TLAMACHTIL 7
TLAKUIKALI 15 ¡Cristo ueyititok!
¿Ken techpaleuia ijkuak Jehová techtlapojpoluia?
“Te melauak titetlapojpoluia” (SAL. 130:4).
NIN TLEN TIMOMACHTISKEJ
Biblia kijtoua seki tlamantli tlen techititia san Jehová melauak techtlapojpoluia. Tlen axkan timomachtiskej techpaleuis okachi matiktlasojkamatilikan Jehová techtlapojpoluia.
1. ¿Tleka ualeua amo tikajsikamatij kox melauak yotechtlapojpoluijkej?
KUALI timomachiliaj ijkuak akin otikyolkokojkej techiluia techtlapojpoluia. Pero ¿tlen kijtosneki ijkuak techiluiaj techtlapojpoluiaj? Miakej amo kajsikamatij tlen kijtosneki melauak tetlapojpoluiskej. Miakej kijtouaj: “Yonimitstlapojpolui. Amo ximotekipacho porque yitikmati kuali timouikaj”. Oksekimej kijtouaj: “Nimitstlapojpoluis pero amo oksepa ijkon xikchiua”.
2. ¿Ken tetlapojpoluia Jehová? (Noijki xikita nota).
2 Jehová amo tetlapojpoluia ijkon ken tejuan titetlapojpoluiaj. Matikitakan tleka ijkon tikijtouaj. Akin okijkuilo salmo okijto Jehová ‘melauak tetlapojpoluia uan ikinon tikmauiliaj’ (Sal. 130:4).a Nin techititia san Jehová melauak tetlapojpoluia ika nochi iyolo. Miak ipati matikitakan ken techtlapojpoluia tla tiknekij noijki ijkon titetlapojpoluiskej. Seki versículos tlen okinmijkuilojkej itech Escrituras Hebreas, okijkuilojkej se tlajtoli ika hebreo tlen san kiteititia ken tetlapojpoluia Jehová.
3. ¿Tleka Jehová amo tetlapojpoluia ijkon ken tejuan titetlapojpoluiaj? (Isaías 55:6, 7).
3 Jehová sepa kipojpoloua totlajtlakol ijkuak techtlapojpoluia uan techkauilia oksepa iuan matimouikakan. Techtlajtlachialtia Jehová melauak techtlapojpoluia ika nochi iyolo (xiktlajtolti Isaías 55:6, 7).
4. ¿Tlen okichi Jehová para matikitakan ye melauak tetlapojpoluia?
4 Jehová amo tetlapojpoluia ijkon ken tejuan tikchiuaj ikinon amo keman tikajsikamatiskej ken tetlapojpoluia. Pero Jehová techititia seki tlamantli tlen kajki itech iTlajtol tlen techpaleuia matikajsikamatikan ken tetlapojpoluia. Ikinon tikitaskej seki tlamantli tlen techpaleuis matikajsikamatikan tlen kichiua Jehová para kipojpolos totlajtlakol uan oksepa iuan matimouikakan. Axkan tikitaskej seki tlamantli tlen techpaleuis okachi matikpatioitakan Jehová techtlapojpoluia porque ye techtlasojtla uan techiknomati.
JEHOVÁ KIUIKA TOTLAJTLAKOL
5. ¿Tlen kichiua Jehová ijkuak techtlapojpoluia?
5 ITlajtol toTajtsin Dios kijtoua totlajtlakol yetoskia ken itlaj etik tikmamajtokej. Matikitakan tleka ijkon tikijtouaj. Tekiua David okijto: “Amo ueli nikilkaua notlajtlakol porque yetoskia ken nikmamajtok itlaj sapanoua etik uan amo nikxikoua” (Sal. 38:4). Pero Jehová kintlapojpoluia akinmej moyolkopaj (Sal. 25:18; 32:5). Tlajtoli “techtlapojpoluia” tlen kajki itech ninmej versículos okitlajtolkopkej ika hebreo uan kijtosneki itlaj “kajkokuij” noso itlaj “kiuikaj”. Nin techpaleuia matimokuayejyekokan Jehová yetoskia ken se tlakatl chikauak tlen kimomamaltia totlajtlakol tlen sapanoua etik uan kiuika.
‘Techtlapojpoluia’ (Sal. 32:5).
6. ¿Kanin kiuika Jehová totlajtlakol?
6 Biblia kijtoua kanin kiuika Jehová totlajtlakol. Salmo 103:12 kijtoua: “Ijkon ken uejka kajki kanin kisa tonaltsin uan kanin poliuiti, ijkon uejka kitlalia nochi totlajtlakol”. Non texto techpaleuia matikajsikamatikan kanin kitlalia Jehová totlajtlakol. Sapanoua uejka mokaua kanin kisa tonaltsin uan kanin kalaki. Nin kijtosneki ijkuak Jehová techtlapojpoluia yetoskia ken sapanoua uejka kiuika totlajtlakol. Nin techititia Jehová melauak techtlapojpoluia uan non techyolseuia.
“Uejka kajki kanin kisa tonaltsin uan kanin poliuiti” (Sal. 103:12).
7. ¿Kanin kikaua Jehová totlajtlakol ijkuak techtlapojpoluia? (Miqueas 7:18, 19).
7 ¿Kijtosneki Jehová kimokauia totlajtlakol ijkuak kijtoua uejka kiuika? Amo. Tekiua Ezequías okijto Jehová yetoskia ken uejka okitlamochili itlajtlakol noso nota kijtoua ‘ayakmo okitak itlajtlakol’ (Is. 38:9, 17; nota). Nin kijtosneki ijkuak timoyolkopaj, Jehová kikitskia totlajtlakol uan uejka kitlamotla kanin amo oksepa kitas. Non versículo noijki uelis ijkin tiktlajtolkopaskej: “Te otikchi manikmachili ken amo keman onitlajtlakolchi”. Nin okachi techpaleuia matikajsikamatikan tlen kijtoua Miqueas 7:18, 19 (xiktlajtolti). Jehová kitlamotla totlajtlakol ijtik mar kanin okachi uejkatlan. Yiuejkika tla itlaj ouetsiaya ijtik mar ayakmo ueli okikixtiayaj.
“Ayakmo tikita notlajtlakol” (Is. 38:17).
“Te tiktlamotlas nochi intlajtlakol ijtik mar kanin okachi uejkatlan” (Miq. 7:19).
8. ¿Tlen yotimomachtijkej?
8 Nochi tlen yotikitakej techititia Jehová melauak techtlapojpoluia, kiuika totlajtlakol uan ayakmo tikmamajtokej. Techtlapojpoluia ijkon ken David okijto: “Pakij akinmej kintlapojpoluiaj tlen amo kuali okichijkej. Noijki pakij akinmej kintlapojpoluiliaj intlajtlakol. Jehová amo kilnamiktok itlajtlakol tlakatl ikinon tlakatl paki” (Rom. 4:7, 8). ToTajtsin Dios melauak techtlapojpoluia ika nochi iyolo.
JEHOVÁ KIPOJPOLOUA TOTLAJTLAKOL
9. ¿Tlen tlamantli techpaleuia matikajsikamatikan Jehová sepa techtlapojpoluia?
9 Axkan matikitakan okseki tlamantli tlen techpaleuia matikajsikamatikan Jehová sepa kintlapojpoluia akinmej moyolkopaj porque yotechtlaxtla. Biblia kijtoua Jehová kipaka uan kichipaua totlajtlakol uan ijkon chipaui akin otlajtlakolchi (Sal. 51:7; Is. 4:4; Jer. 33:8). Ijkuak se tsotsoli kajsi itlaj chichiltik amo san niman chipauis ijkuak tikpakaskej. Pero Jehová techyekiluia ken mokaua totlajtlakol ijkuak techtlapojpoluia. Kijtoua: “Maski namotlajtlakol yetos chichiltik ken escarlata, mokopas istak ken nieve; maski yetos chichiltik ken tsotsoli carmesí, mokopas istak ken ichkatsojmitl” (Is. 1:18). Jehová ijkon techititia para matikneltokakan ye amo san kilnamiktok tlen amo kuali otikchijkej.
“Maski namotlajtlakol yetos chichiltik ken escarlata, mokopas istak ken nieve” (Is. 1:18).
10. ¿Tlen okse tlamantli techititia Jehová para matikajsikamatikan ye melauak techtlapojpoluia?
10 Yichikome otikitakej ijkuak titlajtlakolchiuaj yetoskia ken itlaj tikteuikiliaj (Mat. 18:32-35). Ikinon ijkuak titlajtlakolchiuaj yetoskia ken okachi momiaktilia tlen tikteuikiliaj. Pero ijkuak techtlapojpoluia Jehová, yetoskia ken kipojpoloua nochi tlen tikteuikiliaj uan ayakmo moneki tiktlaxtlauaskej. Ikinon tiktlasojkamatiliaj Jehová porque melauak techtlapojpoluia ika nochi iyolo.
“Ne onimitsilui ayakmo techkopili tlen otechuikiliaya” (Mat. 18:32-35).
11. ¿Ken techtlapojpoluia toTajtsin Dios? (Hechos 3:19).
11 Jehová sepa kipojpoloua totlajtlakol ijkuak techtlapojpoluia (xiktlajtolti Hechos 3:19). Yiuejkika otlajkuilouayaj ika tinta tlen san okipiaya tekoli uan atl. Ikinon ijkuak okinekiayaj itlaj kipojpoloskej, san okisiauayaj se esponja uan ika okipojpolouayaj. Ijkon amo oui okipojpolouayaj ijkuak ikaj itlaj okiteuikiliaya. Ayakmo omotaya kanin oijkuilitoka akin otlateuikiliaya. Tiktlasojkamatiliaj Jehová ijkuak techtlapojpoluia porque ye sepa kipojpoloua totlajtlakol (Sal. 51:9).
‘Jehová techtlapojpoluilia totlajtlakol’ (Hech. 3:19).
12. ¿Tlen kichiua Jehová ijkuak kijtoua kipojpoloua totlajtlakol?
12 Jehová techititia okse tlamantli para matikajsikamatikan tlen kichiua ijkuak techtlapojpoluia. Biblia kijtoua: “Nikpojpolos tlen amo kuali otikchi yetoskia ken se mixtli kipachos. Motlajtlakol nikpojpolos ijkon ken ijkuak sapanoua tlamixtemi uan ayakmo itlaj mota” (Is. 44:22). Ijkuak Jehová techtlapojpoluia, totlajtlakol ayakmo mota ijkon ken ijkuak sapanoua tlamixtemi.
“Nikpojpolos tlen amo kuali otikchi yetoskia ken se mixtli kipachos” (Is. 44:22).
13. ¿Ken timomachiliaj Jehová techtlapojpoluia?
13 ¿Tlen techmachtia nochi tlen yotikitakej? Jehová yotechtlapojpolui ikinon amo matimokuayejyekokan nochipa kilnamiktos otitlajtlakolchijkej. Jesucristo yokitlaxtla ika ieso totlajtlakol ikinon ayakmo moneki tejuan tiktlaxtlauaskej. Totlajtlakol sepa yopojpoliuik ken yetoskia amo keman otitlajtlakolchijkej. Jehová ijkon techtlapojpoluia ijkuak melauak timoyolkopaj.
JEHOVÁ TECHKAUILIA OKSEPA IUAN MATIMOUIKAKAN IJKUAK TECHTLAPOJPOLUIA
Oksepa timouikaj iuan Jehová ijkuak ye techtlapojpoluia. (Xikita párrafo 14).
14. ¿Tleka uelis tikneltokaskej Jehová techtlapojpoluia? (Noijki xikinmita fotos).
14 Oksepa timouikaj iuan Jehová ijkuak ye techtlapojpoluia. Nin tlamantli techpaleuia amo san matikilnamiktokan otitlajtlakolchijkej. Noijki Jehová amo san kilnamiktok tlen amo kuali otikchijkej uan amo san kitok keman uelis techtlajyouiltis. Jehová amo keman ijkon kichiuas. ¿Tleka ijkon tikneltokaj? Ye ineuian ijkon okilui profeta Jeremías: “Ne nikintlapojpoluis uan ayakmo nikilnamikis intlajtlakol” (Jer. 31:34). Apóstol Pablo noijki ijkon okijto: “Ayakmo nikilnamikis intlajtlakol” (Heb. 8:12). ¿Tlen kijtosneki tlen okijto?
“Ayakmo nikilnamikis intlajtlakol” (Jer. 31:34).
15. ¿Tlen kijtosneki ijkuak Jehová kijtoua ayakmo kilnamikis totlajtlakol?
15 Ijkuak Biblia kijtoua “nikilnamikis” amo nochipa kijtosneki tikilnamikiskej tlen yiuejkika opanok. Ualeua kijtosneki itlaj tikchiuaskej. Matikitakan tlen okijto tlakatl tlen okipilojkej inakastlan Jesús. Okilui: “Jesús, techilnamiki ijkuak peuas titlanauatis” (Luc. 23:42, 43). Non tlakatl amo san okilui Jesús makilnamiki ijkuak tlanauatiskia. Jesús okajsikamatki omonekiaya kiyolitis non tlakatl. Non techititia Jehová yotechtlapojpolui ikinon ayakmo keman kilnamikis totlajtlakol.
16. ¿Tlen kijtoua Biblia ijkuak Jehová techtlapojpoluia?
16 Matikitakan okse tlamantli tlen techpaleuia matikajsikamatikan ken timomachiliaj ijkuak Jehová techtlapojpoluia. Tinochtin titlajtlakolejkej ikinon yetoskia ken tikatej ‘tiitlakeualuan tlajtlakoli’. Pero ijkuak Jehová techtlapojpoluia yetoskia ken kinkokototsa cadenas tlen ika tiilpitokej. Ijkon ayakmo tikatej “imak tlajtlakoli” (Rom. 6:17, 18; Apoc. 1:5). Tipakij miak ijkuak Jehová techtlapojpoluia. Timomachiliaj ijkon ken se tlakatl tlen kiluiaj ayakmo yetos tlakeuali.
Otechmakixtijkej “imak tlajtlakoli” (Rom. 6:18).
17. ¿Tleka tikijtouaj yetoskia ken techpajtia Jehová ijkuak techtlapojpoluia? (Isaías 53:5).
17 (Xiktlajtolti Isaías 53:5). Saiktlami tikitaskej Biblia kijtoua tejuan titlajtlakolejkej porque yetoskia ken tikpiaj se kokolistli tlen temikti. Pero Jehová yetoskia ken yotechpajti porque topatka okitemakak iKone. Ijkon oksepa uelis iuan timouikaskej (1 Ped. 2:24). Ijkuak ikaj sapanoua mokokoua uan satepan pajti, paki miak porque ayakmo mokokoua. Tejuan noijki tipakij miak ijkuak Jehová techtlapojpoluia porque oksepa iuan timouikaj.
“Okikokojkej para matipajtikan” (Is. 53:5).
¿KEN TECHPALEUIA IJKUAK JEHOVÁ TECHTLAPOJPOLUIA?
18. ¿Tlen techmachtia nochi tlen yotikitakej ijkuak Jehová techtlapojpoluia? (Noijki xikita recuadro “¿Tlen kichiua Jehová ijkuak techtlapojpoluia?”).
18 ¿Tlen techmachtia nochi tlen yotikitakej ijkuak Jehová techtlapojpoluia? Ijkuak Jehová techtlapojpoluia, sepa kipojpoloua totlajtlakol uan ayakmo keman kilnamikis. Non techpaleuia kuali iuan matimouikakan. Matikilnamiktokan Jehová amo techtlapojpoluia porque ijkon moneki kichiuas. Ye techtlapojpoluia porque techtlasojtla uan kipaktia techtlapojpoluis ika nochi iyolo (Rom. 3:24).
19. (1) ¿Tleka moneki matimotlasojkamatikan? (Romanos 4:8). (2) ¿Tlen timomachtiskej chikome?
19 (Xiktlajtolti Romanos 4:8). Tiktlasojkamatiliaj toTajtsin Dios porque Salmo 130:4 kijtoua ‘ye melauak tetlapojpoluia’. Pero moneki tikchiuaskej tlen okijto Jesús tla tiknekij Jehová matechtlapojpolui. Ye okijto: “Tla amo nankintlapojpoluiaj akinmej itlaj namechtoktiaj, toTajtsin Dios noijki amo namechtlapojpoluilis namotlajtlakol” (Mat. 6:14, 15). Nin techititia moneki titetlapojpoluiskej ijkon ken Jehová tetlapojpoluia. Chikome tikitaskej tlen techpaleuis matitetlapojpoluikan.
TLAKUIKALI 46 Tlasojkamati Jehová
a Miakej tlen kitlajtolkopaj Biblia amo kuali okitlajtolkopkej tlen kijtoua Salmo 130:4 porque san kijtoua toTajtsin Dios tetlapojpoluia uan amo okitlalilijkej tlajtoli melauak.