Jehová kinyolitis akinmej yoixpolikej uan ijkon kiteititia techtlasojtla, ixtlamatki uan kimati mochias

1. ¿Tleka opejki tlachijchiua Jehová?

ACHTO Jehová okatka iselti pero amo omoyolkokouaya uan amitlaj okipolouaya. Ye tetlasojtla, ik non, okinekiaya ma tiyoltokan uan ma tiyolpakikan uan opejki tlachijchiua (Sal. 36:9; 1 Juan 4:19).

2. ¿Ken omomachili Jehová uan ángeles ijkuak Jehová okichijchi nochi tlen onka?

² Jehová achto okichijchi Jesús. Satepan Jehová uan Jesús okichijchijkej “nochi tlan onka” uan noijki okinchijchijkej sapanoua miakej ángeles (Col. 1:16). Jesús oyolpakik okipaleui iTajtsin (Prov. 8:30). Ángeles noijki sapanoua oyolpakej ijkuak okitakej Jehová uan Jesús okichijchijkej iluikak uan tlaltikpak. ¿Tlen okichijkej ángeles? Biblia kijtoua “opejkej chikauak tsajtsij uan momatlaxkalouaj” uan okiueyichijkej Jehová hasta ijkuak otlanki okichijchi Adán uan Eva (Job 38:7; Prov. 8:31). Nochi tlen okichijchi Jehová kiteititia techtlasojtla uan ixtlamatki (Sal. 104:24; Rom. 1:20).

3. Ijkon ken kijtoua 1 Corintios 15:21, 22, ¿ken techpaleuia Jesús topatka omotemakak?

³ Jehová okinekiaya nochipa ma tichantikan ipan nin tlaltikpak. Pero Adán uan Eva okixnamikej inTajtsin akin sapanoua okintlasojtlaya. Ik non, “tlajtlákoli okalak itech nin tlaltíkpaktli iwa okualík mikílistli” (Rom. 5:12). ¿Tlen okichi Jehová? San niman okitematilti ken techmakixtiskia (Gén. 3:15). Jehová okijto kitemakaskia iKone uan ijkon nochtin ixuiuan Adán uan Eva kinmakixtiskia imak tlajtlakoli uan mikilistli. Ijkon nochtin uelis kipejpenaskej kox kitekichiuiliskej toTajtsin Dios uan kox kinekij nochipa yoltoskej (Juan 3:16; Rom. 6:23; xiktlajtolti 1 Corintios 15:21, 22).

4. ¿Tlen timomachtiskej?

⁴ ToTajtsin Dios yokijto kinyolitis akinmej yoixpolikej pero xamo timotlajtlaniaj: ¿Ken kinyolitis Jehová akinmej yoixpolikej? ¿Kox ok tikinmixmatiskej akinmej kinyolitiskej? ¿Tleka sapanoua tiyolpakiskej ijkuak kinyolitiskej akinmej yoixpolikej? Jehová kinyolitis akinmej yoixpolikej, ¿ken techititia ijkon ye tetlasojtla, ixtlamatki uan kimati mochias?

¿KEN KINYOLITIS JEHOVÁ AKINMEJ YOIXPOLIKEJ?

5. ¿Tleka amo san se tonal kinyolitiskej nochtin akinmej yoixpolikej?

⁵ Jehová kitekitiltis Jesús uan sapanoua miakej kinyolitiskej. Pero xamo amo nochtin san se tonal kinyolitiskej. ¿Tleka ijkon tikijtouaj? Porque tla nochtin san se tonal kinyolitiskej, amo kimatiskej tlen kichiuaskej. Jehová amo kipaktiskia ijkon ma pano. Porque ye kipaktia nochi kuali kichiuas uan nochtin kuali ma yetokan (1 Cor. 14:33). Jehová okiteititi ixtlamatki uan kimati mochias ijkuak otechchijchiuilijtia tlaltikpak uan Jesús okipaleui. Jesús kiteititis ixtlamatki uan kimati mochias ijkuak tlanauatis mil xiuitl. Kinpaleuis akinmej momakixtiskej itech Armagedón ma kiyektlalikan tlaltikpak uan ijkon kinseliskej akinmej kinyolitiskej.

6. Ijkon ken kijtoua Hechos 24:15, ¿akinmej kinyolitiskej?

⁶ Kipiaskej miak tekitl akinmej momakixtiskej itech Armagedón porque kinmachtiskej akinmej kinyolitiskej. ¿Tleka kinmachtiskej? Porque Biblia kijtoua kinyolitiskej miakej “akimeh otlájtlakolchijkeh” noso akinmej amo yolmelauakej (xiktlajtolti Hechos 24:15). Moneki kipatlaskej innemilis tla kinekij ma kinpaleui tlen okichi Cristo. Yetos miak tekitl porque tikinmachtiskej akinmej kinyolitiskej ma kixmatikan toTajtsin Dios. ¿Tikinmachtiskej ken axkan tikchiuaj? ¿Kinmiluiskej kanin monechikoskej uan kinmititiskej ken kinmachtiskej tlen satepan kinyolitiskej? Ma timochiakan porque amo tikmatij ken kichiuaskej. San tikmatij ijkuak ajsis mil xiuitl “tlaltikpak tentos ika itlamatilis Jehová” (Is. 11:9). Sapanoua miak tekitl yetos non mil xiuitl.

7. ¿Tleka yolik tikinpaleuiskej akinmej kinyolitiskej?

⁷ Nochi non mil xiuitl itekipanojkauan Jehová ok kipatlatoskej inyelis tla kinekij kiyolpaktiskej. Ik non, moneki yolik kinpaleuiskej akinmej kinyolitiskej ma kipatlatiakan inyelis uan ma kichiuakan tlen Jehová kineki (1 Ped. 3:8). Akinmej kinyolitiskej kinekiskej kiueyichiuaskej Jehová ijkuak kitaskej tokniuan yolyamankej uan noijki kipatlatoskej innemilis porque kinekij kiyolpaktiskej toTajtsin Dios (Filip. 2:12).

¿KOX OK TIKINMIXMATISKEJ AKINMEJ KINYOLITISKEJ?

8. ¿Tleka akinmej kinyolitiskej kinmixmatiskej infamilia uan inyolikniuan

⁸ Onka miak tlamantli tlen kiteititia uelis tikinmixmatiskej akinmej kinyolitiskej. Ijkon ken Jehová okinyoliti yiuejkika sekimej, kiteititia akinmej kinyolitis mokuayejyekoskej uan tlajtoskej ken achto okatkaj uan noijki ken omotayaj. Noijki Jesús okijto ijkuak ikaj ixpoliui yetoskia ken ijkuak kochi uan ijkuak kiyolitiskej yetoskia ken ijkuak ikaj kijxitiaj (Mat. 9:18, 24; Juan 11:11-13). Ijkuak ikaj kijxitiaj amo kipatla ken tlajtoua, ken mokuayejyekoua uan noijki mota ken ijkuak okochito. Ma tikitakan tlen okipanok Lázaro. Ijkuak Jesús okiyoliti yokipiaya naui tonal oixpoliuik uan itlalnakayo yopalantoka. Ikniuan totoka okixmatkej uan ye noijki okinmixmatki (Juan 11:38-44; 12:1, 2).

9. ¿Tleka akinmej kinyolitiskej ok yetoskej tlajtlakolejkej?

⁹ Jehová noijki okijto ijkuak tlanauatis Cristo amikaj kijtos: “Nimokokoua” (Is. 33:24; Rom. 6:7). Kinmakas yankuik intlalnakayo akinmej kinyolitis. Pero ok yetoskej tlajtlakolejkej tlamo amo kinmixmatiskej infamilia uan inyolikniuan. Mil xiuitl ijkuak tlanauatis Cristo nesi ayakmo yetoskej tlajtlakolejkej. Jesús kimaktilis Tekiuajkayotl Jehová ijkuak tlamis mil xiuitl. Ijkuakon Jesús tlamis kichiuas tlen kineki toTajtsin Dios uan ayakmo ikaj yetos tlajtlakole (1 Cor. 15:25-28; Apoc. 20:1-3).

¿TLEKA SAPANOUA TIYOLPAKISKEJ IJKUAK KINYOLITISKEJ AKINMEJ YOIXPOLIKEJ?

10. ¿Tlen tikchiuaskej ijkuak kinyolitiskej akinmej tikintlasojtlaj?

¹⁰ Ma timokuayejyekokan tlen tikchiuaskej ijkuak kinyolitiskej akinmej tikintlasojtlaj. ¿Tiuetskaskej? ¿Tichokaskej? ¿Tiyolpakiskej uan tiktlakuikiliskej Jehová? Amo tikmatij tlen tikchiuaskej pero okachi tiktlasojtlaskej Jehová uan iKone porque yejuan kinyolitiskej akinmej tikintlasojtlaj.

11. Ijkon ken okijto Jesús itech Juan 5:28, 29, ¿tlen kiseliskej akinmej kintlakamatiskej itlanauatiluan toTajtsin Dios?

¹¹ Noijki yolpakiskej akinmej kinyolitiskej porque kipatlaskej inyelis uan kintlakamatiskej itlanauatiluan toTajtsin Dios. Akinmej kipatlaskej inyelis “moyolitiskeh iwa [amo] ok ayik mikiskeh”. Pero Jehová amo kinkauilis ma yetokan itech xochitlali akinmej kixnamikiskej (xiktlajtolti Juan 5:28, 29; Is. 65:20).

12. ¿Ken kinteochiuas Jehová nochtin akinmej chantiskej tlaltikpak?

¹² Ijkuak ualtlanauatis iTekiuajkayo toTajtsin Dios nochtin kitaskej mochiuas tlen kijtoua Proverbios 10:22: “Itlateochiualis Jehová non tlen okachi tlapaleuia uan ye amo tetlajyouiltia”. Iespíritu santo Jehová kinpaleuis ma kipiakan chikauak intlaneltokilis. Nin kijtosneki kipiaskej inyelis ken Cristo uan noijki ayakmo yetoskej tlajtlakolejkej (Juan 13:15-17; Efes. 4:23, 24). Kipiaskej kuali inyelis uan chikajtoskej. ¡Sapanoua yolpakiskej! (Job 33:25). ¿Ken techyolchikaua ma timokuayejyekokan ijkuak kinyolitiskej akinmej yoixpolikej?

MA TIKPATIOITAKAN JEHOVÁ TECHTLASOJTLA

13. Ijkon ken kijtoua Salmo 139:1-4, ¿ken kiteititia Jehová kuali techixmati?

¹³ Axkan yotikitakej akinmej kinyolitis Jehová yetoskej ken achto okatkaj. ¿Tlen kijtosneki non? Jehová sapanoua techtlasojtla uan kimati tlen timokuayejyekouaj, tlen tikmachiliaj, tlen tikijtouaj uan tlen tikchiuaj. Ik non, tla monekis techyolitis, amo kilkauas tlen tikmatij, ken toyelis uan tlen timokuayejyekouaj. Tekiua David okimatiaya Jehová kuali techixmati (xiktlajtolti Salmo 139:1-4). ¿Ken timomachiliaj ijkuak tikitaj Jehová kimati nochi tlen techpanoua?

14. ¿Tleka amo ma techtekipacho Jehová kuali techixmati?

¹⁴ Amo ma techtekipacho Jehová kuali techixmati. ¿Tleka amo? Ma tikilnamiktokan Jehová sapanoua techtlasojtla uan techpatioita. Kita nochi tlen yotechpanok itech tonemilis. Non sapanoua techyolseuia. Amo keman ma timomachilikan toselti tikatej porque Jehová nochipa touan kajki uan kita ken techpaleuis (2 Crón. 16:9).

MA TIKPATIOITAKAN JEHOVÁ IXTLAMATKI

15. ¿Tleka Jehová kiteititia ye ixtlamatki?

¹⁵ Miakej momojtiaj ixpoliuiskej. Ik non, akinmej kinyekana Satanás kichiua ma momojtikan uan ma kichiuakan itlaj amo kuali. Pero amo uelis kichiuas tejuan ijkon ma tikchiuakan. Tikmatokej tla techmiktiskej akinmej techkokoliaj, Jehová techyolitis (Apoc. 2:10). Noijki tikmatij amikaj uelis kichiuas ayakmo ma timouikakan iuan Jehová (Rom. 8:35-39). Jehová kineki techyolitis uan non techititia ye ixtlamatki. Ik non, amo techmomojtiaj akinmej kinyekana Satanás maski kinekij techmiktiskej. Non techyolchikaua amo keman ma tikkuakan Jehová.

16. ¿Tlen moneki timotlajtlaniskej uan tlen kiteititis tlen titlanankiliskej?

¹⁶ ¿Tikneltokaj Jehová techyolitis maski kinekij techmiktiskej akinmej techkokoliaj? Tla tiknekij tikmatiskej, ma timotlajtlanikan: “¿Kiteititia nikneltoka Jehová nochi tlen nikpejpena nikchiuas?” (Luc. 16:10). “¿Nikteititia nikneltoka Jehová nechmakas tlen ika nimopanoltis tla okachi niktekichiuilis?” (Mat. 6:31-33). Tla ijkon tikchiuaj, non techpaleuis ma tikixnamikikan nochi ouijkayotl (Prov. 3:5, 6).

MA TIKPATIOITAKAN JEHOVÁ KIMATI MOCHIAS

17. (1) ¿Ken kiteititia Jehová kimati mochias? (2) ¿Ken uelis tikteititiskej tiktlasojkamatiliaj Jehová porque kimati mochias?

¹⁷ Jehová yokitlali tlen tonal uan tlen hora kipojpolos nochi tlen amo kuali (Mat. 24:36). Ye kineki kinyolitis akinmej yoixpolikej pero non amo kijtosneki san niman itlaj kichijtikisa (Job 14:14, 15). Ye mochixtok ma ajsi tonal ijkuak kinyolitis akinmej yoixpolikej (Juan 5:28). Ik non, ma tiktlasojkamatilikan Jehová porque kimati mochias. Non yokinpaleui miakej ma moyolkopakan uan noijki tejuan yotechpaleui (2 Ped. 3:9). Jehová kineki miakej ma kiselikan yolilistli tlen amo keman tlamis. Ik non, ma tikintemokan ‘nochteh akimeh Dios kimpejpena para mayolitokah nochipa’ uan ma kixmatikan toTajtsin Dios uan ma kitekichiuilikan (Hech. 13:48). Ijkon yejuan noijki mopaleuiskej ijkon ken tejuan.

18. ¿Tleka amo ma timosotlauakan ijkuak oksekimej kixnamikij ouijkayotl?

¹⁸ Jehová kichias ma tlami mil xiuitl uan ijkon ayakmo tikpiaskej tlajtlakoli. Pero axkan ok techtlapojpoluia. Ik non, ma tikchiuakan ken ye uan ma tikitakan tlen kuali kichiuaj oksekimej. Ma tikitakan tlen okipanok se tokni. Inamik opejki moyolkokoua uan ayakmo omonechikouaya. Ye okijto: “Sapanoua onimoyolkoko ijkuak ijkon otechpanok. Ayakmo tikchiuaskiaj tlen otikijtojkej”. Tokni mochijchikaua kitlasojtlas inamik uan noijki kiteititia kimati mochias. Kineltoka Jehová uan amo mosotlaua. Ye kita ouijkayotl ken Jehová uan kita tlen kuali kichiua inamik. Tokni okijto: “Nonamik kipia kuali iyelis uan mochijchikaua ma pajti”. Ik non, amo ma timosotlauakan ijkuak tofamiliares noso tokniuan kixnamikij ouijkayotl.

19. ¿Tlen moneki ma tikchiuakan?

¹⁹ Jesús uan ángeles oyolpakej ijkuak Jehová okichijchi tlaltikpak. Ma timokuayejyekokan ken yolpakiskej ijkuak kitaskej nochtin akinmej nikan chantiskej ayakmo yetoskej tlajtlakolejkej, kitlasojtlaskej Jehová uan kitekichiuiliskej. Noijki yolpakiskej akinmej tlanauatiskej iuan Jesús ompa iluikak ijkuak kitaskej techpaleuia tlen kichiuaj (Apoc. 4:4, 9-11; 5:9, 10). Noijki ma timokuayejyekokan ken tiyetoskej itech xochitlali ijkuak ayakmo ikaj mokokos, ayakmo ikaj moyolkokos uan ayakmo ikaj ixpoliuis. Ijkuakon ayakmo ikaj chokas porque nochtin yolpakiskej (Apoc. 21:4). Ma tikchiakan ma ajsi non tonal uan ma titetlasojtlakan ken Jehová, ma tiyetokan tiixtlamatkej uan ma tikmatikan ma timochiakan ken ye. Non techpaleuis ma tiyolpakikan maski tikixnamikiskej ouijkayotl (Sant. 1:2-4). Tiktlasojkamatiliaj Jehová kinyolitis akinmej yoixpolikej (Hech. 24:15).