Nochipa ma tikchiuakan tlen Jesús otlamachti

1. ¿Tlen uelis techpanos ijkuak peua tikintlapouiaj oksekimej tlen kijtoua Biblia?

XAMO tikilnamiki ijkuak opejki timomachtia Biblia sapanoua omitspakti uan otiknekiaya nochtin ma kimatikan. Ik non, opejki tikintlapouia mofamiliares uan moyolikniuan. Otikneltokaya kinpaleuis axkan uan satepan tlen kijtoua Biblia (Sal. 119:105). Pero xamo sapanoua otimoyolkoko ijkuak amo omitskakej.

2, 3. ¿Tlen omokuayejyekouayaj miakej tlen Jesús okichiuaya uan otetlapouiaya?

² Miakej amo kineltokaskej tlen tikinmiluiskej. Ijkon okipanok Jesús, maski okichi milagros sekimej amo okineltokakej Jehová okipaleuijtoka uan amo itech otlaneltokakej. Ijkuak Jesús okiyoliti Lázaro teopixkej amo okineltokayaj ye okatka Mesías. Hasta okijtojkej kimiktiskiaj Jesús uan Lázaro (Juan 11:47, 48, 53; 12:9-11).

³ Jesús okimatiaya miakej amo kiseliskiaj ken Mesías (Juan 5:39-44). Jesús okinmilui imachtijkauan Juan akin oteapolaktiaya: “Miak pakílistli kipias [akin amitlaj kitsakuilia] por Ne” (Mat. 11:2, 3, 6). ¿Tleka miakej amo okiselijkej Jesús ken Mesías?

4. ¿Tlen timomachtiskej?

⁴ Itech nin tlamachtil uan okse tikitaskej tleka itech achto siglo amo okiselijkej Jesús. Noijki tikitaskej tleka miakej amo kinekij kikakiskej tlen titetlapouiaj. Noijki tikitaskej tlen techpaleuis ma titlaneltokakan itech Jesús uan amitlaj ma techtsakuili.

(1) MIAKEJ OKIMATIAYAJ KANIN OKATKA IALTEPE JESÚS

5. ¿Tleka sekimej amo okineltokayaj Jesús okatka Mesías?

⁵ Miakej amo otlaneltokakej itech Jesús porque okimatiayaj kanin okatka ialtepe. Okimatiayaj kuali otlamachtiaya uan okichiuaya milagros. Pero yejuan okitayaj san se kuaxinki uan ialtepe okatka Nazaret. Sekimej amo okipatioitayaj non altepetl hasta Natanael tlen okatka imachtijka Jesús, okijto: “¿Weletis kisas itla kuali de Nazaret?” (Juan 1:46). ¿Tleka ijkon okijto? Xamo omokuayejyekouaya altepetl kanin ochantiaya Jesús amo okipiaya ipati noso xamo omokuayejyekojtoka tlen kijtoua Miqueas 5:2, kanin okijtouaya Mesías nesiskia Belén uan amo ompa Nazaret.

6. ¿Tlen omonekiaya kichiuaskej akinmej amo okineltokayaj Jesús okatka Mesías?

⁶ ¿Tlen kijtoua Biblia? Profeta Isaías okijto miakej amo kinekiskiaj kimatiskej kanin ouala Jesús noso Mesías (Is. 53:8; nota). Itech profecías okijtouaya kanin ualaskia Jesús. Tla momachtiskiaj, kimatiskiaj Jesús oneski ompa Bélen uan iuejkatata okatka David (Luc. 2:4-7). Jesús oneski ompa Bélen ijkon ken kijtoua Miqueas 5:2. Ik non, ¿tleka amo otlaneltokakej? Porque amo kuali okimatiaya tlen opanok. Ik non, omokuayejyekojkej miak tlamantli uan amo otlaneltokakej itech Jesús.

7. ¿Tleka amo kinekij techkakiskej akinmej tipouij itech ialtepe Jehová?

⁷ ¿Axkan noijki ijkon panoua? Kema. Miakej tiiTlaixpantijkauan Jehová amo okachi otimomachtijkej. Ik non, miakej techitaj amo tiixtlamatkej (Hech. 4:13). Kijtouaj amo uelis titlamachtiskej tlen kijtoua Biblia porque amo kanaj otimomachtitoj. Oksekimej kijtouaj toreligión opejki ompa Estados Unidos pero san sekimej iTlaixpantijkauan Jehová ompa chantij. Sekimej mokuayejyekouaj amo titlaneltokaj itech Jesús. Oksekimej kijtouaj tikinpaleuiaj tekiuajkej ompa Estados Unidos. Akinmej amo kimatij kox non melauak, kinneltokiliaj tlen kinmiluiaj oksekimej uan amo kinekij techkakiskej ijkuak tikintlapouiaj.

8. Ijkon ken Hechos 17:11, ¿tlen moneki tikchiuaskej para tikmatiskej akinmej melauak kichiuaj tlen kijtoua Biblia?

⁸ ¿Tlen techpaleuis nochipa ma tikchiuakan tlen Jesús otlamachti uan amitlaj ma techtsakuili? Ma timomachtikan para tikmatiskej tlen melauak opanok. Ijkon okichi Lucas ijkuak ayamo okijkuilouaya amochtli Lucas, ye achto sapanoua omomachti uan otlatemo para akinmej kitlajtoltiskiaj tlen okijkuilo kimatiskiaj tlen melauak opanok (Luc. 1:1-4). Yiuejkika judíos tlen ochantiayaj ompa Berea ijkon okichijkej. Ijkuak yikin achto okikakej tlen okichi Jesús okitakej tlen okijtouaya Escrituras Hebreas, omomachtijkej para ijkon kitaskiaj kox melauak ijkon opanok (xiktlajtolti Hechos 17:11). Noijki tejuatsin moneki tikitas tla melauak tlen mitsmachtiaj iTlaixpantijkauan Jehová uan tla kajki itech Biblia. Noijki ximomachti ken opejki inreligión iTlaixpantijkauan Jehová. Tla timomachtiaj, non techpaleuis amo ma tikneltokakan tlen oksekimej kijtouaj.

(2) JESÚS AMO OKICHI MILAGROS PARA KINTLAJTLACHIALTIS OKSEKIMEJ

9. ¿Tlen opanok ijkuak Jesús amo okinek kichiuas se milagro itech iluikak?

⁹ Maski Jesús kuali otlamachtiaya oksekimej okinekiayaj kitaskej okseki tlamantli. Okinekiayaj ma kichiua se milagro itech iluikak uan ijkon kineltokaskiaj ye okatka Mesías (Mat. 16:1). Xamo ijkon okiluijkej porque amo kuali okajsikamatiayaj tlen kijtoua Daniel 7:13, 14. Pero ijkuakon Jehová ayamo kichiuaskia non profecía. Pero tlen otlamachtiaya Jesús uelis kinpaleuiskia ma kineltokakan ye okatka Mesías. Ken Jesús amo okichi tlen okiluijkej amo okineltokilijkej (Mat. 16:4).

10. ¿Ken okichi Jesús tlen okijto profeta Isaías itech Mesías?

¹⁰ ¿Tlen kijtoua Biblia? Profeta Isaías okijto Mesías “amo tsajtsis nion chikauak mokakis itlajtol, amikaj kikakis itech ojtli” (Is. 42:1, 2). Jesús otetlapoui pero amo okichi porque okinekiaya ye ma kixmatikan. Amo opejki kinchijchiuaj teokalmej, amo omotlakenti okse tlamantli para oksekimej ma kitakan nion okinmilui ken omonekiaya kinotsaskej. Ijkuak okixkomakayaj amo okichi se milagro para ma kita tekiua Herodes maski okimatiaya uelis kimiktiskiaj (Luc. 23:8-11). Ijkuak Jesús otetlapouiaya okichi seki milagros pero okachi okipatioitaya tetlapouis, okinmilui imachtijkauan: “Porke ika no, Ne oniwala” (Mar. 1:38).

11. ¿Tlen mokuayejyekouaj sekimej?

¹¹ ¿Axkan noijki ijkon panoua? Kema. Axkan noijki miakej kintlajtlachialtia uejueyij teopan uan noijki tlen ompa okichijchijkej. Noijki teopixkej kijtouaj ken moneki kinnotsaskej. Miakej kinpaktia iluitl tlen kichiuaj oksekimej uan amo ijkuilitok itech Biblia. Akinmej ompa yauij amo okachi kinmachtiaj itech toTajtsin Dios uan tlen kineki kichiuas. Pero akinmej touan monechikouaj kimatij tlen kineki toTajtsin Dios ma tikchiuakan. Amo tetlajtlachialtia kali kanin timonechikouaj pero kualtsin uan chipauak. Akinmej techyekanaj amo okse tlamantli motlakentiaj uan amo techiluiaj ken moneki tikinnotsaskej. Tlen timomachtiaj uan titetlapouiaj kisa itech Biblia. Pero miakej amo kineltokaj tlen tikinmiluiaj uan amo kinpaktia ken tikueyichiuaj toTajtsin Dios porque kinpaktiskia kikakiskej tlen yejuan kinekij. Noijki amo tlaneltokaj porque amo kinpaktia tlen titlamachtiaj.

12. Ijkon ken kijtoua Hebreos 11:1, 6, ¿tlen techpaleuis ma titlaneltokakan?

¹² ¿Tlen techpaleuis nochipa ma tikchiuakan tlen Jesús otlamachti uan amitlaj ma techtsakuili? Apóstol Pablo okinmilui tokniuan tlen ochantiayaj ompa Roma: “Titlaneltokah ijkuak tikkakih n kualitlájtoli, iwa tlan tikkakih, ye itemachtilis Cristo” (Rom. 10:17). Tla tiiluichiuaskej maski kualtsin mota pero kixnamiki tlen Biblia kijtoua, non amo techpaleuis ma titlaneltokakan itech Jehová, moneki timomachtiskej Biblia. Moneki tikmatiskej tlen melauak para tikpiaskej chikauak totlaneltokilis ‘porque tla se amo kipia tlaneltokálistli, [amo] weletis tikpaktis Dios’ (xiktlajtolti Hebreos 11:1, 6). Ik non, para ikaj kineltokas tlen kipaktia toTajtsin Dios amo moneki tikitas se milagro. San moneki momachtis Biblia para kipias chikauak itlaneltokilis uan kajsikamatis tlen amo kimati.

(3) JESÚS AMO OKICHIUAYA KEN JUDIOS

13. ¿Tleka miakej okijtojkej amo kuali tlen okichi Jesús?

¹³ Imachtijkauan Juan omotlajtlachialtiayaj porque imachtijkauan Jesús amo omosauayaj noso amo otlakuayaj. Jesús okinmilui amo omonekiaya mosauaskej porque ye ok oyoltoka (Mat. 9:14-17). Pero miakej amo okiselijkej porque amo okichiuaya costumbres uan okualankej porque okinpajti sekimej itech tonal sábado (Mar. 3:1-6; Juan 9:16). Fariseos omoueyinekiayaj porque omoseuiayaj sábado pero okinpaktiaya ma tlanemakakan itech teokali. Okualankej ijkuak Jesús okinmilui amo kuali tlen okichijtokaj (Mat. 21:12, 13, 15). Ijkuak Jesús otetlapoui itech sinagoga ompa Nazaret, akinmej okikakej sapanoua okualankej porque okijto tlen okichijkej israelitas uan ijkon okiteititi yejuan noijki san okinpaktiaya kichiuaskej tlen okinekiayaj uan amo otlaneltokayaj (Luc. 4:16, 25-30). Miakej amo otlaneltokakej porque Jesús amo okichi tlen yejuan okinekiayaj (Mat. 11:16-19).

14. ¿Tleka Jesús okijto amo kuali tlen sekimej okichiuayaj?

¹⁴ ¿Tlen kijtoua Biblia? Jehová okijto ika profeta Isaías: “Nin altepetl san kijtoua nechtemoua pero amo nechueyichiua ika nochi iyolo, amo nechtlasojtla uan san kichiua tlen oksekimej kijtouaj uan tlamachtiaj” (Is. 29:13). Jesús okinmilui akinmej amo kuali tlen okichijtokaj porque okixnamikiayaj iTlajtol toTajtsin Dios. Akinmej okichiuayaj costumbres uan amo okitlakamatiayaj iTlajtol toTajtsin Dios, okixtopejkej Jehová uan Jesús noso Mesías.

15. ¿Tleka miakej amo kinpaktia tlen kichiuaj iTlaixpantijkauan Jehová?

¹⁵ ¿Axkan noijki ijkon panoua? Kema. Miakej kualanij porque iTlaixpantijkauan Jehová amo tikchiuaj seki costumbres tlen Biblia amo kijtoua ma tikchiuakan, ken Navidad nion tiiluichiuaj ijkuak sekimej kajxitiaj xiuitl. Sekimej noijki kualanij porque amo timokajkalakiaj itech iluitl kanin kiueyichiuaj toaltepe nion tikchiuaj seki costumbres ijkuak ikaj ixpoliui. Xamo sekimej kichiuaj costumbres porque mokuayejyekouaj toTajtsin Dios kipaktia tlen kichiuaj. Xamo melauak kinekij kiueyichiuaskej toTajtsin Dios pero tla amo kichiuaj tlen kijtoua Biblia, ye amo kinselis (Mar. 7:7-9).

16. ¿Tlen moneki tikchiuaskej uan tlen amo moneki tikchiuaskej? (Salmo 119:97, 113, 163-165).

¹⁶ ¿Tlen techpaleuis nochipa ma tikchiuakan tlen Jesús otlamachti uan amitlaj ma techtsakuili? Ma tikpatioitakan tlen kijtoua itlanauatiluan toTajtsin Dios uan principios bíblicos (xiktlajtolti Salmo 119:97, 113, 163-165). Tla tiktlasojtlaj Jehová, amo tikchiuaskej tlen amo kipaktia. Nochipa tiktlasojtlaskej Jehová uan amitlaj techtsakuilis.

(4) JESUS AMO OKIJTO TLAPALEUISKIA ITECH POLÍTICA

17. ¿Tlen okinekiayaj miakej ma kichiua Mesías?

¹⁷ Ijkuak okatka Jesús nikan tlaltikpak, miakej okinekiayaj okse ma yeto intekiua itech inmialtepe para ayakmo kinnauatiskia tekiua tlen okatka ompa Roma. Pero ijkuak okinekiayaj ma yeto intekiua Jesús ye amo okinek (Juan 6:14, 15). Fariseos omomojtiayaj porque okineltokayaj Jesús itlaj kichiuaskia itech política uan ijkon romanos ayakmo kinkauiliskiaj fariseos ma tlayekanakan itech inmialtepe. Ik non, miakej judíos amo otlaneltokakej itech Jesús.

18. ¿Tlen profecías itech Mesías judíos amo okinekiayaj kimatiskej?

¹⁸ ¿Tlen kijtoua Biblia? Itech se profecía okijtouaya Jesús moteuiskia iuan sekimej uan ye tlatlaniskia pero noijki okijtouaya achto topatka motemakaskia uan kixpoloskiaj (Is. 53:9, 12). ¿Tleka oksekimej okinekiayaj okse tlamantli ma kichiua? Porque omomachtiayaj profecías tlen san niman kinpaleuiskia uan amo omomachtiayaj okseki profecías (Juan 6:26, 27).

19. ¿Tleka miakej amo kineltoka tlen titetlapouiaj?

¹⁹ ¿Axkan noijki ijkon panoua? Kema. Miakej amo techseliaj porque amo timokajkalakiaj itech política. Kineltokaj tejuan noijki moneki tikinpejpenaskej tekiuajkej. Tla tikinpejpenaskiaj tekiuajkej, tikyolkokoskiaj Jehová uan tikteititiskiaj amo tiknekij ye ma yeto totekiua (1 Sam. 8:4-7). Xamo kineltokaj moneki tikinchijchiuaskej hospitales uan okseki tlamantli para ijkon tikinpaleuiskej. Amo tlaneltokaj porque okachi tikpatioitaj titetlapouiskej uan amo tikyektlaliskej seki tlamantli.

20. Ijkon ken Jesús okijto itech Mateo 7:21-23, ¿tlen okachi moneki tikchiuaskej?

²⁰ ¿Tlen techpaleuis nochipa ma tikchiuakan tlen Jesús otlamachti uan amitlaj ma techtsakuili? (Xiktlajtolti Mateo 7:21-23). Ma tikilnamiktokan moneki tikchiuaskej tlen Jesús otlanauati (Mat. 28:19, 20). Amo ma timokajkalakikan itech tlen kichiuaj akinmej amo kixmatij Jehová. TiiTlaixpantijkauan Jehová tikintlasojtlaj oksekimej uan tiknekij tikinpaleuiskej akinmej tlajyouiaj, ik non, tikintlapouiaj tlen kichiuas iTekiuajkayo toTajtsin Dios uan tikinpaleuiaj iuan ma mouikakan.

21. ¿Tlen moneki tikchiuaskej?

²¹ Itech nin tlamachtil otikitakej naui tlamantli tlen kiteititia tleka amo okikakej Jesús uan amo okichijkej tlen ye otlamachti. Uan tleka axkan kinmixtopeuaj akinmej kichiuaj ken Cristo. Itech okse tlamachtil tikitaskej ok naui tlamantli. Tinochtin ma timochijchikauakan para nochipa titlaneltokaskej itech Jehová uan tikchiuaskej tlen Jesús otlamachti.