Okachi kuali ma timomachtikan Biblia

¿TLEKA MIAK IPATI? Ijkuak timomachtiaj iTlajtol toTajtsin Dios techpaleuia ma tikajsikamatikan “kenijki saikpanoa patlawak weyak wejkatla iwa wejkapa” tlen melauak (Efes. 3:18). Noijki techpaleuia amo ma tikchiuakan ken akinmej amo kitekichiuiliaj Jehová uan ma tikchiuakan tlen timomachtiaj (Filip. 2:15, 16). Tejuan uelis tikitaskej tlen moneki timomachtiskej. ¿Ken uelis okachi kuali tiktlajtoltiskej uan timomachtiskej Biblia?

¿KEN TIKCHIUASKEJ?

• Ma tiktlapaluikan seki versículos uan ma tikijkuilokan tlen okachi ipati, ijkon uelis tikchiuaskej tla tikpiaj Biblia ika amatl noso ika formato electrónico.

• Ijkuak tiktlajtoltiaj, ma timokuayejyekokan uan ma tikinnankilikan ninmej tlajtlanilmej: “¿akin?”, “¿tlen?”, “¿kanin?”, “¿keman?”, “¿ken?” uan “¿tleka?”.

• Ma titlatemokan itech amatlajkuilolmej tlen tikinpiaj uan itech jw.org. Uelis titlatemoskej ika tlamachtilmej noso ika versículos.

• Ma timokuayejyekokan ken techpaleuis tlen timomachtiaj.

• Nochipa ma tikchiuakan tlen timomachtiaj (Luc. 6:47, 48).

IJKUAK YOTIKITAK VIDEO OKACHI TIKNELTOKASKEJ ITLAJTOL TOTAJTSIN DIOS TLA TIMOMACHTIAJ, XIKINNANKILI NINMEJ TLAJTLANILMEJ:

• ¿Tlen kijtoaj sekimej, ken techpaleuia timomachtiskej Biblia?

• ¿Tleka moneki timotlatlaujtiskej ijkuak timomachtiskej Biblia?

• ¿Tlen okachi techpaleuis ma tikajsikamatikan tlen kijtoa Biblia?

• ¿Ken uelis tiktlapaluiskej ijkuak timomachtiaj Biblia?

• ¿Tleka miak ipati timokuayejyekoskej tlen timomachtia?

• ¿Tlen moneki tikchiuaskej ijkuak yotimomachtijkej?