Ayakmo kinneltokiliaj políticos | ¿Tlen kijtoua Biblia?

Itech xiuitl 2024 itech nochi tlaltikpak kinpejpenaskej akinmej tlanauatiskej. Amo keman ijkon omotaya. Pero miakej ayakmo kinneltokiliaj políticos.

• 19 de septiembre 2023, akinmej pouij itech Pew Research Center okijtojkej: “Axkan akinmej kinekij tlanauatiskej amo melauak kinekij tlapaleuiskej. Yejuan san kinekij kipiaskej miak tlamantli”.a

Miakej telpochmej uan ichpochmej noijki ayakmo kinneltokiliaj políticos.

• 29 de enero 2024, periódico tlen itoka The New York Times, okijto: “Miakej telpochmej uan ichpochmej kinekij kiyektlaliskej miak tlamantli pero kijtouaj políticos amo kinneltokiliaj nion kinpaleuiaj”.

• 22 de enero 2024, periódico tlen itoka The Korea Times, okijto: “Okintlajtlanijkej miakej telpochmej uan ichpochmej uan yejuan okijtojkej okachi kinneltokiliaj akinmej kinchiuaj videos itech internet uan amo políticos”.

¿Políticos tlapaleuiskej para kuali matiyetokan? ¿Akin uelis tikneltokiliskej?

Xikita akin tikneltokilia

Moneki kuali tikitaskej akin tikneltokiliaj. Biblia kijtoua: “Akin amo ixtlamatki kineltoka nochi tlen kiluiaj pero akin ixtlamatki mokuayejyekoua itech sejse tlamantli tlen kichiua” (Proverbios 14:15).

• Tla tikneki tikmatis kox melauak tlen mitsiluiaj, xiktlajtolti tlamachtil tlen itoka “Cómo protegerse de la información falsa”.

Maski políticos kinekij tlapaleuiskej, amo ueli nochi kichiuaj. Ikinon Biblia kijtoua:

• “Amo xikinneltokilikan akinmej tlanauatiaj nion ikone se tlaltikpaktlakatl akin amo ueli temakixtia” (Salmo 146:3).

¿Akin uelis tlanauatis?

Biblia kijtoua toTajtsin Dios okipejpenki Jesucristo, san ye uelis techpaleuis uan melauak uelis tikneltokiliskej (Lucas 1:32, 33). ToTajtsin Dios yokitlali Jesús mayeto tekiua itech iTekiuajkayo. Nin tekiuajkayotl kajki iluikak (Mateo 6:10).

• Ximomachti tleka moneki tikneltokaskej tlen kijtoua Jesús uan ye kipojpolos nochi tlen axkan techtlajyouiltia. Xikintlajtolti tlamachtilmej tlen intoka “¿Akin kiyekana nin Tekiuajkayotl?” uan “¿Tlen kichiuas iTekiuajkayo toTajtsin Dios?”.