Nechikolmej pampa akinmej tetlapouiaj tlen techyolchikauaj, techmachtiaj uan techyekanaj

1. ¿Tleka tikchiuaj nechikol pampa akinmej tetlapouiaj?

¹ Jesús achto omonechiko iuan 70 imachtijkauan uan satepan oyajkej otetlapouitoj (Luc. 10:1-11). Ye okinyolchika uan okinmilnamikti amo inselti yetoskiaj uan nochipa kinyekanas Jehová, akin iaxka tekitl. Noijki okinmakak seki tlanauatilmej pampa kuali kichiuaskej inteki uan okintitlanki “ojomeh”. Itech ninmej tonalmej, nechikolmej pampa akinmej tetlapouiaj noijki techyolchikauaj, techmachtiaj uan techyekanaj.

2. ¿San keski kauitl moneki uejkauas nechikol pampa akinmej tetlapouiaj?

² Axkan, nechikol pampa akinmej tetlapouiaj ok mochiua ika 10 noso 15 minutos, itech nin kauitl techiluiaj akin iuan titetlapouiskej, kanin titetlapouitiuij uan mochiua se tlatlaujtilistli. Pero ayakmo ijkon mochiuas. Ijkuak peuas metstli abril, nechikol pampa akinmej tetlapouiaj san uejkauas 5 noso 7 minutos. Tla mochiuas ijkuak otlanki se nechikol, okachi amo uejkauas, pampa tokniuan yokikakej se tlapoualistli. Tla amo uejkaua non nechikol uelis okachi tiuejkauaskej titetlapouiskej. Noijki, tla sekimej precursores noso oksekimej tokniuan peuaj tetlapouiaj ijkuak ayamo peua nechikol pampa akinmej tetlapouiaj, kijtosneki san tepitsin moketsaskej itech tetlapouilistli.

3. ¿Ken moneki mochiuas nechikol pampa akinmej tetlapouiaj pampa okachi kinpaleuis tokniuan?

³ Nechikol pampa akinmej tetlapouiaj moneki mochiuas pampa uelis okachi kinpaleuis tokniuan. Miakej tlanechikolmej kitaj okachi kuali sejse nechikol pampa akinmej tetlapouiaj ma monechikokan kanin tetlapouiskej, ijkon tokniuan amo oui kinchiuilis ajsitiuij kanin tetlapouiskej. Okachi totoka kinyekanaskej, uan akin kiyekana se nechikol pampa akinmej tetlapouiaj okachi kuali kinpaleuis tokniuan. Nochtin tlayekankej moneki kitaskej tlanechikol uan mokuayejyekoskej tlen okachi kuali kichiuaskej. Nochtin moneki kinmiluiskej kanin uan akin iuan tetlapouiskej, satepan uelis kichiuaskej se tlatlaujtilistli pampa tlamis non nechikol.

4. ¿Tleka nechikol pampa akinmej tetlapouiaj moneki tikpatioitaskej ken okseki nechikolmej?

⁴ Miak ipati ken okseki nechikolmej. Nechikol pampa akinmej tetlapouiaj kinpaleuia akinmej tetlapouitiuij, ik non, amo moneki yetoskej itech non nechikol oksekimej tokniuan tlen amo tetlapouiskej. Ik non, non nechikol amo moneki san tikajauilmatiskej noso tikitaskej amo okachi ipati. Ijkon ken okseki nechikolmej, non se tlateochiualistli tlen techmaka Jehová uan noijki techyolchikaua pampa ma timotlasojtlakan iuan tokniuan uan ma tikchiuakan tekitl tlen kuali (Heb. 10:24, 25). Ik non, akin kiyekanas non nechikol moneki kuali ma moyektlali uan tlen kijtos ma kiueyichiua Jehová uan ma kinpaleui akinmej monechikoaj. Nochtin akinmej titetlapouiaj moneki timochijchikauaskej tiyetoskej itech non nechikol.

5. 1) Akin kiyekana tetlapouilistli, ¿tlen tekitl moneki kichiuas itech nechikol pampa akinmej tetlapouiaj? 2) ¿Ken moneki kiyekanas se tokni siuatl nechikol pampa akinmej tetlapouiaj?

⁵ Kuali ma momachti akin kiyekanas nechikol. Pampa ikaj uelis kuali moyektlalis itech se tlamachtil tlen okimakakej uan kipanoltis itech tlanechikol, moneki kiluiskej miakej tonalmej achto. Noijki ijkon moneki moyektlaliskej itech nechikol pampa akinmej tetlapouiaj. Ijkuak kisaskej tetlapouitiuij, akin kiyekana nechikol pampa akinmej tetlapouiaj noso akin kipaleuia, kiyekanas non nechikol. Pero ijkuak nochi tlanechikol san sekan kisaskej tetlapouitiuij, tlayekanki akin kiyekana tetlapouilistli moneki kipejpenas akin kiyekanas non nechikol. Sekimej tlayekankej tlen kiyekanaj tetlapouilistli kijkuiloaj itech se amatl akinmej kiyekanaskej non nechikol uan kitlaliaj itech tablero. Akin kiyekana tetlapouilistli moneki kuali mokuayejyekos ijkuak kinpejpenas akinmej kiyekanaskej nechikol, moneki kilnamikis pampa kuali mochiuas non nechikol moneki kinpejpenas san akinmej kuali tlamachtiaj uan uelis kuali kichiuaskej. Tla amo onka se tlayekanki, se siervo ministerial noso okse tokni tlakatl tlen yomoapolakti itech non tonal, akin kiyekana tetlapouilistli moneki kiluis se tokni siuatl ma kiyekana non nechikol. (Xikita tlamachtil “Ijkuak se siuatl moneki kiyekanas non nechikol”.)

6. ¿Tleka miak ipati kuali ma moyektlali akin kiyekanas nechikol pampa akinmej tetlapouiaj?

⁶ Ijkuak techiluiaj tikpanoltiskej se tlamachtil itech tlanechikol itech Tlamachtil pampa akinmej Tetlapouiaj noso itech Nechikol itech iTeki toTajtsin Dios, tikpatioitaj miak uan kuali timoyektlaliaj. Amo ikaj yikin mokuayejyekojti itech ojtli tlen kijtos itech nechikol. Ik non, ijkuak techiluiskej ma tikyekanakan nechikol pampa akinmej tetlapouiaj moneki tikpatioitaskej. Pampa non nechikol ayakmo moneki okachi uejkauas, moneki kuali timoyektlaliskej pampa uelis tikinpaleuiskej tokniuan uan amo tiuejkauaskej. Ijkuak yitikmatij kanin titetlapouitiuij, tikteititiaj kuali timoyektlaliaj.

7. ¿Tlen tlamantli uelis tlamachtis akin kiyekanas nechikol pampa akinmej tetlapouiaj?

⁷ Tlen uelis tlamachtis. Tlakeuali yolmelajki uan ixtlamatki amo nochi kijtoa tlen uelis timomachtiskej itech non nechikol, pampa tlatlamantli sejse altepetl. Itech recuadro tlen itoka “Tlen uelis timomachtiskej itech nechikol pampa akinmej tetlapouiaj”, kijtoa tlen uelis timomachtiskej. Non nechikol uelis mochiuas ken se tlamachtil iuan nochtin. Ualeua, uelis moteititis se neskayotl noso se video tlen kajki itech jw.org. Ijkuak moyektlalis tokni akin kiyekanas non nechikol, moneki mokuayejyekos itech tlen uelis kinyolchikauas uan kinpaleuis akinmej tetlapouitiuij non tonal.

8. ¿Tlen uelis timomachtiskej itech nechikol pampa akinmej tetlapouiaj itlamian semana?

⁸ Se neskayotl, itech tonal sábado miakej tokniuan kintemakaj revistas Akin Tetlapouijtok uan ¡Despertad! Miakej tokniuan tlen tetlapouiaj itech tonal sábado amo otetlapouijkej itech okseki tonalmej itech semana, ik non, uelis ayakmo kilnamikij tlen omomachtijkej itech Yoak ijkuak Kalchanejke Kiueyichiua Jehová. Ik non, tla tokni akin kiyekana nechikol pampa akinmej tetlapouiaj kiojpauia tlen kijtoa Toteki itech Tekiuajkayotl pampa kintemakaskej revistas, okachi kinpaleuis tokniuan. Noso tlamachtis ken uelis tiktemakaskej revista ika tlen opanok itech altepetl, se iluitl noso tlen uelis tikijtoskej pampa oksepa timokuepaskej tiktlajpalotiuij akin okiseli se revista. Tla itech non nechikol ompa kajki se tokni tlen yotetlapoui ika se revista, akin kiyekana nechikol pampa akinmej tetlapouiaj uelis kiluis ma kijto ken uelis tiktemakaskej noso ma kijto itlaj kuali tlen okipanok. Itech tonal domingo noijki uelis kijtos seki tlamantli itech ken uelis tikintemakaskej revistas. Noijki uelis tlamachtis ika seki amatlajkuilolmej ken Kuali tlajtolmej, Xikaki toTajtsin Dios uan amochtli Tlamachtia Biblia, uan kijtos ken uelis tikintemakaskej.

9. ¿Tlen uelis timomachtiskej itlamian semana tla tikchijtokej se tekitl tlen miak ipati?

⁹ Tla itech tlanechikol mochijtok se tekitl tlen miak ipati itech tetlapouilistli, itlamian semana, akin kiyekanas nechikol uelis tlamachtis ken uelis tikintemakaskej revistas uan amatsitsintin tlen motemakatokej, noijki kijtos ken uelis tikteititiskej timotekipachoaj intech tlaltikpaktlakamej. Noso kijtos itlaj kuali tlen ma kiteititi sapanoa ipati tekitl tlen tikchijtokej.

10, 11. ¿Tleka moneki kuali ma timoyektlalikan pampa kuali mochiuas nechikol pampa akinmej tetlapouiaj?

¹⁰ Ken moyektlaliskej akinmej tetlapouiaj. Akinmej titetlapouiaj noijki uelis titlapaleuiskej pampa kuali ma mochiua nechikol pampa akinmej tetlapouiaj. Moneki kuali timoyektlaliskej pampa titetlapouiskej, uelis itech Yoak ijkuak Kalchanejke Kiueyichiua Jehová, ijkon uelis tikintlapouiskej oksekimej tokniuan tlen otimomachtijkej. Kuali timoyektlaliskej, kijtosneki moneki yitikinpiaskej revistas uan okseki amatlajkuilolmej tlen tikintekitiltiskej ijkuak tiaskej itech nechikol pampa akinmej tetlapouiaj, ijkon amo tiuejkauaskej tiajsitiuij kanin titetlapouiskej.

¹¹ Noijki miak ipati ma tiajsiti itech non nechikol ijkuak ayamo peua, ijkon ken tikchiuaj itech okseki nechikolmej. Tla amo ijkon tikchiuaj, uelis tikinkuejsoskej noso tikintlapololtiskej tokniuan tlen ompa katej. ¿Tleka ijkon tikijtoaj? Pampa tokni tlen kiyekantok non nechikol yomokuayejyeko itech seki tlamantli pampa kinyekanas tokniuan. Se neskayotl, tla amo miakej tokniuan omonechikojkej, uelis ikaj kititlanis kanin ayamo tlamij tetlapouiaj. Uan tla sekimej tokniuan kipiaj carro uelis kintitlanis iuan akinmej amo kipiaj pampa ajsitiuij kanin tetlapouiskej. Tla kanin tetlapouiskej sapanoa amo yolkualmej tlaltikpaktlakamej, uelis kintitlanis sekimej tokniuan tlakamej ma tetlapouikan kanin yetoskej tokniuan siuamej. Tokniuan tlen mokokoaj uelis kintitlanis kanin ixtlauak noso kanin amo tlejkolistli. Uan tokniuan tlen yikin peuaj tetlapouiaj uelis kintitlanis iuan akinmej okachi yikimatij ken tetlapouiskej. Pero tla se tokni amo niman ajsiti, uelis oksepa nochi kipatlas tlen yokijto. Ualeua, melauak amo uelis niman tiajsitiuij, pero tla nochipa ijkon tikchiuaj moneki timotlajtlaniskej kox amo okachi tikpatioitaj non nechikol noso moneki okachi kuali timoyektlaliskej.

12. Tla nochipa timokauaj iuan ikaj titetlapouiskej, ¿tlen moneki tikchiuaskej?

¹² Sekimej tokniuan mokauaj iuan se tokni pampa tetlapouitiuij uan oksekimej mochiaj ma kinmiluikan akin iuan tetlapouiskej. Tla nochipa titetlapouiaj san iuan sekimej tokniuan amo tikteititiaj okachi ‘titetlasojtlaj’, ik non, moneki ma titetlapouikan iuan nochtin tokniuan uan amo san iuan akinmej okachi timouikaj (2 Cor. 6:11-13). Akinmej yikin peua tetlapouiaj uelis tikinmiluiskej inmiuan titetlapouiskej pampa tikinpaleuiskej okachi kuali ma tetlapouikan (1 Cor. 10:24; 1 Tim. 4:13, 15). Kuali ma tikkakikan nochi tlen techiluiskej, ken kanin tipeuaskej titetlapouiskej. Uan ijkuak tlamis non nechikol, amo ma tikpatlakan tlen yotechiluijkej uan san niman ma tiakan kanin titetlapouiskej.

13. Tla nochtin kuali timoyektlaliaj, ¿ken techpaleuis nechikol pampa akinmej tetlapouiaj?

¹³ Ijkuak Jesús okintitlanki 70 imachtijkauan ma tetlapouitij, yejuan “omokopatoh ika miak pakílistli” (Luc. 10:17). Pampa Jesús omonechiko iuan imachtijkauan, melauak okinpaleui pampa kuali ma tetlapouikan. Itech ninmej tonalmej, nechikol pampa akinmej tetlapouiaj noijki sapanoa techpaleuia. Tla nochtin kuali timoyektlaliaj, okachi techyolchikauas, techmachtis uan techyekanas pampa “motetlapowis itech nochi n tlaltíkpaktli” kuali tlajtolmej (Mat. 24:14).