Tlen moneki tikilnamikiskej itech ueyi nechikol
Tlen hora mochiuas. Kanin mochiuas ueyi nechikol titlatlaposkej kualkan a las 8:00. Tlakuikali tlen ika peua ueyi nechikol peuas kualkan a las 9:20, nochi eyi tonalmej. Ijkuakon nochtin moneki timotlaliskej pampa ueyi nechikol peuas ken moneki. Viernes uan sábado ueyi nechikol tlamis tiotlak kanaj a las 5:00 uan domingo tiotlak kanaj a las 4:00.
Ma tikueyichiuakan Jehová ika tlakuikalmej. Yiuejkika, ialtepe toTajtsin Dios okiueyichiuayaj ika tlakuikalmej, ik non, itech ninmej tonalmej noijki miak ipati tiktekitiltiskej tlatsotsonalistli ijkuak tikueyichiuaj Jehová (Sal. 28:7). Itech uejueyij nechikolmej, nochipa peuaj ika se tlatsotsonalistli. Nin tlatsotsonalistli amo san kiteititia yipeuas nechikol, okachi kuali, techyektlalia pampa kuali timomachtiskej uan tikueyichiuaskej Jehová. Ik non, ijkuak tokni tlen kiyekana ueyi nechikol kijtoa yipeuas ika se tlatsotsonalistli, moneki ma timotlalikan uan kuali ma tikkakikan non tlatsotsonalistli, uan ayakmo timotlapouiskej iuan tokniuan. Tla ijkon tikchiuaj, tikteititiaj tikpatioitaj tlen kichiuaj tokniuan pampa kinchiuaj tlatsotsonalmej itech Watchtower. Pampa yejuan ojpa itech se xiuitl, tlakamej uan siuamej, kimotlaxtlauiliaj inpasaje pampa yaskej itech altepetl Patterson (Nueva York) pampa kinchiuatiuij kuajkualtsitsintin tlatsotsonalmej tlen techyolpaktia. Satepan, ijkuak yotikakej non tlatsotsonalistli, nochtin moneki tiktlakuikiliskej Jehová pampa tikueyichiuaskej.
Kanin mokauaskej carros. Amo itlaj kitlaxtlauaskej ijkuak tejuan tikyekanaskej ompa, tikintlalijtiaskej ken ajsitiuij. Ken amo onka miak kanin kikauaskej carros, timitsyoleuaj tla uelis oksekimej yaskej mouan xikinuika. Akinmej amo uelij nejnemij noso itlaj ouijkayotl kipiaj uelis kikauaskej incarros kanin ijkon kijtoa san moneki kipiaskej se amatl kanin kijtoa non noso placa de matrícula pampa akinmej amo uelij nejnemij.
Kanin timotlalis. Ijkuak kitlaposkej kali, amo san niman ma timotlalokan pampa tiktlaniskej kanin okachi techpaktia timotlaliskej. Tejuan tikauaskej oksekimej kuali ma momachilikan uan amo san tejuan. Ijkon moixmatij akinmej melauak kichiuaj ken Cristo uan nin kichiua akinmej techitaj ma kiueyichiuakan Jehová (Juan 13:34, 35; 1 Cor. 13:5; 1 Ped. 2:12). San uelis tikinxelilis kanin motlaliskej akinmej chantij mouan, yauij mouan itech carro noso akinmej tikinmachtijtok ika Biblia. Timitstlatlaujtia amo xiktlali tlamantli itech sillas tlen amo otikinxelo. Tla ijkon tikchiua oksekimej uelis ompa motlaliskej. Ken amo onka miak kanin uelis motlaliskej akinmej mokokoaj, youeuejtikej noso yokokoxkatikej, ualeua amo uelis motlaliskej ompa nochtin ikalchanejkauan. Timitstlatlaujtiaj, xikkaua tokniuan akinmej mokokoaj, yokokoxkatikej noso youeuejtikej ompa ma motlalikan uan noijki akinmej kinpaleuiaj.
Kuali ma timotlakentikan. Moneki kuali timotlakentiskej itech ueyi nechikol, uan amo moneki timotlakentiskej ken motlakentiaj nochtin tlaltikpaktlakamej (1 Tim. 2:9). Noijki moneki timotlakentiskej kuali ijkuak tiajsitiuij hotel noso ijkuak yitiaskej tipaxialotiuij. Ijkon kuali timomachiliskej tikuikaskej amatsintli kanin kijtoa tikpiaj se ueyi nechikol, uan ika miak yolpakilistli titetlapouiskej ijkuak uelis. Tla kuali tinemij uan kuali timotlakentiaj itech ueyi nechikol tlen tikpiaskej, amo san oksekimej tlaltikpaktlakamej kinekiskej momachtiskej itech Biblia, noijki kiyolpaktis Jehová (Sof. 3:17).
Ma titetlakaitakan ijkuak tiktekitiltiskej tocelular noso totableta. Tikteititiaj titetlakaitaj ijkuak tiktlaliaj tocelular noso totableta amo ma mokaki pampa amo ikaj ma kitlapololti. Tla tiktekitiltia cámara, video cámara, tableta noso okse tlamantli, moneki tiktekitiltis ken amo ma kintlapololti oksekimej noso tikintsakuilis amo kuali ma tlachiakan. Noijki tikteititiaj titetlakaitaj ijkuak amo tiktitlanij correos tla amo moneki.
Tlakuali. Okachi kuali ma tikuikakan totlakual pampa amo tikisaskej tikkouatiuij tlajko tonal. Uelis tikuikaskej itech itlaj tlen amo okachi ueyi, tlen uelis akis itlampa silla kanin timotlaliaj. Amo uelis tikuikas itlaj tlen sapanoa ueyi nion uelis tikuikas motlakual itech itlaj tlen uelis tlapanis.
Tomin. Uelis tikteititiskej tiktlasojkamatiliaj Jehová tlakuali tlen techmaka tla tiktemakaj tomin pampa ma mochiua toteki itech nochi Tlaltikpak. Akinmej kitemakaskej cheques uelis kichiuaskej ika tokayotl La Torre del Vigía, A.R. Noijki uelis kitemakaskej tomin ika tarjetas de débito uan crédito itech seki uejueyij nechikolmej.
Pajtli. Tla tejuatsin tikonitok seki pajtli, moneki tikinuikas, pampa itech ueyi nechikol amo tikpiaj non pajtli. Tla tikpia diabetes uan tiktekitiltia akuxa noso jeringas, moneki tikintlamotlas pero moneki kuali tikchiuas pampa amo itlaj kinpanos oksekimej tokniuan. Amo xikintlamotla kanin tiktlaliaj tlajsoli itech ueyi nechikol nion kanin timokalotis noso itech hotel.
Pampa amo itlaj ma techpano. Miak ipati ma timomaluikan pampa amo ma tiuetsikan nion itlaj ma techpano. Nochi xiuitl miakej tokniuan mokojkoaj pampa kiuikaj zapatos tlen kipiaj sapanoa uejueyij tacones. Okachi kuali ma kiuikakan zapatos tlen kinpaleuis pampa uelis tlejkoskej itech escaleras, rampas uan amo itlaj kinpanos.
Akinmej amo kuali tlakakij. Itech seki uejueyij nechikolmej mopanoltis itech radio (FM), mokakis san kanin mochiuas ueyi nechikol. Pampa uelis tikkakis san moneki tikuikas se radio tlen amo ueyi uan tlen tekiti ika pilas uan tikakis ika audífonos.
Coches tlen ika kinuikaj konemej uan sillas. Amo moneki kinuikaskej konemej ika coches noso carritos tlen ika kinuikaj nion moneki kinuikaskej sillas kanin mochiua ueyi nechikol. Uelis kinuikaskej sillas pampa ma motlalikan konemej tla sillas mokitskiskej itech sillas tlen ompa yetoskej.
Perfumes. Miakej uejueyij nechikolmej mochiuaj itech kalmej tlen tsaktokej. Ik non, miak ipati amo ma tiktekitiltikan miak perfume pampa tla tikmotlaliliaj miak nin uelis kichiuas oksekimej tokniuan ma mokokokan (1 Cor. 10:24).
Kanin kinemakaj tlakuali. Ijkuak kuali tinemij kanin kinemakaj tlakuali kichiua oksekimej ma kiueyichiuakan Jehová. Ijkuak titlakuati moneki timotlakentis ken akinmej kichiuaj ken Cristo. Xikkaua seki tomin tlen ika tikintlasojkamatilis akinmej ompa tekitij, tla ijkon kichiuaj ompa.
Kanin mokalotiskej noso hoteles.
Amo xikinxelo miakej cuartos tla amo tikintekitiltis, noijki amo ma mokauakan miakej itech se cuarto.
Amo xikijto ayakmo timokalotis ompa, pero tla moneki tikchiuas timitstlatlaujtiaj xikchiua miak tonalmej achto pampa ijkon oksekimej uelis mokauaskej ompa (Mat. 5:37). Tla tikchiuas, xikijkuilo número tlen omitsmakakej ijkuak otikijto ayakmo ompa timokauas. Tla 48 horas achto tikijtos ayakmo timokalotis, hotel ayakmo mitsmakas motomin.
Xikilnamiki tla itech hotel tiktlaxtlauas ika tarjeta de crédito noso de débito, hotel kimokauis seki tomin pampa nochi tlen uelis panos itech cuarto. Amo uelis tiktekitiltis non tomin, pero ijkuak yitikisas kema mitsmakaskej.
Uelis tiktekitiltis carrito tlen ika tikuikas momaletas tla nochi yotitlayektlali, ijkuak ayakmo tiktekitiltis san niman xikkauati pampa oksekimej noijki uelis kitekitiltiskej.
Uelis tikmakas seki tomin akin mitspaleuis ika momaletas uan noijki akin tlachipauas mocuarto, tla ijkon kichiuaj ompa.
Uelis titlakualchiuas kanin tikochi tla omitsiluijkej uelis tikchiuas.
Tla kanin timokalotis mitsmakaj tlakuali, cafe noso okseki tlamantli, amo xikuika.
Ijkuak timotlapouis iuan akinmej tekitij itech hotel moneki tikteititis kuali monemilis. Xikilnamiki noijki miakej ompa mokalotijtokej, uan yejuan mitstlasojkamatiliskej tla tikintlakaita uan amo tikualani.
Miak ipati tetajmej ma kinmaluikan inkoneuan ijkuak yetoskej itech hotel, ijkuak kitekitiltiskej ascensores, piscina, vestíbulo uan gimnasio.
Itech Lista de hoteles recomendados mota kech tiktlaxtlauas sejse tonal, pero amo moijtoa kech tiktlaxtlauas impuestos. Tla mitsiluiaj okachi xitlaxtlaua, amo xikchiua uan san niman xikinmilui tokniuan akinmej Kitemoaj kanin Mokalotiskej tokniuan itech ueyi nechikol.
Tla itlaj tlapanoa kanin timokalotijtok, san niman xikinmilui tokniuan akinmej Kitemoaj kanin Mokalotiskej tokniuan itech ueyi nechikol.
Akinmej kinekij tlapaleuiskej. Nochtin akinmej kinekij tlapaleuiskej moneki kinmiluiskej tokniuan akinmej tekitij itech Akinmej kinekij tlapaleuiskej. Akinmej ayamo kipiaj 16 xiuitl moneki tekitiskej iuan intatajuan, noso ikaj tlen moneki kinmaluis.