Yankuikej tlakuikalmej pampa tikueyichiuaskej toTajtsin Jehová
1 Nechikol tlen kichiua sejse xiuitl Watch Tower Bible and Tract Society of Pennsylvania, axkan omochi itech tonal 4, metstli octubre, xiuitl 2014, ompa okijtojkej moyankuilis amochtli tlen ika titlakuikaj. ¡Nin melauak okinyolpakti! Nochtin akinmej omonechikojkej okinmilnamiktijkej tleka miak ipati ma titlakuikakan ijkuak tikueyichiuaj toTajtsin Jehová (Sal. 96:2).
2 Uelis timotlajtlaniaj, ¿tleka moneki ma moyankuili amochtli tlen ika titlakuikaj? Onka miak tlamantli. Achto, pampa okachi kuali yitikajsikamatij iTlajtol toTajtsin Dios, ik non, mopatlas seki tlajtolmej tlen motekitiltia itech nin amochtli (Prov. 4:18). Uan okse tlamantli, pampa itech okseki tlatlamantli tlajtolmej moyankuilijtok Traducción del Nuevo Mundo, ik non, kanaj monekis mopatlas seki tlajtolmej tlen achto omotekitiltiayaj. Axkan ninmej tlajtolmej noijki mokixtiskej itech Biblia tlen omoyankuili. Ik non, maski mochiuas miak tekitl pampa moyankuilis, noijki kitlaliliskej okseki tlakuikalmej nin amochtli.
3 ¿Moneki timochiaskej ma kisa nin yankuik amochtli pampa uelis tiktekitiltiskej? Amo. Techyolpaktia timechiluiskej san itech seki metstli ik tlayekapan, motlalis itech jw.org seki tlakuikalmej. Ijkuak mochiuas se yankuik tlakuikali, san niman titlakuikaskej ijkuak tlamis Nechikol itech iTeki toTajtsin Dios uan kipias ninmej tlajtolmej: “yankuik tlakuikali”.
4 Ken timomachtiskej yankuikej tlakuikalmej. Uelis oui techchiuilis timomachtiskej se yankuik tlakuikali. Pero ijkon ken salmista, tiknekij titlakuikaskej itech tlanechikol uan amo ichtaka timokauaskej (Sal. 30:12). Ik non, pampa timomachtiskej yankuikej tlakuikalmej, uelis tikchiuaskej nin:
Tikkakiskej miak uelta tlatsotsonalistli tlen kajki itech jw.org. Tla miak uelta tikkakij, okachi san niman tikilnamikiskej.
Kuali ma timomachtikan tlajtolmej, uan ma timochijchikauakan tikilnamikiskej.
Ma titlakuikakan miak uelta hasta kuali ma mokaki.
Ma titlakuikakan miak uelta ijkuak tikueyichiuaj Jehová ken kalchanejkej hasta tikmatiskej ken kuali titlakuikaskej.
5 Itech seki metstli tlen uits, ijkuak moijtos titlakuikaskej se yankuik tlakuikali ijkuak tlamis Nechikol itech iTeki toTajtsin Dios, achto tikkakiskej tlatsotsonalistli. Satepan nochtin titlakuikaskej ika tlatsotsonalistli, uan ijkon tikchiuaskej ika okseki tlakuikalmej tlen yankuikej.
6 Sapanoa miak ipati titlakuikaskej itech tonechikoluan, ik non, moneki nochtin titlakuikaskej inmiuan tokniuan pampa tikueyichiuaskej toTajtsin Jehová. Uan amo ma tikisakan ijkuak peuas tlakuikali itech nechikol.
7 Tla ijkon tikchiuaj, tikteititiskej sapanoa tikpatioitaj tlatsotsonalistli tlen tiktekitiltiaj. Itech uejueyij nechikolmej, kitlaliaj se tlatsotsonalistli uan satepan peuaj tlapoualismej. Ojpa itech se xiuitl, miakej tokniuan tlen uitsej itech nochi Tlaltikpak kimotlaxtlauiliaj inpasaje pampa yaskej itech altepetl Patterson (Nueva York), pampa kichiuatiuij kuajkualtsin tlatsotsonalistli tlen ika tikueyichiuaj toTajtsin Jehová. Ik non, ijkuak tokni tlen kiyekana ueyi nechikol techiluia ma timotlalikan uan ma tikkakikan nin kuajkualtsin tlatsotsonalistli, san niman ma timotlalikan. Ijkuak ijkon tikchiuaj techpaleuia pampa tikyektlaliskej toyolo uan kuali titlakakiskej (Esd. 7:10).
8 Axkan itech nin nechikol, titlamiskej ika tlakuikali “¡Que venga el reino establecido por Dios!”. Nin tlakuikali, achto omokak itech nechikol tlen mochiua sejse xiuitl, omochi pampa techilnamiktis yikipia cien xiuitl tlanauatijtok Tekiuajkayotl.
9 Jehová melauak techmaka tlamantli “tlan kuali”, ken ninmej yankuikej tlakuikalmej (Mat. 12:35a). Ma timochijchikauakan pampa niman timomachtiskej ninmej tlakuikalmej uan titlakuikaskej ika nochi toyolo pampa tikueyichiuaskej toTajtsin Jehová (Sal. 147:1).