 4:32; 5:1.)