3. Biblia techpaleuia ma tikixnamikikan ouijkayotl

Axkan amo uelis tikchiuaskej amo ma yeto ouijkayotl nion uelis tikyektlaliskej tlen onka. San moneki timoyolchikauas tla timokokoa noso omikik akin sapanoa otiktlasojtlaya. Pero ¿techpaleuis Biblia ma tikixnamikikan nochi nin ouijkayotl?

IJKUAK IKAJ SAPANOA MOKOKOA

Se siuatl tlen itoka Rosa okijto: “Nikpia se kokolistli tlen notatajuan yokipiayaj uan nochipa sapanoa nikualo. Uan okachi nimochijti”. Omotekipachoaya porque amo ueli omomachtiaya Biblia uan okseki tlamachtilmej. Pero okiyolchika tlen okijto Jesús itech Mateo 19:26: “Dios nochi weleti kichiwa”. Rosa okitak ken momachtiskia. Ualeua amo ueli omomachtiaya porque sapanoa okualoaya, ik non, opejki kikaki Biblia uan amatlajkuilolmej.a Uan okijto: “Amo chikauak nikpiaskia notlaneltokilis tla amo yetoskiaj amatlajkuilolmej ika audio”.

Ijkuak Rosa moyolkokoa porque ayakmo kichiua miak tlamantli ken achto, kiyolchikaua tlen kijtoa 2 Corintios 8:12: “Tla se tlakatl ika nochi iyolo kitemaka kech ye weleti kitemaka, Dios kiselia, porke Ye amo techtlajtlanilia tlan amo tikpiah”. Nin tlaxelol kilnamiktia toTajtsin Dios kiyolpaktia tlen ueli kichiua porque mochijchikaua.

IJKUAK IKAJ MIKI AKIN SAPANOA TIKTLASOJTLAJ

Diana tlen itech yotimotlapouijkej, okijto: “Sapanoa onechyolkoko omikik nochpoch tlen san okipiaya 18 xiuitl uan onimokuayejyeko ayakmo uelis niyoltoskia nion uelis oksepa niyetoskia ken achto”. Pero okiyolchika tlen kijtoa Salmo 94:19, kanin salmista okilui toTajtsin Dios: “Ijkuak opejki sapanoa nimotekipachoa, Te otechyolchika uan otechyolseui”. Diana okijto: “Onikilui Jehová ma nechpaleui ma nikchiua itlaj tlen nechyolseuiskia”.

Opejki tlapaleuia uan oyolpakiaya. Uan omokuayejyeko okatka ken pinturas tlen konemej kintekitiltiaj ika tlatlapaluiskej, maski seki yopostekej ok ueli kintekitiltiaj. Okajsikamatki maski okatka ken oposteki, ok uelis kinpaleuiskia oksekimej. Okijto: “Ijkuak onikinyolchikauaya akinmej onikinmachtiaya ika Biblia, Jehová noijki onechyolchikajtoka”. Okinmijkuilo akinmej omomachilijkej ken ye tlen moijtoaj itech Biblia. ¿Tlen omomachti? Ye okijto: “Nochtin yejuan omotlatlaujtijkej”. Noijki okijto: “Onechpaleui ijkuak opejki niktlajtoltia Biblia”.

Diana noijki yomomachti itech Biblia itlaj tlen miak ipati: mokuayejyekoa itech tlen panos uan amo itech tlen yopanok. Kiyolchikaua tlen kijtoa itech Hechos 24:15: “Nochteh non yomikkeh moyolitiskeh, akimeh otlájtlakolchijkeh iwa akimeh amó”. ¿Melauak kineltoka Jehová kiyolitis ichpoch? Ma tikitakan tlen okijto: “Notajtsin Jehová yokijkuilo tlen tonal nimotas iuan ichpoch. Yinikita san ken sekan tiyetoskej kanin otiktokayaj xochitl uan nikitas ken ijkuak onikitak oneski”.

a Katej miakej audios itech Internet itech jw.org.

Biblia noijki techyolchikaua ijkuak sapanoa titlajyouiaj

¿KEN UELIS TECHPALEUIS TOTAJTSIN DIOS?

Biblia technankilia: “Jehová amo uejka kajki itech akinmej kitlatlaujtiaj, itech nochtin akinmej kinotsaj ika tlen melauak. Ye kinmaka tlen kinekij akinmej kimauiliaj; ye kinkaki ijkuak kitlatlaujtiaj ma kinpaleui uan kinmakixtia” (Salmo 145:18, 19). ¡Melauak teyolchika tlen kijtoaj ninmej tlaxelolmej! Pero ¿ken technankilia toTajtsin Dios ijkuak tiktlatlaujtiaj ma techpaleui?

TECHYOLCHIKAUA

Ouijkayotl techtsotlaua, kichiua ma timokokokan uan hasta ayakmo chikauak ma tikpiakan totlaneltokilis (Proverbios 24:10). Pero Jehová “kimaka chikaualistli akin sotlaua uan kichiua ma kipia miak chikaualistli akin amo chikauak” (Isaías 40:29). Tlatitlanil Pablo okixnamik miak ouijkayotl uan okijto: “Para nochi tlamantli nikpia chikaualistli itech akin nechmaka chikaualistli” (Filipenses 4:13, TNM). ToTajtsin Dios okiyolchika ika espíritu santo uan noijki ijkon mitspaleuis tla tiktlajtlanilis (Lucas 11:13).

TECHMAKA IXTLAMATILISTLI

¿Tlen tikchiuas tla tikneki tikajsikamatis tlen kijtoa Biblia uan tiktlakamatis? Santiago akin okatka imachtijka Jesús okijto: “Tla seme de nomejwah amo kipia ixtlamatílistli, makitlajtlanili Dios. Ye nomechmakas miak ixtlamatílistli iwa amo nomechixtokilis” (Santiago 1:5). Uan para toTajtsin Dios mitsmakas tlen tiktlajtlanilis, moneki xiktlajtolti Biblia uan ma xikchiua tlen kijtoa (Santiago 1:23-25). Tla ijkon tikchiuas, tikitas Biblia kipia ixtlamatilistli.

TECHMAKA YOLSEUILISTLI

Tla sapanoa timotekipachoa, Jehová mitspaleuis ximoyolseui. Porque iTlajtol kijtoa: “Amitla manomechtekipacho, yej nochipa xikilikah n Toteko tlan nonkinekih keman nonmotiotsajtsiliah, xiktlajtlanilikah iwa ximotlasojkamatikah. Iyolsewilis Dios, non amaka weleti kajsikamati, kimokuitlawis nomoyolo iwa nomotlayejyekolis por Cristo Jesús” (Filipenses 4:6, 7). Xikilui Jehová ma mitsyolseui.

¿Uan tla amo ueli tikyektlalia ouijkayotl? Amo ximokuayejyeko toTajtsin Dios yomitsilka. Maski onka ouijkayotl, Jehová techyolchikaua ma titlaxikokan (1 Corintios 10:13). Uan Biblia kijtoa uits tonal ijkuak ayakmo tikpiaskej ouijkayotl.