¿Ken tikintekitiltiskej grabaciones ika audio?
1. ¿Tlen okse tlapaleuilistli tikpiaj?
1 Itech página tlen tikpiaj itech Internet www.jw.org/ncx, miakej tlaltikpaktlakamej kinpaleuia ijkuak kintlajtoltiaj amatlajkuilolmej tlen kinpaktia uan melauak (Ecl. 12:10). Pero ¿tejuatsin yotikinkak grabaciones ika audio? Miakej amatlajkuilolmej katej ika audio itech página tlen tikpiaj itech Internet. ¿Ken techpaleuiaj?
2. ¿Ken uelis techpaleuiskej grabaciones ijkuak toselti timomachtiaj noso iuan tokalchanejkauan?
2 Ijkuak toselti timomachtiskej noso iuan tokalchanejkauan. Tla tikinkakij grabaciones itech Biblia, revistas noso okseki amatlajkuilolmej ijkuak kanaj tiauij noso ijkuak itlaj tikchijtokej, okachi kuali tiktekitiltiaj kauitl (Efes. 5:15, 16). Ijkuak tikueyichiuaj Jehová ken kalchanejke uelis tikkaktoskej se grabación uan tiktlajtoltijtiaskej amatlajkuilol. Uan ijkuak timomachtiaj toselti, grabaciones techpaleuiskej okachi kuali ma tiktlajtoltikan se amatl noso tla timomachtijtokej okse tlajtoli
3. Kanin titetlapouiaj, ¿akinmej uelis kinpaleuis grabaciones?
3 Ika ma titetlapouikan. Miakej akinmej tikintlapouiaj kijtoaj amo majxiliaj kitlajtoltiskej se amatlajkuilol, pero uelis kinekiskej kikakiskej se grabación. Oksekimej tlajtoaj okse tlajtoli uan tla kikakij se grabación ika intlajtol, kinekiskej kikakiskej kuali tlajtolmej itech Tekiuajkayotl (Hech. 2:6-8). Itech seki altepemej kitaj miak ipati ma tlakakikan. Se neskayotl, akinmej moixmatij ken hmong yejuan kipiaj costumbre san kintlapouiskej inkoneuan uan ijkon kilnamikij tlen kikakij. Noijki itech ueyi altepetl África, tlaltikpaktlakamej kinpaktia kikakiskej tlapoualismej pampa ika momachtiskej.
4. Ijkuak tikintekitiltiskej grabaciones ika audio itech tetlapouilistli, ¿tlen moneki achto timotlajtlaniskej?
4 Ximokuayejyeko ik kanin titetlapouia, ¿uelis ikaj tiktlalilis se grabación pampa ma kikaki ika itlajtol? ¿Tikixmati ikaj akin uelis kipaleuis se grabación tlen uelis tiktitlanilis itech correo electrónico? ¿Uelis tikkixtis se grabación uan tiktlalis itech se disco uan noijki tikuikilis amatlajkuilol akin kineki kimatis okachi? Tla tiktemakaj se amatlajkuilol ika formato electrónico ken se amochtli, amatlajkuilol, amatsintli noso se revista uelis tikijkuiloskej itech amatsintli Tekitl tlen omochi itech tetlapouilistli. Grabaciones ika audio amo okinchijchijkej san pampa tejuan ika timomachtiskej, noijki pampa ika titetlapouiskej tlen melauak itech Tekiuajkayotl (1 Cor. 3:6).