¿Okachi kuali tiyetos satepan tla tiyolkuali?

Yiuejkika miakej mokuayejyekouaj tla tiyolkualmej techpaleuia kuali ma tiyetokan satepan. Se tlakatl tlen otlamachtiaya uan okatka filósofo tlen omotokayotiaya Confucio ye oyoltoka itech 551 hasta 479 achto itech xiuitl se, ye okijto: “Amo xikinchiuili oksekimej tlen amo tikneki ma mitschiuilikan”.a Miakej tlen chantij Asia noijki ijkon mokuayejyekouaj.

TLEN KICHIUAJ MIAKEJ

Miakej kijtouaj kuali yetoskej satepan tla kichiuaj tlen kuali. Ik non, mochijchikauaj kintlakaitaskej oksekimej, kinchiuiliaj tlen kuali, kichiuaj tlen moneki kanin chantij uan kipiaj chipauak intlalnamikilis. Se siuatl tlen motokayotia Linh uan chanti Vietnam, okijto: “Onimokuayejyekouaya tla nikchiua tlen kuali uan amo nitlakajkayaua kuali niyetos”.

Satepan non siuatl kintlamaka akinmej amitlaj kipiaj uan tlen amo kipiaj inkalijtik.

Miakej kichiuaj tlen kuali porque ijkon kinmachtiaj itech inreligión. Se tlakatl itoka Hsu-Yun uan chanti Taiwan, okijto: “Onechmachtijkej tla ikaj miki uan okichi tlen kuali yolpaki uan tla okichi tlen amo kuali nochipa tlajyouijtok”.

¿TLEN KINPANOUA SATEPAN?

Ijkuak yiyouak kinapaloua ikone uan mota motekipachoua uan sotlaua.

Yotikitakej tla tikinchiuiliaj tlen kuali oksekimej kuali tiyetoskej. Pero miakej yokitakej maski kinpaleuiaj oksekimej amo kinpanoua ken yejuan okinekiayaj. Se siuatl tlen itoka Shiu Ping uan chanti Hong Kong, okijto: “Yonikitak maski tikinchiuiliaj tlen kuali sekimej, yejuan amo techchiuiliaj tlen kuali. Maski onimochijchikauaya nikinmaluis nofamilia uan nikinchiuilis tlen kuali, satepan ayakmo kuali onimouikaya iuan nonamik, ye onechkajte noselti iuan nokone”.

Miakej yokitakej maski kipiaj inreligión amo kinpaleuia kuali ma yetokan. Se siuatl tlen motokayotia Etsuko tlen chanti Japón okijto: “Ne onikpiaya noreligión uan onikinmachtiaya telpochmej uan ichpochmej. Pero onikitaya amo okichiuayaj tlen kuali, san omokualaniayaj porque okinekiayaj tlanauatiskej uan san okauiltiayaj tomin tlen okololouayaj kanin otimonechikouayaj”.

“Maski onimochijchika nikinmaluis nofamilia uan nikinchiuilis tlen kuali, satepan ayakmo kuali onimouikaya iuan nonamik, ye onechkajte noselti iuan nokone” (SHIU PING, HONG KONG)

Sekimej tlen kipiaj inreligión moyolkokouaj porque kitaj maski kinchiuiliaj tlen kuali oksekimej amo kinpaleuia. Ijkon omomachili se siuatl tlen motokayotia Van uan chanti Vietnam, ye okijto: “Akinmej oixpolikej mojmostla onikinmaniliaya: tlakilotl, xochitl uan tlakuali, onikneltokaya xamo ijkon onechteochiuaskiaj satepan. Miak xiuitl ijkon onikchi pero satepan nonamik sapanoua omokoko. Uan nochpoch tlen omomachtijtoka itech okse altepetl oixpoliuik, ye san okipiaya 20 xiuitl”.

¿TLEKA AMO SAN MONEKI MA TIYETOKAN TIYOLKUALMEJ?

Maski tikinchiuiliaj tlen kuali oksekimej non amo techpaleuiaj kuali ma tiyetokan satepan. ¿Tleka ijkon tikijtouaj? Xikita tlen kijtoua Biblia.

AMO NOCHTIN KINEKIJ KICHIUASKEJ TLEN KUALI

“Akin tlajtlakolchiua uelis kijtlakos tlen kuali” (ECLESIASTÉS 9:18).

Maski ma timochijchikauakan tikchiuaskej tlen kuali, tlen kichiuaj oksekimej uelis techijtlakos. Ken ijkuak kajki se kokolistli, xamo tikintlakamatij tekiuajkej uan ayakmo timotaj iuan oksekimej. Pero ¿tla oksekimej amo tetlakamatij? Uelis techajsis non kokolistli.

MIAKEJ AMO KIMATIJ TLEN KUALI UAN TLEN AMO KUALI

“Onka se ojtli tlen tlakatl uelis kitas kuali pero saiktlami kichiuas ma miki” (PROVERBIOS 14:12).

Miakej ijkon yokinpanok, okijtouayaj okichiuayaj tlen kuali pero satepan okajsikamatkej amo melauak ijkon okichiuayaj. Maski tiknekij tikchiuaskej tlen kuali pero tla amo kuali tikpejpenaj tlen tikchiuaskej satepan titlajyouiskej.

AMO TIKMATIJ TLEN TECHPANOS SATEPAN

“Amo nonkimatih tlan tlamochiwas mostla” (SANTIAGO 4:14).

Akinmej yolkualmej noijki ixpoliuij. Ijkuak opejki COVID-19 miakej tlen okinpaleuijkej oksekimej oixpolikej. Ma tikitakan tlen okipanok se siuatl tlen itoka Liting tlen chanti China, itajtsin oixpoliuik ijkuak oyaya itech carro. Ye okijto: “Amo onikajsikamatiaya tleka oixpoliuik tla ye okatka yolkuali. Ye okipaktiaya tekipanos okatka yolyamanki uan amo otlakajkayauaya pero san ye oixpoliuik”.

Tla akinmej yolkualmej kinpanoua tlen amo kuali, ¿tlen techpaleuis para kuali ma tiyetokan satepan? Moneki ikaj akin okachi ixtlamatki ma techpaleui para tikmatiskej tlen timotlajtlaniaj uan tlen moneki tikchiuaskej para kuali tiyetoskej satepan. ¿Akin uelis techpaleuis?

a Tla tikneki okachi tikmatis tlen otlamachti Confucio, xiktlajtolti amochtli El hombre en busca de Dios tlamachtil 7 párrafos 31 hasta 35, tlen okichijchijkej iTlaixpantijkauan Jehová. Noijki uelis tikkixtis itech www.jw.org.