Matikinpaleuikan akinmej tlajyouiaj

1. ¿Ken kinnankilia Jehová itekipanojkauan ijkuak kitlatlaujtiaj?

¿OTIKMATIAYA Jehová uelis mitsyolinis para tikpaleuis se tokni? Nochtin uelis ijkon kichiuaskej, tlayekankej, precursores, telpochmej, ichpochmej, akinmej yikipiaj miak xiuitl, tlakamej uan siuamej. Ijkuak se tokni kitlatlaujtia Jehová makipaleui, ye kinyolinia tlayekankej uan oksekimej tokniuan makiyolchikauakan (Col. 4:11). Tiyolpakij tiktekichiuiliskej Jehová uan tikinpaleuiskej tokniuan. Uelis ijkon tikchiuaskej ijkuak miakej mokokouaj, ijkuak panoua itlaj amo kuali noso ijkuak kintlajyouiltiaj.

IJKUAK MIAKEJ MOKOKOUAJ

2. ¿Tleka ualeua oui tikinpaleuiskej tokniuan ijkuak miakej mokokouaj?

² Ualeua oui timopaleuiskej ijkuak miakej mokokouaj. Xamo tiknekij tikintlajpalotiuij tokniuan inkalijtik pero amo uelis ijkon tikchiuaskej. Noso tiknekij tikinyoleuaskej akinmej amitlaj kipiaj touan matlakuatij pero noijki amo uelis ijkon tikchiuaskej. Xamo tiknekij tikinpaleuiskej oksekimej pero tofamilia noijki tlajyouijtok. Jehová yolpaki ijkuak kita tiknekij tikinpaleuiskej tokniuan maski ualeua oui (Prov. 3:27; 19:17). ¿Ken uelis tikinpaleuiskej?

3. ¿Tlen techmachtia tlen okichijkej tlayekankej kanin monechikoua Desi? (Jeremías 23:4).

³ Tlen uelis kichiuaskej tlayekankej. Tla titlapaleuia ken tlayekanki itech tlanechikol, kuali xikinmixmati tokniuan (xiktlajtolti Jeremías 23:4). Itech okse tlamachtil otimomachtijkej tlen okipanok Desi.b Ye okijto: “Tlayekankej uan oksekimej tokniuan nochipa nouan otetlapouiayaj uan san sekan otimoyolpaktiayaj”. Nonmej tokniuan tlayekankej kuali okixmatiayaj Desi ikinon ijkuak oixpolikej sekimej ifamiliares ika COVID-19 san niman okipaleuijkej.

4. ¿Tleka tlayekankej san niman okipaleuijkej Desi uan tlen techmachtia?

⁴ Desi okijto: “Kuali onimouikaya inmiuan tlayekankej ikinon san niman onikinmilui tlen onechtekipachouaya uan ken onimomachiliaya”. ¿Ken uelis ijkon kichiuaskej tokniuan tlayekankej? Moneki kinmaluiskej tokniuan uan kuali inmiuan mouikaskej ijkuak ayamo tlajyouiaj. Xamo amo uelis nankintlajpalotiuij inkalijtik porque onka se kokolistli pero uelis nankichiuaskej okseki tlamantli para inmiuan nanmotlapouiskej. Desi kilnamiki: “Itech se tonal miak uelta tokniuan tlayekankej onechnotsayaj noso onechtitlaniliayaj mensajes. Textos tlen onechintitlaniliayaj onechyolchikauayaj maski yonikmatiaya tlen okijtouayaj”.

5. ¿Ken uelis kimatiskej tlayekankej tlen kinpoloua tokniuan uan ken uelis kinpaleuiskej?

⁵ Tlayekankej uelis kimatiskej tlen kinpoloua tokniuan ikinon moneki kintlakaitaskej ijkuak itlaj kintlajtlaniskej (Prov. 20:5). ¿Kipiaj tlen ika mopanoltiskej uan tlen ika mopajtiskej? ¿Uelis kipoloskej inteki noso inkalijtik? ¿Uelis tikinpaleuiskej tokniuan para tekiuajkej makinpaleuikan? Sekimej tokniuan okipaleuijkej Desi para kipias tlen ika mopanoltis. Noijki tokniuan tlayekankej okipaleuijkej para kuali mamomachili uan mamouika iuan Jehová. Desi okijto: “Tlayekankej nouan omotlatlaujtiayaj. Amo nikilnamiki tlen okijtouayaj pero kema nikilnamiki ken onimomachiliaya. Yetoskia ken Jehová onechiluiaya: ‘Amo tika moselti’” (Is. 41:10, 13).

6. ¿Ken uelis tinochtin timopaleuiskej itech tlanechikol? (Xikinmita fotos).

⁶ Tlen uelis kichiuaskej tokniuan. Tlayekankej san niman kinpaleuiaj tokniuan. Pero Jehová kineki tinochtin matikinyolchikauakan uan matikinpaleuikan tokniuan (Gál. 6:10). Uelis tikyolchikauaskej akin mokokoua maski amo tikchiuaskej miak tlamantli. Konemej uelis kichiuaskej se dibujó noso se carta para kiyolchikauaskej se tokni. Telpochmej uan ichpochmej uelis kikouatiuij itlaj tlen kipoloua se tokni. Oksekimej uelis kitlakualchiuiliskej se tokni tlen mokokoua uan kikauilitiuij ikalijtik. Pero ijkuak miakej peuaj mokokouaj, tinochtin tikneki matechyolchikauakan. Ikinon ijkuak tlami nechikol noso ijkuak timonechikouaj ika videoconferencia matimokauakan para timotlapouiskej inmiuan tokniuan. Noijki matikinyolchikauakan tokniuan tlayekankej. Sekimej tokniuan kintitlaniliaj tarjetas noso cartas tlayekankej porque sapanoua tlapaleuiaj ijkuak miakej mokokouaj. Tinochtin matimochijchikauan para tikchiuaskej tlen Biblia kijtoua: “Ximosepanyolchikawakah iwa ximochikawakah” (1 Tes. 5:11).

IJKUAK PANOUA ITLAJ AMO KUALI

7. ¿Tlen uelis tikpoloskej ijkuak panoua itlaj amo kuali?

⁷ Ualeua ijkuak panoua itlaj amo kuali san niman mopatla tonemilis. Xamo uelis tikpoloskej tokalijtik noso ixpoliuis se tofamiliar. Tokniuan noijki ijkon kinpanoua. ¿Ken uelis tikinpaleuiskej?

8. ¿Ken uelis moyektlaliskej tlayekankej uan tetajmej ijkuak ayamo panoua tlen amo kuali?

⁸ Tlen uelis kichiuaskej tlayekankej. Tlayekankej, xikinpaleuikan tokniuan mamoyektlalikan ijkuak panos itlaj amo kuali. Xikinmiluikan tlen moneki kichiuaskej para uelis mopaleuiskej uan san niman manamechnotsakan. Itech okse tlamachtil otimomachtijkej tlen okipanok Margaret. Ye okijto: “Itech tlanechikol tlayekankej otechiluijkej ik kanin tichanti tlatlaskia kuajyo, ikinon omonekiaya tikintlakamatiskej tekiuajkej ijkuak techiluiskia maticholokan noso tla tikitaj okachi tlaxotla san niman matikisakan”. Non sapanoua okinpaleui porque san opanok makuili semanas uan oksepa otlatlak kuajyo. Tetajmej, ijkuak nanmomachtiskej Biblia iuan namofamilia ximotlapouikan inmiuan namokoneuan tlen uelis nankichiuaskej ijkuak panos itlaj amo kuali. Tla namejuan uan namokoneuan nanmoyektlaliaj, namechpaleuis ximoyelseuijtokan.

9. ¿Tlen moneki kichiuaskej tlayekankej achto uan satepan ijkuak panos itlaj amo kuali?

⁹ Tla tejuatsin tikyekana se grupo itech tlanechikol, san niman xikintlajtlanili innúmero tokniuan para uelis tikinnotsas ijkuak itlaj panos. Xikchiua se lista uan tla tokniuan kipatlaj innúmero xikpatla lista. Ijkon san niman uelis tikinnotsas tokniuan uan tikmatis tlen kinpoloua ijkuak itlaj panos. Xikmaka non lista akin kinyekana tlayekankej uan ye motlapouis iuan tlayekanki itech circuito. Kuali nanyetoskej tla san sekan nanmopaleuiaj. Ijkuak ayakmo otlatlak kuajyo, tlayekanki itech circuito kanin chanti Margaret amo okochki 36 horas para kinpaleuis tlayekankej. Okinpaleui makintemokan tokniuan tlen okiskej inkalijtik uan okinpaleuijkej 450 (2 Cor. 11:27). Tokniuan san sekan omopaleuijkej ikinon okajsikej kanin kinkalotiskej tokniuan tlen okiskej inkalijtik.

10. ¿Tleka tlayekankej moneki kinmaluiskej tokniuan? (Juan 21:15).

¹⁰ Tlayekankej moneki kinyolchikauaskej tokniuan uan kinpaleuiskej kuali mamouikakan iuan Jehová (1 Ped. 5:2). Ijkuak tlaxixini, tlayekankej moneki kitaskej nochtin tokniuan kuali mayetokan, makipiakan tlen kikuaskej, tlen ika motlakentiskej uan kanin mokalotiskej. Maski yopanok miak metstli, tokniuan ok kinekiskej makinyolchikauakan uan makinpaleuikan kuali mamouikakan iuan Jehová (xiktlajtolti Juan 21:15). Tokni Harold tlen tlapaleuia inmiuan akinmej tlayekana Betel, omotlapoui inmiuan tokniuan tlen chantij kanin otlaxixinki. Ye okijto: “Ualeua tokniuan ok moyolkokouaj. Maski tokniuan yikuali katej pero ok kilnamikij tlen okinpanok, xamo oixpoliuik ikaj akin okitlasojtlayaj noso kilnamikij tlen okipolojkej. Ijkuak kilnamikij nochi tlen okinpanok oksepa moyolkokouaj. Pero non amo kijtosneki amo tlaneltokaj. Uelis tinochtin ijkon timomachiliskej”.

11. ¿Ken uelis tikinpaleuiskej familias tlen tlajyouiaj?

¹¹ Tlayekankej moneki kitlakamatiskej nin tlanauatil: “Xichokakah inwah akimeh chokah” (Rom. 12:15). Tokniuan tlen otlajyouijkej kanin otlaxixinki moneki kinmilnamiktiskej Jehová ok kintlasojtla uan noijki tokniuan. Tlayekankej uelis kinpaleuiskej familias para mamotlatlaujtikan, mamomachtikan, mamonechikokan uan matetlapouikan. Noijki uelis nankinpaleuiskej tetajmej para makinmachtikan inkoneuan uelis nochipa mouikaskej iuan Jehová maski tlaxixinis. Tetajmej, xikinmilnamiktikan namokoneuan Jehová nochipa yetos inyolikni uan kinpaleuis. Noijki xikinmiluikan katej miakej tokniuan itech nochi tlaltikpak uan yejuan nochipa kinpaleuiskej (1 Ped. 2:17).

12. ¿Tlen uelis kichiuaskej tokniuan para tlapaleuiskej ijkuak tlaxixini? (Xikita foto).

¹² Tlen uelis kichiuaskej tokniuan. Tla kanin tichanti otlaxixinki, xikintlajtlani tlayekankej ken uelis titlapaleuis. Xamo uelis tikinkalotis tokniuan tlen okiskej inkalijtik noso tokniuan tlen tlapaleuiaj kanin tlaxixini. Noijki uelis titlapaleuis para mamoxejxelo tlakuali noso okseki tlamantli. Pero uelis titlapaleuis maski uejka otlaxixinki. ¿Ken uelis tikchiuas? Ximotlatlaujti inpatka tokniuan uan xiktemaka motomin ika nochi moyolo para kinpaleuiskej tokniuan (2 Cor. 1:8-11; 8:2-5). Noijki xikintlajtlani tlayekankej tlen uelis tikchiuas para titlapaleuiti kanin otlaxixinki. Tla mitsyoleuaj xitlapaleuiti, xamo achto mitsmachtiskej tlen uelis tikchiuas para okachi titlapaleuis.

IJKUAK TECHTLAJYOUILTIAJ

13. ¿Ken tlajyouiaj tokniuan tlen chantij kanin tekiuajkej amo kinkauiliaj matetlapouikan?

¹³ Tokniuan okachi tlajyouiaj ijkuak tekiuajkej kintlajyouiltiaj. Tokniuan tlen chantij kanin tekiuajkej amo kinkauiliaj matetlapouikan tlajyouiaj. Noijki amo kipiaj tlen ika mopanoltiskej, mokokouaj uan ualeua ixpoliui se infamiliar. Xamo tlayekankej amo uelis kintlajpalotiuij tokniuan para kinyolchikauaskej porque tekiuajkej amo kinkauiliaj, ijkon okipanok tokni Andréi. Se tokni siuatl tlen iuan okatka itech grupo para tetlapouiskej, amo okipiaya tlen ika mopanoltis uan satepan okipanok se accidente. Okichiuilijkej miak operaciones ikinon amo otekipanouaya. Tekiuajkej amo okinkauiliayaj mamonechikokan uan yokatka COVID-19, pero tokniuan omochijchikajkej para kipaleuiskej uan Jehová amo keman okika iselti.

14. ¿Ken kiteititiaj tlayekankej kineltokaj Jehová kinpaleuis?

¹⁴ Tlen uelis kichiuaskej tlayekankej. Andréi okitlatlaujti Jehová uan omochijchika tlapaleuis. Jehová okipaleui ijkuak okinyolini sekimej tokniuan para makipaleuikan non tokni. Sekimej okiuikayaj kanin tlapajtiaj uan oksekimej okimakayaj tlen ika mopanoltis. Jehová okinteochi porque san sekan omopaleuijkej uan okiteititijkej okatkaj yolchikauakej (Heb. 13:16). Tlayekankej, xikinkauilikan oksekimej manamechpaleuikan ijkuak tekiuajkej ayakmo namechkauiliskej ximonechikokan (Jer. 36:5, 6). Nochipa xikneltokakan Jehová. Ye namechpaleuis para xikinpaleuikan oksekimej tokniuan.

15. ¿Tlen moneki tikchiuaskej para san sekan tiyetoskej ijkuak techtlajyouiltiskej?

¹⁵ Tlen uelis kichiuaskej tokniuan. Ijkuak techtlajyouiltiskej tekiuajkej, xamo amo uelis miakej san sekan timonechikoskej. Ikinon kuali matimouikakan inmiuan oksekimej tokniuan. Matikixnamikikan Satanás uan matikintlasojtlakan tokniuan. Tla itlaj amo kuali techchiuiliaj tokniuan, matikintlapojpoluikan uan tla itlaj otikinchiuilijkej matikinmiluikan matechtlapojpoluikan (Prov. 19:11; Efes. 4:26). San niman matimopaleuikan (Tito 3:14). Tokniuan omoyolchikajkej ijkuak okipaleuijkej tokni siuatl tlen omokoko. Non okinpaleui okachi kuali mamouikakan (Sal. 133:1).

16. Ijkon ken kijtoua Colosenses 4:3, 18, ¿ken uelis tikinpaleuiskej tokniuan ijkuak kintlajyouiltiaj?

¹⁶ Miakej tokniuan kitekichiuiliaj Jehová maski tekiuajkej kintlajyouiltiaj. Sekimej tokniuan tsaktokej. Matiktlatlaujtikan Jehová inpatka nonmej tokniuan, inpatka infamilias uan akinmej kinpaleuiaj tokniuan tlen tsaktokej (xiktlajtolti Colosenses 4:3, 18).c Ijkuak timotlatlaujtiaj inpatka tokniuan melauak kinpaleuia (2 Tes. 3:1, 2; 1 Tim. 2:1, 2).

17. ¿Ken uelis timoyektlaliskej para titlaxikoskej ijkuak techtlajyouiltiskej?

¹⁷ Tejuatsin uan mofamilia uelis nanmoyektlaliskej para nantlaxikoskej ijkuak namechtlajyouiltiskej (Hech. 14:22). Amo ximokuayejyekokan kox sapanoua namechtlajyouiltiskej. Ximochijchikauakan okachi kuali nanmouikaskej iuan Jehová uan xikinpaleuikan namokoneuan noijki ijkon makichiuakan. Tla ualeua itlaj namechtekipachoua, san niman xiktlatlaujtikan Jehová (Sal. 62:7, 8). Ximotlapouikan iuan namofamilia tleka uelis nankineltokaskej Jehová namechpaleuis.d Xikinpaleuikan namokoneuan mamoyektlalikan ijkuak itlaj panos, pero noijki xikinpaleuikan mamoyektlalikan para uelis tlaxikoskej ijkuak kintlajyouiltiskej uan makineltokakan Jehová kinpaleuis. Ijkon moyolchikauaskej uan moyolseuijtoskej.

18. ¿Ken techteochiuas Jehová?

¹⁸ ToTajtsin Dios techpaleuia matimoyolseuijtokan (Filip. 4:6, 7). Jehová techyolseuia ijkuak miakej peuaj mokokouaj, ijkuak panoua itlaj tlen amo kuali noso ijkuak tekiuajkej techtlajyouiltiaj. Jehová okintlali tlayekankej para makinmaluikan tokniuan uan noijki techkauilia tinochtin matimopaleuikan. Tla nochipa timoyolseuijtokej, techpaleuis matitlaxikokan itech ueyi “tlaijyowílistli” (Mat. 24:21). Itech non tonal miak ipati matimoyolseuijtokan uan matikinpaleuikan oksekimej mamoyolseuijtokan. Ijkuak panos ueyi tlajyouilistli ayakmo timoyolkokoskej nion timotekipachoskej. Tiyolpakiskej ijkon ken Jehová kineki uan nochipa timoyolseuijtoskej (Is. 26:3, 4).