Ken uelis tiktekitiltiskej amatlajkuilol

Kuali tlajtolmej techmaka toTajtsin Dios Okichijchijkej pampa oksepa tikintlajpaloskej uan tikinmachtiskej ika Biblia

1. ¿Tlen amatlajkuilol otikselijkej itech ueyi nechikol “Ma tikmaluikan toyolo”?

¹ Itech ueyi nechikol de Distrito “Ma tikmaluikan toyolo”, otikselijkej se amatlajkuilol tlen uelis techpaleuis pampa tikinmachtiskej ika Biblia, uan otiyolpakej ijkuak otikselijkej amatlajkuilol Kuali tlajtolmej techmaka toTajtsin Dios. Nin amatlajkuilol okipatlak amatlajkuilol Tlen kineki toTajtsin Dios, nin amatlajkuilol noijki kiualika tlamachtilmej tlen amo okachi oui, uan tlen techpaleuia pampa san niman tikinmachtiskej itech Biblia. Amatlajkuilol Tlen kineki toTajtsin Dios otlamachtiaya itech tlanauatilmej tlen moneki tikchiuaskej, pero okatka oui pampa akinmej yikin kinekij momachtiskej. Uan yankuik amatlajkuilol techmachtia kuali tlajtolmej tlen kipia Biblia (Hech. 15:35).

2. ¿Tleka okichijchijkej amatlajkuilol Kuali tlajtolmej?

² ¿Tleka otechmakakej nin amatlajkuilol? Miakej tokniuan okinekiayaj kipiaskej se amatlajkuilol tlen amo okachi oui kajsikamatiskej, uan tlen uelis kichiuas tlaltikpaktlakamej ma kinekikan momachtiskej uan ma kinekikan ma tikinmachtikan ika amochtli Tlen melauak tlamachtia Biblia. Pampa miakej amo kinekij momachtiskej ika se amochtli, pero kema ika se amatlajkuilol tlen amo okachi oui. Noijki se amatlajkuilol amo okachi oui pampa motlajtolkuepas ika tlatlamantli tlajtolmej.

3. ¿Tleka nin amatlajkuilol tlatlamantli chijchijtok?

³ Ken chijchijtok. Miakej toamatlajkuiloluan otikinchijchijkej pampa tlaltikpaktlakamej amo okachi oui kintlajtoltiskej uan momachtiskej tlen melauak maski san yejuan inselti. Pero nin amatlajkuilol okse tlamantli chijchijtok: pampa uelis momachtiskej moneki ikaj ma kinpaleui. Ik non, ijkuak tiktemakaskej, moneki timomachtiskej maski san se noso ome párrafos. Uan ken párrafos amo okachi uejueyij, uelis momachtiskej san itech ojtli noso kanin tekitij. Maski achto tlamachtil uelis techpaleuis, nochtin tlamachtilmej melauak kuali pampa timomachtiskej.

4. ¿Ken techpaleuia nin amatlajkuilol pampa tikinmachtiskej ika Biblia?

⁴ Itech toamatlajkuiloluan tlajtlanilmej monankiliaj itech párrafos. Pero nin amatlajkuilol tlatlamantli, pampa tlajtlanilistli monankilia itech Biblia, pampa miakej kinpaktia kajsiskej tlanankilistli itech Biblia, uan amo itech toamatlajkuiloluan. Ik non, nion se tlaxelol ijkuilitok tlen kijtoa. Pampa ma kintlajtoltikan itech Biblia. Ijkon kajsikamatiskej nochi tlen momachtiaj iaxka toTajtsin Dios (Is. 54:13).

5. ¿Tleka miak ipati kuali ma timomachtikan ika tlamachtil tlen timomachtiskej?

⁵ Nin amatlajkuilol noijki amo techyekiluia nochtin tlaxelolmej bíblicos. Pampa akinmej tikinmachtiaj uelis techtlajtlaniskej, uan tejuan uelis tikinnankiliskej ika tlen yotimomachtijkej. Ik non, miak ipati kuali ma timomachtikan itech sejse tlamachtil. Pero, maski techpaktis amo moneki titlajtoskej miak, okachi tikpaleuiskej tla tikaua ma techyekilui tlen kajsikamati itech se tlaxelol. Ika tlajtlanilmej uelis tikpaleuiskej pampa kuali ma kajsikamati tlen kijtoa Biblia (Hech. 17:2).

6. ¿Ken uelis tiktekitiltiskej nin amatlajkuilol 1) iuan akinmej amo tlaneltokaj itech Biblia nion itech toTajtsin Dios? 2) ijkuak titetlapouiaj inkalijtik tlaltikpaktlakamej? 3) ijkuak san niman tikinmiluiaj tiknekij tikinmachtiskej? 4) ijkuak oksepa tikintlajpaloaj?

⁶ Ijkon ken oksekimej amatlajkuilolmej tlen ika tikinmachtiaj, nin amatlajkuilol uelis tiktemakaskej itech non metstli maski amo ika titekitiskej. Miakej kinekiskej tekitiskej ika nin amatlajkuilol pampa san niman kinmachtiskej. Uan noijki, ken omoijto itech ueyi nechikol, “nin amatlajkuilol kichiuas ma tiyolpakikan ijkuak tikinmachtiaj oksekimej” (xikita recuadros itech páginas 2 a 4).

7. ¿Ken uelis tikinmachtiskej ika nin amatlajkuilol?

⁷ Ken uelis tiktekitiltiskej pampa tikinmachtiskej. Achto uelis tiktlajtoltiskej tlajtlanilistli tlen tliliuik nesij uan noijki párrafos. Satepan ma tiktemokan itech Biblia tlaxelolmej, uan ika tlajtlanilmej ma tikpaleuikan pampa ma kajsikamati tlen kijtoaj. Achto tiktlajtoltiskej okse párrafo, ma tikchiuilikan tlajtlanilistli tlen tliliuik nesi, pampa tikitaskej kox kuali okajsikamatki. Achto uelis timomachtiskej san se noso ome tlajtlanilmej. Uan ajachitsin uelis okachi timomachtijtiaskej pampa uelis timomachtiskej nochi tlamachtil.

8. ¿Tlen moneki tikilnamikiskej ijkuak tiktlajtoltiskej se tlaxelol bíblico, uan tleka?

⁸ Tlaxelolmej kanin kijtoa xiktlajtolti kinankiliaj tlajtlanilmej tlen tliliuik nesij. Ijkuak tiktlajtoltiskej se tlaxelol, miak ipati amo ma tikijtokan “tlatitlanil Pablo okijkuilo” noso “xikita tlen okijkuilo Jeremías”, pampa amo ma kajsikamatikan tlen ompa ijkuilitok okijkuilo se tlakatl. Okachi kuali ma tikijtokan “iTlajtol toTajtsin Dios kijtoa” noso “xikita tlen kijtoa Biblia”.

9. ¿Moneki tikintlajtoltiskej nochi tlaxelolmej tlen ijkuilitokej?

⁹ ¿Tikintlajtoltiskej nochi tlaxelolmej bíblicos, noso san kanin kijtoa “xiktlajtolti”? Moneki tikitaskej. Maski nochtin tlaxelolmej kipaleuiaj tlen moijtoa itech párrafo, noijki kipiaj tlajtolmej tlen miak ipati. Pero tla amo onka miak kauitl, amo okachi kineki momachtis noso amo okachi kixmati letra, uelis san tikintlajtoltiskej kanin kijtoa “xiktlajtolti”.

10. ¿Keman uelis tikmachtiskej ika amochtli Tlamachtia Biblia?

¹⁰ Keman uelis tikmachtiskej ika amochtli Tlamachtia Biblia. Ijkuak okachi yimomachtis, uelis tikmachtiskej ika amochtli Tlamachtia Biblia noso uelis tiktlamiskej amatlajkuilol. Pero moneki kuali timokuayejyekoskej tlen tikchiuaskej. Uan, ¿moneki timomachtiskej achto tlamachtil tlen kipia amochtli? Amo onka se tlanauatil, pampa sejse tlatlamantli mokuayejyekoa. Pero uelis kinpaleuis tla oksepa momachtiaj seki tlamachtilmej ika amochtli Tlamachtia Biblia.

11. ¿Tleka moneki ma tiktekitiltikan nin amatlajkuilol?

¹¹ Maski axkan onka miak tlamantli tlen amo kuali, tejuan tikpiaj se kuali tlateochiualistli, titetlapouiskej: iTekiuajkayo toTajtsin Dios yitlanauatijtok uan ayakmo miak poliui pampa kuali ma yeto Tlaltikpak (Mat. 24:14; 2 Ped. 3:13). Melauak nochtin akinmej kikakiskej ninmej tlajtolmej kijtoskej ken okijto toTajtsin Dios: “¡Melauak kualtsitsintin ipan tepemej ikxiuan akin kitematiltia kuali tlajtolmej, akin tetlapouia yolseuilistli, akin kitematiltia tlamantli tlen kuali, akin tetlapouia temakixtilistli, akin kijtoa itech Sión: ‘¡MoDios axkan yiueyi tekiua!’” (Is. 52:7). Ma tiktekitiltikan nin amatlajkuilol pampa tikintlapouiskej nochtin akinmej kinekij momachtiskej itech kuali tlajtolmej tlen techmaka toTajtsin Dios.

Pampa ika titetlapouiskej

“Miakej motlajtlaniaj tlen kineki kichiuas toTajtsin Dios iuan tlaltikpaktlakamej, nikneki nimitsmachtis ken uelis tikmatiskej. Se neskayotl, ¿tikneltoka toTajtsin Dios kineki kitlajtlamis tlajyouilistli? [Xikaua ma tlanankili.] Nin amatlajkuilol mitsnankilis ika Biblia nin tlajtlanilistli. [Xikmaka amatlajkuilol, xiktlajtolti achto párrafo itech achto tlamachtil uan Jeremías 29:11.] Ijkon ken kijtoa nikan, ¿amo melauak toTajtsin Dios kineki kuali ma tiyetokan satepan? [Xikaua ma tlanankili.] Uelis tikmokauis amatlajkuilol, uan okse tonal uelis timomachtiskej okse párrafo uan tikitaskej ken toTajtsin Dios kitlajtlamis tlajyouilistli.” Tla ok majxilia, uelis nankitlajtoltiskej uan nanmomachtiskej okse párrafo uan eyi tlaxelolmej bíblicos. Ximokaua tlen tonal timokuepas pampa nanmomachtiskej okse tlajtlanilistli.

“Miak uelta tiktlatlaujtiaj toTajtsin Dios, uan okachi ijkuak itlaj techtekipachoa, ¿amo melauak? [Xikaua ma tlanankili.] ¿Tikneltoka toTajtsin Dios kikaki nochi totlatlaujtiluan, noso san tlen kiyolpaktia? [Xikaua ma tlanankili.] Nin amatlajkuilol techiluia kanin itech Biblia uelis tiknankiliskej ninmej tlajtlanilmej. [Xikmaka uan ximomachtikan achto párrafo tlen kipia tlamachtil 12, uan noijki tlaxelolmej kanin kijtoa “xiktlajtolti”.] Tiyolpakij tikmatiskej toTajtsin Dios techyoleua ma tiktlatlaujtikan; pero pampa kuali timotlatlaujtiskej moneki kuali tikixmatiskej. [Xikita tlamachtil 2 uan xikititi tlamachtilmej tlen kipia.] Tla tikneki uelis nimitsmakas amatlajkuilol, uan okse tonal nimokuepas pampa ika Biblia tiknankiliskej ninmej tlajtlanilmej.”

“Axkan timotlapouijtokej pampa miakej kintekipachoa tlen panos satepan. ¿Tikneltoka moyektlalis nochi? [Xikaua ma tlanankili.] ¿Otikmatiaya Biblia techmaka kuali tlajtolmej tlen kichiua ma tikchiakan tlen kuali? Xikita seki tlajtlanilmej tlen monankiliaj itech Biblia.” Xikmaka amatlajkuilol uan xikilui ma kipejpena se tlajtlanilistli tlen moita itech saiktlami página. Ijkuakon, xiktlapo amatlajkuilol itech non tlamachtil uan xikititi ken timomachtiaj nin amatlajkuilol. Ximokaua tlen tonal timokuepas pampa nanmomachtiskej tlajtlanilistli itech nin tlamachtil.

Ijkuak tikintlajtlaniskej kox kinekij momachtiskej Biblia

“Axkan tikintlapouiaj nochtin ken uelis timomachtiskej Biblia. Nin amatlajkuilol kipia 15 tlamachtilmej, techmachtiaj kanin itech Biblia uelis tiknankiliskej ninmej tlajtlanilmej tlen okachi inpati. [Xikititi achto página uan saiktlami.] ¿Se tonal yotimochijchika pampa tikajsikamatis Biblia? [Xikaua ma tlanankili.] Ma nimitsititi ken amo okachi oui tlamachtilmej tlen kipia. [Xiktemo tlamachtil 3 uan ximomachtikan achto párrafo tlen kipia tlajtlanilistli eyi. Satepan, xiktlajtoltikan Apocalipsis 21:4, 5. Tla ok majxilia uelis nanmomachtiskej okse párrafo uan tlaxelolmej bíblicos tlen nesij.] Uelis nimitsmakas nin amatlajkuilol. Timitsyoleuaj ximomachti maski san se tlamachtil. Tla mitspaktia uelis ok timomachtiskej. Ijkuak oksepa niuits uelis timomachtiskej achto tlamachtil tlen kipia san se página.”