Ayakmo yetos guerras uan ayakmo ikaj mokualanis

TOTAJTSIN DIOS KINMACHIUAS TEKIUAJKEJ

ToTajtsin Dios kijtoua kinmixpolos tekiuajkej itech se guerra tlen Biblia kitokayotia Armagedón (Apocalipsis 16:16).a Non tonal “kinnechikoskej tekiuajkej ijkuak mochiuas guerra itech iueyi tonal toTajtsin Dios tlen kipia nochi chikaualistli” (Apocalipsis 16:14). Ye kinmachiuas nochi guerras itech Armagedón.

ToTajtsin Dios kinpatkayotis tekiuajkej ika iTekiuajkayo. Non Tekiuajkayotl ualtlanauatis iluikak uan amo keman kipojpoloskej (Daniel 2:44). Ye yokipejpenki iKone tlen itoka Jesucristo matlanauati (Isaías 9:​6, 7; Mateo 28:18). Nin Tekiuajkayotlb ye tlen otlamachti Jesús ijkuak okinmilui idiscípulos makitlajtlanikan ijkuak motlatlaujtiaj (Mateo 6:​9, 10). Jesús kiyekanas non Tekiuajkayotl uan san ye tlanauatis.

Tekiuajkej san kichiuaj tlen yejuan kinekij ijkuak tlanauatiaj pero Jesús amo ijkon kichiuas. Ye yolkuali uan amo techikoita. Nin kijtosneki amikaj tlajyouis porque okse tlamantli mota, poui itech okse altepetl noso tlajtoua okse tlajtoli (Isaías 11:​3, 4). Nochtin kuali yetoskej porque Jesús kuali kinnauatis. “Porque ye kimakixtis akin amitlaj kipia uan kitlajtlanilia makipaleui, noijki akin moyolkokoua uan akin amo kipia akin kipaleuis. [...] Kinpaleuis amo makintlajyouiltikan nion itlaj makintoktikan” (Salmo 72:​12-14).

ITekiuajkayo toTajtsin Dios kinpojpolos nochi teposmej tlen ika temiktiaj (Miqueas 4:3). Noijki kinmixpoloskej akinmej san kinekij momakaskej uan amo tlapaleuiaj kuali mayetokan oksekimej (Salmo 37:​9, 10). Tinochtin kuali tiyetoskej uan amitlaj techpanos maski san kanin tiaskej (Ezequiel 34:28).

ITekiuajkayo toTajtsin Dios techpaleuis tinochtin kuali matiyetokan. Ijkuakon ayakmo ikaj kijtos amitlaj kipia, amo kipia tlen kikuas uan amo kipia kanin chantis. Nochipa kipiaskej miak tlakuali uelik uan nochtin kipiaskej kanin kualtsin chantiskej (Salmo 72:16; Isaías 65:​21-23).

ITekiuajkayo toTajtsin Dios kinmachiuas guerras uan ijkuakon ayakmo ikaj tlajyouis. Ayakmo ikaj kikojkoskej uan ayakmo ikaj motekipachos noso momojtis. Noijki kinyolitiskej akinmej yoixpolikej (Isaías 25:8; 26:19; 35:​5, 6). Familias san sekan yetoskej uan ayakmo kilnamikiskej tlen opanouaya itech se guerra (Apocalipsis 21:4).

AYAKMO TIYETOSKEJ TITLAJTLAKOLEJKEJ

Noijki Tekiuajkayotl techpaleuis san Jehovác matikueyichiuakan porque ye “tetlasojtla uan teyolseuia” (2 Corintios 13:11). Nochtin kuali mouikaskej (Isaías 2:​3, 4; 11:9). Ayakmo yetoskej tlajtlakolejkej akinmej kitlakamatiskej toTajtsin Dios (Romanos 8:​20, 21).

TOTAJTSIN DIOS KIPOJPOLOS SATANÁS UAN IEJEKAUAN

ITekiuajkayo toTajtsin Dios kipojpolos Satanás uan iejekauan. Ijkon ayakmo kinyolinis oksekimej makinpeualtikan guerras (Apocalipsis 20:​1-3, 10). Tinochtin kuali tiyetoskej uan timoyolseuiskej porque yejuan ayakmo yetoskej (Salmo 72:7).

Xikneltoka toTajtsin Dios uelis kinpojpolos guerras uan ayakmo ikaj mokualanis. Ye kineki ijkon kichiuas porque kipia chikaualistli.

• Ye uelis kachiuas guerra uan ayakmo ikaj mokualanis. Ijkon kichiuas porque kipia chikaualistli uan kimati ken kichiuas (Job 9:4). Ye nochi ueli kichiua (Job 42:2).

• ToTajtsin Dios amo kipaktia matitlajyouikan (Isaías 63:9). Noijki “ye kikokolia akin kipaktia momakas” (Salmo 11:5).

• ToTajtsin Dios nochipa kichiua tlen kijtoua porque amo tlakajkayaua (Isaías 55:​10, 11; Tito 1:2).