Axkan nechpaktia nikinpaleuis oksekimej

TLEN ONIKCHIUAYA.

Onineski Acul, se altepetsintli tlen kajki itech tepeyo ik oeste ompa Guatemala. Nofamilia kimixmatij ken ixiles, nin tlajtoli poui iuan maya. Nitlajtoua español, pero noijki onimomachti intlajtol notatajuan. Onimoskalti ijkuak itech noaltepe okatka guerra uan ouejka treinta y seis xiuitl. Sapanoua miakej ixiles oixpolikej.

Ijkuak onikpiaya naui xiuitl, nokni tlen okipiaya chikome xiuitl omauiltijtoka ika se granada pero san niman otoponki. Non okichi ayakmo ma nitlachia uan nokni oixpoliuik. Satepan onechtitlankej Guatemala kanin kinpaleuiaj akinmej amo tlachiaj uan ompa onimomachti braille. Akinmej ompa otekipanouayaj amo onechkauiliayaj ma nimotlapoui iuan oksekimej konemej uan noijki konemej amo okinekiayaj nouan mouikaskej. Nochipa onikatka noselti, san onechkauiliayaj ma niktlajpaloti nonantsin ome metstli uan onikchixtoka ma ajsi non tonal para niaskia, nonantsin sapanoua onechtlasojtlaya. Pero ye oixpoliuik ijkuak ne onikpiaya majtlaktli xiuitl, sapanoua onimoyolkoko porque san ye onechtlasojtlaya.

Ijkuak onikpiaya once xiuitl, onimokopki noaltepe uan onichantito iuan notlakpaikni tlen okipiaya ifamilia. Yejuan onechmakakej nochi tlen omonekiaya pero ok onimoyolkokouaya. Ualeua onikiluiaya toTajtsin Dios: “¿Tleka oixpoliuik nonantsin? ¿Tleka ayakmo nitlachia?”. Sekimej onechiluiayaj nochi tlen onechpanotoka toTajtsin Dios ijkon okinekiaya. Ik non, onimokuayejyekouaya toTajtsin Dios amo yolkuali uan amo tetlasojtla. Ualeua onimokuayejyekouaya nimomiktis.

Ken ayakmo onitlachiaya ayakmo onikchiuaya miak tlamantli uan amo kuali onimomachiliaya. Ijkuak onikatka nichokotsin, miak uelta nouan omotekakej maski ne amo oniknekiaya. Amikaj onikilui porque onikmachiliaya amikaj nopatka omotekipachouaya. Amikaj iuan onimouikaya. Sapanoua onimotekipachouaya uan amo onechpaktiaya niyetos iuan oksekimej porque onikmachiliaya itlaj amo kuali nechchiuiliskiaj.

BIBLIA OKIPATLAK NONEMILIS.

Ijkuak onikpiaya 13 xiuitl, se iTlaixpantijka Jehová uan isiua onechtlapouijkej ijkuak onikiski recreo. Akin onechmachtiaya onechiknomatki, ik non, okinmilui ma nechtlapouitij. Yejuan onechiluijkej Biblia kijtoua akinmej amo tlachiaj oksepa tlachiaskej uan akinmej oixpolikej uelis oksepa kinyolitiskej (Isaías 35:5; Juan 5:28, 29). Onechpaktiaya nikinkakis, pero onipinauaya, ik non, amitlaj onikinmiluiaya. Maski amo okachi onikintlapouiaya, yejuan onechajsikamatiayaj uan nochipa oualayaj para nechmachtiskej ika Biblia. Maski omonekiaya nejnemiskej ipan se tepetl kanaj 10 kilómetros (6 millas).

Nokni onechilui yejuan amo okachi okipiayaj tomin pero kuali omoyejyektlaliayaj. Noijki onechtlasojtlayaj porque ualeua itlaj onechtliokoliayaj. Ne onikneltokaya san ijkon kichiuaj akinmej melauak kineltokaj Cristo.

Onimomachtiaya Biblia ika seki amatlajkuilolmej tlen katej ika braille. Onikajsikamatiaya tlen onimomachtiaya pero amo nochi onikneltokaya. Amo onikneltokaya toTajtsin Dios kitekipachoua tlen nechpanoua nion oksekimej onechitayaj ken ye nechita. Onikajsikamatki tleka techpanoua tlen amo kuali, pero amo onikneltokaya ye techtlasojtla.a

Ijkuak onimomachti tlen kijtoua Biblia onikpatlak tlen onimokuayejyekouaya. Onimomachti toTajtsin Dios kiyolkokoua ijkuak techpanoua tlen amo kuali. Ijkuak kintlajyouiltiaj itekipanojkauan, ye kijtoua: “Nikita ken tlajyouia noaltepe [...] ne kuali nikmati ken tlajyouiaj” (Éxodo 3:7). Ijkuak onikajsikamatki Jehová sapanoua techtlasojtla, onikijto nikchiuas tlen ye kineki. Itech xiuitl 1998 onimoapolakti uan onimochi niiTlaixpantijka Jehová.

Opanok kanaj se xiuitl ijkuak onimoapolakti, onia kanin kinmachtiaj akinmej amo tlachiaj ompa altepetl Escuintla. Se tlayekanki okitak okatka oui nimonechikos hasta Acul porque okatka sapanoua uejka, oniaya ik kanin oualayaj tokniuan tlen onechmachtiayaj. Ye okitemo se familia kanin uelis nimokauaskia uan nechpaleuiskiaj ma nimonechiko. Hasta axkan ok nechmaluiaj ken yetoskia nofamilia.

Uelis namechtlapouis ken onechpaleuijkej oksekimej tokniuan. Ne nikneltoka iTlaixpantijkauan Jehová melauak kichiuaj ken Cristo (Juan 13:34, 35).

TLATEOCHIUALISTLI TLEN YONIKSELI.

Ayakmo nikmachilia amitlaj nopati, axkan yinikmati tlen nikchiuas. Amo san nikita tlen amo ueli nikchiua, nimochijchikaua nikinpaleuis oksekimej para ma kixmatikan tlen kijtoua Biblia. Axkan nitlapaleuia ken tlayekanki uan ualeua nechyoleuaj ma nitlamachti itech okseki nechikolmej tlen ik ompa katej. Noijki sapanoua niyolpaki porque ualeua nitlamachtia kanin miakej monechikouaj.

Itech xiuitl 2010 ompa altepetl Salvador onikseli Tlamachtil tlen kiseliaj tlayekankej uan siervos ministeriales (axkan itoka Tlamachtil para ma tetlapouikan Tekiuajkayotl). Ompa onimomachti ken uelis okachi nikinpaleuis tokniuan, noijki onikajsikamatki Jehová sapanoua kintlasojtla uan kinpatioita nochtin akinmej kichiuaj tlen ye kineki.

Jesucristo okijto: “Okachi yolpaki akin itlaj kitemaka uan amo ijkuak itlaj kiselia” (Hechos 20:35, TNM). Axkan niyolpaki uan noijki nechpaktia nikinpaleuis oksekimej.