Amitlaj kintsakuilis akinmej yolkualmej

1, 2. (1) ¿Tlen okijto se ixtlamatki itech se amochtli? (2) ¿Tlen timomachtiskej?

AXKAN sapanoua miakej kijtouaj tlaneltokaj itech Jesús pero amo kichiuaj tlen ye otlamachti (2 Tim. 4:3, 4). Itech se amochtli se ixtlamatki okijto: “Tla axkan yetoskia se tlakatl ijkon ken Jesús uan tlamachtiskia ijkon ken ye, ¿tikneltokiliskiaj noso tikchiuaskiaj ijkon ken yiuejkika okichijkej? Amo tikneltokiliskiaj”.

² Itech achto siglo miakej okikakej tlen Jesús otlamachti uan noijki okitakej okichi milagros pero amo okineltokilijkej. Itech okse tlamachtil otikitakej naui tlamantli tlen okiteititi tleka amo okineltokilijkej Jesús uan axkan tikitaskej ok naui tlamantli. Noijki tikitaskej tleka miakej amo kineltokaj tlen titetlapouiaj uan tlen techpaleuis nochipa ma tikchiuakan tlen Jesús otlamachti uan amitlaj ma techtsakuili.

(1) JESÚS AMO OTECHIKOITAK

3. ¿Tleka sekimej amo otlaneltokakej itech Jesús?

³ Ijkuak Jesús okatka nikan tlaltikpak omouikaya iuan miakej, otlakua iuan akinmej okipiayaj miak tomin uan iuan akinmej otlayekanayaj itech inaltepe. Pero noijki inmiuan okatka iuan akinmej amo okipiayaj miak tlamantli. Noijki okinmiknomatki akinmej okinmiluiayaj tlajtlakolejkej. Akinmej omoueyinekiayaj amo otlaneltokakej itech Jesús. Okintlajtlanijkej imachtijkauan: “¿Tleka nantlakuaj iwan tominololojkej iwan akinmej tlajtlakolchiwaj?”. Jesús okinnankili: “Tlakah chikawakeh amo kimotlakewiah se tlapajti, yej non kokoxkeh ne amo onikinnotsako non yekmilajkameh ne onikinnotsako n tlajtlakolchijkeh, paramamoyolpatlakah” (Luc. 5:29-32).

4. Ijkon ken okijkuilo profeta Isaías, ¿tlen amo omonekiaya motlajtlaniskiaj judíos?

⁴ ¿Tlen kijtoua Biblia? Seki xiuitl achto ijkuak ayamo oualaya Mesías, profeta Isaías okijto miakej amo kineltokiliskiaj. Ye okijkuilo: “Okixtopejkej uan amo okiselijkej [...]. Yetoskia ken toixpan kitlatiskia ixko. Okixtopejkej uan otikitakej ken amitlaj ipati” (Is. 53:3). Nin profecía okiteititi miakej amo kiseliskiaj, ik non, judíos itech achto siglo amo omonekiayaj motlajtlaniskiaj tleka miakej amo okiseliayaj Jesús.

5. ¿Tlen mokuayejyekouaj miakej porque tikchiuaj tlen Jesús otlamachti?

⁵ ¿Axkan noijki ijkon panoua? Kema. Akinmej tlayekanaj itech inreligión kinpaktia kinseliskej akinmej kipiaj miak tomin, akinmej miakej kinmixmatij uan akinmej ixtlamatkej. Maski amo kichiuaj tlen kijtoua Biblia uan amo kipiaj chipauak innemilis. Uan akinmej tlayekanaj itech inreligión techkokoliaj porque tiktekichiuiliaj Jehová ika pakilistli uan tikpiaj chipauak tonemilis. Apóstol Pablo okijto: “Dios okimpéjpenki akimeh itech nin tlaltíkpaktli amaka kintlakitah” (1 Cor. 1:26-29). Pero Jehová techtlasojtla porque nochipa tiktlakamatij.

6. ¿Tlen okijto Jesús itech Mateo 11:25, 26 uan ken uelis tikchiuaskej ijkon ken ye?

⁶ ¿Tlen techpaleuis nochipa ma tikchiuakan tlen Jesús otlamachti uan amitlaj ma techtsakuili? (Xiktlajtolti Mateo 11:25, 26). Amo ma tikinkakilikan akinmej kijtouaj amo kuali tlen tikchiuaj. Ma tikilnamikikan Jehová san kintekitiltiaj akinmej yolyamankej para kichiuaskej tlen ye kineki (Sal. 138:6). Ma timokuayejyekokan ken Jehová yokintekitilti itekipanojkauan maski miakej kijtouaj amo ixtlamatkej.

(2) JESÚS OKIJTO TLEN AMO MELAUAK OTLAMACHTIAYAJ

7. ¿Tleka Jesús okinmilui fariseos okipiayaj ome inmixko uan tlen okijtojkej yejuan?

⁷ Jesús amo omomojti ijkuak okinmilui fariseos amo melauak tlen otlamachtiayaj. Okinmilui okipiayaj ome inmixko porque okachi okintekipachouaya momajtekiskej uan amo kinmaluiskej intatajuan (Mat. 15:1-11). Tlen ye okijto okintlajtlachialti imachtijkauan, ik non, okiluijkej: “¿Yotikma n fariseos okualankeh ijkuak okikakeh tlan otikijto?”. Pero ye okinnankili: “Nochi tlatookali non amo okitookak Notajtsi non kajki ilwikak, kiwiwitlaskeh ika nochi inelwayo. Xikinkawakah, yejwah noiwa amo tlachiah iwa kinyakanah oksikimeh kemi yejwah. Tla se non amo tlachia kiyakanas ok se kemi ye, san ken ome wetsiskeh itech tékochtli” (Mat. 15:12-14). Maski tlen okijto Jesús okinkualani fariseos ye nochipa okijto tlen melauak.

8. ¿Ken okiteititi Jesús toTajtsin Dios amo kiselia tlen tlamachtiaj religiones?

⁸ Jesús noijki okijto amo melauak tlen otlamachtiayaj. Ye amo okijto toTajtsin Dios kiselia tlen tlamachtiaj religiones. Ye okijto miakej yaskiaj itech ojtli tlen teuika mikilistli uan amo miakej yaskiaj itech ojtli tlen pitsauak, tlen techpaleuis nochipa ma tiyoltokan (Mat. 7:13, 14). Okijto miakej kijtoskiaj kitekichiuiliskiaj toTajtsin Dios pero amo melauak ijkon kichiuaskiaj. Ik non, okijto: “Ximotlachilikah inmak nekateh tiotlajtolteh tekajkayajkeh, non motlakentiah kemi yetoskiah ichkameh, pero ik inmijtik kokoyomeh tekuanimeh. Nomejwah weletis nonkinmixmatiskeh ika tlan kichiwah” (Mat. 7:15-20).

9. Xikijto tlen tlamachtilmej okijto Jesús amo melauak.

⁹ ¿Tlen kijtoua Biblia? Se profecía okijto Mesías sapanoua kitlakaitaskia kali kanin okiueyichiuayaj Jehová, yetoskia ken se tlitl ijtik iyolo (Sal. 69:9; Juan 2:14-17). Ik non, Jesús okijto akinmej otlamachtiayaj tlen amo melauak uan okichiuayaj tlen amo kipaktia toTajtsin Dios. Fariseos otlamachtiayaj ijkuak ikaj omikiaya oksekan ok oyoltoka pero Jesús otlamachti akinmej ixpoliuij yetoskia ken kochtokej (Juan 11:11). Saduceos amo okineltokayaj toTajtsin Dios kinyolitis akinmej oixpolikej pero Jesús okiyoliti iyolikni Lázaro (Juan 11:43, 44; Hech 23:8). Fariseos okineltokayaj toTajtsin Dios okijtouaya tlen kinpanoskia pero Jesús okijto nochtin uelis kipejpenaskiaj tla kitekichiuiliskiaj Jehová noso amo (Mat. 11:28).

10. ¿Tleka amo kineltokaj miakej tlen titlamachtiaj?

¹⁰ ¿Axkan noijki ijkon panoua? Kema. Miakej kualanij porque ika Biblia tikteititiaj amo melauak tlen yejuan kineltokaj. Miakej tlamachtiaj toTajtsin Dios kintlajyouiltia akinmej ixpoliuij uan akinmej kineltokaj, kichiuaj nochi tlen kinmiluiaj itech inreligión. Akinmej tiktekichiuiliaj Jehová tikijtouaj non amo melauak porque tikmatij ye techtlasojtla. Religiones noijki tlamachtiaj ijkuak tiixpoliuij oksekan tiyoltokej pero tejuan titlamachtiaj ika Biblia non amo melauak. Tla non yetoskia melauak toTajtsin Dios amo kijtoskia kinyolitis akinmej yoixpolikej. Miakej noijki tlamachtiaj toTajtsin Dios yokijto tlen tikchiuaskej satepan pero tejuan titlamachtiaj ye techkauilia ma tikpejpenakan tlen tikchiuaskej satepan, tla tiktekichiuiliskej toTajtsin Dios noso amo. Akinmej tlayekanaj itech inreligión kualanij ijkuak ijkon techkakij.

11. ¿Tlen kineki toTajtsin Dios ma tikchiuakan ijkon ken okijto Jesús itech Juan 8:45-47?

¹¹ ¿Tlen techpaleuis nochipa ma tikchiuakan tlen Jesús otlamachti uan amitlaj ma techtsakuili? Tla tikpatioitaj tlen kijtoua Biblia, moneki tikneltokaskej tlen kijtoua toTajtsin Dios (xiktlajtolti Juan 8:45-47). Amo ma tikchiuakan ken Satanás, nochipa ma tikijtokan uan ma tikchiuakan ken toTajtsin Dios kijtoua (Juan 8:44). ToTajtsin Dios kineki ma tikchiuakan ken Jesús, ik non, ye techiluia: “Xiktlawelitakah nochi tlan amokuali, iwa xikchiwakah tlan kuali” (Rom. 12:9; Heb. 1:9).

(3) JESÚS OTLAXIKO IJKUAK OKITLAJYOUILTIJKEJ

12. ¿Tleka judíos amo otlaneltokayaj itech Jesús?

¹² ¿Tleka judíos amo otlaneltokayaj itech Jesús? Pablo okijto: “Tejwah tiktematiltiah n Cristo, Akin [okimiktijkej itech se kuauitl]. N judíojteh kinkuejsoa tlan titetlapowiah” (1 Cor. 1:23). ¿Tleka amo okineltokilijkej Jesús? Porque okineltokayaj san tlajtlakolejkej okinmiktiayaj itech kuauitl uan Mesías amo omonekiaya ijkon kimiktiskiaj (Deut. 21:22, 23).

13. ¿Tlen amo okinekiayaj kajsikamatiskej akinmej amo otlaneltokakej itech Jesús?

¹³ Judíos amo okinekiayaj kineltokaskej Jesús amo okatka tlajtlakole, san okimamaltijkej okichi miak tlamantli amo kuali, okitlajyouiltijkej uan okixkomakakej maski ye amitlaj okichi. Akinmej otlanauatiayaj itech Sanedrín san niman omonechikojkej para kitaskiaj tlen kichiuiliskiaj Jesús pero amo okichijkej ijkon ken okijtouayaj tlanauatilmej (Luc. 22:54; Juan 18:24). Jueces amo okitakej kox melauak tlen oksekimej okijtouayaj itech Jesús. Yejuan okintemojkej tlakamej para ma kijtokan tlen amo melauak uan para ijkon ma kixpolokan. Ijkuak okitakej amo opanok ijkon ken yejuan okinekiayaj, ueyi teopixki okilui Jesús itlaj ma kijto uan ijkon kitlajtlakoltiskiaj. Pero tlanauatilmej tlen okatkaj amo okijtouayaj ikaj ijkon ma kichiuilikan (Mat. 26:59; Mar. 14:55-64). Ijkuak toTajtsin Dios okiyoliti Jesús, jueces okintlaxtlauijkej soldados para ma kijtokan tleka itlalnakayo Jesús ayakmo okatka kanin okitlalijkaj (Mat. 28:11-15).

14. ¿Tlen okijtouaya profecía kipanoskia Mesías?

¹⁴ ¿Tlen kijtoua Biblia? Maski miakej judíos amo okineltokayaj Mesías mikiskia. ¿Tlen okijtouayaj profecías? Biblia kijtoua: “Okitemakak iyolilis hasta okimiktijkej uan okiluijkej ye noijki otlajtlakolchiuaya ken oksekimej. Okimama intlajtlakol miakej uan otlajto inpatka tlajtlakolejkej” (Is. 53:12). Maski okijtojkej Jesús itlaj amo kuali okichi uan okimiktijkej, judíos omonekiaya itech tlaneltokaskiaj.

15. ¿Tlen kintlajtlakoltiaj tokniuan sekimej tekiuajkej?

¹⁵ ¿Axkan noijki ijkon panoua? Kema. Ijkon ken okipanok Jesús miakej kijtouaj tiiTlaixpantijkauan Jehová tikchiuaj tlen amo kuali uan sekimej tokniuan kintsakuaj. Ma tikitakan tlen okinpanok sekimej tokniuan. Ompa Estados Unidos tokniuan miak uelta oyajkej inmixpan tekiuajkej para ma kinkauilikan ma kiueyichiuakan Jehová. Sekimej jueces okinchikoitakej tokniuan, ompa Quebec Canadá, akinmej otlayekanayaj itech religión uan tekiuajkej ayakmo okinekiayaj ma titetlapouikan. Miakej tokniuan okintsakej porque otetlapouiayaj tlen kichiuas iTekiuajkayo toTajtsin Dios. Ompa Alemania, nazis okinmixpolojkej miakej tokniuan telpokamej. Axkan ompa Rusia miakej tokniuan yokintsakej porque tetlapouiaj tlen kijtoua Biblia, tekiuajkej kijtouaj amo kintlakamatij intlanauatiluan. Noijki amo kitekauiliaj ma kipiakan Biblia ika ruso Traducción del Nuevo Mundo de las Santas Escrituras porque kipia itoka toTajtsin Dios, Jehová.

16. Ijkon ken kijtoua 1 Juan 4:1, ¿tleka amo moneki tikneltokaskej ijkuak kinteneuaj tokniuan?

¹⁶ ¿Tlen techpaleuis nochipa ma tikchiuakan tlen Jesús otlamachti uan amitlaj ma techtsakuili? Ma tiktemokan tlen melauak opanok. Ijkuak Jesús otlamachti itech tepetl, okijto miakej kichiuaskiaj uan kijtoskiaj amo kuali tlen kichiuaj imachtijkauan (Mat. 5:11). Pero nochi non kichijtok Satanás, ye kinyekana para akinmej techkokoliaj ma kijtokan amo kuali tlen tikchiuaj uan ijkon techteneuaj (Apoc. 12:9, 10). Amo ma tikneltokakan tlen kijtouaj nion amo keman ma timomojtikan uan nochipa ma titlaneltokakan itech Jehová (xiktlajtolti 1 Juan 4:1).

(4) JESÚS OKINEMAKEJ UAN IMACHTIJKAUAN OKIKAJTEJKEJ

17. ¿Tlen omokuayejyekojkej sekimej tlen okipanok Jesús?

¹⁷ Ijkuak ayamo okimiktiayaj Jesús, se imachtijka okinemakak. Okse imachtijka okijto eyi uelta amo okixmatiaya uan nochtin imachtijkauan okikajtejkej (Mat. 26:14-16, 47, 56, 75). Pero Jesús amo omotlajtlani tleka ijkon okipanotoka ye yokimatiaya ijkon kipanoskia (Juan 6:64; 13:21, 26, 38; 16:32). Xamo sekimej tlen okitakej tlen okichijkej imachtijkauan Jesús amo otlaneltokakej uan okijtojkej amo okinekiayaj yetoskej ken yejuan.

18. ¿Tlen profecías omochijkej ijkuak ayamo okimiktiayaj Jesús?

¹⁸ ¿Tlen kijtoua Biblia? Ijkuak Jesús ayamo oualaya nikan tlaltikpak, yiuejkika yokatka se profecía tlen okijtouaya Mesías kinemakaskiaj ika 30 platatomin (Zac. 11:12, 13). Profecía noijki okijtouaya akin kinemakaskia yetoskia akin iuan omouikaya (Sal. 41:9). Zacarías noijki okijto: “Xikkojko tlajpixki uan ma moxexelokan ichkauan” (Zac. 13:7). Akinmej yolkualmej okitakej tlen okipanok Mesías pero non amo okintsakuili para ayakmo ma tlaneltokakan. Okitakej profecías tlen omochijkej itech Mesías uan non okinpaleui okachi ma tlaneltokakan.

19. ¿Tlen kimatij akinmej yolkualmej?

¹⁹ ¿Axkan noijki ijkon panoua? Kema. Sekimej okatkaj iTlaixpantijkauan Jehová pero axkan kixnamikij ialtepe uan kinekij oksekimej ijkon ma kichiuakan. Itech Internet kijtouaj amo kuali tlen tikchiuaj uan techteneuaj. Akinmej yolkualmej amo kinneltokiliaj nonmej tlen ijkon kichiuaj, kineltokaj Biblia kijtoua non panoskia (Mat. 24:24; 2 Ped. 2:18-22).

20. ¿Tlen techpaleuis para amo mitskajkayauaskej akinmej ayakmo iTlaixpantijkauan Jehová? (2 Timoteo 4:4, 5).

²⁰ ¿Tlen techpaleuis nochipa ma tikchiuakan tlen Jesús otlamachti uan amitlaj ma techtsakuili? Nochipa titlaneltokaskej itech Jehová tla nochipa timomachtiaj, tiktlatlaujtiaj uan nochipa tikchiuaj tlen ye yokijto (xiktlajtolti 2 Timoteo 4:4, 5). Tla tikpiaj chikauak totlaneltokilis, amo timomojtiskej ijkuak oksekimej kijtoskej amo kuali tlen tikchiuaj (Is. 28:16). Tla tiktlasojtlaj Jehová, iTlajtol uan tokniuan, amo techkajkayauaskej akinmej ayakmo iTlaixpantijkauan Jehová uan kixnamikij ialtepe.

21. ¿Tlen kuali tikmatij maski oksekimej amo kinekij kikakiskej tlen titetlapouiaj?

²¹ Itech achto siglo miakej amo otlaneltokakej itech Jesús pero miakej kema otlaneltokakej. Ijkon okichijkej miakej tlen okatkaj teopixkej uan noijki se tlen otlayekanaya itech Sanedrín (Hech. 6:7; Mat. 27:57-60; Mar. 15:43). Axkan sapanoua miakej yokijtojkej kichiuaskej ken Jesús porque kimatij tlen kijtoua Biblia uan kipatioitaj iTlajtol toTajtsin Dios. ITlajtol toTajtsin Dios kijtouaj: “Kipiaj miak yolseuilistli akinmej kitlasojtlaj motlanauatil; amitlaj kichiua ma uetsikan” (Sal. 119:165).