Ma titetlapouikan itech tlamantli kuali tlen techmaka Jehová tlen amo technamiki tikpiaskej
“Amitla ok se nechtekipachoa, nion manimikki. Ne sanwel niknekiskia nikchiwas nochi tlan Toteko Cristo Jesús onechnawati manikchiwa. Kijtosneki manitetlapowi de n kualitlájtoli non techmatiltia kenijki Dios satlawel techtlasojtla” (HECHOS 20:24).
1, 2. ¿Ken okiteititi tlatitlanil Pablo okitlasojkamatiaya iteiknomatilis toTajtsin Dios?
TLATITLANIL Pablo okintlajyouilti akinmej okichiuayaj ken Cristo. Ik non, okimatiaya amo okinamikiaya ma kiknomati toTajtsin Dios. Ika nochi iyolo okijto tlen okimakak toTajtsin Dios tlen amo okinamikiaya kipias “amo sanenka” (xiktlajtolti 1 Corintios 15:9, 10).
2 Ijkuak Pablo yimikiskia, okitlajkuilili Timoteo: “Niktlasojkamati n Toteko Cristo Jesús, Akin onechmák chikawálistli para manitetlapowi de itlajtol, porke Ye okitak nikmati niktlakita” (1 Timoteo 1:12-14). ¿Itech tlen tetlapouiskia? Pablo okinmilui tlayekankej itech tlanechikol itech altepetl Éfeso: “Pero amitla ok se nechtekipachoa, nion manimikki. Ne sanwel niknekiskia nikchiwas nochi tlan Toteko Cristo Jesús onechnawati manikchiwa. Kijtosneki manitetlapowi de n kualitlájtoli non techmatiltia kenijki Dios satlawel techtlasojtla” (Hechos 20:24).
3. ¿Tlen okinauatijkej tlatitlanil Pablo ma kichiua? (Xikita tlaixkopinal tlen ika peua tlamachtil).
3 ¿Tlen “kualitlájtoli” otetlapoui tlatitlanil Pablo? ¿Uan tleka non “kualitlájtoli” okiteititiaya itlasojtlalis toTajtsin Dios? Pablo okinmilui tokniuan itech Éfeso: “Nomejwah kuali nonkimatokeh, por itlasojtlalis Dios onechmák nin tekitl para nomechpalewis” (Efesios 3:1, 2). Jesús okinauati Pablo ma kintlapoui akinmej amo okatkaj judíos. Omonekiaya kinmiluis yejuan uelis tlanauatiskiaj iuan Mesías (xiktlajtolti Efesios 3:5-8). Pablo otetlapoui ika miak pakilistli uan otechmakak se kuali neskayotl. Ijkon okiteititi tlen okimakak toTajtsin Dios tlen amo okinamikiaya kipias “amo sanenka”.
¿TIKTLASOJKAMATIJ ITLASOJTLALIS TOTAJTSIN DIOS?
4, 5. ¿Tleka tikijtoaj “kuali tlajtolmej itech Tekiuajkayotl” noijki kijtosneki “kualitlájtoli non techmatiltia kenijki Dios satlawel techtlasojtla”?
4 Itech itlamian ninmej tonalmej, Jehová technauatia ma titetlapouikan “kuali tlajtolmej itech Tekiuajkayotl”. Uan moneki titetlapouiskej “itech nochi Tlaltikpak” (Mateo 24:14, TNM). “Kuali tlajtolmej itech Tekiuajkayotl” noijki kijtosneki “kualitlájtoli non techmatiltia kenijki Dios satlawel techtlasojtla”. ¿Tleka ijkon tikijtoaj? Pampa nochi tlateochiualismej tlen techmakas iTekiuajkayo toTajtsin Dios techmakas pampa ye techtlasojtla (Efesios 1:3). Pablo okiteititi okitlasojkamatiaya itlasojtlalis toTajtsin Dios ijkuak otetlapoui ika miak pakilistli. ¿Tikchiuaj ken ye? (xiktlajtolti Romanos 1:14-16).
5 Yichikome otimomachtijkej uelis timopaleuiskej ika itlasojtlalis toTajtsin Dios maski titlajtlakolejkej. Uan otimomachtijkej pampa techtlasojtla techteochiua. Ik non, moneki ma tikintlapouikan oksekimej itech itlasojtlalis Jehová uan tlen moneki kichiuaskej pampa ye kintlasojtlas. ¿Ken uelis tikinpaleuiskej oksekimej ma kiteititikan kitlasojkamatij itlasojtlalis toTajtsin Dios?
MA TIKTEMATILTIKAN KUALI TLAJTOLMEJ ITECH IMIKILIS JESÚS
6, 7. ¿Tleka ijkuak tikinyekiluiaj tlaltikpaktlakamej itech imikilis Jesús tiktematiltiaj itlasojtlalis Jehová?
6 Axkan miakej amo kinkuejsoa intlalnamikilis ijkuak tlajtlakolchiuaj. Ik non, amo kajsikamatij tleka moneki tlaneltokaskej itech imikilis Jesús. Uan oksekimej kimachiliaj amo yolpakij itech innemilis. Pero ijkuak motlapouiaj iuan iTlaixpantijkauan Jehová, sekimej kajsikamatij tlen kijtosneki tlajtlakoli, ken kinmijtlakoa uan tlen moneki kichiuaskej pampa ayakmo tlajtlakolchiuaskej. Tla yolkualmej, motlasojkamatij ijkuak kimatij toTajtsin Dios okiualtitlanki iKone nikan Tlaltikpak pampa techmakixtis itech tlajtlakoli uan mikilistli. Noijki kajsikamatij Jehová ijkon okichi pampa sapanoa techtlasojtla (1 Juan 4:9, 10).
7 Ma tikitakan tlen Pablo okijto itech iKone Jehová akin sapanoa kitlasojtla: “Iwa Cristo ika iesso okintlaxtla totlajtlakolwah, iwa Dios yotechtlapojpolwi”. Pablo noijki okijto non omochi pampa toTajtsin Dios sapanoa techtlasojtla (Efesios 1:7). Imikilis Cristo okachi kiteititia toTajtsin Dios techtlasojtla uan sapanoa techiknomati. Techyolseuia tikmatiskej tla titlaneltokaj itech imikilis Jesús, toTajtsin Dios uelis techtlapojpoluis uan totlalnamikilis yetos chipauak (Hebreos 9:14). ¡Tiknekij nochtin tikintlapouiskej itech ninmej kuali tlajtolmej!
MA TIKINPALEUIKAN TLALTIKPAKTLAKAMEJ MA MOUIKAKAN IUAN JEHOVÁ
8. ¿Tleka moneki tinochtin kuali timouikaskej iuan toTajtsin Dios?
8 Ixpan toTajtsin Dios, akinmej amo tlaneltokaj itech imikilis Jesús katej ken akinmej kikokoliaj. Ik non, moneki tikinmiluiskej uelis mouikaskej iuan toTajtsin Dios. Tlatitlanil Juan okijkuilo: “Akin kineltoka iKone in toTajtzin Dios, kipia nemilistle katlej mach keman tlamis. Pero akin amo kineltoka yon iKone, mach kipias yon nemilistle, sino ipan witz ikualanilis in Dios” (Juan 3:36, ITlajtol toTajtzin Dios [NHY]). Tiyolpakij tikmatij imikilis Jesús techkauilia ma timouikakan iuan toTajtsin Dios (xikita recuadro “¿Tlen kijtosneki?”). Pablo ijkin okiyekijto: “Nomejwah ononkatkah wejka de Dios por tlan amo kuali ononkiyejyekoliayah iwa ononkichijtinemiah. Pero axa Dios ken okinekia nomechtlalis iyakapa nonyolchipawakeh iwa nion se tlajtlákoli xikpiakah nion itla amo kuali manomechtlajtlakolti. Onomechtlapojpolwi ika imikilis Cristo Jesús” (Colosenses 1:21, 22).
Moneki tikinmiluiskej tlaltikpaktlakamej uelis mouikaskej iuan toTajtsin Dios
9, 10. (1) ¿Tlen okinnauati tlapejpenalmej Cristo? (2) ¿Ken kinpaleuiaj “oksikimeh ichkameh” tlapejpenalmej?
9 Cristo okinnauati tlapejpenalmej ‘makinmatiltikah kenijki nochteh weletis kuali yetoskeh íwa’ toTajtsin Dios (xikita recuadro “¿Tlen kijtosneki?”). Pablo okinmilui: “Nochi tlan onka Dios techmaka, iwa otechyekseli itech Cristo, iwa otechnawati matikinmatiltikah kenijki nochteh weletis kuali yetoskeh Íwa. Yika, por Cristo Jesús, Dios omoyolsewi iwan nochteh n tlaltikpaktlakah. Ayakmó okimitak intlajtlakolwah n tlakah. Tejwah otechnawatih matiktematiltikah n kualitlájtoli kenijki se weletis yetos kuali iwan Dios. Ijkó kiné, tejwah tiwitseh nomonawak porke Cristo techtitlani. Kemi yaskia inewia Dios nomechtlatlaujtia ximoyolkopakah inawak. Yika, kemi Cristo techaltitlani, tomechtlatlaujtiah: xiyetokah ika kuali inawak Dios” (2 Corintios 5:18-20).
10 Se ueyi tlateochiualistli pampa “oksikimeh ichkameh” kinpaleuiskej tlapejpenalmej itech nin tekitl (Juan 10:16). “Oksikimeh ichkameh” kinpaleuiaj tlapejpenalmej ijkuak kitematiltiaj tlen kijtoa Cristo. Yejuan okachi tetlapouiaj uan kinmachtiaj tlaltikpaktlakamej itech Biblia. Uan noijki kinpaleuia kuali ma mouikakan iuan toTajtsin Dios. Nin sapanoa miak ipati pampa tetlapouia “kualitlájtoli non techmatiltia kenijki Dios satlawel techtlasojtla”.
MA TIKINMACHTIKAN OKSEKIMEJ TOTAJTSIN DIOS KINKAKI TOTLATLAUJTILUAN
11, 12. ¿Tleka kinyolseuia tlaltikpaktlakamej kimatiskej uelis kitlatlaujtiskej Jehová?
11 Miakej tlaltikpaktlakamej motlatlaujtiaj pampa kuali momachiliaj. Pero amo kineltokaj kox kinkaki toTajtsin Dios. Ik non, moneki kimatiskej Jehová kinkaki ijkuak motlatlaujtiaj. Itech se tlakuikali, David okilui Jehová: “Te akin Tikaki tlatlaujtilmej, monauak uitsej nochtin tlaltikpaktlakamej. Tlen amo kuali onikchi nechyolkokoa, pero te tikinmilkaua totlajtlakoluan” (Salmo 65:2, 3).
Ijkuak tikinmachtiaj tlaltikpaktlakamej ken moneki motlatlaujtiskej, tikinpaleuiaj kuali ma mouikakan iuan Jehová
12 Jesús okinmilui imachtijkauan: “Notajtsi nomechmakas nochi tlan nonkitlajtlaniliskeh ika Notoka” (Juan 14:14). Ika ninmej tlajtolmej, Jesús okijto uelis tiktlajtlaniliskej Jehová san tlen tlamantli tlen mouika iuan itlanekilis. Tlatitlanil Juan okijto itech Jehová: “Titlaneltokah inawak Dios, porke tikmatih Ye techkaki tla itla tiktlajtlaniliah non Ye kipaktia” (1 Juan 5:14). Tiyolpakij tikinpaleuiaj tlaltikpaktlakamej ma kimatikan tlatlaujtilistli amo san kinpaleuis kuali ma momachilikan. Ika tlatlaujtilistli ‘timijkuaniaj inawak Dios katlej kinawatia nochi tlamantle iwan katlej kipia weyi iteiknotlamachilis’ (Hebreos 4:16). Moneki tikinmachtiskej ken moneki motlatlaujtiskej, akin kitlatlaujtiskej uan tlen uelis kitlajtlaniliskej. Ijkon tikinpaleuiskej ma mouikakan iuan Jehová uan ma moyolseuikan ijkuak tlajyouiaj (Salmo 4:1; 145:18).
ITLASOJTLALIS TOTAJTSIN DIOS “ITECH TONATIJMEH NON SIKIN WITSEH”
13, 14. (1) ¿Tlen kualtsin tekitl kipiaskej tlapejpenalmej? (2) ¿Tlen tlamantli kuali kichiuaskej tlapejpenalmej pampa tlaltikpaktlakamej?
13 Jehová okachi kiteititis itlasojtlalis “itech tonatijmeh non sikin witseh”. ¿Ken kichiuas? Kinmakas se ueyi tlateochiualistli 144,000 akinmej tlanauatiskej iuan Cristo itech iluikak. ¿Tlen non tlateochiualistli? Pablo okiyekijto: “Pero Dios ken satlawel teiknoma, iwa ken miak techtlasojtla, maya ok otimiktokah por totlajtlakolwah, Ye okichi matiyolitokah sansikah iwan Cristo Jesús. Yika, Dios otechmakixtiko porke otechtlasojtlak. Dios noiwa otechyoliti sansikah iwan Cristo Jesús, iwa otechyayanti iwan Ye, kan ilwikak. Ijkí okichi, para kiteititis itech tonatijmeh non sikin witseh kenijki saikpanoa techtlasojtla iwa saikpanoa techiknomati por Cristo Jesús” (Efesios 2:4-7).
14 Oui tikajsikamatiskej nochi tlamantli kuali tlen Jehová kinmakas tlapejpenalmej ijkuak tlanauatiskej iuan Cristo itech iluikak (Lucas 22:28-30; Filipenses 3:20, 21; 1 Juan 3:2). Jehová kinmititis ‘kenijki saikpanoa kintlasojtla’. Yejuan yetoskej “yankuik Jerusalén”, inovia Cristo (Apocalipsis 3:12; 17:14; 21:2, 9, 10). Uan tekitiskej iuan Cristo ijkuak “kimpajtiskeh n tlaltikpaktlakah”. Nin kijtosneki kinpaleuiskej tlaltikpaktlakamej ma momakixtikan itech tlajtlakoli iuan mikilistli; ayakmo tlajtlakolchiuaskej (xiktlajtolti Apocalipsis 22:1, 2, 17).
15, 16. ¿Ken kinmititis Jehová itlasojtlalis “oksikimeh ichkameh” itech Xochitlali?
15 Efesios 2:7 kijtoa toTajtsin Dios kiteititis itlasojtlalis itech “tonatijmeh non sikin witseh”. Itech nonmej tonalmej, nochtin akinmej chantiskej itech Tlaltikpak kimatiskej ‘kenijki saikpanoa kintlasojtla’ Jehová (Lucas 18:29, 30). Ijkuak kinyolitis akinmej yomikej ijkon okachi kiteititis sapanoa kintlasojtla tlaltikpaktlakamej (Job 14:13-15; Juan 5:28, 29). ¿Akinmej kinyolitiskej? Sekimej itekipanojkauan toTajtsin Dios tlen yolmelauakej tlen omikej achto mikiskia Cristo. Noijki kinyolitiskej “oksikimeh ichkameh” tlen mikiskej itech itlamian tonalmej. Nochtin yejuan oksepa yoltoskej uan kitekichiuiliskej Jehová.
16 Pero toTajtsin Dios noijki kinyolitis sapanoa miakej tlaltikpaktlakamej tlen amo okixmatkej. Juan okijkuilo: “Iwan onikinmitak in mikkamej, wejweyin iwan tzitzikinmej, omoketokaj iyakapan Dios. Iwan toTajtzin Dios okintlapoj in librojtin, iwan noijki okitlapoj in oksé libro kan oijkuilitokaj intoka nochtin katlej kipiaj yankuik nemilistle. Dios okinmixkomakak in mikkamej iwan okinmakak inlugar según tlan okichijkej, iwan según tlan oijkuilitoka itech yonmej librojtin. In mikkamej katlej oyekaj ijtik atl okiskej, noijki in mikilistle [...], okintemakakej in mikkamej katlej okinpixtokaj. Iwan nochtin okinmixkomakakej iwan okinlugartijkej según tlan okichijkej” (Apocalipsis 20:12, 13, NHY). Akinmej kinyolitiskej uelis kixmatiskej toTajtsin Dios uan uelis kiseliskej ken intekiua. Monekis kipiaskej innemilis ijkon ken kijtoa Biblia uan yankuikej tlanauatilmej tlen yetoskej itech “librojtin” noso rollos. Ika ninmej yankuikej tlanauatilmej Jehová noijki kiteititis itlasojtlalis.
MA TITETLAPOUIKAN “KUALITLÁJTOLI”
17. ¿Tlen moneki ma tikilnamiktokan ijkuak titetlapouiaj?
17 Yitlamis nochi tlen amo kuali. Ik non, okachi moneki ma titetlapouikan “kualitlájtoli” itech Tekiuajkayotl (Marcos 13:10). Ma tikilnamikikan ijkuak titetlapouiaj tikueyichiuaj Jehová. ¿Ken tikueyichiuaj? Ijkuak tikinmiluiaj tlaltikpaktlakamej nochi tlamantli kualtsin tlen tikseliskej itech Xochitlali mochiuas pampa Jehová techtlasojtla.
Ma tiktekichiuilikan Jehová ken “akinmej tlamaluiaj itech tlamantli kuali tlen amo technamiki tikpiaskej” (1 Pedro 4:10). (Xikinmita párrafos 17 a 19).
18, 19. ¿Ken uelis tikueyichiuaskej itlasojtlalis Jehová?
18 Ijkuak titetlapouiaj uelis tikinmiluiskej tlaltikpaktlakamej tlen panos itech Tlaltikpak ijkuak Jesús ualtlanauatis. Ijkuakon, tlaltikpaktlakamej mopaleuiskej ika imikilis Cristo uan yolik ayakmo tlajtlakolchiuaskej. Biblia kijtoa: “Nochi tlan onkaj ixko yin tlaltikpak mach ok keman ijtlakawis. Iwan ijkuakón momakixtis ijkón ken momakixtiskej ikonewan Dios” (Romanos 8:21). Nin ijkon mochiuas pampa Jehová techmaka tlamantli tlen amo technamiki tikpiaskej.
19 Se ueyi tlateochiualistli tikintlapouiskej tlaltikpaktlakamej itech tlen kijtoa Apocalipsis 21:4, 5. Ompa kijtoa tlen kichiuas toTajtsin Dios: “Kinmixayowajwatsas nochteh, iwa ayakmó yetos mikílistli, nion chokílistli, nion neyolkókoli, nion tekipanólistli, porke nochi tlan yowejka okatka, nochi yotlatlajtlanki”. Jehová akin kajki itech itrono kijtoa: “Xikita, ne nochi nikyankuilis”. Uan noijki kijtoa: “Xikijkuilo tlan nimitsilis, porke tlan nimitsilijtok milák iwa kuali se kinneltokas”. Ma titetlapouikan ika pakilistli ninmej kuali tlajtolmej, ijkon tikueyichiuaskej itlasojtlalis Jehová.