¿Tlen techpaleuis okachi kuali matimotlatlaujtikan?

1, 2. (1) ¿Tleka ualeua ijkuak timotlatlaujtiaj tikmachiliaj san ompa tikojpauijtokej tlen tikiluiaj Jehová uan amo tikiluiaj nochi tlen tikmachiliaj? (2) ¿Ken tikmatij Jehová nochi kikaki ijkuak tiktlatlaujtiaj?

XAMO ualeua ijkuak timotlatlaujtiaj tikmachiliaj san ompa tikojpauijtokej tlen tikiluiaj Jehová uan amo tikiluiaj nochi tlen tikmachiliaj. Tinochtin uelis ijkon techpanos porque tikchiuaj miak tlamantli. Ikinon san totoka timotlatlaujtiaj uan amo timajxiliaj okachi timotlapouiskej iuan Jehová. Xamo noijki timokuayejyekouaj amo technamiki tikiluiskej Jehová ken timomachiliaj porque titlajtlakolejkej.

² Biblia kijtoua toTajtsin Dios okachi kipatioita tla tiktlatlaujtiaj ika nochi toyolo uan matiyetokan tiyolyamankej. Ikinon amo matechtekipacho tlen tlajtoli tiknejnekiskej ijkuak tiktlatlaujtiskej Jehová. Ye kinkaki ijkuak kitlatlaujtiaj akinmej yolkualmej (Sal. 10:17). Jehová kikaki nochi tlen tikiluiaj porque kitekipachoua tlen techpanoua (Sal. 139:​1-3).

3. ¿Tlen tlajtlanilmej tikinnankiliskej?

³ Itech nin tlamachtil tikinnankiliskej ninmej tlajtlanilmej: ¿Tleka amo matimomojtikan tikiluiskej Jehová nochi tlen timokuayejyekouaj uan tlen tikmachiliaj? ¿Ken uelis okachi timotlatlaujtiskej ika nochi toyolo? ¿Ken techpaleuia timokuayejyekoskej ken omotlatlaujtijkej akinmej yiuejkika okitekichiuilijkej Jehová? ¿Tlen techpaleuis matikiluikan Jehová ken timomachiliaj ijkuak itlaj techtekipachoua?

AMO MATIMOMOJTIKAN TIKTLATLAUJTISKEJ JEHOVÁ

4. ¿Tlen techpaleuis matikiluikan Jehová ken timomachiliaj? (Salmo 119:145).

⁴ Tla tikitaj Jehová ken se toyolikni tlen kineki techpaleuis, okachi tikiluiskej tlen tikmachiliaj uan tlen timokuayejyekouaj. Matikitakan tlen okipanok akin okijkuilo Salmo 119. Ye sapanoua otlajyoui porque miakej okitenejkej (Sal. 119:​23, 69, 78). Noijki amo kuali omomachiliaya porque ualeua okichiuaya tlen amo kuali (Sal. 119:5). Pero ye omochijchika kuali mouikas iuan Jehová ikinon amo omomojti kiluis ken omomachiliaya (xiktlajtolti Salmo 119:145).

5. Xikyekijto tleka moneki tiktlatlaujtiskej Jehová maski timokuayejyekouaj amo technamiki ijkon tikchiuaskej.

⁵ Jehová noijki kineki makitlatlaujtikan akinmej yotlajtlakolchijkej (Is. 55:​6, 7). Ikinon amo matimokuayejyekokan amo uelis tiktlatlaujtiskej Jehová. Matikijtokan se tlakatl omopolo itech tepeyo uan amo kimati ik kanin yas. Pero satepan kinmita sekimej personas tlen uelis kintlajtlanis ik kanin uelis yas. ¿Tikijtoskiaj non tlakatl amo kintlajtlaniskia ik kanin yas porque pinaua? Ye kintlajtlanis porque kineki kimatis ik kanin yas. Tejuan noijki amo matimomojtikan nion matipinauakan timotlapouiskej iuan Jehová maski ualeua timotlapololtiaj noso titlajtlakolchiuaj (Sal. 119:​25, 176).

¿KEN UELIS TIMOTLATLAUJTISKEJ IKA NOCHI TOYOLO?

6, 7. Xikijto ken uelis tiktlatlaujtiskej Jehová ika nochi toyolo. (Noijki xikita nota).

⁶ Okachi timouikaskej iuan Jehová tla tikiluiaj ika nochi toyolo tlen tikmachiliaj uan tlen timokuayejyekouaj. Matikitakan tlen techpaleuis ijkon matikchiuakan.

⁷ Matimokuayejyekokan ken iyelis Jehová.a Ijkuak tikmatij ken iyelis Jehová okachi amo oui tikitaj tikiluiskej tlen timokuayejyekouaj uan tlen tikmachiliaj (Sal. 145:​8, 9, 18). Ijkon okichi se tokni tlen itoka Kristine uan ipapa sapanoua oteuitekiaya. Ye okijto: “Onikitaya oui nimotlapouis iuan Jehová porque amo onikitaya ken notajtsin. Onimokuayejyekouaya amo niyolkuali uan onikmachiliaya Jehová amo nechtlasojtla porque ualeua onimotlapololtiaya”. ¿Tlen okipaleui ayakmo ijkon mamokuayejyeko? Ye okijto: “Onikajsikamatki Jehová tetlasojtla uan amo tekaua. Ikinon nochipa nikilnamiktok Jehová nechmatilanas uan necheualtis tla niuetsis. Noijki nimokuayejyekoua ye nechtlasojtla ikinon niktlapouia ijkuak nipaki uan ijkuak nimoyolkokoua”.

8, 9. Xikyekijto tleka techpaleuia achto timokuayejyekoskej tlen tikiluiskej Jehová ijkuak timotlatlaujtiskej.

⁸ Achto matimokuayejyekokan tlen tikiluiskej Jehová ijkuak tiktlatlaujtiskej. Uelis timotlajtlaniskej: “¿Tlen tlamantli nikixnamiki? ¿Ikaj iuan onimokualani uan moneki niktlapojpoluis? ¿Itlaj nechpanotok uan moneki nikiluis Jehová manechpaleui?” (2 Rey. 19:​15-19). Noijki matimotlatlaujtikan ijkon ken Jesús omotlatlaujti uan matikiluikan Jehová mamochipaua itoka, matlanauatiki iTekiuajkayo uan mamochiua tlen kimonekiltia (Mat. 6:​9, 10).

⁹ Axkan matikitakan tlen okipanok se tokni itoka Aliska. Ye okitak oui motlatlaujtis ijkuak okimatki inamik okipiaya cáncer itech itsonteko uan mikiskia. Ye okijto: “Sapanoua onimotekipachouaya ikinon amo onikmatiaya tlen nikchiuas uan tlen nikijtos”. ¿Tlen yokipaleui tokni? Ye okijto: “Kuali nimokuayejyekoua tlen nikijtos ijkuak nimotlatlaujtia. Ijkon amo san nikiluia Jehová tlen nechpanoua uan tlen nikixnamiki. Non nechpaleuia kualtsin maniktlapoui Jehová uan manimoyolseui”.

10. ¿Tleka amo san totoka matimotlatlaujtikan? (Noijki xikinmita fotos).

¹⁰ Amo san totoka matimotlatlaujtikan Jehová. Ye techkaki ijkuak san totoka tiktlatlaujtiaj pero okachi tikiluiskej nochi tlen tikmachiliaj tla tiuejkauaskej iuan timotlapouiskej.b Uelis tikchiuaskej nin tlamantli. Matiktemokan kanin uelis timotlatlaujtiskej uan amikaj matechkuejso. Amo matechtekipacho tla mokakis ijkuak timotlatlaujtiskej. Matimochijchikauakan nochipa ijkon tikchiuaskej. Ijkon okichi inamik Aliska tlen motokayotia Elijah. Ye okijto: “Sejse tonal nimochijchikaua miak uelta nimotlatlaujtis. Yonikitak okachi nimouika iuan Jehová ijkuak niuejkaua iuan nimotlapouia. Uelis niuejkauas iuan nimotlapouis porque ye amo san kitok hora”.

MATIMOKUAYEJYEKOKAN TLEN OKIJTOJKEJ IJKUAK OMOTLATLAUJTIAYAJ AKINMEJ YIUEJKIKA OKITEKICHIUILIAYAJ JEHOVÁ

11. ¿Ken techpaleuis tla timokuayejyekouaj tlen okijtojkej ijkuak omotlatlaujtiayaj akinmej yiuejkika okitekichiuiliayaj Jehová? (Noijki xikita recuadro “¿Te noijki ijkon timomachilia?”).

¹¹ Techpaleuis tla timokuayejyekoskej tlen okijtojkej ijkuak omotlatlaujtiayaj akinmej yiuejkika okitekichiuiliayaj Jehová. Yejuan omotlatlaujtiayaj ika nochi inyolo uan okitlakuikiliayaj toTajtsin Dios. Matiktlajtoltikan tlen okijtojkej uan non techpaleuis okachi matimotlatlaujtikan. Xamo tikajsiskej seki tlajtoli tlen uelis tiknejnekiskej para tikueyichiuaskej Jehová. Noijki tikitaskej sekimej omotlatlaujtijkej uan okijtojkej seki tlamantli tlen xamo noijki ijkon techpanoua.

12. ¿Tlen uelis timotlajtlaniskej ijkuak tiktlajtoltiskej ken omotlatlaujtijkej akinmej okitekichiuiliayaj Jehová?

¹² Ijkuak tiktlajtoltiskej ken omotlatlaujtijkej akinmej okitekichiuiliayaj toTajtsin Dios, matimotlajtlanikan: “¿Akin omotlatlaujti? ¿Tlen okipanotoka? ¿Nechpanotok ijkon ken ye okipanok? ¿Tlen nechmachtia ijkuak ijkon omotlatlaujti?”. Xamo moneki okachi timomachtiskej tla tiknekij tikmatiskej nochi non tlamantli. Pero sapanoua techpaleuis tla ijkon tikchiuaskej. Axkan matikitakan ken omotlatlaujtijkej sekimej.

13. ¿Ken techpaleuia tlen okichi Ana ijkuak omotlatlaujti? (1 Samuel 1:​10, 11; noijki xikita dibujo).

¹³ (Xiktlajtolti 1 Samuel 1:​10, 11). Ana sapanoua otlajyouijtoka ijkuak omotlatlaujti porque amo oueliaya okinpiaya ikoneuan uan okse isiua Elcaná san tlen amo okitoktiaya (1 Sam. 1:​4-7). ¿Ken techpaleuis tlen okichi Ana ijkuak omotlatlaujti tla tikmachiliaj amo moyektlalia tlen techpanotok? Ye omajxili kiluis Jehová tlen okitekipachouaya uan satepan kuali omomachili (1 Sam. 1:​12, 18). Matikyekiluikan Jehová tlen techtekipachoua uan ken timomachiliaj uan ijkon yetoskia ken tikmakaj totlamamal (Sal. 55:22).

14. (1) ¿Tlen techititia tlen okipanok Ana? (2) ¿Ken techpaleuia Biblia okachi kuali matimotlatlaujtikan? (Noijki xikita nota).

¹⁴ Ana okipixki se chokotsin uan okitokayotijkej Samuel. Opanok seki xiuitl uan ikonetsin okiuikili teopixki Elí (1 Sam. 1:​24-28). Se tonal okitlatlaujti Jehová ika nochi iyolo uan okitlasojkamatili porque okitak ye kinmaluia akinmej kitekichiuiliaj uan amo kikauaj (1 Sam. 2:​1, 8, 9).c Xamo Ana ok otlajyouiaya pero ye okachi okitak ken okiteochijtoka Jehová. Tlen okipanok techititia okachi titlaxikoskej tla tikitaj ken techpaleuia Jehová.

15. ¿Tlen techmachtia ijkuak Jeremías okilui Jehová tlen okiyolkokouaya? (Jeremías 12:1).

¹⁵ (Xiktlajtolti Jeremías 12:1). Jeremías omoyolkokouaya ijkuak okinmitaya oksekimej okachi opakiayaj maski okichiuayaj tlen amo kuali. Noijki omoyolkokouaya porque israelitas okipinauiayaj (Jer. 20:​7, 8). Xamo tejuan noijki ijkon timomachiliaj porque sekimej techpinauiaj uan pakij maski kichiuaj tlen amo kuali. Jeremías okilui Jehová tlen okiyolkokouaya pero amo keman okitlajtlakolti tlen okipanotoka. Ye okajsikamatki Jehová kichiua tlen kuali porque okitak ijkuak okiyektlaliaya ialtepe tlen sapanoua oteixnamikiaya (Jer. 32:19). Tejuan noijki matikiluikan Jehová tlen techyolkokoua uan matikneltokakan ayakmo miak poliui kachiuas nochi tlen amo kuali panotok.

16. ¿Tlen techmachtia tlen okijto se levita tlen okiuikakej itech okse altepetl? (Salmo 42:​1-4; noijki xikinmita fotos).

¹⁶ (Xiktlajtolti Salmo 42:​1-4). Nin tlakuikali okijkuilo se levita tlen okiuikakej itech okse altepetl. Ye okijto ken omomachiliaya porque amo oueliaya kiueyichiuas Jehová inuan israelitas. Xamo timomachiliaj ijkon ken ye porque tikatej tokalijtik uan amo ueli tikisaj noso titsaktokej porque titlaneltokaj. Timoyolkokouaj ijkuak ijkon techpanoua pero matikiluikan Jehová ken timomachiliaj. Non techpaleuis okachi kuali matimomachilikan, matikilnamiktokan tlen okachi miak ipati uan amo san matimokuayejyekokan tlen techpanotok. Levita kuali omokuayejyeko uan non okipaleui makita ken uelis kiueyichiuaskia toTajtsin Dios (Sal. 42:5). Noijki omokuayejyeko ken okimaluijtoka Jehová (Sal. 42:8). Matiktlatlaujtikan Jehová ika nochi toyolo uan non techpaleuis matikitakan ken timomachiliaj, amo san matimokuayejyekojtokan tlen techpanotok uan matitlaxikokan.

17. (1) ¿Tlen techmachtia tlen okijto Jonás ijkuak omotlatlaujti? (Jonás 2:​1, 2). (2) ¿Ken techpaleuis seki tlamantli tlen ijkuilitok itech Salmos ijkuak titlajyouiskej? (Noijki xikita nota).

¹⁷ (Xiktlajtolti Jonás 2:​1, 2). Profeta Jonás okitlatlaujti toTajtsin Dios ijkuak okatka ijtik se ueyi michi. Ye amo otetlakamatki pero okineltokak Jehová kikakiskia ijkuak kitlatlaujtiskia. Ye okijto miak tlamantli tlen ijkuilitok itech Salmos ijkuak omotlatlaujti uan non kiteititia kuali okimatiaya tlen ompa oijkuilitoka.d Ye okilnamik tlen kijtouaj Salmos uan omokuayejyeko tlen ompa okijtouaya. Ikinon okineltokak Jehová uelis kipaleuiskia. Tejuan noijki matikinmomachtikan textos uan ijkon tikinmilnamikiskej ijkuak titlajyouiskej. Non techyolseuis ijkuak timotlatlaujtiskej.

MATIKTLATLAUJTIKAN JEHOVÁ UAN IJKON OKACHI IUAN TIMOUIKASKEJ

18, 19. Xikyekijto ken techpaleuia Romanos 8:​26, 27 tla amo tikmatij ken tikiluiskej Jehová tlen tikmachiliaj.

¹⁸ (Xiktlajtolti Romanos 8:​26, 27). Xamo ualeua sapanoua timotekipachouaj uan amo tikmatij ken tikijtoskej tlen tikmachiliaj. Pero espíritu santo techpaleuis ijkuak ijkon techpanos porque ye topatka motlatlaujtia. ¿Tleka ijkon tikijtouaj? Jehová okinyekanki ika iespíritu santo akinmej okijkuilojkej Biblia para makijkuilokan tlen okijtojkej akinmej omotlatlaujtijkej. Ikinon ye techkakis tla tikiluiskej tlen okijtojkej akinmej yiuejkika okitlatlaujtijkej. Ye techkakis uan technankilis maski amo tikmatij ken tikijtoskej tlen tikmachiliaj.

¹⁹ Ijkon okichi se tokni itoka Elena tlen chanti Rusia. Ye okitsakej porque omotlatlaujtiaya uan okitlajtoltiaya Biblia. Elena sapanoua omotekipachouaya uan okitaya oui motlatlaujtis. Ye okijto: “Onikilnamik Jehová nechkakis maski amo kuali onimomachiliaya. Nechkakiskia tla nikiluiskia tlen okijtojkej akinmej yiuejkika omotlatlaujtijkej porque yetoskia ken ne onikilui non tlamantli. Non onechpaleui ijkuak sapanoua onitlajyouijtoka”.

20. ¿Tlen techpaleuis matikmatikan ken timotlatlaujtiskej ijkuak sapanoua timotekipachouaj?

²⁰ Ayakmo kuali timotlatlaujtiaj ijkuak timotekipachouaj porque san timokuayejyekojtokej miak tlamantli. Pero uelis tikinkakiskej Salmos ika audio noso matikijkuilokan ken timomachiliaj ijkon ken okichi tekiua David. Non techpaleuis matikmatikan tlen tikijtoskej ijkuak timotlatlaujtiskej (Sal. 18, 34, 142; kanin peua). Tejuan tlatlamantli timokuayejyekouaj ikinon tisejse matiktemokan tlen techpaleuis okachi kuali matimotlatlaujtikan (Sal. 141:2). ¿Tlen yomitspaleui kuali ximotlatlaujti?

21. ¿Tleka uelis tikiluiskej Jehová nochi tlen tikmachiliaj?

²¹ Tejuan timoyolseuiaj ijkuak tikmatij Jehová kimati ken timomachiliaj maski ayamo tikiluiaj (Sal. 139:4). Ikinon nochipa matiktlatlaujtikan porque ye techkaki uan kipaktia kitas tikneltokaj. Ye techkakis tla tikiluiskej tlen okijtojkej akinmej yiuejkika okitlatlaujtijkej. Matikiluikan nochi tlen tikmachiliaj uan matiktlapouikan ijkuak tipakij uan ijkuak timoyolkokouaj. Jehová kipaktia touan mouikas uan ye amo keman techkauas.