¿Akin uelis tiktlajtlaniskej ken kita tlen tiknekij tikchiuaskej?

1. ¿Tlen techpaleuis kuali makisa tlen tiknekij tikchiuaskej? (Proverbios 13:10; 15:22).

TINOCHTIN tiknekij kuali makisa tlen tiknekij tikpejpenaskej tikchiuaskej. Biblia techiluia matikintlajtlanikan oksekimej tla tiknekij kuali makisa tlen tikchiuaskej (xiktlajtolti Proverbios 13:10; 15:22).

2. ¿Tlen yotechilui Jehová kichiuas?

² San Jehová okachi kuali techyektlapouia. Ikinon matiktlatlaujtikan matechmaka ixtlamatilistli. Ye yokijto: “Nimitsitos ijkuak nimitsyektlapouis” (Sal. 32:8). Nin kijtosneki Jehová kimati ken techyektlapouis uan techpaleuia matikchiuakan tlen techiluia.

3. ¿Tlen naui tlamantli tiknankiliskej?

³ Tiknejnekiskej iTlajtol toTajtsin Dios para tiknankiliskej naui tlamantli tlen xamo timotlajtlaniaj. ¿Tlen tikchiuaskej tla tiknekij matechpaleui ijkuak techyektlapouiskej? ¿Akin uelis tiktlajtlaniskej ken kita tlen tiknekij tikchiuaskej? ¿Tleka moneki matikkakikan ijkuak ikaj techyektlapouia? ¿Tleka amo matikinmiluikan oksekimej topatka makipejpenakan tlen tiknekij tikchiuaskej?

¿TLEN TIKCHIUASKEJ TLA TIKNEKIJ MATECHPALEUI IJKUAK TECHYEKTLAPOUISKEJ?

4. ¿Tlen moneki tikchiuaskej tla tiknekij matechpaleui ijkuak ikaj techyektlapouis?

⁴ Matiyetokan tiyolyamankej tla tiknekij matechpaleui tlen techiluis ijkuak ikaj techyektlapouis. Matikilnamiktokan okachi techpaleuis tlen techiluiskej tla achto tikintlajtlaniskej tokniuan tlen okachi kimatij noso tlen okachi ixtlamatkej. Tla amo tikchiuaskej nin tlamantli, Jehová amo uelis techpaleuis uan amo tikchiuaskej tlen kijtoua iTlajtol (Miq. 6:8; 1 Ped. 5:5). Pero tla tiyolyamankej tikkakiskej nochi tlen techiluia toTajtsin Dios.

5. ¿Tleka tekiua David uelis moueyinekiskia?

⁵ Tekiua David techmachtia itlaj miak ipati porque ye okichi miak tlamantli pero amo keman omoueyineki. Ye otlatsotsonaya ijkuak ayamo okatka tekiua, miakej okixmatiayaj uan hasta tekiua Saúl okitlakej makitlatsotsoniliti (1 Sam. 16:​18, 19). Jehová okimakak chikaualistli ijkuak okitlali mayeto tekiua (1 Sam. 16:​11-13). Miakej okiueyitlalijkej David porque okintlanili akinmej okinkokoliayaj. Noijki okitlanili Goliat tlen okatka filisteo uan okatka uejkapan (1 Sam. 17:​37, 50; 18:7). Tla moueyinekiskia, uelis kijtoskia: “Ne yonikchi miak tlamantli kuali ikinon amo moneki ikaj niktlajtlanis tlen nikchiuas”. Pero David amo ijkon okichi.

6. ¿Ken tikmatij David okikakiaya ijkuak okiyektlapouiayaj? (Xikita dibujo).

⁶ Tekiua David omouikaya iuan iyolikniuan tlen uelis kintlajtlaniskia kox kuali okitayaj tlen okinekiaya kichiuas (1 Crón. 27:​32-34). Ye nochipa okikakiaya ijkuak ikaj okiyektlapouiaya maski okatka tlakatl noso siuatl. Se tonal okikak tlen okilui Abigaíl. Inamik Abigaíl omotokayotiaya Nabal uan non tlakatl okatka sapanoua fiero iyelis porque otlaixnekiaya uan amo omotlasojkamatiaya. David okikak Abigaíl porque okatka yolyamanki ikinon amo otemikti (1 Sam. 25:​2, 3, 21-25, 32-34).

7. ¿Tlen techmachtia tlen okichi David? (Eclesiastés 4:13; noijki xikinmita fotos).

⁷ ¿Tlen techmachtia tlen okichi David? Xamo tejuan noijki tikmatij tikchiuaskej miak tlamantli uan ualeua tikinnauatiaj oksekimej. Pero non amo kijtosneki nochi yitikmatij uan amo moneki ikaj itlaj techiluis. Moneki matikkakikan tlen techiluiskej maski san akin techyektlapouis (xiktlajtolti Eclesiastés 4:13). Ijkon amo tikchiuaskej tlen amo kuali uan amo timotlajyouiltiskej nion tikintlajyouiltiskej oksekimej.

¿AKIN UELIS TIKTLAJTLANISKEJ KEN KITA TLEN TIKNEKIJ TIKCHIUASKEJ?

8. ¿Tleka David okitlajtlani Jonatán tlen kichiuaskia para oksepa mouikaskia iuan tekiua Saúl?

⁸ Matikitakan tlen okse tlamantli techmachtia tlen okichi David. Ye okinkakiaya akinmej omouikayaj iuan Jehová uan tlen okajsikamatiayaj tlen okipanotoka. Ijkon okichi ijkuak okitlajtlani Jonatán tlen kichiuaskia para oksepa mouikaskia iuan tekiua Saúl. ¿Tleka okitlajtlani Jonatán? Porque ye kuali omouikaya iuan Jehová uan noijki kuali okixmatiaya ipapa (1 Sam. 20:​9-13). ¿Ken uelis tikchiuaskej ijkon ken okichi David?

9. Xikyekijto akin uelis tiktlajtlaniskej tla tiknekij tikmatiskej tlen tikchiuaskej. (Proverbios 13:20).

⁹ Ijkuak itlaj tikpejpenaskej tikchiuaskej uan tiknekij ikaj tiktlajtlaniskej, matiktlajtlanikan akin kuali mouika iuan Jehová uan yokipanok tlen tiknekij tikmatiskej (xiktlajtolti Proverbios 13:20).a Matikijtokan se telpochtli kineki monamiktis. ¿Akin uelis kitlajtlanis tlen kichiuas? Se telpochtli uelis kiluis principios bíblicos tlen katej itech Biblia uan kipaleuis. Pero okachi kipaleuis tla kitlajtlanis se tokni tlen yomonamikti. Non tokni uelis kiluis tlen kixnamikij akinmej monamiktiaj uan noijki kiluis tlen uelis kipaleuis. Non telpochtli uelis kitlajtlanis se tokni tlen kuali kixmati uan kuali mouika iuan isiua.

10. ¿Tlen timomachtiskej?

¹⁰ Axkan yotikitakej tlen moneki tikchiuaskej tla tiknekij matechpaleui tlen techiluiskej ijkuak techyektlapouiskej uan noijki otikitakej akin moneki tiktlajtlaniskej matechilui ken kita tlen tiknekij tikchiuaskej. Axkan tikitaskej tleka moneki matikinkakikan oksekimej ijkuak techyektlapouiskej uan kox techpaleuis tla tikinmiluiskej oksekimej topatka makipejpenakan tlen tikchiuaskej.

¿TLEKA MONEKI MATIKKAKIKAN IJKUAK IKAJ TECHYEKTLAPOUIA?

11, 12. (1) ¿Tlen amo moneki matikchiuakan? (2) ¿Tlen okichi Rehoboam ijkuak omonekiaya kipejpenas itlaj miak ipati?

¹¹ Miakej achto kipejpenaj tlen kichiuaskej uan satepan kintlajtlaniaj oksekimej para makinmiluikan kuali tlen kinekij kichiuaskej. Amo kuali tla ijkon tikchiuaskej. Tikitaskej tlen okipanok tekiua Rehoboam para amo ijkon matechpano.

¹² Rehoboam okitlalijkej mayeto tekiua ompa Israel ijkuak Salomón oixpoliuik. Ijkuakon israelitas kuali okatkaj uan amitlaj okinpolouaya. Pero okijtojkej Salomón sapanoua okintekipanoltiaya ikinon okiluijkej Rehoboam ayakmo okachi makintekipanolti. Tekiua Rehoboam okijto mokuayejyekoskia tlen kichiuaskia. Ye okinmilui sekimej tlakamej tlen yokipiayaj miak xiuitl makipaleuikan. Nonmej tlakamej okipaleuijkej Salomón ijkuak otlanauatiaya (1 Rey. 12:​2-7). Pero Rehoboam amo okikak tlen okiluijkej. ¿Tleka ijkon okichi? Xamo yokimatiaya tlen kichiuas uan okintlajtlani oksekimej san para makiluikan kuali tlen yokipejpenki kichiuas. Ikinon okipakti tlen okiluijkej telpochmej ijkuak okintlajtlani kox kuali okitayaj tlen okinekiaya kichiuas (1 Rey. 12:​8-14). Rehoboam okinkak nonmej telpochmej pero sekimej israelitas okixnamikej porque amo okinpakti tlen okichijtoka. Ye otlajyoui porque amo kuali okipejpenki tlen okinekiaya kichiuas (1 Rey. 12:​16-19).

13. ¿Tlen techpaleuis matikmatikan kox tikinkakij oksekimej ijkuak techyektlapouiaj?

¹³ ¿Tlen techmachtia tlen okipanok Rehoboam? Ijkuak ikaj tiktlajtlaniaj ken kita tlen tiknekij tikchiuaskej, matikkakikan tlen techiluis uan amo san matikchiakan matechilui kuali tlen tiknekij tikchiuaskej. Matimotlajtlanikan: “¿Amo nikneki nikkakis tla amo nechiluia tlen ne nimokuayejyekoua nikchiuas?”.

14. Xikyekijto tlen moneki tikilnamiktoskej ijkuak ikaj techyektlapouis. (Noijki xikita dibujo).

¹⁴ Matikijtokan se tokni kiluiaj uejka matekipanoti uan kuali kitlaxtlauiskej. Pero moneki kikajteuas ifamilia. Ye achto kitlajtlania se tokni tlayekanki tlen uelis kichiuas. Non tokni kiyektlapouia ika iTlajtol toTajtsin Dios uan kiluia moneki kinpaleuis akinmej pouij itech ifamilia kuali mamouikakan iuan Jehová (Efes. 6:4; 1 Tim. 5:8). Tokni amo okipakti tlen okilui tlayekanki ikinon opejki kintlajtlania oksekimej tokniuan para makiluikan kuali kitaj tlen kineki kichiuas. ¿Okinekiaya makipaleuikan noso san makiluikan kuali tlen kineki kichiuas? Noijki matikilnamiktokan toyolo tekajkayaua (Jer. 17:9). Ikinon ualeua amo techpaktis tlen oksekimej techiluiskej matikchiuakan.

¿TLEKA AMO MATIKINMILUIKAN OKSEKIMEJ TOPATKA MAKIPEJPENAKAN TLEN TIKCHIUASKEJ?

15. ¿Tlen amo moneki tikchiuaskej uan tleka?

¹⁵ Jehová kichia tisejse matikpejpenakan tlen tikchiuaskej (Gál. 6:​4, 5). Axkan yotimomachtijkej tleka moneki timoyekanaskej ika iTlajtol toTajtsin Dios ijkuak itlaj tikpejpenaskej tikchiuaskej uan matikkakikan tlen techiluiskej tokniuan tlen kuali mouikaj iuan Jehová. Pero amo keman matikinmiluikan tokniuan topatka makipejpenakan tlen tikchiuaskej. Ikinon amo matikintlajtlanikan toyolikniuan tlen kichiuaskiaj tla kinpanoskia ijkon ken techpanotok. Noijki kuali matimokuayejyekokan tlen tikchiuaskej uan amo san matikchiuakan tlen oksekimej kichiuaj.

16. ¿Tlen okinpanok tokniuan tlen okatkaj ompa Corinto uan tleka sejse omonekiaya kipejpenaskej kox kikuaskiaj nakatl tlen okinmaniliayaj imágenes? (1 Corintios 8:7; 10:​25, 26).

¹⁶ Matikitakan tlen okichijkej tokniuan tlen okatkaj achto siglo. Nonmej tokniuan opouiayaj itech tlanechikol ompa Corinto uan omonekiaya kipejpenaskej itlaj miak ipati. Apóstol Pablo okinmijkuilili: “Tejuan tikmatij se imagen amitlaj ipati porque onka san se Dios” (1 Cor. 8:4). Ikinon miakej tokniuan okijtojkej kikuaskiaj nakatl tlen kinemakaj maski xamo okinmanilijkej imágenes. Oksekimej okijtojkej amo kikuaskiaj non nakatl porque okinkuejsouaya intlalnamikilis (xiktlajtolti 1 Corintios 8:7; 10:​25, 26). Sejse tokniuan omonekiaya kipejpenas tlen kichiuaskia. Pablo amo keman okinmilui tokniuan tlen okatkaj Corinto makintlajtlanikan oksekimej inpatka makijtokan tlen omonekiaya kichiuaskej nion makichiuakan tlen oksekimej kichiuaj. Porque ‘nochtin kijtoskej tlen okichijkej ijkuak toTajtsin Dios kinmixkomakas’ (Rom. 14:​10-12).

17. Xikyekijto tlen techpanos tla san tikchiuaskej tlen oksekimej kichiuaj. (Noijki xikinmita fotos).

¹⁷ Axkan noijki uelis techpanos ijkon ken okinpanok tokniuan tlen okatkaj achto siglo. Matimotlapouikan itech tlamantli tlen kipia san tepitsin estli. Tisejse moneki tikpejpenaskej kox tikseliskej noso amo.b Xamo tikitaj oui tikpejpenaskej tlen tikchiuaskej pero moneki tisejse tikpejpenaskej tlen tikchiuaskej (Rom. 14:4). Totlalnamikilis ayakmo techiluis tlen moneki tikchiuaskej tla san tikchiuaskej tlen oksekimej kichiuaj. Matikixtlamachtikan totlalnamikilis uan ijkon tikpejpenaskej tlen okachi techpaleuis (Heb. 5:14). Achto matimomachtikan uan matikitakan tlen principios bíblicos techpaleuiskej uan ijkon kuali tikpejpenaskej tlen tikchiuaskej. Tla yotimomachtijkej uan tikitaj moneki ikaj matechpaleui matikajsikamatikan tlen tiknekij tikmatiskej, matikiluikan matechpaleui se tokni tlen kipia chikauak itlaneltokilis.

MATIKINTLAJTLANIKAN OKSEKIMEJ KEN KITAJ TLEN TIKNEKIJ TIKCHIUASKEJ

18. ¿Ken techpaleuia Jehová matikpejpenakan tlen tikchiuaskej?

¹⁸ Jehová techkauilia matikpejpenakan tlen tikchiuaskej porque kimati tikchiuaskej tlen kuali. ToTajtsin Dios techpaleuia ika iTlajtol uan noijki uelis techpaleuiskej toyolikniuan tlen kipiaj chikauak intlaneltokilis matimoyekanakan ika principios bíblicos. Ijkon Jehová techmaluia ken se teta tlen sapanoua tetlasojtla (Prov. 3:​21-23). ¿Ken uelis tiktlasojkamatiliskej porque techpaleuia?

19. ¿Ken uelis tikyolpaktiskej Jehová?

¹⁹ Tetajmej kinpaktia ijkuak inkoneuan kipejpenaj kitekichiuiliskej Jehová, ijkuak mochiuaj ixtlamatkej uan ijkuak kinekij kinpaleuiskej oksekimej. Jehová noijki paki ijkuak timochijchikauaj tiktekichiuiliskej uan ijkuak tikintlajtlaniaj oksekimej ken kitaj tlen tiknekij tikchiuaskej. Noijki tikueyichiuaj ijkuak tikpejpenaj tlen okachi kuali.