¿Technankilia Jehová ijkuak tiktlatlaujtiaj?

1, 2. ¿Tleka ualeua timokuayejyekouaj Jehová amo technankilia ijkuak tiktlatlaujtiaj?

“TIYOLPAKIS ijkuak tiktekichiuilis Jehová uan ye mitsmakas tlen kineki moyolo” (Sal. 37:4). Kualtsin tlen techiluia Jehová. Pero miak ipati matimokuayejyekokan kox Jehová san niman techmaka nochi tlen tiktlajtlaniliaj. Matimokuayejyekokan tlen kinpanoua sekimej tokniuan. Se tokni tlen kajki iselti kiluia Jehová kineki yas itech Tlamachtil para matetlapouikan Tekiuajkayotl pero panoua seki xiuitl uan amo kinotsaj. Se tokni telpochtli mokokoua uan kiluia Jehová makipajti para uelis okachi tlapaleuis kanin monechikoua pero amo pajti. Ipapanuan se telpochtli kitlatlaujtiaj Jehová makipaleui para nochipa makitekichiuili pero ye ayakmo kitekichiuilia Jehová.

² Xamo itlaj yotikiluijkej Jehová matechmaka pero ayamo tikseliaj. Ikinon xamo timokuayejyekouaj Jehová kinnankilia oksekimej pero tejuan amo technankilia. Noijki xamo timokuayejyekouaj amo techmaka tlen tiktlajtlaniliaj porque otikchijkej itlaj amo kuali. Se tokni tlen itoka Janice ijkon okipanok.b Ye uan inamik okiluijkej Jehová okinekiayaj yaskej Betel. Janice okijto: “Ne onimokuayejyeko san niman technotsaskiaj”. Pero opanok miak xiuitl uan amo okinnotskej. Janice okijto: “Onimoyolkoko uan amo onikmatiaya tlen nikchiuas. Onimotlajtlaniaya tlen amo kuali onikchi. Ne kuali onikilui Jehová tlen oniknekiaya pero amo onikajsikamatiaya tleka amo onechnankiliaya”.

3. ¿Tlen timomachtiskej axkan?

³ Xamo ualeua timotlajtlaniaj kox Jehová techkaki ijkuak tiktlatlaujtiaj. Sekimej tlen okitekichiuilijkej Jehová yiuejkika noijki ijkon omotlajtlanijkej (Job 30:20; Sal. 22:2; Hab. 1:2). ¿Tlen techpaleuis matikneltokakan Jehová technankilia ijkuak tiktlatlaujtiaj? (Sal. 65:2). Para tikmatiskej achto matimomachtikan eyi tlamantli. Se, ¿tlen kichiua Jehová? Ome, ¿tlen kineki Jehová matikchiuakan? Uan eyi, ¿tleka ualeua moneki tikpatlaskej tlen tiktlajtlaniliaj Jehová?

¿TLEN KICHIUA JEHOVÁ?

4. ¿Tlen techiluia Jehová ijkon ken kijtoua Jeremías 29:12?

⁴ Jehová techiluia techkaki ijkuak tiktlatlaujtiaj (xiktlajtolti Jeremías 29:12). Jehová kintlasojtla akinmej kitekichiuiliaj uan nochipa kinkaki (Sal. 10:17; 37:28). Pero non amo kijtosneki nochipa techmakas tlen tiktlajtlaniliaj. Xamo ijkuak tiyetoskej itech xochitlali Jehová techmakas tlen tiktlajtlaniliaj ikinon moneki timochiaskej.

5. ¿Tlen kilnamiktok Jehová ijkuak technankilia?

⁵ Jehová kilnamiktok tlen kineki kichiuas ijkuak technankilia (Is. 55:​8, 9). Ye kineki ipan tlaltikpak matechyekana iTekiuajkayo uan san sekan matiktekichiuilikan ika pakilistli. Pero Satanás okijto okachi kuali tiyetoskej tla san tejuan timonauatiskej (Gén. 3:​1-5). Jehová kinkauilia miakej makichiuakan tlen yejuan kinekij para kiteititis Diablo san tlakajkayaua. Ikinon axkan titlajyouiaj (Ecl. 8:9). Tejuan tikmatij axkan Jehová amo kachiuas tlen techtlajyouiltia. Tla ijkon kichiuaskia, miakej mokuayejyekoskiaj kuali tiyetoskej tla san tejuan timonauatiskej uan uelis tikyektlaliskej tlen techtlajyouiltia.

6. ¿Tleka moneki matikneltokakan Jehová tetlasojtla uan kichiua tlen kuali?

⁶ Jehová tlatlamantli technankilia maski ualeua san se tlamantli tiktlajtlaniliaj. Tekiua Ezequías okitlatlaujti Jehová makipajti ijkuak omokoko uan ye okipajti (2 Rey. 20:​1-6). Pero Jehová amo okichi tlen okilui Pablo ijkuak okitlatlaujti makikixtili se ‘uitstli itech icuerpo’. Non kijtosneki Pablo xamo omokokouaya (2 Cor. 12:​7-9). Noijki matikilnamikikan tlen okinpanok Santiago uan Pedro. Tekiua Herodes okinekiaya kinmiktis. Tokniuan omotlatlaujtijkej ipatka Pedro uan ipatka Santiago. Pedro omomakixti porque Jehová okichi se milagro pero Santiago okimiktijkej maski ipatka omotlatlaujtijkej (Hech. 12:​1-11). Xamo timotlajtlaniaj tleka Jehová okimakixti Pedro pero amo okimakixti Santiago. Biblia amo kijtoua tleka pero tejuan tikmatij Jehová nochipa kichiua tlen kuali. Ye okintlasojtlaya Pedro uan Santiago (Deut. 32:4; Apoc. 21:14).c Ualeua xamo Jehová amo technankilis ijkon ken tejuan tiknekij. Pero Jehová tetlasojtla uan kichiua tlen kuali ikinon amo tikualanij ken technankilia porque tikmatij ye kuali technankilis (Job 33:13).

7. ¿Tlen amo moneki matikchiuakan uan tleka?

⁷ Amo moneki matikitakan tlen techpanoua uan tlen kinpanoua oksekimej. Xamo tiktlajtlaniliaj itlaj Jehová pero ye amo techmaka. Satepan tikmatij ikaj okitlajtlanili Jehová tlen tejuan otiktlajtlanilijkej uan ye okimakak. Ijkon okipanok se tokni tlen itoka Anna. Inamik tlen itoka Matthew okajsik cáncer uan ye okitlatlaujti Jehová makipaleui mapajti. Ijkuakon ome tokniuan tlen yokipiayaj miak xiuitl noijki okinmajsik cáncer. Ikinon Anna okitlatlaujtiaya Jehová makinpaleui nonmej tokniuan uan noijki inamik. Satepan ome tokniuan opajtikej pero Matthew oixpoliuik. Anna omotlajtlaniaya kox Jehová okinpajti nonmej tokniuan uan tleka inamik amo okipajti. Amo kuali tikmatij tleka nonmej tokniuan opajtikej pero tikmatij Jehová satepan kipojpolos nochi tlen techtlajyouiltia. Noijki kineki kinyolitis akinmej okitekichiuilijkej (Job 14:15).

8. (1) ¿Tlen kichiua Jehová para techpaleuis ijkon ken kijtoua Isaías 43:2? (2) ¿Ken techpaleuia tla timotlatlaujtiaj ijkuak titlajyouiaj? (Xikita video Jehová techpaleuia ma titlaxikokan ijkuak timotlatlaujtiaj).

⁸ Jehová nochipa techpaleuis. ToTajtsin Jehová techtlasojtla uan amo kipaktia kitas ijkuak titlajyouiaj (Is. 63:9). Pero amo techkixtilia nochi tlen techtlajyouiltia. Biblia kijtoua tlen techtlajyouiltia yetoskia ken aueyatl uan tlitl (xiktlajtolti Isaías 43:2). Jehová techiluia techpaleuis ijkuak titlajyouiskej uan amo kitekauilis nochipa matitlajyouijtokan. Noijki techmakas espíritu santo para matitlaxikokan (Luc. 11:13; Filip. 4:13). Ikinon tikmatij nochipa techpaleuis matitlaxikokan uan nochipa matiktekichiuilikan.d

¿TLEN KINEKI JEHOVÁ MATIKCHIUAKAN?

9. ¿Ken techpaleuia Santiago 1:​6, 7 matikneltokakan Jehová techpaleuis?

⁹ Jehová kineki matikneltokakan (Heb. 11:6). Ualeua xamo sapanoua titlajyouiaj uan timotlajtlaniaj kox Jehová melauak techpaleuis. Pero Biblia techiluia toTajtsin Dios techmakas chikaualistli. Ijkon uelis titlaxikoskej uan yetoskia ken ‘titlejkoskej itech se tepamitl’ (Sal. 18:29). Ikinon amo keman matikijtokan Jehová amo techpaleuis. Matiktlatlaujtikan Jehová ika nochi toyolo uan matikneltokakan ye technankilis (xiktlajtolti Santiago 1:​6, 7).

10. Xikyekijto tlen moneki tikchiuaskej ijkuak yotimotlatlaujtijkej.

¹⁰ Jehová kineki itlaj matikchiuakan ijkuak yotiktlatlaujtijkej. Matimokuayejyekokan se tokni kitlatlaujtia Jehová para makikauili yas ueyi nechikol akin kipaleuia. ¿Tlen uelis kichiuas Jehová para kinankilis? Ye uelis kipaleuis mamoyolchikaua para kiluis akin kipaleuia. Pero tokni moneki yas kitati akin kipaleuia para iuan motlapouis uan xamo moneki miak uelta ijkon kichiuas. Uelis kiluis akin kipaleuia tekipanos okse tonal. Noijki uelis kiluis amo makitlaxtlaui non tonal.

11. ¿Tleka moneki nochipa matimotlatlaujtikan?

¹¹ Jehová kineki matikiluikan miak uelta tlen techtekipachoua (1 Tes. 5:17). Jesús otechpaleui matikajsikamatikan ualeua Jehová amo san niman technankilis ijkuak tiktlatlaujtiaj (Luc. 11:9). Ikinon amo matimosotlauakan. Nochipa matimotlatlaujtikan ika nochi toyolo (Luc. 18:​1-7). Ijkuak miak uelta tikiluiaj Jehová tlen tiknekij, tikititiaj melauak techpoloua tlen tiktlajtlaniliaj uan tikneltokaj ye techpaleuis.

¿TLEKA UALEUA MONEKI TIKPATLASKEJ TLEN TIKTLAJTLANILIAJ JEHOVÁ?

12. (1) ¿Tlen uelis timotlajtlaniskej uan tleka? (2) ¿Tlen moneki tikilnamikiskej para tiktlakaitaskej Jehová ijkuak timotlatlaujtiskej? (Xikita recuadro “¿Tiktlakaitaj Jehová ijkuak tiktlatlaujtiaj?”).

¹² Uelis timotlajtlaniskej eyi tlamantli tla tikitaj Jehová amo san niman technankilia. Se, “¿okachi ipati tlen niktlajtlanilia Jehová?”. Tejuan timokuayejyekouaj tlen tiktlajtlaniliaj okachi techpaleuis. Pero xamo tlen tiknekij satepan amo techpaleuis. Xamo tiknekij tikyektlaliskej itlaj pero Jehová okachi kimati ken kiyektlalis. Noijki xamo tlen tiktlajtlaniliaj Jehová amo kineki ijkon matikchiuakan (1 Juan 5:14). Matimokuayejyekokan tlen okinekiayaj ipapanuan se telpochtli tlen otikitakej itech párrafo se. Yejuan okitlatlaujtijkej Jehová makipaleui intelpoch para nochipa makitekichiuili uan mota kuali tlen okitlajtlanilijkej. Pero Jehová amikaj kichiualtia makitekichiuili. Ye kineki tinochtin matikueyichiuakan inuan tokoneuan porque ijkon tikpejpenaj tikchiuaskej (Deut. 10:​12, 13; 30:​19, 20). Pero ¿tlen uelis kitlajtlaniliskej Jehová ipapanuan non telpochtli? Uelis kiluiskej makinpaleui para kipaleuiskej intelpoch makitlasojtla Jehová uan kuali iuan mamouika (Prov. 22:6; Efes. 6:4).

13. ¿Keman techpaleuia Jehová ijkon ken kijtoua Hebreos 4:16?

¹³ Ome, “¿Jehová san niman nechmakas tlen niktlajtlanilia?”. Xamo tiknekij Jehová san niman matechnankili ijkuak tiktlatlaujtiaj. Pero ye kimati keman technankilis (xiktlajtolti Hebreos 4:16). Ijkuak Jehová amo san niman technankilia uelis timokuayejyekoskej amo technankilis. Pero xamo Jehová kita ok moneki timochiaskej. Matimotlapouikan oksepa tlen okipanok telpochtli tlen okitlatlaujtiaya Jehová makipajti. Tla Jehová kipajtiskia, xamo Satanás kijtoskia non telpochtli kitekichiuilia Jehová porque okipajti (Job 1:​9-11; 2:4). Pero matikilnamikikan Jehová yokijto kipojpolos kokolistli (Is. 33:24; Apoc. 21:​3, 4). Ikinon axkan amo tikchiaj Jehová san niman matechpajti. ¿Tlen uelis kitlajtlanilis Jehová non telpochtli? Uelis kitlajtlanilis makimaka chikaualistli uan makiyolseui para kitekichiuilis maski mokokoua (Sal. 29:11).

14. ¿Tlen techmachtia tlen okipanok Janice?

¹⁴ Oksepa matimotlapouikan tlen okipanok tokni Janice tlen okinekiaya yas Betel. Opanok makuili xiuitl uan ye okajsikamatki ken okinankili Jehová ijkuak okitlatlaujti. Ye okijto: “Jehová onechpaleui okachi kuali maniktekichiuili uan manikyektlali seki tlamantli. Omonekiaya okachi nitlaneltokas, okachi kuali nimomachtis uan omonekiaya nipakis maski amo san niman omochiuaya tlen ne oniknekiaya”. Satepan inamik Janice okiyolejkej mayeto tlayekanki itech circuito. Ye okijto: “Jehová onechnankili maski amo ken ne oniknekiaya. Yolik onikajsikamatki sapanoua kualtsin ken onechnankili. Sapanoua niktlasojkamatilia porque nechtlasojtla uan nechteochiua”.

15. ¿Tleka ualeua amo moneki tikiluiskej Jehová nochi tlen tiknekij? (Noijki xikinmita fotos).

¹⁵ Eyi, “¿moneki nikiluis Jehová nochi tlen nikneki?”. Maski moneki tikiluiskej Jehová nochi tlen tiknekij, xamo ualeua amo moneki ijkon tikchiuaskej para tikkauiliskej Jehová matechyekana. Oksepa matimotlapouikan tlen okipanok tokni tlen kajki iselti uan okitlatlaujtiaya Jehová para uelis yas itech Tlamachtil para matetlapouikan Tekiuajkayotl. Ye kineki yas momachtiti para tlapaleuis kanin okachi moneki. ¿Tlen okachi uelis kitlajtlanilis Jehová ijkuak kitlatlaujtia makipaleui? Uelis kitlatlaujtis makipaleui tlatlamantli makitekichiuili (Hech. 16:​9, 10). Satepan ijkuak motlatlaujtis uelis kitlajtlanis tlayekanki itech circuito kanin moneki okachi matlapaleuikan precursores. Uelis noijki tlajkuilos Betel para kimatis kanin okachi moneki tetlapouis.e

16. ¿Tlen uelis tikneltokaskej?

¹⁶ Ijkon ken yotimomachtijkej, uelis tikneltokaskej Jehová technankilis ijkuak tiktlatlaujtiskej porque ye techtlasojtla uan kimati techmakas tlen kuali (Sal. 4:3; Is. 30:18). Xamo technankilis amo ken tejuan otiknekiayaj pero ye nochipa kikaki ijkuak tiktlatlaujtiaj. Techtlasojtla miak uan amo keman techkauas toselti (Sal. 9:10). Ikinon nochipa matikneltokakan Jehová uan ijkuak timotlatlaujtiskej matikiluikan tlen tikpiaj itech toyolo (Sal. 62:8).