1 | Ximotlatlaujti ‘Nochi tlan mitstekipachoa, xiktlali imak Dios’

BIBLIA KIJTOUA: “Nochi tlan nomechtekipachoah, xiktlalikah imak Dios, porke Ye [namechmaluia]” (1 PEDRO 5:7).

¿Tlen kijtosneki?

Jehová kineki matikiluikan nochi tlen techtekipachoua (Salmo 55:22). Matikiluikan Jehová nochi tlen techtekipachoua maski ualeua amitlaj ipati. Jehová kitekipachoua tlen tejuan techtekipachoua. Ikinon timoyolseuiaj ijkuak timotlatlaujtiaj (Filipenses 4:6, 7).

¿Ken techpaleuia?

Xamo timokuayejyekouaj tikatej toselti ijkuak amo kuali timomachiliaj. Noijki xamo oksekimej amo kajsikamatij tlen techpanotok (Proverbios 14:10). Pero toTajtsin Dios techajsikamati uan kuali techkaki, ikinon uelis tikiluiskej nochi tlen tikmachiliaj. Jehová kineki matikiluikan nochi tlen techtekipachoua porque kimati tlen timokuayejyekouaj, kimati ijkuak timoyolkokouaj uan kimati nochi tlen techpanoua (2 Crónicas 6:29, 30).

Okachi tikneltokaj Jehová techpaleuis ijkuak tikiluiaj tlen techpanoua. Noijki uelis tikijtoskej ken se tlakatl tlen okijkuilo Biblia. Ye okijto: “Otikitak ken nitlajyouia; otikmatki tlen nechtekipachoua” (Salmo 31:7). Timoyolchikauaj ijkuak tikmatij Jehová kita tlen techpanoua. Pero ye amo san techita ijkuak titlajyouiaj. Jehová kajsikamati tlen techpanoua, techpaleuia matimoyolseuikan uan techyolchikaua ika iTlajtol.

Biblia okipaleui Julián

Sapanoua nimotekipachoua

“Nimochijchikaua amo sapanoua nimotekipachos uan nikpia se kokolistli tlen itoka trastorno obsesivo compulsivo (TOC). Ualeua kuali nimomachilia pero san niman sapanoua peua nimotekipachoua. Ijkon nechpanoua ijkuak miakej nouan katej porque nimomojtia ken nechitaj”.

“Miakej mochijchikauaj nechpaleuiskej porque kimatij tlen nechpanoua pero ualeua amo nechpaleuia tlen nechiluiaj. Pero nikintlasojkamatilia porque mochijchikauaj nechpaleuiskej kuali manimomachili”.

“Ualeua oui nikita nimotlapouis iuan Jehová porque nimokokoua uan sapanoua nimotekipachoua. Ikinon moneki nimochijchikauas para kuali nimokuayejyekos tlen nikiluis Jehová. Nikita oui porque peua nimokuayejyekoua miak tlamantli uan nikilkaua tlen nikiluis. Ijkuak ijkon nechpanoua, oui nikita nikiluis Jehová tlen nimokuayejyekoua uan tlen nikmachilia”.

Nechpaleuia tlen kijtoua Biblia

“Ijkuak onimomachti Biblia, onikajsikamatki amo moneki nikiluis miak tlamantli toTajtsin Dios para manechkaki. Ijkuak nikita oui nikiluis tlen nikmachilia, san nikiluia: ‘Jehová techpaleui’. Maski amo miak tlamantli nikiluia Jehová, ye nechajsikamati uan nechpaleuia. Noijki onikitato se tepajti. Kuali nimomachilia ijkuak nimotlatlaujtia uan nio nikitati tepajti. Nimochijchikaua nimouikas iuan toTajtsin Dios porque nikmati ye nechtlasojtla uan kineki nechpaleuis”.