Nochipa matimotlatlaujtikan inpatka tokniuan

1. ¿Ken tikmatij Jehová kipatioita matiktlatlaujtikan?

JEHOVÁ techkauilia matiktlatlaujtikan uan non se kualtsin tetliokolil tlen tikpiaj. Tejuan tikmatij Jehová yokinmakak seki tekitl ángeles uan noijki iKone yokimakak miak tekitl tlen sapanoua miak ipati (Sal. 91:11). Pero san Jehová techkaki ijkuak tiktlatlaujtiaj porque yokijto san ye ineuian ijkon kichiuas (Mat. 28:18). Ye kineki techkakis ijkuak tiktlatlaujtiaj (Sal. 65:2).

2. ¿Tlen techmachtia tlen okichi apóstol Pablo?

² Tejuan uelis tikiluiskej Jehová nochi tlen techtekipachoua pero moneki noijki timotlatlaujtiskej inpatka tokniuan. Apóstol Pablo ijkon okichi. Ye omotlatlaujtiaya inpatka oksekimej maski okitekipachouaya miak tlamantli (2 Cor. 11:23; 12:​7, 8). Okinmilui tokniuan tlen okatkaj Éfeso ye inpatka omotlatlaujtiaya (Efes. 1:16). Pero noijki okijtouaya akinmej inpatka omotlatlaujtiaya. Timoteo ijkon okijkuilili uan okilui: “Niktlasojkamatilia toTajtsin Dios uan nochipa nimitsilnamiki ijkuak nimotlatlaujtia tlajka uan youak” (2 Tim. 1:3).

3. ¿Tleka ualeua tikilkauaj timotlatlaujtiskej inpatka tokniuan?

³ Ualeua tikilkauaj timotlatlaujtiskej inpatka tokniuan. ¿Tleka ijkon techpanoua? Se tokni itoka Sabrinaa okijto: “Mojmostla tikchiuaj miak tlamantli ikinon amo timajxiliaj. Ijkuak timotlatlaujtiaj san tikiluiaj toTajtsin Dios tlen techtekipachoua uan tlen techpoloua”. Sapanoua techpaleuis nin tlamachtil tla ijkon techpanoua. Tikitaskej tleka miak ipati timotlatlaujtiskej inpatka tokniuan. Noijki tikitaskej seki tlamantli tlen techpaleuis ijkon matikchiuakan.

¿TLEKA MIAK IPATI MATIMOTLATLAUJTIKAN INPATKA TOKNIUAN?

4, 5. ¿Ken kinpaleuia tokniuan ijkuak inpatka timotlatlaujtiaj? (Santiago 5:16).

⁴ Matimotlatlaujtikan inpatka tokniuan porque “kipia chikaualistli uan uelis kinpaleuis” (xiktlajtolti Santiago 5:16). Sapanoua kinpaleuis tokniuan tla inpatka timotlatlaujtiskej. Jesús okilui Pedro ‘okitlatlaujti toTajtsin Dios makipia chikauak itlaneltokilis’ porque ye yokimatiaya kijtoskia amo okixmatiaya (Luc. 22:32). Pablo okimatiaya kinpaleuia tokniuan ijkuak inpatka timotlatlaujtiaj. Ijkuak Pablo otsaktoka Roma, okitlajkuilili Filemón uan okilui: “Xamo nechkixtiskej porque nanmotlatlaujtiaj uan oksepa uelis namechtlajpaloti” (Filem. 22). Amo uejkika opanok uan okikixtijkej uan oksepa opejki tetlapouia.

⁵ Nin amo kijtosneki tiknauatiaj Jehová makichiua tlen tikiluiaj ijkuak tiktlatlaujtiaj. Pero ye techkaki ijkuak tikiluiaj tlen techtekipachoua uan ualeua kichiua tlen tiktlajtlaniliaj. Nin techyolinia okachi matiktlatlaujtikan ijkuak itlaj techtekipachoua uan tikneltokaj ye kichiuas tlen okachi techpaleuis (Sal. 37:5; xikita 2 Corintios 1:11 uan xikinmita notas de estudio ika español).

6. ¿Tlen tikteititiskej tla timotlatlaujtiskej inpatka tokniuan? (1 Pedro 3:8).

⁶ Okachi titeiknomatiskej tla timotlatlaujtiskej inpatka tokniuan (xiktlajtolti 1 Pedro 3:8). Akin teiknomati kita tlen kijyouiaj oksekimej uan san niman kita ken kinpaleuis (Mar. 1:​40, 41). Se tlayekanki itoka Misael okijto: “Ijkuak nimotlatlaujtia inpatka tokniuan, okachi nikajsikamati tlen kinpanoua uan non nechpaleuia okachi manikintlasojtla. Ne nikmachilia inuan nika maski yejuan amo kimatij”. Okse tlayekanki itoka Richard noijki okijto: “Okachi tiknekij tikinpaleuiskej tokniuan ijkuak inpatka timotlatlaujtiaj. Noijki ijkuak tikinpaleuiaj yetoskia ken titlapaleuiaj mamochiua tlen otimotlatlaujtijkej”.

7. ¿Tleka techpaleuia timotlatlaujtiskej inpatka tokniuan amo san matimokuayejyekojtokan tlen techpanotok? (Filipenses 2:​3, 4; noijki xikinmita fotos).

⁷ Matimotlatlaujtikan inpatka tokniuan uan non techpaleuis amo san matechtekipachojto tlen techpanoua (xiktlajtolti Filipenses 2:​3, 4). Tinochtin titlajyouiaj porque axkan tlanauatia Satanás (1 Juan 5:19; Apoc. 12:12). Ijkuak timotlatlaujtiaj inpatka tokniuan techilnamiktia “nochtin tokniuan ipan tlaltikpak noijki ijkon tlajyouijtokej” (1 Ped. 5:9). Se precursora itoka Katherine okijto: “Ijkuak nimotlatlaujtia inpatka tokniuan nechilnamiktia amo san ne nitlajyouia. Non nechpaleuia amo san manechtekipacho tlen nechpanoua”.

¿AKINMEJ INPATKA UELIS TIMOTLATLAUJTISKEJ?

8. ¿Akinmej inpatka uelis timotlatlaujtiskej?

⁸ Uelis timotlatlaujtiskej inpatka akinmej mokokouaj, telpochmej uan ichpochmej tlen kinpinauiaj kanin momachtiaj uan noijki akinmej yikipiaj miak xiuitl. Noijki tekiuajkej kintlajyouiltiaj tokniuan uan ualeua ijkon kichiuaj infamiliares (Mat. 10:​18, 36; Hech. 12:5). Sekimej tokniuan oksekan omopaleuitoj porque itech inmialtepe mokualaniaj. Noijki ualeua tlaxixini itech se altepetl ikinon miakej tokniuan tlajyouiaj. Xamo tejuan amo tikinmixmatij nonmej tokniuan pero uelis inpatka timotlatlaujtiskej. Ijkon tikteititiskej timosepantlasojtlaj ijkon ken otlanauati Jesús (Juan 13:34).

9. ¿Tleka moneki timotlatlaujtiskej inpatka tokniuan tlen tlapaleuiaj itech ialtepe toTajtsin Dios uan noijki inpatka insiua?

⁹ Uelis timotlatlaujtiskej inpatka tokniuan tlen pouij itech Cuerpo Gobernante uan akinmej kinpaleuiaj. Noijki uelis timotlatlaujtiskej inpatka tokniuan tlen kiyekanaj Betel, tokniuan tlen kiyekanaj seki tekitl ompa Betel, tlayekankej itech circuito, akinmej tlayekanaj itech tlanechikol uan siervos ministeriales. Yejuan kichiuaj miak tekitl tlen techpaleuia pero noijki kixnamikij miak tlamantli (2 Cor. 12:15). Se tlayekanki itech circuito tlen itoka Mark okijto: “Amo kuali nimomachilia porque nopapanuan uejka katej. Yejuan yikipiaj miak xiuitl uan mokokouaj. Amo kuali nimomachilia porque amo ueli nikinpaleuia maski nokni uan inamik kuali kinmaluiaj”. Tejuan uelis timotlatlaujtiskej inpatka nonmej tokniuan maski amo tikmatij tlen kintekipachoua (1 Tes. 5:​12, 13). Noijki uelis timotlatlaujtiskej inpatka insiua porque yejuan kinpaleuiaj innamik matlapaleuikan itech tlanechikol.

10, 11. ¿Kipaktia Jehová matimotlatlaujtikan inpatka nochtin tokniuan?

¹⁰ Axkan yotikitakej ualeua timotlatlaujtiaj inpatka miakej tokniuan. Xamo tikiluiaj Jehová makinpaleui akinmej tsaktokej noso makinyolchikaua tokniuan porque omiki akin okitlasojtlayaj. Se tlayekanki itoka Donald okijto: “Sapanoua miakej tokniuan tlajyouiaj ikinon inpatka nochtin timotlatlaujtiaj para amo tikilkauaskej nion se tokni”.

¹¹ Jehová kipaktia matimotlatlaujtikan inpatka nochtin tokniuan. Porque tejuan amo tikmatij tlen kinpanoua. Ikinon miak ipati matimotlatlaujtikan inpatka nochtin tokniuan (Juan 17:20; Efes. 6:18). Tla ijkon tikchiuaskej tikteititiskej tikintlasojtlaj miak (1 Ped. 2:17).

¿TLEN TIKCHIUASKEJ IJKUAK TIKTLATLAUJTISKEJ JEHOVÁ MAKINPALEUI TOKNIUAN?

12. ¿Tleka techpaleuis tla tikitaj tlen kinpanoua tokniuan?

¹² Matikitakan tlen kinpanoua tokniuan. Jehová kipatioita matimotlatlaujtikan inpatka nochtin tokniuan pero noijki matikiluikan intoka tlen tiknekij makinpaleui. ¿Tikixmatij se tokni tlen touan monechikoua uan sapanoua mokokoua? ¿Tikixmatij se telpochtli noso se ichpochtli tlen san tlen amo kitoktiaj kanin momachtia? ¿Tikixmatij se tokni tlen san iselti kinmiskaltia ikoneuan uan ‘kinyektlapouia uan kinmachtia ken Jehová kineki’? (Efes. 6:4). Matikitakan tlen kinpanoua tokniuan uan non techpaleuis matikinmajsikamatikan uan inpatka matimotlatlaujtikan (Rom. 12:15).b

13. ¿Uelis timotlatlaujtiskej inpatka tokniuan tlen amo tikinmixmatij?

¹³ Matikiluikan Jehová tlen intoka tokniuan tlen tiknekij makinpaleui. Uelis ijkon tikchiuaskej maski amo tikinmixmatij. Uelis timotlatlaujtiskej inpatka tokniuan tlen tsaktokej ompa Crimea, Eritrea, Rusia uan Singapur. Itech jw.org tikinmajsiskej intoka.c Se tlayekanki itech circuito tlen itoka Brayan okijto: “Ijkuak nikijkuiloua itoka se tokni tlen tsaktok, nechpaleuia amo manikilkaua ipatka manimotlatlaujti”.

14, 15. ¿Tlen techpaleuis matikiluikan Jehová ken tiknekij makinpaleui tokniuan?

¹⁴ Matikiluikan Jehová ken tiknekij makinpaleui tokniuan. Matikitakan tlen okijto Misael tlen otimotlapouijkej itech párrafo chikuase. Ye okijto: “Ijkuak niktlajtoltia itech jw.org tlen kinpanoua tokniuan tlen tsaktokej, nimokuayejyekoua ken nimomachiliskia tla noijki ijkon nechpanoskia. Nechtekipachoskia nosiua kox kuali yetoskia. Non nechpaleuia kuali manimotlatlaujti inpatka tokniuan tlen tsaktokej uan yomonamiktijkej” (Heb. 13:3).

¹⁵ Ijkuak mojmostla timokuayejyekouaj tlen kinpanoua tokniuan tlen tsaktokej, okachi tikmatiskej tlen tikiluiskej Jehová ijkuak inpatka timotlatlaujtiskej. Uelis tikiluiskej Jehová makinpaleui akinmej ompa tlayekanaj amo makintlajyouiltikan tokniuan noso makinkauilikan ompa makiueyichiuakan (1 Tim. 2:​1, 2). Noijki matikiluikan Jehová makinpaleui tokniuan makipiakan kualtsin inyelis. Non kinpaleuis mamoyolchikauakan oksekimej tokniuan uan noijki uelis techkakiskej akinmej tikintlapouiaj (1 Ped. 2:12). Uelis timotlatlaujtiskej inpatka nochtin tokniuan maski amo tsaktokej. Ijkon tikteititiskej tejuan sapanoua titetlasojtlaj (1 Tes. 3:12).

KUALI MATIKITAKAN TLEN TIKIJTOUAJ IJKUAK TIMOTLATLAUJTIAJ

16. ¿Tlen moneki matikilnamiktokan ijkuak timotlatlaujtiaj? (Mateo 6:8).

¹⁶ Axkan yotikitakej sapanoua kinpaleuia tokniuan ijkuak inpatka timotlatlaujtiaj. Pero moneki kuali tikitaskej tlen tikijtouaj ijkuak timotlatlaujtiaj. Jehová yikimati tlen tejuan tiknekij tikiluiskej. Amo matikiluikan Jehová ken moneki kichiuas seki tlamantli. Ye yikimati tlen kinpoloua akinmej kitekichiuiliaj (xiktlajtolti Mateo 6:8). Xamo timotlajtlaniaj kox itlaj ipati timotlatlaujtiskej inpatka oksekimej tla Jehová yikimati tlen tiktlajtlaniliskej. Pero axkan yotikitakej tleka moneki timotlatlaujtiskej inpatka tokniuan. Moneki ijkon tikchiuaskej porque ijkon tikteititiskej tikintlasojtlaj uan techtekipachoua tlen kinpanoua. Noijki Jehová paki ijkuak kita titetlasojtlaj ijkon ken ye tetlasojtla.

17, 18. Xikyekijto ken tikmatij Jehová kipatioita ijkuak timotlatlaujtiaj inpatka tokniuan.

¹⁷ Jehová kipatioita matimotlatlaujtikan inpatka tokniuan maski tejuan amo tikitaj. Pero ijkuak ijkon tikchiuaj tikteititiaj tikintlasojtlaj tokniuan. Matikitakan tleka ijkon tikijtouaj. Matikijtokan se teta kipia se ichokotsin uan se itakotsin. Chokotsin mokokoua uan ikni kitlatlaujtia ipapa makipaleui. Teta kitlasojtla ichokotsin ikinon yikimati tlen kichiuas uan kimaluia. Pero teta paki ijkuak itakotsin kiluia makipaleui ikni porque kitlasojtla.

¹⁸ Jehová noijki kineki matechtekipacho tlen kinpanoua tokniuan uan inpatka matimotlatlaujtikan. Ijkon tikteititiskej amo san techtekipachoua tlen tejuan techpanoua uan Jehová kita tlen tikchiuaj (2 Tes. 1:3; Heb. 6:10). Noijki tokniuan otikitakej kinpaleuia ijkuak inpatka timotlatlaujtiaj. Ikinon nochipa inpatka matimotlatlaujtikan.