Tiktekichiuiliaj toTajtsin Dios akin “satlawel teiknoma”

1. ¿Xamo tlen timokuayejyekouaj ijkuak ikaj teiknomati?

IJKUAK ikaj teiknomati, xamo timokuayejyekouaj ye yolkuali uan kitemaka tlen kipia. Xamo timokuayejyekouaj ijkuak Jesús okijto tlen okichi se samaritano. Ye okiknomatki se judío ijkuak okiteuijkej uan okitlachtekijkej. Samaritano sapanoua okiknomatki judío uan okimalui uan okipajti (Luc. 10:29-37). Tlen okichi non tlakatl techititia Jehová techiknomati, ye nochipa ijkon kichiua porque techtlasojtla.

2. ¿Ken kiteititia Jehová noijki teiknomati?

² Ikaj akin teiknomati noijki uelis amo kitlajyouiltis ikaj tlen kinamiki. Jehová ijkon kichiua, ye nochipa techiknomati. Ijkon okijto Salmista: “Amo techtlajyouiltia ken technamiki” (Sal. 103:10). Pero ualeua Jehová moneki ikaj kiyektlalis ken moneki porque tlajtlakolchiua.

3. ¿Tlen tlajtlanilmej tikitaskej?

³ Itech nin tlamachtil tikitaskej eyi tlajtlanilmej: ¿Tleka teiknomati Jehová? ¿Tleka ijkuak ikaj kiyektlalia ken moneki noijki kititia kiknomati? ¿Ken uelis tikteititiskej titeiknomatij?

¿TLEKA TECHIKNOMATI JEHOVÁ?

4. ¿Tleka techiknomati Jehová?

⁴ Jehová techtlasojtla. Apóstol Pablo okijto: “Dios ken satlawel teiknoma”. Itech non texto Pablo okijto toTajtsin Dios kinmiluia tlapejpenalmej tlanauatiskej ompa iluikak (Efes. 2:4-7). Pero Jehová amo san kinmiknomati tlapejpenalmej. Itech se Salmo David okijto: “Jehová nochtin kinchiuilia tlen kuali uan kiteititia teiknomati ika nochi tlen okichijchi” (Sal. 145:9). Jehová tinochtin techtlasojtla, ik non, techiknomati uan ijkon kichiua ijkuak moneki.

5. ¿Ken omomachti Jesús oteiknomatki ken Jehová?

⁵ Jesús kuali kimati iTajtsin teiknomati. Achto ualaskia tlaltikpak miak xiuitl okatka iuan iTajtsin (Prov. 8:30, 31). Jesús okitak Jehová miak uelta okinmiknomatki akinmej chantij nikan tlaltikpak porque noijki okatkaj tlajtlakolejkej (Sal. 78:37-42). Ijkuak Jesús otlamachtiaya noijki okiteititi oteiknomatiaya.

6. ¿Tlen okijto Jesús para ma tikajsikamatikan Jehová teiknomati?

⁶ Yotikitakej itech okse tlamachtil, Jesús okiteititi Jehová teiknomati ijkuak okijto tlen okipanok se telpochtli tlen okauilti itomin uan oauilnemiaya (Luc. 15:13). Satepan omoyolkopki uan omokopki ikalijtik. ¿Tlen okichi itajtsin? Telpochtli omotlajtlachialti ijkuak okitak tlen okichi itajtsin. Jesús okijto: “Iwa ok wejka owalaya, ita okonitak iwa saikpanoa okiknoma. Omotlelo okinamikito, okinanawajtek iwa okiixtennamik”. Itajtsin amo okitlajtlakolti, okiknomatki, okitlapojpolui uan okikauili oksepa iuan ma chanti. Telpochtli sapanoua otlajtlakolchi pero itajtsin okitlapojpolui porque omoyolkopki. Jehová teiknomati ijkon ken itajtsin non telpochtli. Jesús okiteititi Jehová kintlapojpoluia akinmej melauak moyolkopaj (Luc. 15:17-24).

7. ¿Ken kiteititia Jehová ixtlamatki ijkuak teiknomati?

⁷ Jehová sapanoua ixtlamatki. Jehová amo san kijtoua ixtlamatki. Biblia kijtoua: “Ixtlamatílistli non Dios kitemaka [teiknomati] iwa nochipa kichiwah tlan kuali” (Sant. 3:17). Ijkon ken se tlakatl tlen kipia ikoneuan kimati kinpaleuis tla kinmiknomati, Jehová noijki techiknomati porque techpaleuia (Sal. 103:13; Is. 49:15). Maski titlajtlakolejkej tikmatij Jehová techiknomati uan tikneltokaj tikitaskej tlen yokijto kichiuas. Ye sapanoua ixtlamatki techiknomati pero nochipa kichiua ken moneki.

8. ¿Tlen moneki kichiuaskej tlayekankej uan tleka?

⁸ Ma tikijtokan se tokni peua auilnemi. Ijkuakon, ¿tlen moneki tikchiuaskej? Pablo okijto: “Amo ximowikakah iwa” (1 Cor. 5:11). Akinmej amo moyolkopaj moneki kinkixtiskej itech tlanechikol. Tlayekankej moneki ijkon kichiuaskej para kinmaluiskej tokniuan uan noijki para amo ma mosokioti itoka Jehová. Ijkuak ikaj kikixtiaj itech tlanechikol sekimej mokuayejyekouaj Jehová amo kinmiknomati. Ma tikitakan kox non melauak.

IJKUAK IKAJ KIKIXTIA ITECH TLANECHIKOL KIKNOMATI

9, 10. (1) Ijkon ken kijtoua Hebreos 12:5, 6, ¿tleka ijkuak ikaj kikixtiaj itech tlanechikol kititiaj kiknomatij? (2) ¿Tlen techpaleuis ma tikajsikamatikan?

⁹ Sapanoua timoyolkokouaj ijkuak ikaj akin tiktlasojtlaj kijtouaj itech tlanechikol “ayakmo iTlaixpantijka Jehová”. Xamo timotlajtlaniaj kox omonekiaya kikixtiskej. Ijkuak se tokni kiyektlaliaj kititiaj kiknomatij uan kitlasojtlaj (Prov. 13:24). Ijkuak ikaj kikixtiaj itech tlanechikol, ¿kipaleuia ma moyolkopa? Kema. Miakej tokniuan tlen otlajtlakolchijkej okinpaleui ijkuak tlayekankej okinkixtijkej itech tlanechikol, okinpaleui ma tlalnamikikan, ma kipatlakan innemilis uan oksepa ma mouikakan iuan Jehová (xiktlajtolti Hebreos 12:5, 6).

¹⁰ Ma tikijtokan se tlajpixki okitak se ichkatsin opejki mokokoua. Ye kuali kimati para kipajtis moneki kiuikas oksekan ichkatsin uan ijkon oksekimej ichkamej amo mokokoskej. Pero ichkamej kinpaktia san sekan yetoskej, ik non, ijkuak kinxexelouaj momojtiaj. Ik non, ijkuak se kiuika oksekan ¿kijtosneki amo kiknomati? Amo ijkon. Tlajpixki kimati tla ichkatsin amo kiuikas oksekan oksekimej uelis mokokoskej. Ijkuak ijkon kichiuaj kimaluiaj oksekimej ichkamej (noijki xikita Levítico 13:3, 4).

11. (1) ¿Tleka uelis tikijtoskej akin okikixtijkej itech tlanechikol yetoskia ken se ichkatsin? (2) ¿Tlen ok uelis kipaleuis akin okikixtijkej itech tlanechikol?

¹¹ Ijkuak ikaj kikixtiaj itech tlanechikol yetoskia ken ichkatsin tlen mokokoua (Sant. 5:14). Seki kokolistli uelis tikmopanoltiliskej, ijkon ijkuak ikaj ayakmo kuali mouika iuan Jehová uelis techijtlakos. Ik non, moneki kikixtiskej itech tlanechikol. Ijkuak ikaj kiyektlaliaj, Jehová techititia techtlasojtla uan ijkon kipaleuis ma moyolkopa akin otlajtlakolchi. Akin kikixtiaj itech tlanechikol ok uelis touan monechikos uan non kipaleuis oksepa ma mouika iuan Jehová. Noijki uelis kinpias amatlajkuilolmej para momachtis uan kitas JW Broadcasting^®. Ijkuak tlayekankej kitaj ken kipatlati inemilis uelis iuan motlapouiskej para kiyolchikauaskej, kiyekanaskej uan xamo oksepa uelis kiseliskej ma yeto iTlaixpantijka Jehová.b

12. ¿Ken kiteititiaj tlayekankej teiknomatij ijkuak kikixtiaj akin amo moyolkopa?

¹² Ma tikilnamikikan san kikixtiaj itech tlanechikol akin amo moyolkopa. Tlayekankej amo moneki san kajauilmatiskej nin tlamantli. Yejuan kimatokej Jehová ikaj kiyektlalia hasta kanin moneki (Jer. 30:11). Tlayekankej kintlasojtlaj tokniuan uan kinekij nochipa ma mouikakan iuan Jehová pero ualeua moneki kikixtiskej itech tlanechikol akin amo moyolkopa.

13. ¿Tleka yiuejkika ikaj okikixtijkej itech tlanechikol?

¹³ Ma tikitakan tlen okichi apóstol Pablo ijkuak se tlakatl amo omoyolkopki ijkuak otlajtlakolchiuaya. Ye ochantiaya Corinto uan oauilnemiaya iuan isiua itajtsin. ¡Sapanoua tepinati tlen okichijtoka! Jehová okinmilui israelitas: “Tlakatl tlen moteka iuan isiua itajtsin amo kitlakaita itajtsin. Ik non, moneki kinmiktiskej” (Lev. 20:11). Pablo amo okijto omonekiaya kimiktiskej non tlakatl pero kema okijto ma kikixtikan itech tlanechikol. Tlen okichijtoka non tlakatl okinmijtlakojtoka tokniuan tlen inmiuan omonechikouaya porque yejuan omokuayejyekouayaj amo otlajtlakolchijtoka (1 Cor. 5:1, 2, 13).

14. ¿Pablo ken okiknomatki tlakatl tlen okikixtijkej itech tlanechikol uan tleka? (2 Corintios 2:5-8, 11).

¹⁴ Satepan Pablo okimatki non tlakatl okipatlak inemilis uan melauak omoyolkopki. Maski non tlakatl okichi amo kuali ma tlajtokan itech tokniuan. Pablo okinmilui tlayekankej kuali ma kiselikan, ik non, okijto: “Xiktlapojpolwikah iwa xikyolchikawakah”. Okinyekilui tleka omonekiaya kichiuaskej, tlamo “saikpanoa moyolkokos iwa mosotlawas”. Pablo okiknomatki non tlakatl porque omoyolkopki. Amo okinekiaya ma moyolkokojto porque non kichiuaskia amo ma kineki ma kitlapojpoluikan (xiktlajtolti 2 Corintios 2:5-8, 11).

15. ¿Keman moneki tlayekankej teiknomatiskej uan keman amo?

¹⁵ Tlayekankej noijki teiknomatij ijkon ken kichiua Jehová. Kiyektlaliaj se tokni ijkuak moneki uan kichiuaj ken moneki pero kiknomatij ijkuak kitaj moneki ijkon kichiuaskej. Tla yejuan amo kiyektlaliaj akin otlajtlakolchi amo kiknomatij, kijtosneki kikauiliaj ma kichiua tlen kineki. Pero ¿san yejuan tlayekankej moneki teiknomatiskej?

¿TLEN TECHPALEUIS MA TITEIKNOMATIKAN?

16. Ijkon ken kijtoua Proverbios 21:13, ¿tlen kichiua Jehová iuan akinmej teiknomatij?

¹⁶ Tinochtin akinmej tikchiuaj ken Cristo tiknekij titeiknomatiskej ijkon ken Jehová. ¿Tleka tiknekij ijkon tikchiuaskej? Porque Jehová amo kinkaki akinmej amo teiknomatij (xiktlajtolti Proverbios 21:13). Tejuan tiknekij Jehová ma techkaki, ik non, timochijchikauaj tikinmiknomatiskej oksekimej. Ijkuak se tokni moyolkokoua, timochijchikauaj tikpaleuiskej. Noijki timochijchikauaj tikchiuaskej tlen kijtoua Biblia: “Dios amo kinmiknomatis akimeh amo teiknomatih” (Sant. 2:13). Tla tiyolyamankej uan tikilnamikij moneki techiknomatiskej, non kichiuas noijki ma titeiknomatikan. Uan okachi moneki titeiknomatiskej ijkuak akin otlajtlakolchi oksepa mouika iuan Jehová.

17. ¿Ken okiteititi David melauak oteiknomatki?

¹⁷ Biblia techiluia sekimej oteiknomatkej ijkon ken Jehová. Ma timokuayejyekokan tlen okichi tekiua David, ye melauak oteiknomatki. Saúl okinekiaya kimiktis pero David okiknomatki porque okimatiaya Jehová okitlali ma yeto tekiua, ik non, David amo keman omokuayejyeko kichiuilis tlen amo kuali (1 Sam. 24:9-12, 18, 19).

18, 19. ¿Keman amo oteiknomatki David?

¹⁸ Pero David amo nochipa oteiknomatki. Se tonal se tlakatl tlen omotokayotiaya Nabal okatka amo yolkuali uan okinuijuikalti David uan itlakeualuan amo okinek kinmakas tlakuali. David sapanoua okualanki uan okijto kinmiktiskiaj Nabal uan itlakeualuan. Pero amo ijkon okichi porque Abigaíl san niman okinmakato tlakuali (1 Sam. 25:9-22, 32-35).

¹⁹ Okse tonal profeta Natán okilui David se tlakatl tlen okipiaya miak tomin okichtekili ichkatsin se tlakatl tlen sapanoua okitlasojtlaya. David sapanoua okualanki uan okijto: “¡Ixpan Jehová akin yoltok, tlakatl tlen ijkon okichi moneki kimiktiskej!” (2 Sam. 12:1-6). Ye okimatiaya tlanauatil tlen okijkuilo Moisés okijtouaya, tla ikaj okichtekiaya se ichka omonekiaya kikopas naui ichkamej (Éx. 22:1). Pero David amo okiknomatki non tlakatl uan okijto omonekiaya kimiktiskej. Natán ijkon okilui David para ma kajsikamati ye okachi otlajtlakolchijtoka. David amo okiknomatki tlakatl pero Jehová kema okiknomatki David (2 Sam. 12:7-13).

20. ¿Tlen techmachtia tlen okichi David?

²⁰ Ken otikitakej ijkuak David sapanoua okualanki amo okiknomatki Nabal uan okijto ma kinmiktikan. Uan satepan noijki ijkon okijto ijkuak okitlapoui Natán. Tla David okatka yolkuali xamo timotlajtlaniaj tleka amo oteiknomatki. Ma timokuayejyekokan tlen okipanotoka. Non tonal David okikuejsouaya itlalnamikilis. Ijkuak ikaj amo kinmiknomati oksekimej, kijtosneki ayakmo kuali mouika iuan Jehová. Ik non, Jesús okijto: “Amo [xikinteneuakan] oksikimeh, ijkó noiwa amo [nomechteneuaskej] nomejwah” (Mat. 7:1, 2). Ik non, moneki ma timochijchikauakan ma tikinmiknomatikan oksekimej ijkon ken kichiua Jehová.

21, 22. ¿Ken uelis titeiknomatiskej?

²¹ Tla titeiknomatij amo san tikteititiskej techyolkokoua tlen kinpanoua oksekimej. Tinochtin uelis timokuayejyekoskej akinmej uelis tikinpaleuiskej, xamo tofamilia, tokniuan tlen inmiuan timonechikouaj noso akinmej tikintlapouiaj. Tla ijkon tikchiuaj tikinmititiskej tikinmiknomatij. Xamo moneki ikaj ma tikyolseuitij, uelis tikuikiliskej tlakuali noso uelis tikpaleuiskej ika okse tlamantli. “Noijki xamo moneki ma tikyolchikauakan se tokni tlen okiselijkej oksepa ma yeto iTlaixpantijka Jehová. Noijki ma titetlapouikan tlen toTajtsin Dios kichiuas. Ijkon tikteititiskej titeiknomatij (Job 29:12, 13; Rom. 10:14, 15; Sant. 1:27).

²² Nochipa ma titeiknomatikan porque katej miakej tlen tlajyouiaj. Tla ijkon tikchiuaj, tikyolpaktiskej Jehová, akin sapanoua teiknomati.