Panotok guerra ompa Israel uan okseki altepemej tlen ik ompa katej | ¿Tlen kijtoua Biblia?

Miakej kintekipachoua tlen kichijtokej tekiuajkej tlen katej Estados Unidos, Israel uan Irán. ¿Kox peuas okse guerra ipan nochi tlaltikpak? ¿Tekiuajkej uelis kichiuaskej amo mamochiua se guerra uan nochtin kuali mayetokan?

Akinmej kimatij tlen profecías kijtoua Biblia mochiuaskej, xamo motlajtlaniaj kox itech nonmej altepemej peuas guerra tlen moixmati Armagedón tlen kijtoua libro Apocalipsis.

¿Tlen kijtoua Biblia?

¿Tekiuajkej uelis kichiuaskej ayakmo mayeto guerra ompa Israel uan okseki altepemej tlen ik ompa katej?

Biblia kijtoua: “Amo xikinneltokilikan akinmej tlanauatiaj nion okse tlakatl porque yejuan amo uelis temakixtiskej” (Salmo 146:3).

Amo tikmatij kox tekiuajkej uelis itlaj kichiuaskej para kuali mayetokan itech nonmej altepemej. Pero Biblia kijtoua nion se tekiua uelis kachiuas guerra uan tlapaleuis nochtin kuali mayetokan. San toTajtsin Dios uelis kachiuas “guerras itech nochi tlaltikpak” (Salmo 46:9).

• Tla tikneki okachi tikmatis xiktlajtolti revista Akin Tetlapouijtok “Ayakmo yetos guerras”.

¿Mochijtok se profecía ika guerra tlen panotok itech nonmej altepemej?

Biblia kijtoua: “Nankikakiskej onka guerra itech miakej altepemej. [...] Porque se altepetl mokualanis iuan okse altepetl uan noijki tekiuajkej mokualaniskej” (Mateo 24:6, 7).

Guerra tlen panotok itech nonmej altepemej kiteititiaj “yitlamis tlen axkan onka” noso kijtosneki tikatej “itlamian tonalmej” (Mateo 24:3; 2 Timoteo 3:1). Non kiteititia ayakmo miak poliui uan toTajtsin Dios kachiuas guerras uan nochi tlen techtlajyouiltia.

• Tla tikneki okachi tikmatis xiktlajtolti tlamachtil “¿Tlen kiteititia tikatej “itlamian tonalmej”?”.

¿Peuas Armagedón itech nonmej altepemej?

Biblia kijtoua: “Noijki okinnechikojkej tekiuajkej kanin ika hebreo itoka Armagedón” (Apocalipsis 16:16).

Guerra Armagedón amo ye tlen panotok itech nonmej altepemej. Itech non guerra toTajtsin Dios momakas inuan tekiuajkej tlen katej ipan nochi tlaltikpak.

• Tla tikneki okachi tikmatis xiktlajtolti tlamachtil “¿Tlen kijtosneki Armagedón?”.

¿Tlen techpaleuis amo matimomojtikan?

Biblia kijtoua: “Amitlaj manamechtekipacho. Nochipa xiktlatlaujtikan toTajtsin Dios, xikiluikan manamechyekana uan nochipa xiktlasojkamatilikan” (Filipenses 4:6).

Jehováa kineki matiktlatlaujtikan. Ye kitekipachoua tlen techpanoua ikinon techkaki ijkuak tiktlatlaujtiaj uan techyolseuia (1 Pedro 5:7). Noijki techyekiluia tleka onka guerras, tlen kichiuas para ayakmo ijkon mapano uan tlen kichiuas para kachiuas nochi tlen techtlajyouiltia (Apocalipsis 21:3, 4).

• Xiktlajtolti tlamachtil “¿Puedo encontrar consuelo en la Biblia?” uan xikita ken techpaleuia toTajtsin Dios.