OKACHI KUALI MA TITLAMACHTIKAN | XIYOLPAKI IJKUAK TITETLAPOUIA
Ma tikinpaleuikan ma momachtikan
Akinmej tikinmachtiaj uelis kixmatiskej Jehová uan uelis kipiaskej chikauak intlaneltokilis tla okachi momachtiaj Biblia (Mat. 5:3; Heb. 5:12-6:2). Moneki kimatiskej ken momachtiskej Biblia.
Akinmej peua tikinmachtia xikinmititi ken achto yejuan uelis momachtiskej uan xikinyoleua ijkon ma kichiuakan (mwb18.03 pág. 6). Xikinyekilui tleka ma motlatlaujtikan ijkuak peuaskej momachtiskej. Xikinmititi tlen kinpaleuis uan nochipa ma kitakan tlen kajki itech jw.org uan JW Broadcasting®. Xikinpaleui para ma momatikan mojmostla ma kitlajtoltikan Biblia, ma momachtikan para ijkuak monechikoskej iuan tokniuan uan para kimatiskej tlen motlajtlaniaj. Xikinpaleui ma mokuayejyekokan tlen momachtiaj.
IJKUAK YOTIKITAK VIDEO MA TIKINPALEUIKAN AKINMEJ TIKINMACHTIAJ KEN MOMACHTISKEJ, XIKINNANKILI NINMEJ TLAJTLANILMEJ:
¿Ken okipaleui Ana Coral ma kajsikamati okachi ipati momachtis uan amo san kajsis intlanankilis tlajtlanilmej?
¿Ken okajsikamatki Coral Jehová amo kineki ma tiauilnemikan?
Xikinpaleui akinmej tikinmachtia ma kajsikamatikan uan ma kichiuakan tlen momachtiaj.
¿Ken okajsikamatki Coral ken moneki timokuayejyekoskej?