ITlajtol toTajtsin Dios kipia chikaualistli

1. ¿Tleka tikneltokaj “itlajtol Dios yolitok iwa kipia weletílistli”? (Xikita tlaixkopinal tlen ika peua tlamachtil).

ITLAIXPANTIJKAUAN Jehová tikneltokaj “itlajtol Dios yolitok iwa kipia weletílistli” (Heb. 4:12). Yotikitakej Biblia techpatilia tonemilis uan noijki oksekimej. Ijkuak ayamo okatkaj iTlaixpantijkauan Jehová sekimej otlachtekiayaj, okintekitiltiayaj drogas uan oauilnemiayaj. Sekimej inselti omomachiliayaj maski sapanoa okinmixmatiayaj noso okipiayaj miak tomin (Ecl. 2:3-11). Miakej amo okimatiayaj tlen kichiuaskej pero axkan kipiaj se chialistli porque Biblia okinpaleui. Uelis yotiktlajtoltijkej tlen okinpanok itech revista Akin Tetlapouijtok kanin kijtoa “Biblia okinpatili innemilis”. Uan yotikitakej maski tiiTlaixpantijkauan Jehová moneki ma timoyekanakan ika Biblia uan ijkon kuali timouikaskej iuan Jehová.

2. Itech achto siglo, ¿ken okinpaleui sekimej iTlajtol toTajtsin Dios?

² Amo techtlajtlachialtia miakej momachtijtokej Biblia uan kipatlatokej innemilis. Ijkon okinpanok tlen okichiuayaj ken Cristo itech achto siglo akinmej okichiayaj yaskej iluikak (xiktlajtolti 1 Corintios 6:9-11). Tlatitlanil Pablo okijto akinmej amo kalakiskej itech iTekiuajkayo toTajtsin Dios uan satepan okinmilui akinmej okichiuayaj ken Cristo: “Sikimeh de nomejwah achto ijkó ononkichijtinemiah. Pero iespíritu santo toTajtsin Dios uan iTlajtol onamechpaleui xikpatlakan namonemilis. Sekimej maski yokichiuayaj ken Cristo, otlajtlakolchijkej uan ayakmo kuali omouikakej iuan Jehová. Biblia tlajtoa itech se tlapejpenal tlen okikixtijkej itech tlanechikol. Pero satepan okipatlak inemilis uan oksepa omokuepki itech tlanechikol (1 Cor. 5:1-5; 2 Cor. 2:5-8). Techyolchikaua tikitaj miakej yokipatlakej innemilis ika iTlajtol toTajtsin Dios.

3. ¿Tlen timomachtiskej?

³ Jehová otechmakak iTlajtol uan tiknekij kuali tiktekitiltiskej (2 Tim. 2:15). Ik non, itech nin tlamachtil tikitaskej eyi tlamantli tlen techpaleuis okachi kuali ma tiktekitiltikan Biblia. Itech tonemilis, ijkuak titetlapouiaj uan ijkuak titlamachtiaj itech tlanechikol. Nin tlamantli techpaleuis ma tiktlasojtlakan Jehová uan ma tiktlasojkamatilikan porque techmachtia kuali ma tiyetokan (Is. 48:17).

ITECH TONEMILIS

4. (1) ¿Tlen tikchiuaskej tla tiknekij ma techpaleui Biblia? (2) ¿Tlen tikchiua para tiktlajtoltis Biblia?

⁴ Tla tiknekij ma techpaleui Biblia, moneki mojmostla ma tiktlajtoltikan (Jos. 1:8). Tinochtin amo timajxiliaj pero non amo ma techtsakuili amo ma tiktlajtoltikan nion okseki tekitl tlen tikpiaj (xiktlajtolti Efesios 5:15, 16). Uelis kualkan tiktlajtoltiskej, tlajka noso yoak. Timomachiliaj ken salmista akin okijto: “¡Nikpatioita motlanauatil! Nochi tonal itech nimokuayejyekoa” (Sal. 119:97).

5, 6. (1) ¿Tleka moneki ma timokuayejyekokan? (2) ¿Ken techpaleuis ma timokuayejyekokan? (3) ¿Ken mitspaleuia tiktlajtoltis Biblia uan itech timokuayejyekos?

⁵ Pero amo san tiktlajtoltiskej Biblia. Moneki timokuayejyekoskej itech tlen tiktlajtoltiaj (Sal. 1:1-3). Uan ijkon tiyetoskej tiixtlamatkej ken kijtoa Biblia. Uelis tiktlajtoltiskej Biblia ika amatl noso ika formato electrónico pero ma ajsi itech toyolo.

⁶ ¿Ken techpaleuis tla timokuayejyekoaj? Sekimej ijkuak kitlajtoltijtiuij Biblia, motlajtlanijtiuij: “¿Tlen nechmachtia nin itech Jehová? ¿Nikchijtok nin itech nonemilis? ¿Ok moneki okachi nimochijchikauas para nikyektlalis noyelis?”. Okachi tiktlakamatiskej tlen techiluia tla timokuayejyekoaj itech iTlajtol toTajtsin Dios uan tla timotlatlaujtiaj. Uan ijkon techpaleuis ichikaualis iTlajtol toTajtsin Dios (2 Cor. 10:4, 5, TNM).

IJKUAK TITETLAPOUIAJ

7. ¿Ken uelis okachi tiktekitiltiskej Biblia ijkuak titetlapouiaj?

⁷ Nochipa ma tiktekitiltikan Biblia ijkuak titetlapouiaj uan ijkuak titlamachtiaj. Se tokni okijto: “Tla titetlapouiti iuan Jehová, ¿te okachi titetlapouis noso tikkauilis ye ma tetlapoui?”. ¿Tleka ijkon okijto? Porque ijkuak ikaj tiktlajtoltiliaj se tlaxelol yetoskia ken Jehová kitlapouijtok. Tla kuali tikpejpenaskej se tlaxelol tlen tikintlajtoltiliskej akinmej tikintlapouiskej, okachi ajsis itech inyolo (1 Tes. 2:13). Ik non, ma timotlajtlanikan: “¿Nimochijchikaua niktlajtoltis se tlaxelol ijkuak nitetlapouia?”.

8. ¿Tleka amo san ma tikintlajtoltilikan tlaxelolmej akinmej tikintlapouiaj?

⁸ Amo san ma tikintlajtoltilikan seki tlaxelolmej akinmej tikintlapouiaj. ¿Tleka? Porque panos ijkon ken achto siglo, miakej amo kajsikamatiskej tlen kijtoa Biblia (Rom. 10:2). Ik non, amo ma timokuayejyekokan yokajsikamatkej tlaxelolmej tlen yotikintlajtoltilijkej akinmej tikintlapouiaj. Ma tikinmiluikan tlen okachi miak ipati uan ma tikinyekiluikan tlen kijtosneki. Ijkon akinmej tikintlapouiaj uelis kilnamiktoskej uan ajsis itech inyolo (xiktlajtolti Lucas 24:32).

9. ¿Ken uelis kitlakaitaskej Biblia akinmej tikintlapouiaj? Xikijto se neskayotl.

⁹ Tlen peua tikijtoaj ijkuak tiktlajtoltiskej se tlaxelol, uelis kipaleuis akin tiktlapouijtokej ma kitlakaita Biblia. Se neskayotl, uelis tikiluiskej: “Ma tikitakan tlen kijtoa toTajtsin Dios itech nin tlamantli”. Pero tla timotlapouijtokej iuan akin amo kixmati Biblia uelis tikiluiskej: “Xikita tlen kijtoa se amochtli tlen miak ipati”. Tla akin iuan timotlapouia amo kipaktia se tlaneltokalistli, uelis tiktlajtlaniskej: “¿Yotikinkak ninmej tlajtolmej tlen yiuejkika omoijtojkej?”. Nochtin akinmej tikintlapouiaj tlatlamantli mokuayejyekoaj, ik non, moneki kuali tikmatiskej ken tikintlapouiskej (1 Cor. 9:22, 23).

10. (1) Xikijto tlen okipanok se tokni. (2) Xikyekijto ken yotikitak Biblia melauak tlapaleuia ijkuak titetlapouia.

¹⁰ Miakej tokniuan yokitakej melauak kinpaleuia Biblia akinmej kintlapouiaj. Se neskayotl, se tokni okitlajpaloaya se tlakatl uan yimiak xiuitl okintlajtoltiaya revistas. Se tonal, tokni okijto amo san kikajteuiliskia revista Akin Tetlapouijtok noijki kitlajtoltiliskia se tlaxelol tlen kiualika revista. Okitlajtoltili 2 Corintios 1:3, 4, kanin kijtoa “Ye n Teta non nochipa techiknomati iwa nochipa techyolchikawa” uan “Ye nochipa techyolchikawa ijkuak titlaijyowiah”. Non tlakatl oajsik itech iyolo tlen okitlajtoltili tokni hasta okilui oksepa ma kintlajtoltili nonmej tlaxelolmej. Non tlakatl okijto sapanoa omonekiaya ikaj ma kiyolchikaua ye uan isiua uan okinekiaya okachi kimatis itech Biblia. Ken tikitaj, melauak kinpaleuis oksekimej tla tiktekitiltiaj Biblia ijkuak titetlapouiaj (Hech. 19:20).

IJKUAK TITLAMACHTIAJ ITECH TLANECHIKOL

11. ¿Tlen tekitl kipiaj tokniuan tlen tlamachtiaj itech tlanechikol?

¹¹ Tinochtin techpaktia tiaskej nechikolmej uan uejueyi nechikolmej. Uan tiauij porque ompa tikueyichiuaj Jehová. Pero noijki ompa timomachtiaj miak tlamantli tlen techpaleuia itech tonemilis. Tokniuan tlen tlamachtiaj itech tlanechikol kipiaj se ueyi tlateochiualistli pero nin tekitl amo san ajauili (Sant. 3:1). Ik non, moneki kuali kitaskej nochi tlen tlamachtiaj ma kisa itech Biblia. Tla tejuatsin titlamachtia itech tlanechikol, ¿tlen uelis tikchiuas para ma kinpaleui iTlajtol toTajtsin Dios akinmej mitskakij?

12. Tokniuan tlen tlamachtiaj itech tlanechikol, ¿ken uelis okachi tlajtoskej itech Biblia?

¹² Moneki okachi titlajtos itech Biblia ijkuak tiktemakas se tlapoualistli (Juan 7:16). Ijkuak tiktemakas se tlapoualistli amo okachi xitlajto itech tlen okinpanok oksekimej noso itech neskayomej, tlamo non kichiuas ayakmo miak inpati ma yetokan tlaxelolmej tlen tikintlajtoltis. Xikilnamikto amo san se tlamantli kijtosneki tiktlajtoltis Biblia uan titlamachtis Biblia. Tla tikintekitiltis miakej tlaxelolmej amo kinmilnamikiskej. Ik non, kuali xikinpejpena tlen tlaxelolmej tikintekitiltis, kuali xikintlajtolti, xikita ken tikinyekijtos, xikintemo tlen neskayomej kinnamikis uan ken tikinmiluis kichiuaskej itech innemilis (Neh. 8:8). Tla tlapoualistli tlen tiktemakas kisas itech se bosquejo tlen kintemaka ialtepe Jehová, ximomachti tlajtolmej tlen kipia noijki tlaxelolmej uan kuali xikajsikamati ken nonmej tlajtolmej mouikaj iuan tlaxelolmej. Satepan xikinpejpena tlaxelolmej tlen tikintekitiltis uan ijkon tikinmachtis tlen moneki (tikajsis okseki tlamantli tlen mitspaleuis itech amochtli Benefíciese de la Escuela del Ministerio Teocrático itech tlamachtilmej 21, 22 uan 23). Pero tlen okachi moneki xiktlatlaujti Jehová ma mitspaleui uan ijkon kuali titlamachtis iTlajtol (xiktlajtolti Esdras 7:10; Proverbios 3:13, 14).

13. (1) ¿Ken okipaleui se tokni tlaxelol tlen okikak itech nechikol? (2) ¿Ken yomitspaleui Biblia ijkuak kuali kitekitiltiaj itech nechikol?

¹³ Ma tikitakan se neskayotl, se tokni tlen ichan Australia sapanoa okipaleui Biblia porque tokni tlen okitemakak tlapoualistli kuali okitekitilti. Ijkuak omoskalti sapanoa otlajyoui pero opejki momachtia Biblia uan omotemakak ixpan Jehová. Pero amo okachi okineltokaya Jehová okitlasojtlaya. Se tonal, itech nechikol okikak se tlaxelol tlen oajsik itech iyolo. Omokuayejyeko itech non tlaxelol uan okseki okintlajtolti, ijkon okimatki Jehová okitlasojtlaya.a Uan te, ¿se tonal yotikkak se tlaxelol itech nechikol noso itech se ueyi nechikol uan oajsik itech moyolo? (Neh. 8:12).

14. ¿Ken tikteititiskej tikpatioitaj iTlajtol toTajtsin Dios?

¹⁴ Tinochtin tiktlasojkamatij toTajtsin Dios porque otechmakak iTlajtol uan kichiua amo ma poliui (1 Ped. 1:24, 25). Ik non, nochipa ma tiktlajtoltikan, ma tiktlakamatikan uan ika ma tikinpaleuikan oksekimej. Ijkon tikteititiskej tikpatioitaj iTlajtol toTajtsin Dios. Pero tlen okachi ipati, tikteititiskej tiktlasojtlaj Jehová akin otlanauati ma kijkuilokan iTlajtol.