¿KEN UELIS AYAKMO TITEKOKOLISKEJ?

4 | Xikilui toTajtsin Dios ma mitspaleui

Biblia kijtoua:

“Ijkuak n Espíritu kiyakana se tlakatl, ye ni tlan kichiwah: tetlasojtla, kipia pakílistli, kipia yolsewílistli, nochi kixikoa, kuali tlakatl, teiknomati, tlaneltokak, yolyamanki, kuali monawatia” (GÁLATAS 5:22, 23).

¿Tlen kijtosneki?

ToTajtsin Dios techpaleuis para ayakmo ma titekokolikan. San iespíritu santo uelis techpaleuis kuali ma tikpiakan tonemilis. Ik non, ma tikkauilikan toTajtsin Dios ma techpaleui. Tla ijkon tikchiuaj, techpanos ken apóstol Pablo: “Para nochi tlamantli nikpia chikaualistli porque onka akin nechmaka chikaualistli” (Filipenses 4:13, TNM). Uan ijkin uelis tikijtoskej: “Jehová ye akin nechpaleuia” (Salmo 121:2).

Nin uelis tikchiuas:

“Achto sapanoua onitlateuiaya [...]. Pero Jehová onechpaleui ayakmo ijkon ma nikchiua” (WALDO).

Ika nochi moyolo xiktlatlaujti toTajtsin Dios ma mitsmaka iespíritu santo uan ma mitspaleui xikpia kuali monemilis (Lucas 11:13). Ye mitspaleuis para okachi titetlasojtlas, timoyolseuijtos, tikmatis timochias, tikmatis timonauatis uan ijkon amo tikinkokolis oksekimej. Ximomachti tlen kijtoua Biblia uan xikchiua tlen ompa kijtoua. Noijki ximouika iuan akinmej mochijchikauaj kipiaskej innemilis ken yotikijtojkej porque mitsyoliniskej xitetlasojtla uan xikchiua tlen kuali (Hebreos 10:24).

Ma tikitakan tlen okipanok: WALDO

Ayakmo otekokoli nion otlateui

Ijkuak Waldo okatka tsikitsin otlajyoui. Ye okijto: “Itech ojtli nochipa onimoteuiaya iuan akinmej okinemakayaj drogas [...]. Se tonal, sekimej tlen okichiuayaj tlen amo kuali okitlakejkej ikaj ma nechmiktiki. Onechtsoponili se cuchillo pero onicholo”.

Waldo amo okipakti ijkuak iTlaixpantijkauan Jehová opejkej kimachtiaj isiua. Ye okijto: “Onikintlauelitaya uan onikinuijuikaltiaya pero yejuan kuali onechnankiliayaj”.

Satepan noijki opejki momachtia Biblia. Ye okijto: “Onikitaya oui nikchiuas tlen onimomachtijtoka. Onikijto amo keman nikpatlaskia nonemilis”. Pero seki tlamantli tlen kijtoua Biblia okichi ma kipatla tlen omokuayejyekouaya.

Waldo okijto: “Se tonal Alejandro akin onechmachtiaya, onechilui ma niktlajtolti Gálatas 5:22 uan 23 [...]. Okijto kuali nikpiaskia nonemilis tla nikneltoka nechpaleuis iespíritu santo Jehová uan amo ma nikneltoka san noselti uelis ijkon nikchiuas. Non onechpaleui”.

Waldo ayakmo otekokoli porque okikauili toTajtsin Dios ma kipaleui. Ye okijto: “Nofamiliares uan akinmej inmiuan onimouikaya okintlajtlachialti onikpatlak nonemilis”. Noijki okijto: “Achto sapanoua onitlateuiaya [...]. Pero Jehová onechpaleui ayakmo ijkon ma nikchiua”.