Pampa okachi kuali titetlapouiskej: ma tikinpaleuikan akinmej yikin peuaskej tetlapouiskej

Tleka miak ipati. Akinmej yikin mochiuaskej imachtijkauan Jesús, moneki ma ‘tikinmachtikan ma kichiuakan nochi tlen otechnauati Jesús’ nin kijtosneki tikinmachtiskej tlaltikpaktlakamej tlen melauak (Mat. 28:19, 20, TNM). Miakej akinmej yikin peuaskej tetlapouiskej uelis yipanoaj itech Tlamachtil pampa Akinmej Tetlapouiaj uan noijki uelis yikintlapouiaj inkalchanejkauan noso inyolikniuan. Pero pampa yejuan kipatioitaj miak tlen momachtijtokej uan kimatokej Jehová kineki nochtin tlaltikpaktlakamej ma kimatikan tlen melauak, kinekiskej tetlapouiskej (Rom. 10:13, 14). Ijkuak kinmiluiskej yiuelis tetlapouiskej iuan tlanechikol, moneki kuali ma tikinmachtikan pampa kinpaleuis amo ma momojtikan uan ijkon kiteititiskej moskaltijtok intlaneltokilis (Luc. 6:40).

Ken uelis tikchiuaskej:

Xikpaleui akin yikin peuas tetlapouis ma kinpia amatlajkuilolmej tlen ika tetlapouis uan tlamachtis. Xikititi tlen kiuikas uan noijki xikyekilui ken motekitiltiaj amatlajkuilolmej.
Iuan xikpejpena se tlamachtil itech Toteki itech Tekiuajkayotl uan ximomachtikan ken nantetlapouiskej. Xiktekitiltikan noijki amochtli Benefíciese itech página 82 uan xikpejpenakan tlen tlamachtil uelis namechpaleuis kanin nantetlapouiaj. Xikpaleui ma tetlapoui ika itlajtoluan. Noijki xikyekilui tleka moneki kuali ma motlakenti uan ma moyejyektlali (2 Cor. 6:3, 4).
Moneki xikmachtijto. Xikititi tarjeta tlen kiteititia kanin nantetlapouiaj uan xikmachti ken kitekitiltis Amatl tlen motemitia ijkuak titetlapouiaj tla ikaj kineki okachi kimatis. Xikmachti ijkuak tetlapouis ma kitekitilti jw.org uan amatlajkuiloltsin Buenas nuevas para gente de todas las naciones. Xikpaleui ma kita miak ipati kimachtis ikaj tlen kineki okachi kimatis (1 Cor. 3:6).
Amo ximosotlaua uan xikilui kuali tekitl kichijtok (Prov. 25:11). Xikmachti ika moneskayo. Akin yikin peuas tetlapouis amo keman kilkauas ken otikpaleui uan ken tiyolpaki titetlapouis kuali tlajtolmej.

Xikchiua nin itech nochi metstli:

Iuan xitetlapoui inkalijtik tlaltikpaktlakamej uan xikyoleua mouan ma uia pampa nankimachtitiui akin okachi kineki kimatis tlen melauak. Tla amo ikaj tikmachtia, xikyoleua se tokni tlen okachi kuali moneki tetlapouis mouan ma tetlapouiti.