Ma titlapaleuikan para tikintlapouiskej akinmej tlajtoaj okse tlajtoli

Ijkuak oksekimej tikintlapouiaj ika intlajtol itech iTekiuajkayo toTajtsin Dios okachi kuali techkakij. Xamo, ik non, itech Pentecostés xiuitl 33 Jehová okichi miakej judíos yolkualmej “de nochi lado de nin tlaltíkpaktli” ma kikakikan kuali tlajtolmej ika tlajtoli tlen okachi kuali okimatiayaj, maski nochtin okajsikamatiayaj hebreo noso griego (Hech. 2:5, 8). Axkan katej tlanechikolmej ika tlatlamantli tlajtolmej tlen tetlapouiaj kanin oksekimej tokniuan noijki tetlapouiaj. ¿Tlen moneki kichiuaskej tokniuan para nochtin kintlapouiskej uan ijkon amo san motonalpoloskej nion kinkuejsoskej akinmej ompa chantij?

• 

  Ma motlapouikan (Prov. 15:22): Tokniuan tlen kiyekanaj tetlapouilistli moneki motlapouiskej uan kitaskej ken okachi kuali titetlapouiskej. Xamo tlanechikolmej ika okse tlajtoli amo kinekiskej ma titetlapouikan kanin yejuan tetlapouiaj porque amo miakej ompa chantij. Tla kanin tetlapouiaj sapanoa ueyi uan amo ueli nochtin kintlapouiaj, xamo kinekiskej nochtin ma tikintlapouikan uan tla tikajsij akin kimati okse tlajtoli uan kineki momachtis ma tikinmiluikan tokniuan (od-S pág. 93 párr. 37). Noijki, xamo kinekiskej ma tikinpaleuikan ma kinmajsikan akinmej tlajtoaj intlajtol, moneki tikijkuiloskej kanin chantij uan ijkon uelis kintemoskej (km-S 7/12 pág. 5, recuadro). Moneki tikilnamiktoskej akinmej san sekan chantij ualeua amo tlajtoaj san se tlajtoli. Itech toaltepe katej tlanauatilmej uan moneki tikintlakamatiskej, ik non, amo san akin tikiluiskej kanin chantij akinmej otikinmajsikej.

• 

  Ma timopaleuikan (Efes. 4:16): Moneki tiktlakamatiskej tlen techiluia akin kiyekana tetlapouilistli. ¿Tikmachtiaj ikaj tlen tlajtoa okse tlajtoli? Xamo okachi kipaleuis tla kimachtis se tokni tlen kajki itech se tlanechikol kanin tlajtoaj ken ye.

• 

  Ma timoyektlalikan (Prov. 15:28; 16:1): Tla tikajsi ikaj akin tlajtoa okse tlajtoli kanin titetlapouia, ximochijchikaua tikmatiltis kuali tlajtolmej. Para timoyektlalis ximokuayejyeko tlen tlajtolmej kimatij akinmej chantij kanin titetlapouia, xikintemo videos uan Biblia ika nonmej tlajtolmej. Noijki xiktekitilti aplicación JW Language para tikmatis ken titetlajpalos ika okseki tlajtolmej.