¿Otikmatiaya?

¿Tleka Esteban amo omomojti ijkuak okatka inmixpan akinmej okikokoliayaj?

ESTEBAN okatka inmixpan 71 tlakamej tlen okikokoliayaj uan ninmej otlanauatiayaj itech Sanedrín. Ninmej teopixkej otlayekanayaj itech non altepetl. Ninmej tlakamej okinnechiko teopixki Caifás. Ye noijki okinnechiko ijkuak okixkomakakej Jesús ijkuak okijtojkej ma kimiktikan (Mat. 26:57, 59; Hech. 6:8-12). Okiteluijkej Esteban pero ijkuak okitakej “ixko omotaya kemi ixko se ángel” (Hech. 6:13-15).

¿Tleka Esteban amo omomojti? Achto kiuikaskiaj inmixpan teopixkej, ye okitekichiuilijtoka Jehová itech se tlanechikol uan omopaleuiaya ika iespíritu santo toTajtsin Dios (Hech. 6:3-7). Nin okipaleui ma moyolseui uan ma kilnamiki seki tlamantli ijkuak okixkomakakej (Juan 14:16). Itech Hechos 7 kijtoa ijkuak Esteban okatka inmixpan teopixkej, espíritu santo okilnamikti kanaj veinte textos tlen moajsij itech Escrituras Hebreas (Juan 14:26). Pero Esteban okachi otlaneltokak ijkuak toTajtsin Dios okinextili Jesús kajki iyekma (Hech. 7:54-56, 59, 60).

Xamo se tonal noijki ijkon techtlajyouiltiskej (Juan 15:20). Jehová techpaleuis ika iespíritu santo, tla nochipa timomachtiaj iTlajtol uan nochipa titetlapouiaj. Noijki techpaleuis amo ma timomojtikan uan ma tikpiakan yolseuilistli (1 Ped. 4:12-14).