¿Tlen techpaleuis okachi ma techpakti ijkuak timomachtiaj Biblia?

JOSUÉ okinauatijkej ma kinyekana israelitas uan ma kinuika kanin kinmakaskiaj tlali tlen okinmilui Jehová. Uan omonekiaya kixnamikis miak ouijkayotl. Pero Jehová okilui nochi kuali kisaskia uan okilui ma yeto yolchikauak. Okilui ma kitlakamati itlanauatil uan mojmostla ma kitlajtolti iTlajtol uan ma kichiua tlen kijtoa. Uan okilui tla ijkon kichiuaskia, ‘kuali yaskia itech iojui uan ijkon moyekanaskia ika ixtlamatilistli’ (Jos. 1:7, 8).

“Iksemi tonatijmeh yetos miak tlaijyowílistli” uan tikixnamikiskej miak ouijkayotl (2 Tim. 3:1). Pero nochi kuali kisas tla tikchiuaskej tlen Jehová okilui Josué. Mojmostla ma tiktlajtoltikan Biblia uan ijkon tikmatiskej tlen tikchiuaskej ijkuak tikixnamikiskej ouijkayotl.

Pero miakej amo tikmatij timomachtiskej Biblia uan sekimej nion kinpaktia. Miak ipati ma timomachtikan Biblia, ik non, tikitaskej “Nin tlamantli mitspaleuis ximomachti Biblia”. Ompa tikajsiskej seki tlamantli para okachi kuali timomachtiskej uan para ma techpakti.

Se salmista otlakuikak: “Techmachti ika motlanauatiluan para ma ninejnemi itech moojui porque non nechyolpaktia” (Sal. 119:35). Noijki mitspaktis ijkuak timomachtis iTlajtol toTajtsin Dios. Timomachtis miak tlamantli ijkuak tikmatis ken tikchiuas.

Maski amo tikyekanaj se altepetl ken Josué pero noijki tikixnamikij ouijkayotl. Ma timomachtikan Biblia ken Josué uan ma tikchiuakan tlen timomachtiaj. Kuali tiyetoskej uan tikpiaskej ixtlamatilistli tla ijkon tikchiuaskej.